৪. চতুত্থৱগ্গৱণ্ণনা

১৫১. চতুত্থৱগ্গস্স পঠমে ৰসেসূতি অম্বিলমধুৰতিত্তককটুকলোণিকখাৰিককসাৱাদিভেদেসু সাযনীযেসু. গেধং অকৰন্তি গিদ্ধিং অকৰোন্তো, তণ্হং অনুপ্পাদেন্তোতি ৱুত্তং হোতি. অলোলোতি ‘‘ইদং সাযিস্সামি, ইদং সাযিস্সামী’’তি এৱং ৰসৱিসেসেসু অনাকুলো. অনঞ্ঞপোসীতি পোসেতব্বকসদ্ধিৱিহাৰিকাদিৱিৰহিতো, কাযসন্ধাৰণমত্তেন সন্তুট্ঠোতি ৱুত্তং হোতি. যথা ৱা পুব্বে উয্যানে ৰসেসু গেধকৰণলোলো হুত্ৱা অঞ্ঞপোসী আসিং, এৱং অহুত্ৱা যায তণ্হায লোলো হুত্ৱা ৰসেসু গেধং কৰোতি, তং তণ্হং হিত্ৱা আযতিং তণ্হামূলকস্স অঞ্ঞস্স অত্তভাৱস্স অনিব্বত্তনেন অনঞ্ঞপোসীতি দস্সেতি. অথ ৱা অত্থভঞ্জনকট্ঠেন কিলেসা ‘‘অঞ্ঞে’’তি ৱুচ্চন্তি, তেসং অপোসনেন অনঞ্ঞপোসীতি অযমেত্থ অত্থো. সপদানচাৰীতি অৱোক্কম্মচাৰী অনুপুব্বচাৰী, ঘৰপটিপাটিং অছড্ডেত্ৱা অড্ঢকুলঞ্চ দলিদ্দকুলঞ্চ নিৰন্তৰং পিণ্ডায পৱিসমানোতি অত্থো. কুলে কুলে অপ্পটিবদ্ধচিত্তোতি খত্তিযকুলাদীসু যত্থ কত্থচি কিলেসৱসেন অলগ্গচিত্তো, চন্দূপমো নিচ্চনৱকো হুত্ৱাতি অত্থো. সেসং ৱুত্তনযমেৱাতি (সু. নি. অট্ঠ. ১.৬৫; অপ. অট্ঠ. ১.১.১২১).

পঠমং.

১৫২. দুতিযে আৱৰণানীতি নীৱৰণানেৱ, তানি অত্থতো উৰগসুত্তে (সু. নি. ১ আদযো) ৱুত্তানি. তানি পন যস্মা অব্ভাদযো ৱিয চন্দং সূৰিযং ৱা চেতো আৱৰন্তি, তস্মা ‘‘আৱৰণানি চেতসো’’তি ৱুত্তানি. তানি উপচাৰেন ৱা অপ্পনায ৱা পহায. উপক্কিলেসেতি উপগম্ম চিত্তং ৱিবাধেন্তে অকুসলে ধম্মে, ৱত্থোপমাদীসু (ম. নি. ১.৭০ আদযো) ৱুত্তে অভিজ্ঝাদযো ৱা. ব্যপনুজ্জাতি পনুদিত্ৱা ৱিনাসেত্ৱা, ৱিপস্সনামগ্গেন পজহিত্ৱাতি অত্থো. সব্বেতি অনৱসেসে. এৱং সমথৱিপস্সনাসম্পন্নো পঠমমগ্গেন দিট্ঠিনিস্সযস্স পহীনত্তা অনিস্সিতো. সেসমগ্গেহি ছেত্ৱা তেধাতুকগতং সিনেহদোসং, তণ্হাৰাগন্তি ৱুত্তং হোতি. সিনেহো এৱ হি গুণপটিপক্খতো সিনেহদোসোতি ৱুত্তো. সেসং ৱুত্তনযমেৱ (সু. নি. অট্ঠ. ১.৬৬).

দুতিযং.

