৯. কোকসুনখলুদ্দকৱত্থু

যো অপ্পদুট্ঠস্সাতি ইমং ধম্মদেসনং সত্থা জেতৱনে ৱিহৰন্তো কোকং নাম সুনখলুদ্দকং আৰব্ভ কথেসি.

সো কিৰ একদিৱসং পুব্বণ্হসমযে ধনুং আদায সুনখপৰিৱুতো অৰঞ্ঞং গচ্ছন্তো অন্তৰামগ্গে একং পিণ্ডায পৱিসন্তং ভিক্খুং দিস্ৱা কুজ্ঝিত্ৱা ‘‘কাড়কণ্ণি মে দিট্ঠো, অজ্জ কিঞ্চি ন লভিস্সামী’’তি চিন্তেত্ৱা পক্কামি. থেৰোপি গামে পিণ্ডায চৰিত্ৱা কতভত্তকিচ্চো পুন ৱিহাৰং পাযাসি. ইতৰোপি অৰঞ্ঞে ৱিচৰিত্ৱা কিঞ্চি অলভিত্ৱা পচ্চাগচ্ছন্তো পুন থেৰং দিস্ৱা ‘‘অজ্জাহং ইমং কাড়কণ্ণিং দিস্ৱা অৰঞ্ঞং গতো কিঞ্চি ন লভিং, ইদানি মে পুনপি অভিমুখো জাতো, সুনখেহি নং খাদাপেস্সামী’’তি সঞ্ঞং দত্ৱা সুনখে ৱিস্সজ্জেসি. থেৰোপি ‘‘মা এৱং কৰি উপাসকা’’তি যাচি. সো ‘‘অজ্জাহং তৱ সম্মুখীভূতত্তা কিঞ্চি নালত্থং, পুনপি মে সম্মুখীভাৱমাগতোসি, খাদাপেস্সামেৱ ত’’ন্তি ৱত্ৱা সুনখে উয্যোজেসি. থেৰো ৱেগেন একং ৰুক্খং অভিৰুহিত্ৱা পুৰিসপ্পমাণে ঠানে নিসীদি. সুনখা ৰুক্খং পৰিৱাৰেসুং. লুদ্দকো গন্ত্ৱা ‘‘ৰুক্খং অভিৰুহতোপি তে মোক্খো নত্থী’’তি তং সৰতুণ্ডেন পাদতলে ৱিজ্ঝি. থেৰো ‘‘মা এৱং কৰোহী’’তি তং যাচিযেৱ. ইতৰো তস্স যাচনং অনাদিযিত্ৱা পুনপ্পুনং ৱিজ্ঝিযেৱ. থেৰো একস্মিং পাদতলে ৱিজ্ঝিযমানে তং উক্খিপিত্ৱা দুতিযং পাদং ওলম্বিত্ৱা তস্মিং ৱিজ্ঝিযমানে তম্পি উক্খিপতি, এৱমস্স সো যাচনং অনাদিযিত্ৱাৱ দ্ৱেপি পাদতলানি ৱিজ্ঝিযেৱ. থেৰস্স সৰীৰং উক্কাহি আদিত্তং ৱিয অহোসি. সো ৱেদনানুৱত্তিকো হুত্ৱা সতিং পচ্চুপট্ঠাপেতুং নাসক্খি, পাৰুতচীৱৰং ভস্সন্তম্পি ন সল্লক্খেসি. তং পতমানং কোকং সীসতো পট্ঠায পৰিক্খিপন্তমেৱ পতি. সুনখা ‘‘থেৰো পতিতো’’তি সঞ্ঞায চীৱৰন্তৰং পৱিসিত্ৱা অত্তনো সামিকং লুঞ্জিত্ৱা খাদন্তা অট্ঠিমত্তাৱসেসং কৰিংসু. সুনখা চীৱৰন্তৰতো নিক্খমিত্ৱা বহি অট্ঠংসু.

