২. দেসনাসুত্তৱণ্ণনা

৩৯. দুতিযে পৰিযাযেনাতি এত্থ পৰিযায-সদ্দো ‘‘মধুপিণ্ডিকপৰিযাযোত্ৱেৱ নং ধাৰেহী’’তিআদীসু (ম. নি. ১.২০৫) দেসনাযং আগতো. ‘‘অত্থি খ্ৱেস, ব্ৰাহ্মণ, পৰিযাযো, যেন মং পৰিযাযেন সম্মা ৱদমানো ৱদেয্য – অকিৰিযৱাদো সমণো গোতমো’’তিআদীসু (পাৰা. ৫; অ. নি. ৮.১১) কাৰণে. ‘‘কস্স নু খো, আনন্দ, অজ্জ পৰিযাযো ভিক্খুনিযো ওৱদিতু’’ন্তিআদীসু (ম. নি. ৩.৩৯৮) ৱাৰে. ইধ পন ৱাৰেপি কাৰণেপি ৱট্টতি, তস্মা, ভিক্খৱে, তথাগতস্স দ্ৱে ধম্মদেসনা যথাৰহং কাৰণেন ভৱন্তি, ৱাৰেন ৱাতি অযমেত্থ অত্থো. ভগৱা হি ৱেনেয্যজ্ঝাসযানুৰূপং কদাচি ‘‘ইমে ধম্মা কুসলা, ইমে, ধম্মা অকুসলা. ইমে ধম্মা সাৱজ্জা, ইমে ধম্মা অনৱজ্জা. ইমে সেৱিতব্বা, ইমে ন সেৱিতব্বা’’তিআদিনা কুসলাকুসলধম্মে ৱিভজন্তো কুসলধম্মেহি অকুসলধম্মে অসঙ্কৰতো পঞ্ঞাপেন্তো ‘‘পাপং পাপকতো পস্সথা’’তি ধম্মং দেসেতি. কদাচি ‘‘পাণাতিপাতো, ভিক্খৱে, আসেৱিতো ভাৱিতো বহুলীকতো নিৰযসংৱত্তনিকো তিৰচ্ছানযোনিসংৱত্তনিকো পেত্তিৱিসযসংৱত্তনিকো, যো সব্বলহুকো পাণাতিপাতো, সো অপ্পাযুকসংৱত্তনিকো’’তিআদিনা (অ. নি. ৮.৪০) আদীনৱং পকাসেন্তো পাপতো নিব্বিদাদীহি নিযোজেন্তো ‘‘নিব্বিন্দথ ৱিৰজ্জথা’’তি ধম্মং দেসেতি.

ভৱন্তীতি হোন্তি পৱত্তন্তি. পাপং পাপকতো পস্সথাতি সব্বং পাপধম্মং দিট্ঠেৱ ধম্মে আযতিঞ্চ অহিতদুক্খাৱহতো লামকতো পস্সথ. তত্থ নিব্বিন্দথাতি তস্মিং পাপধম্মে ‘‘অচ্চন্তহীনভাৱতো লামকট্ঠেন পাপং, অকোসল্লসম্ভূতট্ঠেন অকুসলং, পকতিপভস্সৰস্স পসন্নস্স চ চিত্তস্স পভস্সৰাদিভাৱৱিনাসনতো সংকিলেসিকং, পুনপ্পুনং ভৱদুক্খনিব্বত্তনতো পোনোব্ভৱিকং, সহেৱ দৰথেহি পৰিড়াহেহি ৱত্তনতো সদৰথং, দুক্খস্সেৱ ৱিপচ্চনতো দুক্খৱিপাকং, অপৰিমাণম্পি কালং অনাগতে জাতিজৰামৰণনিব্বত্তনতো আযতিং জাতিজৰামৰণিযং, সব্বহিতসুখৱিদ্ধংসনসমত্থ’’ন্তিআদিনা নযেন নানাৱিধে আদীনৱে, তস্স চ পহানে আনিসংসে সম্মপঞ্ঞায পস্সন্তা নিব্বিন্দথ নিব্বেদং আপজ্জথ. নিব্বিন্দন্তা চ ৱিপস্সনং ৱড্ঢেত্ৱা অৰিযমগ্গাধিগমেন পাপতো ৱিৰজ্জথ চেৱ ৱিমুচ্চথ চ. মগ্গেন ৱা সমুচ্ছেদৱিৰাগৱসেন ৱিৰজ্জথ, ততো ফলেন পটিপ্পস্সদ্ধিৱিমুত্তিৱসেন ৱিমুচ্চথ. অথ ৱা পাপন্তি লামকতো পাপং. কিং ৱুত্তং হোতি? যং অনিচ্চদুক্খাদিভাৱেন কুচ্ছিতং অৰিযেহি জিগুচ্ছনীযং ৱট্টদুক্খং পাপেতীতি পাপং. কিং পন তং? তেভূমকধম্মজাতং. যথাৱুত্তেন অত্থেন পাপকতো দিস্ৱা তত্থ অনিচ্চতো, দুক্খতো, ৰোগতো, গণ্ডতো, সল্লতো, অঘতো, আবাধতোতিআদিনা ৱিপস্সনং ৱড্ঢেন্তা নিব্বিন্দথ. অযং দুতিযাতি যাথাৱতো অহিতানত্থৱিভাৱনং পঠমং উপাদায ততো ৱিৱেচনং অযং দুতিযা ধম্মদেসনা.

গাথাসু বুদ্ধস্সাতি সব্বঞ্ঞুবুদ্ধস্স. সব্বভূতানুকম্পিনোতি সব্বেপি সত্তে মহাকৰুণায অনুকম্পনসভাৱস্স. পৰিযাযৱচনন্তি পৰিযাযেন কথনং দেসনং. পস্সাতি পৰিসং আলপতি, পৰিসজেট্ঠকং ৱা সন্ধায ৱুত্তং. কেচি পনাহু ‘‘অত্তানমেৱ সন্ধায ভগৱা ‘পস্সা’তি অৱোচা’’তি. তত্থাতি তস্মিং পাপকে ৱিৰজ্জথ ৰাগং পজহথাতি অত্থো. সেসং ৱুত্তনযমেৱ.

দুতিযসুত্তৱণ্ণনা নিট্ঠিতা.