৩৭. ৱঙ্গীসত্থেৰৱত্থু

চুতিং যো ৱেদীতি ইমং ধম্মদেসনং সত্থা জেতৱনে ৱিহৰন্তো ৱঙ্গীসত্থেৰং আৰব্ভ কথেসি.

ৰাজগহে কিৰেকো ব্ৰাহ্মণো ৱঙ্গীসো নাম মতমনুস্সানং সীসং আকোটেত্ৱা ‘‘ইদং নিৰযে নিব্বত্তস্স সীসং, ইদং তিৰচ্ছানযোনিযং, ইদং পেত্তিৱিসযে, ইদং মনুস্সলোকে, ইদং দেৱলোকে নিব্বত্তস্স সীস’’ন্তি জানাতি. ব্ৰাহ্মণা ‘‘সক্কা ইমং নিস্সায লোকং খাদিতু’’ন্তি চিন্তেত্ৱা তং দ্ৱে ৰত্তৱত্থানি পৰিদহাপেত্ৱা আদায জনপদং চৰন্তা মনুস্সে ৱদন্তি ‘‘এসো ৱঙ্গীসো নাম ব্ৰাহ্মণো মতমনুস্সানং সীসং আকোটেত্ৱা নিব্বত্তট্ঠানং জানাতি, অত্তনো ঞাতকানং নিব্বত্তট্ঠানং পুচ্ছথা’’তি. মনুস্সা যথাবলং দসপি কহাপণে ৱীসতিপি সতম্পি দত্ৱা ঞাতকানং নিব্বত্তট্ঠানং পুচ্ছন্তি. তে অনুপুব্বেন সাৱত্থিং পত্ৱা জেতৱনস্স অৱিদূৰে নিৱাসং গণ্হিংসু. তে ভুত্তপাতৰাসা মহাজনং গন্ধমালাদিহত্থং ধম্মস্সৱনায গচ্ছন্তং দিস্ৱা ‘‘কহং গচ্ছথা’’তি পুচ্ছিত্ৱা ‘‘ৱিহাৰং ধম্মস্সৱনাযা’’তি ৱুত্তে ‘‘তত্থ গন্ত্ৱা কিং কৰিস্সথ, অম্হাকং ৱঙ্গীসব্ৰাহ্মণেন সদিসো নাম নত্থি, মতমনুস্সানং সীসং আকোটেত্ৱা নিব্বত্তট্ঠানং জানাতি, ঞাতকানং নিব্বত্তট্ঠানং পুচ্ছথা’’তি আহংসু. তে ‘‘ৱঙ্গীসো কিং জানাতি, অম্হাকং সত্থাৰা সদিসো নাম নত্থী’’তি ৱত্ৱা ইতৰেহিপি ‘‘ৱঙ্গীসসদিসো নত্থী’’তি ৱুত্তে কথং ৱড্ঢেত্ৱা ‘‘এথ, দানি ৱো ৱঙ্গীসস্স ৱা অম্হাকং ৱা সত্থু জাননভাৱং জানিস্সামা’’তি তে আদায ৱিহাৰং অগমংসু. সত্থা তেসং আগমনভাৱং ঞত্ৱা নিৰযে তিৰচ্ছানযোনিযং মনুস্সলোকে দেৱলোকেতি চতূসু ঠানেসু নিব্বত্তানং চত্তাৰি সীসানি, খীণাসৱসীসঞ্চাতি পঞ্চ সীসানি আহৰাপেত্ৱা পটিপাটিযা ঠপেত্ৱা আগতকালে ৱঙ্গীসং পুচ্ছি – ‘‘ত্ৱং কিৰ সীসং আকোটেত্ৱা মতকানং নিব্বত্তট্ঠানং জানাসী’’তি? ‘‘আম, জানামী’’তি. ‘‘ইদং কস্স সীস’’ন্তি? সো তং আকোটেত্ৱা ‘‘নিৰযে নিব্বত্তস্সা’’তি আহ. অথস্স সত্থা ‘‘সাধু সাধূ’’তি সাধুকাৰং দত্ৱা ইতৰানিপি তীণি সীসানি পুচ্ছিত্ৱা তেন অৱিৰজ্ঝিত্ৱা ৱুত্তৱুত্তক্খণে তথেৱ তস্স সাধুকাৰং দত্ৱা পঞ্চমং সীসং দস্সেত্ৱা ‘‘ইদং কস্স সীস’’ন্তি পুচ্ছি, সো তম্পি আকোটেত্ৱা নিব্বত্তট্ঠানং ন জানাতি.

