৪০. দেৱহিতব্ৰাহ্মণৱত্থু

পুব্বেনিৱাসন্তি ইমং ধম্মদেসনং সত্থা জেতৱনে ৱিহৰন্তো দেৱহিতব্ৰাহ্মণস্স পঞ্হং আৰব্ভ কথেসি.

একস্মিঞ্হি সমযে ভগৱা ৱাতৰোগেন আবাধিকো হুত্ৱা উপৱাণত্থেৰং উণ্হোদকত্থায দেৱহিতব্ৰাহ্মণস্স সন্তিকং পহিণি. সো গন্ত্ৱা সত্থু আবাধিকভাৱং আচিক্খিত্ৱা উণ্হোদকং যাচি, তং সুত্ৱা ব্ৰাহ্মণো তুট্ঠমানসো হুত্ৱা ‘‘লাভা ৱত মে, যং মম সন্তিকং সম্মাসম্বুদ্ধো উণ্হোদকস্সত্থায সাৱকং পহিণী’’তি উণ্হোদকস্স কাজং পুৰিসেন গাহাপেত্ৱা ফাণিতস্স চ পুটং উপৱাণত্থেৰস্স পাদাসি. থেৰো তং গাহাপেত্ৱা ৱিহাৰং গন্ত্ৱা সত্থাৰং উণ্হোদকেন ন্হাপেত্ৱা উণ্হোদকেন ফাণিতং আলোড়েত্ৱা ভগৱতো পাদাসি, তস্স তঙ্খণেযেৱ সো আবাধো পটিপস্সম্ভি. ব্ৰাহ্মণো চিন্তেসি – ‘‘কস্স নু খো দেয্যধম্মো দিন্নো মহপ্ফলো হোতি, সত্থাৰং পুচ্ছিস্সামী’’তি সো সত্থু সন্তিকং গন্ত্ৱা তমত্থং পুচ্ছন্তো ইমং গাথমাহ –

‘‘কত্থ দজ্জা দেয্যধম্মং, কত্থ দিন্নং মহপ্ফলং;

কথঞ্হি যজমানস্স, কথং ইজ্ঝতি দক্খিণা’’তি. (সং. নি. ১.১৯৯);

অথস্স সত্থা ‘‘এৱৰূপস্স ব্ৰাহ্মণস্স দিন্নং মহপ্ফলং হোতী’’তি ৱত্ৱা ব্ৰাহ্মণং পকাসেন্তো ইমং গাথমাহ –

৪২৩. ‘‘পুব্বেনিৱাসং যো ৱেদি, সগ্গাপাযঞ্চ পস্সতি;

অথো জাতিক্খযং পত্তো, অভিঞ্ঞাৱোসিতো মুনি; (সং. নি. ১.১৯৯);

সব্বৱোসিতৱোসানং, তমহং ব্ৰূমি ব্ৰাহ্মণ’’ন্তি.

তস্সত্থো – যো পুব্বেনিৱাসং পাকটং কত্ৱা জানাতি, ছব্বীসতিদেৱলোকভেদং সগ্গঞ্চ চতুব্বিধং অপাযঞ্চ দিব্বচক্খুনা পস্সতি, অথো জাতিক্খযসঙ্খাতং অৰহত্তং পত্তো, অভিঞ্ঞেয্যং ধম্মং অভিজানিত্ৱা পৰিঞ্ঞেয্যং পৰিজানিত্ৱা পহাতব্বং পহায সচ্ছিকাতব্বং সচ্ছিকত্ৱা ৱোসিকো নিট্ঠানং পত্তো, ৱুসিতৱোসানং ৱা পত্তো, আসৱক্খযপঞ্ঞায মোনভাৱং পত্তত্তা মুনি, তমহং সব্বেসং কিলেসানং ৱোসানং অৰহত্তমগ্গঞাণং ব্ৰহ্মচৰিযৱাসং ৱুত্থভাৱেন সব্বৱোসিতৱোসানং ব্ৰাহ্মণং ৱদামীতি.

দেসনাৱসানে বহূ সোতাপত্তিফলাদীনি পাপুণিংসু. ব্ৰাহ্মণোপি পসন্নমানসো সৰণেসু পতিট্ঠায উপাসকত্তং পৱেদেসীতি.

দেৱহিতব্ৰাহ্মণৱত্থু চত্তালীসং.

ব্ৰাহ্মণৱগ্গৱণ্ণনা নিট্ঠিতা.

ছব্বীসতিমো ৱগ্গো.