১৫৩. ততিযে ৱিপিট্ঠিকত্ৱানাতি পিট্ঠিতো কত্ৱা, ছড্ডেত্ৱা জহিত্ৱাতি অত্থো. সুখং দুখঞ্চাতি কাযিকং সাতাসাতং. সোমনস্সদোমনস্সন্তি চেতসিকং সাতাসাতং. উপেক্খন্তি চতুত্থজ্ঝানুপেক্খং. সমথন্তি চতুত্থজ্ঝানসমথমেৱ. ৱিসুদ্ধন্তি পঞ্চনীৱৰণৱিতক্কৱিচাৰপীতিসুখসঙ্খাতেহি নৱহি পচ্চনীকধম্মেহি ৱিমুত্তত্তা অতিসুদ্ধং, নিদ্ধন্তসুৱণ্ণমিৱ ৱিগতূপক্কিলেসন্তি অত্থো.

অযং পন যোজনা – ৱিপিট্ঠিকত্ৱান সুখং দুক্খঞ্চ পুব্বেৱ, পঠমজ্ঝানূপচাৰভূমিযংযেৱ দুক্খং, ততিযজ্ঝানূপচাৰভূমিযঞ্চ সুখন্তি অধিপ্পাযো. পুন আদিতো ৱুত্তং চ-কাৰং পৰতো নেত্ৱা ‘‘সোমনস্সং দোমনস্সঞ্চ ৱিপিট্ঠিকত্ৱান পুব্বেৱা’’তি অধিকাৰো. তেন সোমনস্সং চতুত্থজ্ঝানূপচাৰে, দোমনস্সঞ্চ দুতিযজ্ঝানূপচাৰেযেৱাতি দীপেতি. এতানি হি এতেসং পৰিযাযতো পহানট্ঠানানি. নিপ্পৰিযাযতো পন দুক্খস্স পঠমজ্ঝানং, দোমনস্সস্স দুতিযজ্ঝানং, সুখস্স ততিযজ্ঝানং, সোমনস্সস্স চতুত্থজ্ঝানং পহানট্ঠানং. যথাহ – ‘‘পঠমজ্ঝানং উপসম্পজ্জ ৱিহৰতি এত্থুপ্পন্নং দুক্খিন্দ্ৰিযং অপৰিসেসং নিৰুজ্ঝতী’’তিআদি (সং. নি. ৫.৫১০). তং সব্বং হেট্ঠা ৱুত্তনযেন গহেতব্বং. পৰতো পুব্বেৱাতি তীসু পঠমজ্ঝানদীসু দুক্খদোমনস্সসুখানি ৱিপিট্ঠিকত্ৱা এত্থেৱ চ চতুত্থজ্ঝানে সোমনস্সং ৱিপিট্ঠিকত্ৱা ইমায পটিপদায লদ্ধানুপেক্খং সমথং ৱিসুদ্ধং একো চৰে ইতি. সেসং ৱুত্তনযমেৱাতি (সু. নি. অট্ঠ. ১.৬৭; অপ. অট্ঠ. ১.১.১২৩).

ততিযং.