অথ নেসং থেৰো একং সুক্খদণ্ডকং ভঞ্জিত্ৱা খিপি. সুনখা থেৰং দিস্ৱা ‘‘সামিকোৱ অম্হেহি খাদিতো’’তি ঞত্ৱা অৰঞ্ঞং পৱিসিংসু. থেৰো কুক্কুচ্চং উপ্পাদেসি ‘‘মম চীৱৰন্তৰং পৱিসিত্ৱা এস নট্ঠো, অৰোগং নু খো মে সীল’’ন্তি. সো ৰুক্খা ওতৰিত্ৱা সত্থু সন্তিকং গন্ত্ৱা আদিতো পট্ঠায সব্বং তং পৱত্তিং আৰোচেত্ৱা – ‘‘ভন্তে, মম চীৱৰং নিস্সায সো উপাসকো নট্ঠো, কচ্চি মে অৰোগং সীলং, অত্থি মে সমণভাৱো’’তি পুচ্ছি. সত্থা তস্স ৱচনং সুত্ৱা ‘‘ভিক্খু অৰোগং তে সীলং, অত্থি তে সমণভাৱো, সো অপ্পদুট্ঠস্স পদুস্সিত্ৱা ৱিনাসং পত্তো, ন কেৱলঞ্চ ইদানেৱ, অতীতেপি অপ্পদুট্ঠানং পদুস্সিত্ৱা ৱিনাসং পত্তোযেৱা’’তি ৱত্ৱা তমত্থং পকাসেন্তো অতীতং আহৰি –

অতীতে কিৰেকো ৱেজ্জো ৱেজ্জকম্মত্থায গামং ৱিচৰিত্ৱা কিঞ্চি কম্মং অলভিত্ৱা ছাতজ্ঝত্তো নিক্খমিত্ৱা গামদ্ৱাৰে সম্বহুলে কুমাৰকে কীড়ন্তে দিস্ৱা ‘‘ইমে সপ্পেন ডংসাপেত্ৱা তিকিচ্ছিত্ৱা আহাৰং লভিস্সামী’’তি একস্মিং ৰুক্খবিলে সীসং নিহৰিত্ৱা নিপন্নং সপ্পং দস্সেত্ৱা, ‘‘অম্ভো, কুমাৰকা এসো সাড়িকপোতকো, গণ্হথ ন’’ন্তি আহ. অথেকো কুমাৰকো সপ্পং গীৱাযং দড়্হং গহেত্ৱা নীহৰিত্ৱা তস্স সপ্পভাৱং ঞত্ৱা ৱিৰৱন্তো অৱিদূৰে ঠিতস্স ৱেজ্জস্স মত্থকে খিপি. সপ্পো ৱেজ্জস্স খন্ধট্ঠিকং পৰিক্খিপিত্ৱা দড়্হং ডংসিত্ৱা তত্থেৱ জীৱিতক্খযং পাপেসি, এৱমেস কোকো সুনখলুদ্দকো পুব্বেপি অপ্পদুট্ঠস্স পদুস্সিত্ৱা ৱিনাসং পত্তোযেৱাতি.

সত্থা ইমং অতীতং আহৰিত্ৱা অনুসন্ধিং ঘটেত্ৱা ধম্মং দেসেন্তো ইমং গাথমাহ –

১২৫. ‘‘যো অপ্পদুট্ঠস্স নৰস্স দুস্সতি, সুদ্ধস্স পোসস্স অনঙ্গণস্স;

তমেৱ বালং পচ্চেতি পাপং, সুখুমো ৰজো পটিৱাতংৱ খিত্তো’’তি.

তত্থ অপ্পদুট্ঠস্সাতি অত্তনো ৱা সব্বসত্তানং ৱা অদুট্ঠস্স. নৰস্সাতি সত্তস্স. দুস্সতীতি অপৰজ্ঝতি. সুদ্ধস্সাতি নিৰপৰাধস্সেৱ. পোসস্সাতি ইদম্পি অপৰেনাকাৰেন সত্তাধিৱচনমেৱ. অনঙ্গণস্সাতি নিক্কিলেসস্স. পচ্চেতীতি পতিএতি. পটিৱাতন্তি যথা একেন পুৰিসেন পটিৱাতে ঠিতং পহৰিতুকামতায খিত্তো সুখুমো ৰজোতি তমেৱ পুৰিসং পচ্চেতি, তস্সেৱ উপৰি পততি, এৱমেৱ যো পুগ্গলো অপদুট্ঠস্স পুৰিসস্স পাণিপ্পহৰাদীনি দদন্তো পদুস্সতি, তমেৱ বালং দিট্ঠেৱ ধম্মে, সম্পৰাযে ৱা নিৰযাদীসু ৱিপচ্চমানং তং পাপং ৱিপাকদুক্খৱসেন পচ্চেতীতি অত্থো.

দেসনাৱসানে সো ভিক্খু অৰহত্তে পতিট্ঠহি, সম্পত্তপৰিসাযপি সাত্থিকা ধম্মদেসনা অহোসীতি.

কোকসুনখলুদ্দকৱত্থু নৱমং.