১০. মাৰধেয্যসুত্তৱণ্ণনা

৫৯. দসমস্স কা উপ্পত্তি? একদিৱসং কিৰ সত্থা সেক্খবহুলায পৰিসায পৰিৱুতো নিসিন্নো তেসং অজ্ঝাসযং ওলোকেত্ৱা উপৰি ৱিসেসাধিগমায উস্সাহং জনেতুং অসেক্খভূমিং থোমেন্তো ইদং সুত্তং অভাসি. তত্থ অতিক্কম্মাতিআদীসু অযং সঙ্খেপত্থো – অতিক্কম্ম অতিক্কমিত্ৱা অভিভৱিত্ৱা. মাৰধেয্যং মাৰস্স ৱিসযং ইস্সৰিযট্ঠানং. আদিচ্চোৱ যথা আদিচ্চো অব্ভাদিউপক্কিলেসৱিমুত্তো অত্তনো ইদ্ধিযা আনুভাৱেন তেজসাতি তীহি গুণেহি সমন্নাগতো নভং অব্ভুস্সক্কমানো সব্বং আকাসগতং তমং অতিক্কম্ম অতিক্কমিত্ৱা অভিভৱিত্ৱা ৱিধমিত্ৱা ৱিৰোচতি, ওভাসতি, তপতি; এৱমেৱ খীণাসৱো ভিক্খু তীহি ধম্মেহি সমন্নাগতো সব্বুপক্কিলেসৱিমুত্তো মাৰধেয্যসঙ্খাতং তেভূমকধম্মপ্পৱত্তং অভিভৱিত্ৱা ৱিৰোচতীতি.

অসেক্খেনাতি এত্থ সিক্খাসু জাতাতি সেক্খা, সত্তন্নং সেক্খানং এতেতি ৱা সেক্খা, অপৰিযোসিতসিক্খত্তা সযমেৱ সিক্খন্তীতি ৱা সেক্খা মগ্গধম্মা হেট্ঠিমফলত্তযধম্মা চ. অগ্গফলধম্মা পন উপৰি সিক্খিতব্বাভাৱেন ন সেক্খাতি অসেক্খা. যত্থ হি সেক্খভাৱাসঙ্কা অত্থি, তত্থাযং পটিসেধোতি লোকিযধম্মেসু নিব্বানে চ অসেক্খভাৱানাপত্তি দট্ঠব্বা. সীলসমাধিপঞ্ঞাসঙ্খাতা হি সিক্খা অত্তনো পটিপক্খকিলেসেহি ৱিপ্পযুত্তা পৰিসুদ্ধা উপক্কিলেসানং আৰম্মণভাৱম্পি অনুপগমনতো সাতিসযং সিক্খাতি ৱত্তুং যুত্তা, অট্ঠসুপি মগ্গফলেসু ৱিজ্জন্তি; তস্মা চতুমগ্গহেট্ঠিমফলত্তযধম্মা ৱিয অৰহত্তফলধম্মাপি ‘‘তাসু সিক্খাসু জাতা’’তি চ, তংসিক্খাসমঙ্গিনো অৰহতো ইতৰেসং ৱিয সেক্খত্তে সতি ‘‘সেক্খস্স এতে’’তি চ ‘‘সিক্খা সীলং এতেস’’ন্তি চ সেক্খাতি আসঙ্কা সিযুন্তি তদাসঙ্কানিৱত্তনত্থং অসেক্খাতি যথাৱুত্তসেক্খভাৱপ্পটিসেধং কত্ৱা ৱুত্তং. অৰহত্তফলে পৱত্তমানা হি সিক্খা পৰিনিট্ঠিতকিচ্চত্তা ন সিক্খাকিচ্চং কৰোন্তি, কেৱলং সিক্খাফলভাৱেন পৱত্তন্তি. তস্মা তা ন সিক্খাৱচনং অৰহন্তি, নাপি তংসমঙ্গিনো সেক্খৱচনং, ন চ তংসম্পযুত্তধম্মা সিক্খনসীলা. ‘‘সিক্খাসু জাতা’’তি এৱমাদিঅত্থেহি অগ্গফলধম্মা সেক্খা ন হোন্তি. হেট্ঠিমফলেসু পন সিক্খা সকদাগামিমগ্গৱিপস্সনাদীনং উপনিস্সযভাৱতো সিক্খাকিচ্চং কৰোন্তীতি সিক্খাৱচনং অৰহন্তি, তংসমঙ্গিনো চ সেক্খৱচনং, তংসম্পযুত্তা ধম্মা চ সিক্খনসীলা. সেক্খধম্মা যথাৱুত্তেহি অত্থেহি সেক্খা হোন্তিযেৱ.