১৫৪. চতুত্থে আৰদ্ধং ৱীৰিযং অস্সাতি আৰদ্ধৱিৰিযো. এতেন অত্তনো ৱীৰিযাৰম্ভং আদিৱীৰিযং দস্সেতি. পৰমত্থো ৱুচ্চতি নিব্বানং, তত্থ পত্তিযা পৰমত্থপত্তিযা. এতেন ৱীৰিযাৰম্ভেন পত্তব্বফলং দস্সেতি. অলীনচিত্তোতি এতেন ৱীৰিযুপত্থম্ভানং চিত্তচেতসিকানং অলীনতং দস্সেতি. অকুসীতৱুত্তীতি এতেন ঠানাসনচঙ্কমাদীসু কাযস্স অনৱসীদনং. দড়্হনিক্কমোতি এতেন ‘‘কামং তচো চ ন্হাৰু চা’’তি (ম. নি. ১.১৮৪; সং. নি. ২.২২; অ. নি. ২.৫; মহানি. ১৯৬) এৱং পৱত্তং পদহনৱীৰিযং দস্সেতি. যং তং অনুপুব্বসিক্খাদীসু পদহন্তো ‘‘কাযেন চেৱ পৰমত্থসচ্চং সচ্ছিকৰোতি, পঞ্ঞায চ নং অতিৱিজ্ঝ পস্সতী’’তি ৱুচ্চতি. অথ ৱা এতেন মগ্গসম্পযুত্তৱীৰিযং দস্সেতি. তঞ্হি দড়্হঞ্চ ভাৱনাপাৰিপূৰিগতত্তা, নিক্কমো চ সব্বসো পটিপক্খা নিক্খন্তত্তা, তস্মা তংসমঙ্গীপুগ্গলোপি দড়্হো নিক্কমো অস্সাতি ‘‘দড়্হনিক্কমো’’তি ৱুচ্চতি. থামবলূপপন্নোতি মগ্গক্খণে কাযথামেন ঞাণবলেন চ উপপন্নো. অথ ৱা থামভূতেন বলেন উপপন্নোতি থামবলূপপন্নো, থিৰঞাণবলূপপন্নোতি ৱুত্তং হোতি. এতেন তস্স ৱীৰিযস্স ৱিপস্সনাঞাণসম্পযোগং দীপেন্তো যোনিসো পদহনভাৱং সাধেতি. পুব্বভাগমজ্ঝিমউক্কট্ঠৱীৰিযৱসেন ৱা তযোপি পাদা যোজেতব্বা. সেসং ৱুত্তনযমেৱাতি (সু. নি. অট্ঠ. ১.৬৮).

চতুত্থং.

১৫৫. পঞ্চমে পটিসল্লানন্তি তেহি তেহি সত্তসঙ্খাৰেহি পটিনিৱত্তিত্ৱা সল্লীনং, একত্তসেৱিতা একীভাৱো কাযৱিৱেকোতি অত্থো. ঝানন্তি পচ্চনীকঝাপনতো আৰম্মণলক্খণূপনিজ্ঝানতো চ চিত্তৱিৱেকো ৱুচ্চতি. তত্থ অট্ঠ সমাপত্তিযো নীৱৰণাদিপচ্চনীকঝাপনতো কসিণাদিআৰম্মণূপনিজ্ঝানতো চ ‘‘ঝান’’ন্তি ৱুচ্চতি. ৱিপস্সনামগ্গফলানি সত্তসঞ্ঞাদিপচ্চনীকঝাপনতো লক্খণূপনিজ্ঝানতো চ ‘‘ঝান’’ন্তি ৱুচ্চতি. ইধ পন আৰম্মণূপনিজ্ঝানমেৱ অধিপ্পেতং. এৱমেতং পটিসল্লানঞ্চ ঝানঞ্চ অৰিঞ্চমানোতি অজহমানো অনিস্সজ্জমানো. ধম্মেসূতি ৱিপস্সনুপগেসু পঞ্চক্খন্ধাদিধম্মেসু. নিচ্চন্তি সততং সমিতং অব্বোকিণ্ণং. অনুধম্মচাৰীতি তে ধম্মে আৰব্ভ পৱত্তমানেন অনুগতং ৱিপস্সনাধম্মং চৰমানো. অথ ৱা ধম্মেসূতি এত্থ ধম্মাতি নৱ লোকুত্তৰধম্মা, তেসং ধম্মানং অনুলোমো ধম্মোতি অনুধম্মো, ৱিপস্সনাযেতং অধিৱচনং. তত্থ ‘‘ধম্মানং নিচ্চং অনুধম্মচাৰী’’তি ৱত্তব্বে গাথাবন্ধসুখত্থং ৱিভত্তিব্যত্তযেন ‘‘ধম্মেসূ’’তি ৱুত্তং সিযা. আদীনৱং সম্মসিতা ভৱেসূতি তায অনুধম্মচাৰিতাসঙ্খাতায ৱিপস্সনায অনিচ্চাকাৰাদিদোসং তীসু ভৱেসু সমনুপস্সন্তো এৱং ইমায কাযৱিৱেকচিত্তৱিৱেকং অৰিঞ্চমানো সিখাপ্পত্তৱিপস্সনাসঙ্খাতায পটিপদায অধিগতোতি ৱত্তব্বো একো চৰেতি এৱং যোজনা ৱেদিতব্বা (সু. নি. অট্ঠ. ১.৬৯; অপ. অট্ঠ. ১.১.১২৫).