নিগমনকথা

এত্তাৱতা সব্বপঠমে যমকৱগ্গে চুদ্দস ৱত্থূনি, অপ্পমাদৱগ্গে নৱ, চিত্তৱগ্গে নৱ, পুপ্ফৱগ্গে দ্ৱাদস, বালৱগ্গে পন্নৰস, পণ্ডিতৱগ্গে একাদস, অৰহন্তৱগ্গে দস, সহস্সৱগ্গে চুদ্দস, পাপৱগ্গে দ্ৱাদস, দণ্ডৱগ্গে একাদস, জৰাৱগ্গে নৱ, অত্তৱগ্গে দস, লোকৱগ্গে একাদস, বুদ্ধৱগ্গে নৱ, সুখৱগ্গে অট্ঠ, পিযৱগ্গে নৱ, কোধৱগ্গে অট্ঠ, মলৱগ্গে দ্ৱাদস, ধম্মট্ঠৱগ্গে দস, মগ্গৱগ্গে দ্ৱাদস, পকিণ্ণকৱগ্গে নৱ, নিৰযৱগ্গে নৱ, নাগৱগ্গে অট্ঠ, তণ্হাৱগ্গে দ্ৱাদস, ভিক্খুৱগ্গে দ্ৱাদস, ব্ৰাহ্মণৱগ্গে চত্তালীসাতি পঞ্চাধিকানি তীণি ৱত্থুসতানি পকাসেত্ৱা নাতিসঙ্খেপনাতিৱিত্থাৰৱসেন উপৰচিতা দ্ৱাসত্ততিভাণৱাৰপমাণা ধম্মপদস্স অত্থৱণ্ণনা নিট্ঠিতাতি.

পত্তং ধম্মপদং যেন, ধম্মৰাজেননুত্তৰং;

গাথা ধম্মপদে তেন, ভাসিতা যা মহেসিনা.

সতেৱীসা চতুস্সতা, চতুসচ্চৱিভাৱিনা;

সতত্তযঞ্হি ৱত্থূনং, পঞ্চাধিকা সমুট্ঠিতা.

ৱিহাৰে অধিৰাজেন, কাৰিতম্হি কতঞ্ঞুনা;

পাসাদে সিৰিকূটস্স, ৰঞ্ঞো ৱিহৰতা মযা.

অত্থব্যঞ্জনসম্পন্নং, অত্থায চ হিতায চ;

লোকস্স লোকনাথস্স, সদ্ধম্মট্ঠিতিকম্যতা.

তাসং অট্ঠকথং এতং, কৰোন্তেন সুনিম্মলং;

দ্ৱাসত্ততিপমাণায, ভাণৱাৰেহি পাড়িযা.

যং পত্তং কুসলং তেন, কুসলা সব্বপাণিনং;

সব্বে ইজ্ঝন্তু সঙ্কপ্পা, লভন্তু মধুৰং ফলন্তি.

পৰমৱিসুদ্ধসদ্ধাবুদ্ধিৱীৰিযপটিমণ্ডিতেন সীলাচাৰজ্জৱমদ্দৱাদিগুণসমুদযসমুদিতেন সকসমযসমযন্তৰগহনজ্ঝোগাহণসমত্থেন পঞ্ঞাৱেয্যত্তিযসমন্নাগতেন তিপিটকপৰিযত্তিপ্পভেদে সাট্ঠকথে সত্থুসাসনে অপ্পটিহতঞাণপ্পভাৱেন মহাৱেয্যাকৰণেন কৰণসম্পত্তিজনিতসুখৱিনিগ্গতমধুৰোদাৰৱচনলাৱণ্ণযুত্তেন যুত্তমুত্তৱাদিনা ৱাদীৱৰেন মহাকৱিনা পভিন্নপটিসম্ভিদাপৰিৱাৰে ছড়ভিঞ্ঞাপটিসম্ভিদাদিপ্পভেদগুণপটিমণ্ডিতে উত্তৰিমনুস্সধম্মে সুপ্পতিট্ঠিতবুদ্ধীনং থেৰৱংসপ্পদীপানং থেৰানং মহাৱিহাৰৱাসীনং ৱংসালঙ্কাৰভূতেন ৱিপুলৱিসুদ্ধবুদ্ধিনা বুদ্ধঘোসোতি গৰূহি গহিতনামধেয্যেন থেৰেন কতাযং ধম্মপদট্ঠকথা –

তাৱ তিট্ঠতু লোকস্মিং, লোকনিত্থৰণেসিনং;

দস্সেন্তী কুলপুত্তানং, নযং সদ্ধাদিবুদ্ধিযা.

যাৱ বুদ্ধোতি নামম্পি, সুদ্ধচিত্তস্স তাদিনো;

লোকম্হি লোকজেট্ঠস্স, পৱত্ততি মহেসিনোতি.

ইতি তেৱীসাধিকচতুসতগাথাপঞ্চাধিকতিসতৱত্থুপটিমণ্ডিতা

ছব্বীসতিৱগ্গসমন্নাগতা ধম্মপদৱণ্ণনা সমত্তা.

ধম্মপদ-অট্ঠকথা সব্বাকাৰেন নিট্ঠিতা.