৯. সাৰিপুত্তত্থেৰৱত্থু

যম্হাতি ইমং ধম্মদেসনং সত্থা জেতৱনে ৱিহৰন্তো সাৰিপুত্তত্থেৰং আৰব্ভ কথেসি.

সো কিৰাযস্মা অস্সজিত্থেৰস্স সন্তিকে ধম্মং সুত্ৱা সোতাপত্তিফলং পত্তকালতো পট্ঠায ‘‘যস্সং দিসাযং থেৰো ৱসতী’’তি সুণাতি, ততো অঞ্জলিং পগ্গয্হ ততোৱ সীসং কত্ৱা নিপজ্জতি. ভিক্খূ ‘‘মিচ্ছাদিট্ঠিকো সাৰিপুত্তো, অজ্জাপি দিসা নমস্সমানো ৱিচৰতী’’তি তমত্থং তথাগতস্স আৰোচেসুং. সত্থা থেৰং পক্কোসাপেত্ৱা ‘‘সচ্চং কিৰ ত্ৱং, সাৰিপুত্ত, দিসা নমস্সন্তো ৱিচৰসী’’তি পুচ্ছিত্ৱা, ‘‘ভন্তে, মম দিসা নমস্সনভাৱং ৱা অনমস্সনভাৱং ৱা তুম্হেৱ জানাথা’’তি ৱুত্তে ‘‘ন, ভিক্খৱে, সাৰিপুত্তো দিসা নমস্সতি, অস্সজিত্থেৰস্স পন সন্তিকা ধম্মং সুত্ৱা সোতাপত্তিফলং পত্ততায অত্তনো আচৰিযং নমস্সতি. যঞ্হি আচৰিযং নিস্সায ভিক্খু ধম্মং ৱিজানাতি, তেন সো ব্ৰাহ্মণেন অগ্গি ৱিয সক্কচ্চং নমস্সিতব্বোযেৱা’’তি ৱত্ৱা ধম্মং দেসেন্তো ইমং গাথমাহ –

৩৯২. ‘‘যম্হা ধম্মং ৱিজানেয্য, সম্মাসম্বুদ্ধদেসিতং;

সক্কচ্চং তং নমস্সেয্য, অগ্গিহুত্তংৱ ব্ৰাহ্মণো’’তি.

তত্থ অগ্গিহুত্তংৱাতি যথা ব্ৰাহ্মণো অগ্গিহুত্তং সম্মা পৰিচৰণেন চেৱ অঞ্জলিকম্মাদীহি চ সক্কচ্চং নমস্সতি, এৱং যম্হা আচৰিযা তথাগতপৱেদিতং ধম্মং ৱিজানেয্য, তং সক্কচ্চং নমস্সেয্যাতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

সাৰিপুত্তত্থেৰৱত্থু নৱমং.