পঞ্চমং.

১৫৬. ছট্ঠে তণ্হক্খযন্তি নিব্বানং, এৱং দিট্ঠাদীনৱায তণ্হায এৱ অপ্পৱত্তিং. অপ্পমত্তোতি সাতচ্চকাৰী. অনেড়মূগোতি অলালামুখো. অথ ৱা অনেড়ো চ অমূগো চ, পণ্ডিতো ব্যত্তোতি ৱুত্তং হোতি. হিতসুখসম্পাপকং সুতমস্স অত্থীতি সুতৱা, আগমসম্পন্নোতি ৱুত্তং হোতি. সতীমাতি চিৰকতাদীনং অনুস্সৰিতা. সঙ্খাতধম্মোতি ধম্মূপপৰিক্খায পৰিঞ্ঞাতধম্মো. নিযতোতি অৰিযমগ্গেন নিযামং পত্তো. পধানৱাতি সম্মপ্পধানৱীৰিযসম্পন্নো. উপ্পটিপাটিযা এস পাঠো যোজেতব্বো. এৱমেতেহি অপ্পমাদাদীহি সমন্নাগতো নিযামসম্পাপকেন পধানেন পধানৱা, তেন পধানেন পত্তনিযামত্তা নিযতো, ততো অৰহত্তপ্পত্তিযা সঙ্খাতধম্মো. অৰহা হি পুন সঙ্খাতব্বাভাৱতো ‘‘সঙ্খাতধম্মো’’তি ৱুচ্চতি. যথাহ – ‘‘যে চ সঙ্খাতধম্মাসে, যে চ সেক্খা পুথূ ইধা’’তি (সং. নি. ২.৩১; সু. নি. ১০৪৪; চূড়নি. অজিতমাণৱপুচ্ছা ৬৩, অজিতমাণৱপুচ্ছানিদ্দেস ৭; নেত্তি. ১৪; পেটকো. ৪৫). সেসং ৱুত্তনযমেৱাতি (সু. নি. অট্ঠ. ১.৭০).

ছট্ঠং.

১৫৭. সত্তমে সীহোতি চত্তাৰো সীহা – তিণসীহো, পণ্ডুসীহো, কাড়সীহো, কেসৰসীহোতি. তেসং কেসৰসীহো অগ্গমক্খাযতি, এসো ইধ অধিপ্পেতো. ৱাতো পুৰত্থিমাদিৱসেন অনেকৱিধো. পদুমং ৰত্তসেতাদিৱসেন. তেসু যো কোচি ৱাতো যং কিঞ্চি পদুমং ৱট্টতিযেৱ. তত্থ যস্মা সন্তাসো অত্তসিনেহেন হোতি, অত্তসিনেহো চ তণ্হালেপো, সোপি দিট্ঠিসম্পযুত্তেন ৱা দিট্ঠিৱিপ্পযুত্তেন ৱা লোভেন হোতি, সোপি চ তণ্হাযেৱ. সজ্জনং পন তত্থ উপপৰিক্খাৱিৰহিতস্স মোহেন হোতি, মোহো চ অৱিজ্জা. তত্থ সমথেন তণ্হায পহানং হোতি, ৱিপস্সনায অৱিজ্জায. তস্মা সমথেন অত্তসিনেহং পহায সীহো ৱিয সদ্দেসু অনিচ্চদুক্খাদীসুঅসন্তসন্তো, ৱিপস্সনায মোহং পহায ৱাতোৱ জালম্হি খন্ধাযতনাদীসু অসজ্জমানো, সমথেনেৱ লোভং, লোভসম্পযুত্তং এৱ দিট্ঠিঞ্চ পহায, পদুমংৱ তোযেন সব্বভৱভোগলোভেন অলিপ্পমানো.

