৯. সিক্খানিসংসসুত্তৱণ্ণনা

৪৬. নৱমে সিক্খানিসংসাতি এত্থ সিক্খিতব্বাতি সিক্খা, সা তিৱিধা অধিসীলসিক্খা, অধিচিত্তসিক্খা, অধিপঞ্ঞাসিক্খাতি. তিৱিধাপি চেসা সিক্খা আনিসংসা এতেসং, ন লাভসক্কাৰসিলোকাতি সিক্খানিসংসা. ৱিহৰথাতি সিক্খানিসংসা হুত্ৱা ৱিহৰথ, তীসু সিক্খাসু আনিসংসদস্সাৱিনো হুত্ৱা তাহি সিক্খাহি লদ্ধব্বং আনিসংসমেৱ সম্পস্সন্তা ৱিহৰথাতি অত্থো. পঞ্ঞুত্তৰাতি তাসু সিক্খাসু যা অধিপঞ্ঞাসিক্খাসঙ্খাতা পঞ্ঞা, সা উত্তৰা পধানা ৱিসিট্ঠা এতেসন্তি পঞ্ঞুত্তৰা. যে হি সিক্খানিসংসা ৱিহৰন্তি, তে পঞ্ঞুত্তৰা ভৱন্তীতি. ৱিমুত্তিসাৰাতি অৰহত্তফলসঙ্খাতা ৱিমুত্তি সাৰং এতেসন্তি ৱিমুত্তিসাৰা, যথাৱুত্তং ৱিমুত্তিংযেৱ সাৰতো গহেত্ৱা ঠিতাতি অত্থো. যে হি সিক্খানিসংসা পঞ্ঞুত্তৰা চ, ন তে ভৱৱিসেসং পত্থেন্তি, অপিচ খো ৱিভৱং আকঙ্খন্তা ৱিমুত্তিংযেৱ সাৰতো পচ্চেন্তি. সতাধিপতেয্যাতি জেট্ঠককৰণট্ঠেন সতি অধিপতেয্যং এতেসন্তি সতাধিপতেয্যা অধিপতি এৱ অধিপতেয্যন্তি কত্ৱা, চতূসু সতিপট্ঠানেসু সুপ্পতিট্ঠিতচিত্তা কাযানুপস্সনাদিমুখেন সমথৱিপস্সনাভাৱনানুযুত্তাতি অত্থো.

অথ ৱা সিক্খানিসংসাতি ভিক্খৱে, এৱৰূপে দুল্লভক্খণপটিলাভে তিৱিধসিক্খাসিক্খনমেৱ আনিসংসং কত্ৱা ৱিহৰথ, এৱং ৱিহৰন্তা চ পঞ্ঞুত্তৰা পঞ্ঞায উত্তৰা লোকুত্তৰপঞ্ঞায সমন্নাগতা হুত্ৱা ৱিহৰথ, এৱংভূতা চ ৱিমুত্তিসাৰা নিব্বানসাৰা অনঞ্ঞসাৰা ৱিহৰথ. তথাভাৱস্স চাযং উপাযো, যং সতাধিপতেয্যা ৱিহৰথ, সতিপট্ঠানভাৱনায যুত্তপ্পযুত্তা হোথ, সব্বত্থ ৱা সতাৰক্খেন চেতসা ৱিহৰথাতি এৱমেত্থ অত্থো ৱেদিতব্বো. ইতি ভগৱা তীসু সিক্খাসু ভিক্খূ নিযোজেন্তো যথা তা সিক্খিতব্বা, যেন চ পাৰিপূৰিং গচ্ছন্তি, তং সঙ্খেপেনেৱ দস্সেত্ৱা ইদানি যথানুসিট্ঠং পটিপজ্জমানানং ফলৱিসেসদস্সনেন তস্সা পটিপত্তিযা অমোঘভাৱং পকাসেন্তো ‘‘সিক্খানিসংসান’’ন্তিআদিমাহ. তং ৱুত্তত্থমেৱ.

গাথাসু পৰিপুণ্ণসিক্খন্তি অগ্গফলপ্পত্তিযা পৰিসুদ্ধসিক্খং, অসেক্খন্তি অত্থো. অপহানধম্মন্তি এত্থ পহানধম্মা ৱুচ্চন্তি কুপ্পা ৱিমুত্তিযো. পহানধম্মোতি হি হানধম্মো কুপ্পধম্মো. ন পহানধম্মোতি অপহানধম্মো, অকুপ্পধম্মো. ‘‘অপ্পহানধম্মো’’তিপি পাড়ি, সো এৱ অত্থো. খযো এৱ অন্তোতি খযন্তো, জাতিযা খযন্তো জাতিখযন্তো, নিব্বানং. খযো ৱা মৰণং, জাতিখযন্তো নিব্বানমেৱ, তস্স দিট্ঠত্তা জাতিখযন্তদস্সী.

তস্মাতি যস্মা সিক্খাপাৰিপূৰিযা অযং জৰাপাৰঙ্গমনপৰিযোসানো আনিসংসো, তস্মা. সদাতি সব্বকালং. ঝানৰতাতি লক্খণূপনিজ্ঝানে, আৰম্মণূপনিজ্ঝানেতি দুৱিধেপি ঝানে ৰতা, ততো এৱ সমাহিতা. মাৰং সসেনং অভিভুয্যাতি কিলেসসেনায অনট্ঠসেনায চ সসেনং অনৱসিট্ঠং চতুব্বিধম্পি মাৰং অভিভৱিত্ৱা. দেৱপুত্তমাৰস্সপি হি গুণমাৰণে সহাযভাৱূপগমনতো কিলেসা ‘‘সেনা’’তি ৱুচ্চন্তি. তথা ৰোগাদযো অনট্ঠা মচ্চুমাৰস্স. যথাহ –

‘‘কামা তে পঠমা সেনা, দুতিযা অৰতি ৱুচ্চতি;

ততিযা খুপ্পিপাসা তে, চতুত্থী তণ্হা পৱুচ্চতি.

‘‘পঞ্চমী থিনমিদ্ধং তে, ছট্ঠা ভীৰূ পৱুচ্চতি;

সত্তমী ৱিচিকিচ্ছা তে, মক্খো থম্ভো চ অট্ঠমো.

‘‘লাভো সিলোকো সক্কাৰো, মিচ্ছালদ্ধো চ যো যসো;

যো চত্তানং সমুক্কংসে, পৰে চ অৱজানতি.

‘‘এসা নমুচি তে সেনা, কণ্হস্সাভিপ্পহাৰিনী;

ন নং অসূৰো জিনাতি, জেত্ৱা চ লভতে সুখ’’ন্তি. (সু. নি. ৪৩৮-৪৪১; মহানি. ২৮);

যথা চাহ –

‘‘অজ্জেৱ কিচ্চমাতপ্পং, কো জঞ্ঞা মৰণং সুৱে;

ন হি নো সঙ্গৰং তেন, মহাসেনেন মচ্চুনা’’তি. (ম. নি. ৩.২৮০; জা. ২.২২.১২১);

ভৱথ জাতিমৰণস্স পাৰগাতি জাতিযা মৰণস্স চ পাৰগামিনো নিব্বানগামিনো ভৱথাতি.

নৱমসুত্তৱণ্ণনা নিট্ঠিতা.