অথ ৱা সেক্খাতি অপৰিযোসিতসিক্খানং ৱচনন্তি, অসেক্খাতি পদং পৰিযোসিতসিক্খানং দস্সনন্তি ন লোকিযধম্মনিব্বানানং অসেক্খভাৱাপত্তি. ৱুড্ঢিপ্পত্তা সেক্খা অসেক্খা চ সেক্খধম্মেসু এৱ কেসঞ্চি ৱুড্ঢিপ্পত্তানং অসেক্খতা আপজ্জতীতি অৰহত্তমগ্গধম্মা ৱুড্ঢিপ্পত্তা. যথাৱুত্তেহি চ অত্থেহি সেক্খাতি কত্ৱা অসেক্খা আপন্নাতি চে? তং ন, সদিসেসু তব্বোহাৰতো. অৰহত্তমগ্গতো হি নিন্নানাকৰণং অৰহত্তফলং ঠপেত্ৱা পৰিঞ্ঞাদিকিচ্চকৰণং ৱিপাকভাৱঞ্চ, তস্মা তে এৱ সেক্খা ধম্মা অৰহত্তফলভাৱং আপন্নাতি সক্কা ৱত্তুং. কুসলসুখতো চ ৱিপাকসুখং সন্ততৰতায পণীততৰন্তি ৱুড্ঢিপ্পত্তাৱ তে ধম্মা হোন্তীতি ‘‘অসেক্খা’’তি ৱুচ্চন্তি.

তে পন অসেক্খধম্মে খন্ধৱসেন ইধ তিধা ৱিভজিত্ৱা তেহি সমন্নাগমেন খীণাসৱস্স আনুভাৱং ৱিভাৱেন্তো ভগৱা ‘‘অসেক্খেন সীলক্খন্ধেনা’’তিআদিমাহ. তত্থ সীলসদ্দস্স অত্থো হেট্ঠা ৱুত্তো. খন্ধসদ্দো পন ৰাসিম্হি পঞ্ঞত্তিযং ৰুড়্হিযং গুণেতি বহূসু অত্থেসু দিট্ঠপ্পযোগো. তথা হি ‘‘অসঙ্খেয্যো অপ্পমেয্যো মহাউদকক্খন্ধোত্ৱেৱ সঙ্খ্যং গচ্ছতী’’তিআদীসু (অ. নি. ৪.৫১; ৬.৩৭) ৰাসিম্হি আগতো. ‘‘অদ্দসা খো ভগৱা মহন্তং দাৰুক্খন্ধং গঙ্গায নদিযা সোতেন ৱুয্হমান’’ন্তিআদীসু (সং. নি. ৪.২৪১) পঞ্ঞত্তিযং. ‘‘চিত্তং মনো মানসং হদযং পণ্ডৰং মনো মনাযতনং ৱিঞ্ঞাণং ৱিঞ্ঞাণক্খন্ধো’’তিআদীসু (ধ. স. ৬৩, ৬৫) ৰুড়্হিযং. ‘‘ন খো, আৱুসো ৱিসাখ, অৰিযেন অট্ঠঙ্গিকেন মগ্গেন তযো খন্ধা সঙ্গহিতা, তীহি চ খো, আৱুসো ৱিসাখ, খন্ধেহি অৰিযো অট্ঠঙ্গিকো মগ্গো সঙ্গহিতো’’তিআদীসু (ম. নি. ১.৪৬২) গুণে. ইধাপি গুণেযেৱ দট্ঠব্বো. তস্মা অসেক্খেন সীলসঙ্খাতেন গুণেনাতি অত্থো. সমন্নাগতোতি সম্পযুত্তো সমঙ্গীভূতো. সমাদহতি এতেন, সযং ৱা সমাদহতি, সমাধানমেৱ ৱাতি সমাধি. পকাৰেহি জানাতি যথাসভাৱং পটিৱিজ্ঝতীতি পঞ্ঞা. সীলমেৱ খন্ধো সীলক্খন্ধো. সেসেসুপি এসেৱ নযো.

তত্থ অগ্গফলভূতা সম্মাৱাচা, সম্মাকম্মন্তো, সম্মাআজীৱো চ সভাৱেনেৱ অসেক্খো সীলক্খন্ধো নাম, তথা সম্মাসমাধি অসেক্খো সমাধিক্খন্ধো. তদুপকাৰকতো পন সম্মাৱাযামসম্মাসতিযো সমাধিক্খন্ধে সঙ্গহং গচ্ছন্তি. তথা সম্মাদিট্ঠি অসেক্খো পঞ্ঞাক্খন্ধো. তদুপকাৰকতো সম্মাসঙ্কপ্পো পঞ্ঞাক্খন্ধে সঙ্গহং গচ্ছতীতি এৱমেত্থ অট্ঠপি অৰহত্তফলধম্মা তীহি খন্ধেহি সঙ্গহেত্ৱা দস্সিতাতি ৱেদিতব্বং.

যস্স এতে সুভাৱিতাতি যেন অৰহতা এতে সীলাদযো অসেক্খধম্মক্খন্ধা সুভাৱিতা সুট্ঠু ৱড্ঢিতা, সো আদিচ্চোৱ ৱিৰোচতীতি সম্বন্ধো. ‘‘যস্স চেতে’’তিপি পঠন্তি. তেসঞ্চ সদ্দো নিপাতমত্তং. এৱমেতস্মিং ৱগ্গে পঠমসুত্তে ৱট্টং, পৰিযোসানসুত্তে ৱিৱট্টং, ইতৰেসু ৱট্টৱিৱট্টং কথিতং.

দসমসুত্তৱণ্ণনা নিট্ঠিতা.

পঠমৱগ্গৱণ্ণনা নিট্ঠিতা.