এত্থ চ সমথস্স সীলং পদট্ঠানং, সমথো সমাধি, ৱিপস্সনা পঞ্ঞাতি এৱং তেসু দ্ৱীসু ধম্মেসু সিদ্ধেসু তযোপি খন্ধা সিদ্ধা হোন্তি. তত্থ সীলক্খন্ধেন সুৰতো হোতি, সো সীহোৱ সদ্ধেসু আঘাতৱত্থূসু অকুজ্ঝিতুকামতায ন সন্তসতি, পঞ্ঞাক্খন্ধেন পটিৱিদ্ধসভাৱো ৱাতোৱ জালম্হি খন্ধাদিধম্মভেদে ন সজ্জতি, সমাধিক্খন্ধেন ৱীতৰাগো পদুমংৱ তোযেন ৰাগেন ন লিপ্পতি. এৱং সমথৱিপস্সনাহি সীলসমাধিপঞ্ঞাক্খন্ধেহি চ যথাসম্ভৱং অৱিজ্জাতণ্হানং, তিণ্ণঞ্চ অকুসলমূলানং পহানৱসেন অসন্তসন্তো অসজ্জমানো অলিপ্পমানো চ ৱেদিতব্বো. সেসং ৱুত্তনযমেৱাতি (সু. নি. অট্ঠ. ১.৭১; অপ. অট্ঠ. ১.১.১২৭).

সত্তমং.

১৫৮. অট্ঠমে সহনা চ হননা চ সীঘজৱত্তা চ সীহো. কেসৰসীহোৱ ইধ অধিপ্পেতো. দাঠা বলমস্স অত্থীতি দাঠবলী. পসয্হ অভিভুয্যাতি উভযং চাৰীসদ্দেন সহ যোজেতব্বং পসয্হচাৰী অভিভুয্যচাৰীতি. তত্থ পসয্হ নিগ্গয্হ পৱাহেত্ৱা চৰণেন পসয্হচাৰী. অভিভৱিত্ৱা সন্তাসেত্ৱা ৱসীকত্ৱা চৰণেন অভিভুয্হচাৰী. স্ৱাযং কাযবলেন পসয্হচাৰী, তেজসা অভিভুয্যচাৰী. তত্থ সচে কোচি ৱদেয্য ‘‘কিং পসয্হ অভিভুয্যচাৰী’’তি. ততো মিগানন্তি সামিৱচনং উপযোগত্থে কত্ৱা ‘‘মিগে পসয্হ অভিভুয্যচাৰী’’তি পটিৱত্তব্বং. পন্তানীতি দূৰানি. সেনাসনানীতি ৱসনট্ঠানানি. সেসং পুব্বে ৱুত্তনযেনেৱ সক্কা জানিতুন্তি ন ৱিত্থাৰিতং (সু. নি. অট্ঠ. ১.৭২).

অট্ঠমং.

১৫৯. নৱমে ‘‘সব্বে সত্তা সুখিতা ভৱন্তূ’’তিআদিনা নযেন হিতসুখূপনযনকামতা মেত্তা. ‘‘অহো ৱত ইমম্হা দুক্খা ৱিমুচ্চেয্যু’’ন্তিআদিনা নযেন অহিতদুক্খাপনযনকামতা কৰুণা. ‘‘মোদন্তি ৱত ভোন্তো সত্তা, মোদন্তি সাধু সুট্ঠূ’’তিআদিনা নযেন হিতসুখাৱিপ্পযোগকামতা মুদিতা. ‘‘পঞ্ঞাযিস্সন্তি সকেন কম্মেনা’’তি সুখদুক্খেসু অজ্ঝুপেক্খনতা উপেক্খা. গাথাবন্ধসুখত্থং পন উপ্পটিপাটিযা মেত্তং ৱত্ৱা উপেক্খা ৱুত্তা, মুদিতা চ পচ্ছা. ৱিমুত্তিন্তি চতস্সোপি হি ৱিমুত্তী. এতা অত্তনো পচ্চনীকধম্মেহি ৱিমুত্তত্তা ৱিমুত্তিযো. তেন ৱুত্তং – ‘‘মেত্তং উপেক্খং কৰুণং ৱিমুত্তিং, আসেৱমানো মুদিতঞ্চ কালে’’তি.

