১১. আপাযিকসুত্তৱণ্ণনা

৪৮. একাদসমে আপাযিকাতি অপাযে নিব্বত্তিস্সন্তীতি আপাযিকা. তত্থাপি নিৰযে নিব্বত্তিস্সন্তীতি নেৰযিকা. ইদমপ্পহাযাতি ইদং ইদানি ৱক্খমানং দুৱিধং পাপসমাচাৰং অপ্পজহিত্ৱা, তথাপটিপত্তিতথাপগ্গহণৱসেন পৱত্তং ৱাচং চিত্তং দিট্ঠিঞ্চ অপ্পটিনিস্সজ্জিত্ৱাতি অত্থো. অব্ৰহ্মচাৰীতি ব্ৰহ্মসেট্ঠং চৰতীতি ব্ৰহ্মচাৰী, ব্ৰহ্মা ৱা সেট্ঠো আচাৰো এতস্স অত্থীতি ব্ৰহ্মচাৰী, ন ব্ৰহ্মচাৰীতি অব্ৰহ্মচাৰী, ব্ৰহ্মচাৰিপটিৰূপকো দুস্সীলোতি অত্থো. ব্ৰহ্মচাৰিপটিঞ্ঞোতি ‘‘ব্ৰহ্মচাৰী অহ’’ন্তি এৱংপটিঞ্ঞো. পৰিপুণ্ণন্তি অখণ্ডাদিভাৱেন অৱিকলং. পৰিসুদ্ধন্তি উপক্কিলেসাভাৱেন পৰিসুদ্ধং. অমূলকেনাতি দিট্ঠাদিমূলৱিৰহিতেন, দিট্ঠং সুতং পৰিসঙ্কিতন্তি ইমেহি চোদনামূলেহি ৱজ্জিতেন. অব্ৰহ্মচৰিযেন অসেট্ঠচৰিযেন. অনুদ্ধংসেতীতি ‘‘পৰিসুদ্ধো অয’’ন্তি জানন্তোৱ পাৰাজিকৱত্থুনা ধংসেতি পধংসেতি, চোদেতি অক্কোসতি ৱা.

গাথাসু অভূতৱাদীতি পৰস্স দোসং অদিস্ৱাৱ অভূতেন তুচ্ছেন মুসাৱাদং কত্ৱা পৰং অব্ভাচিক্খন্তো. কত্ৱাতি যো ৱা পন পাপকম্মং কত্ৱা ‘‘নাহং এতং কৰোমী’’তি আহ. উভোপি তে পেচ্চ সমা ভৱন্তীতি তে উভোপি জনা ইতো পৰলোকং গন্ত্ৱা নিৰযং উপগমনতো গতিযা সমানা ভৱন্তি. তত্থ গতিযেৱ নেসং পৰিচ্ছিন্না, ন পন আযু. বহুঞ্হি পাপং কত্ৱা চিৰং নিৰযে পচ্চতি, পৰিত্তং কত্ৱা অপ্পমত্তকমেৱ কালং. যস্মা পন তেসং উভিন্নম্পি কম্মং লামকমেৱ. তেন ৱুত্তং ‘‘নিহীনকম্মা মনুজা পৰত্থা’’তি. ‘‘পৰত্থা’’তি পন পদস্স পুৰতো ‘‘পেচ্চা’’তি পদেন সম্বন্ধো – পৰত্থ পেচ্চ ইতো গন্ত্ৱা তে নিহীনকম্মা সমা ভৱন্তীতি.

এৱং ভগৱা অভূতব্ভক্খানৱসেন ভূতদোসপটিচ্ছাদনৱসেন চ পৱত্তস্স মুসাৱাদস্স ৱিপাকং দস্সেত্ৱা ইদানি তস্মিং ঠানে নিসিন্নানং বহূনং পাপভিক্খূনং দুচ্চৰিতকম্মস্স ৱিপাকদস্সনেন সংৱেজনত্থং দ্ৱে গাথা অভাসি. তত্থ কাসাৱকণ্ঠাতি কসাৱৰসপীতত্তা কাসাৱেন ৱত্থেন পলিৱেঠিতকণ্ঠা. পাপধম্মাতি লামকধম্মা. অসঞ্ঞতাতি কাযাদীহি সঞ্ঞমৰহিতা. পাপাতি তথাৰূপা পাপপুগ্গলা, পাপেহি কম্মেহি উপপজ্জিত্ৱা ‘‘তস্স কাযোপি আদিত্তো সম্পজ্জলিতো সজোতিভূতো, সঙ্ঘাটিপি আদিত্তা’’তিআদিনা (সং. নি. ২.২১৮-২১৯; পাৰা. ২৩০) লক্খণসংযুত্তে ৱুত্তনযেন মহাদুক্খং অনুভৱন্তিযেৱ.

ততিযগাথায অযং সঙ্খেপত্থো – যঞ্চে ভুঞ্জেয্য দুস্সীলো নিস্সীলপুগ্গলো কাযাদীহি অসঞ্ঞতো ৰট্ঠৱাসীহি সদ্ধায দিন্নং যং ৰট্ঠপিণ্ডং ‘‘সমণোম্হী’’তি পটিজানন্তো গহেত্ৱা ভুঞ্জেয্য, ততো আদিত্তো অগ্গিৱণ্ণো অযোগুড়োৱ ভুত্তো সেয্যো সুন্দৰতৰো. কিংকাৰণা? তপ্পচ্চযা হিস্স একোৱ অত্তভাৱো ঝাযেয্য, দুস্সীলো পন হুত্ৱা সদ্ধাদেয্যং ভুঞ্জিত্ৱা অনেকানিপি জাতিসতানি নিৰযে উপ্পজ্জেয্যাতি.

একাদসমসুত্তৱণ্ণনা নিট্ঠিতা.