অথ নং সত্থা ‘‘কিং, ৱঙ্গীস, ন জানাসী’’তি ৱত্ৱা, ‘‘আম, ন জানামী’’তি ৱুত্তে ‘‘অহং জানামী’’তি আহ. অথ নং ৱঙ্গীসো যাচি ‘‘দেথ মে ইমং মন্ত’’ন্তি. ন সক্কা অপব্বজিতস্স দাতুন্তি. সো ‘‘ইমস্মিং মন্তে গহিতে সকলজম্বুদীপে অহং জেট্ঠকো ভৱিস্সামী’’তি চিন্তেত্ৱা তে ব্ৰাহ্মণে ‘‘তুম্হে তত্থেৱ কতিপাহং ৱসথ, অহং পব্বজিস্সামী’’তি উয্যোজেত্ৱা সত্থু সন্তিকে পব্বজিত্ৱা লদ্ধূপসম্পদো ৱঙ্গীসত্থেৰো নাম অহোসি. অথস্স সত্থা দ্ৱত্তিংসাকাৰকম্মট্ঠানং দত্ৱা ‘‘মন্তস্স পৰিকম্মং সজ্ঝাযাহী’’তি আহ. সো তং সজ্ঝাযন্তো অন্তৰন্তৰা ব্ৰাহ্মণেহি ‘‘গহিতো তে মন্তো’’তি পুচ্ছিযমানো ‘‘আগমেথ তাৱ, গণ্হামী’’তি ৱত্ৱা কতিপাহেনেৱ অৰহত্তং পত্ৱা পুন ব্ৰাহ্মণেহি পুট্ঠো ‘‘অভব্বো দানাহং, আৱুসো, গন্তু’’ন্তি আহ. তং সুত্ৱা ভিক্খূ ‘‘অযং, ভন্তে, অভূতেন অঞ্ঞং ব্যাকৰোতী’’তি সত্থু আৰোচেসুং. সত্থা ‘‘মা, ভিক্খৱে, এৱং অৱচুত্থ, ইদানি, ভিক্খৱে, মম পুত্তো চুতিপটিসন্ধিকুসলো জাতো’’তি ৱত্ৱা ইমা গাথা অভাসি –

৪১৯. ‘‘চুতিং যো ৱেদি সত্তানং, উপপত্তিঞ্চ সব্বসো;

অসত্তং সুগতং বুদ্ধং, তমহং ব্ৰূমি ব্ৰাহ্মণং.

৪২০. ‘‘যস্স গতিং ন জানন্তি, দেৱা গন্ধব্বমানুসা;

খীণাসৱং অৰহন্তং, তমহং ব্ৰূমি ব্ৰাহ্মণ’’ন্তি.

তত্থ যো ৱেদীতি যো সত্তানং সব্বাকাৰেন চুতিঞ্চ পটিসন্ধিঞ্চ পাকটং কত্ৱা জানাতি, তমহং অলগ্গতায অসত্তং, পটিপত্তিযা সুট্ঠু গতত্তা সুগতং, চতুন্নং সচ্চানং বুদ্ধতায বুদ্ধং ব্ৰাহ্মণং ৱদামীতি অত্থো. যস্সাতি যস্সেতে দেৱাদযো গতিং ন জানন্তি, তমহং আসৱানং খীণতায খীণাসৱং, কিলেসেহি আৰকত্তা অৰহন্তং ব্ৰাহ্মণং ৱদামীতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

ৱঙ্গীসত্থেৰৱত্থু সত্ততিংসতিমং.