তত্থ আসেৱমানোতি তিস্সো তিকচতুক্কজ্ঝানৱসেন ভাৱযমানো, উপেক্খং চতুত্থজ্ঝানৱসেন ভাৱযমানো. কালেতি মেত্তং আসেৱিত্ৱা ততো ৱুট্ঠায কৰুণং, ততো ৱুট্ঠায মুদিতং, ততো ইতৰতো ৱা নিপ্পীতিকজ্ঝানতো ৱুট্ঠায উপেক্খং আসেৱমানোৱ ‘‘কালে আসেৱমানো’’তি ৱুচ্চতি, আসেৱিতুং ফাসুকালে ৱা. সব্বেন লোকেন অৱিৰুজ্ঝমানোতি দসসু দিসাসু সব্বেন সত্তলোকেন অৱিৰুজ্ঝমানো. মেত্তাদীনঞ্হি ভাৱিতত্তা সত্তা অপ্পটিক্কূলা হোন্তি, সত্তেসুপি ৱিৰোধভূতো পটিঘো ৱূপসম্মতি. তেন ৱুত্তং – ‘‘সব্বেন লোকেন অৱিৰুজ্ঝমানো’’তি. সেসং ৱুত্তসদিসমেৱাতি (সু. নি. অট্ঠ. ১.৭৩).

নৱমং.

১৬০. দসমে সংযোজনানীতি দস সংযোজনানি, তানি চ তেন তেন মগ্গেন সন্দালযিত্ৱান. অসন্তসং জীৱিতসঙ্খযম্হীতি জীৱিতসঙ্খযো ৱুচ্চতি চুতিচিত্তস্স পৰিভেদো, তস্মিঞ্চ জীৱিতসঙ্খযে জীৱিতনিকন্তিযা পহীনত্তা অসন্তসন্তি. এত্তাৱতা সউপাদিসেসনিব্বানধাতুং অত্তনো দস্সেত্ৱা গাথাপৰিযোসানে অনুপাদিসেসায নিব্বানধাতুযা পৰিনিব্বাযীতি (সু. নি. অট্ঠ. ১.৭৪).

দসমং.

১৬১. একাদসমে ভজন্তীতি সৰীৰেন অল্লীযিত্ৱা পযিৰুপাসন্তি. সেৱন্তীতি অঞ্জলিকম্মাদীহি কিংকাৰপটিস্সাৱিতায চ পৰিচৰন্তি. কাৰণং অত্থো এতেসন্তি কাৰণত্থা, ভজনায সেৱনায চ নাঞ্ঞং কাৰণমত্থি, অত্থো এৱ তেসং কাৰণং, অত্থহেতু সেৱন্তীতি ৱুত্তং হোতি. নিক্কাৰণা দুল্লভা অজ্জ মিত্তাতি ‘‘ইতো কিঞ্চি লচ্ছামা’’তি এৱং অত্তপটিলাভকাৰণেন নিক্কাৰণা, কেৱলং –

‘‘উপকাৰো চ যো মিত্তো, সুখে দুক্খে চ যো সখা;

অত্থক্খাযী চ যো মিত্তো, যো চ মিত্তানুকম্পকো’’তি. (সু. নি. অট্ঠ. ১.৭৫; অপ. অট্ঠ. ১.১.১৩১; দী. নি. ৩.২৬৫) –

এৱং ৱুত্তেন অৰিযেন মিত্তভাৱেন সমন্নাগতা দুল্লভা অজ্জ মিত্তা. অত্তনি ঠিতা এতেসং পঞ্ঞা, অত্তানংযেৱ ওলোকেন্তি, ন অঞ্ঞন্তি অত্তট্ঠপঞ্ঞা. ‘‘দিট্ঠত্থপঞ্ঞা’’তি অযম্পি কিৰ পোৰাণপাঠো. সম্পতি দিট্ঠেযেৱ অত্থে এতেসং পঞ্ঞা, আযতিং ন পেক্খন্তীতি ৱুত্তং হোতি. অসুচীতি অসুচিনা অনৰিযেন কাযৱচীমনোকম্মেন সমন্নাগতাতি. সেসং পুব্বে ৱুত্তনযেনেৱ ৱেদিতব্বং. যং অন্তৰন্তৰা অতিৱিত্থাৰভযেন ন ৱুত্তং, তং সব্বং পাঠানুসাৰেনেৱ ৱেদিতব্বং (সু. নি. অট্ঠ. ১.৭৫; অপ. অট্ঠ. ১.১.১৩১). একাদসমং.

