৩. ৱিজ্জাসুত্তৱণ্ণনা

৪০. ততিযে পুব্বঙ্গমাতি সহজাতৱসেন, উপনিস্সযৱসেন চাতি দ্ৱীহি আকাৰেহি পুব্বঙ্গমা পুৰস্সৰা পধানকাৰণং. ন হি অৱিজ্জায ৱিনা অকুসলুপ্পত্তি অত্থি. সমাপত্তিযাতি সমাপজ্জনায সভাৱপটিলাভায, পৱত্তিযাতি অত্থো. তত্থ অকুসলপ্পৱত্তিযা আদীনৱপ্পটিচ্ছাদনেন অযোনিসোমনসিকাৰস্স পচ্চযভাৱেন অপ্পহীনভাৱেন চ অকুসলধম্মানং উপনিস্সযভাৱো দিস্সতি.

এৱং ব্যাধিমৰণাদিদুক্খস্স অধিট্ঠানভাৱতো সব্বাপি গতিযো ইধ দুগ্গতিযো. অথ ৱা ৰাগাদিকিলেসেহি দূসিতা গতিযো কাযৱচীচিত্তানং পৱত্তিযোতি দুগ্গতিযো, কাযৱচীমনোদুচ্চৰিতানি. অস্মিং লোকেতি ইধ লোকে মনুস্সগতিযং ৱা. পৰম্হি চাতি ততো অঞ্ঞাসু গতীসু. অৱিজ্জামূলিকা সব্বাতি তা সব্বাপি দুচ্চৰিতস্স ৱিপত্তিযো ৱুত্তনযেন অৱিজ্জাপুব্বঙ্গমত্তা অৱিজ্জামূলিকা এৱ. ইচ্ছালোভসমুস্সযাতি অসম্পত্তৱিসযপৰিযেসনলক্খণায ইচ্ছায, সম্পত্তৱিসযলুব্ভনলক্খণেন লোভেন চ সমুস্সিতা উপচিতাতি ইচ্ছালোভসমুস্সযা.

যতোতি যস্মা অৱিজ্জাহেতু অৱিজ্জায নিৱুতো হুত্ৱা. পাপিচ্ছোতি অৱিজ্জায পটিচ্ছাদিতত্তা পাপিচ্ছতায আদীনৱে অপস্সন্তো অসন্তগুণসম্ভাৱনৱসেন কোহঞ্ঞাদীনি কৰোন্তো পাপিচ্ছো, লোভেনেৱ অত্ৰিচ্ছতাপি গহিতাতি দট্ঠব্বা. অনাদৰোতি লোকাধিপতিনো ওত্তপ্পস্স অভাৱেন সব্ৰহ্মচাৰীসু আদৰৰহিতো. ততোতি তস্মা অৱিজ্জাপাপিচ্ছতাঅহিৰিকানোত্তপ্পহেতু. পসৱতীতি কাযদুচ্চৰিতাদিভেদং পাপং উপচিনতি. অপাযং তেন গচ্ছতীতি তেন তথা পসুতেন পাপেন নিৰযাদিভেদং অপাযং গচ্ছতি উপপজ্জতি.

তস্মাতি যস্মা এতে এৱং সব্বদুচ্চৰিতমূলভূতা সব্বদুগ্গতিপৰিক্কিলেসহেতুভূতা চ অৱিজ্জাদযো, তস্মা ইচ্ছঞ্চ, লোভঞ্চ, অৱিজ্জঞ্চ, চসদ্দেন অহিৰিকানোত্তপ্পঞ্চ ৱিৰাজযং সমুচ্ছেদৱসেন পজহং. কথং ৱিৰাজেতীতি আহ? ৱিজ্জং উপ্পাদযন্তি, ৱিপস্সনাপটিপাটিযা চ, মগ্গপটিপাটিযা চ, উস্সক্কিত্ৱা অৰহত্তমগ্গৱিজ্জং অত্তনো সন্তানে উপ্পাদযন্তো. সব্বা দুগ্গতিযোতি সব্বাপি দুচ্চৰিতসঙ্খাতা দুগ্গতিযো, ৱট্টদুক্খস্স ৱা অধিট্ঠানভাৱতো দুক্খা, সব্বা পঞ্চপি গতিযো জহে পজহেয্য সমতিক্কমেয্য. কিলেসৱট্টপ্পহানেনেৱ হি কম্মৱট্টং ৱিপাকৱট্টঞ্চ পহীনং হোতীতি.

ততিযসুত্তৱণ্ণনা নিট্ঠিতা.

পঠমভাণৱাৰৱণ্ণনা নিট্ঠিতা.