চতুত্থৱগ্গৱণ্ণনা নিট্ঠিতা.

সদ্ধম্মপ্পজ্জোতিকায চূড়নিদ্দেস-অট্ঠকথায

খগ্গৱিসাণসুত্তনিদ্দেসৱণ্ণনা নিট্ঠিতা.

নিগমনকথা

যো সো সুগতপুত্তানং, অধিপতিভূতেন হিতৰতিনা;

থেৰেন থিৰগুণৱতা, সুৱিভত্তো মহানিদ্দেসো.

তস্সত্থৱণ্ণনা যা, পুব্বট্ঠকথানযং তথা;

যুত্তিং নিস্সায মযাৰদ্ধা, নিট্ঠানমুপগতা এসা.

যং পুৰং পুৰুত্তমং, অনুৰাধপুৰৱ্হযং;

যো তস্স দক্খিণে ভাগে, মহাৱিহাৰো পতিট্ঠিতো.

যো তস্স তিলকো ভূতো, মহাথূপো সিলুচ্চযো;

যং তস্স পচ্ছিমে ভাগে, লেখো কথিকসঞ্ঞিতো.

কিত্তিসেনোতি নামেন, সজীৱো ৰাজসম্মতো;

সুচিচাৰিত্তসম্পন্নো, লেখো কুসলকম্মিকো.

সীতচ্ছাযতৰুপেতং, সলিলাসযসম্পদং;

চাৰুপাকাৰসঞ্চিতং, পৰিৱেণমকাৰযি.

উপসেনো মহাথেৰো, মহাপৰিৱেণৱাসিযো;

তস্সাদাসি পৰিৱেণং, লেখো কুসলকম্মিকো.

ৱসন্তেনেত্থ থেৰেন, থিৰসীলেন তাদিনা;

উপসেনৱ্হযেন সা, কতা সদ্ধম্মজোতিকা.

ৰঞ্ঞো সিৰিনিৱাসস্স, সিৰিসঙ্ঘস্স বোধিনো;

ছব্বীসতিম্হি ৱস্সম্হি, নিট্ঠিতা নিদ্দেসৱণ্ণনা.

সমযং অনুলোমেন্তী, থেৰানং থেৰৱংসদীপানং;

নিট্ঠং গতা যথাযং, অট্ঠকথা লোকহিতজননী.

সদ্ধম্মং অনুলোমেন্তা, অত্তহিতং পৰহিতঞ্চ সাধেন্তা;

নিট্ঠং গচ্ছন্তু তথা, মনোৰথা সব্বসত্তানং.

সদ্ধম্মপ্পজ্জোতিকায, অট্ঠকথাযেত্থ গণিতকুসলেহি;

গণিতা তু ভাণৱাৰা, ঞেয্যাতিৰেকচত্তাৰিসা.

আনুট্ঠুভেন অস্সা, ছন্দো বদ্ধেন গণিযমানা তু;

অতিৰেকদসসহস্স-সঙ্খা গাথাতি ৱিঞ্ঞেয্যা.

সাসনচিৰট্ঠিতত্থং, লোকহিতত্থঞ্চ সাদৰেন মযা;

পুঞ্ঞং ইমং ৰচযতা, যং পত্তমনপ্পকং ৱিপুলং.

পুঞ্ঞেন তেন লোকো, সদ্ধম্মৰসাযনং দসবলস্স;

উপভুঞ্জিত্ৱা ৱিমলং, পপ্পোতু সুখং সুখেনেৱাতি.

সদ্ধম্মপ্পজ্জোতিকা নাম

চূড়নিদ্দেস-অট্ঠকথা নিট্ঠিতা.