৩৪. জোতিকত্থেৰৱত্থু

যোধ তণ্হন্তি পুন ইমং ধম্মদেসনং সত্থা ৱেড়ুৱনে ৱিহৰন্তো জোতিকত্থেৰং আৰব্ভ কথেসি.

অজাতসত্তুকুমাৰো হি দেৱদত্তেন সদ্ধিং একতো হুত্ৱা পিতৰং ঘাতেত্ৱা ৰজ্জে পতিট্ঠিতো ‘‘জোতিকসেট্ঠিস্স মহাপাসাদং গণ্হিস্সামী’’তি যুদ্ধসজ্জো নিক্খমিত্ৱা মণিপাকাৰে সপৰিৱাৰস্স অত্তনো ছাযং দিস্ৱা ‘‘গহপতিকো যুদ্ধসজ্জো হুত্ৱা বলং আদায নিক্খন্তো’’তি সল্লক্খেত্ৱা উপগন্তুং ন ৱিসহি. সেট্ঠিপি তং দিৱসং উপোসথিকো হুত্ৱা পাতোৱ ভুত্তপাতৰাসো ৱিহাৰং গন্ত্ৱা সত্থু সন্তিকে ধম্মং সুণন্তো নিসিন্নো হোতি. পঠমে দ্ৱাৰকোট্ঠকে আৰক্খং গহেত্ৱা ঠিতো পন যমকোড়ি নাম যক্খো তং দিস্ৱা ‘‘কহং গচ্ছসী’’তি সপৰিৱাৰং ৱিদ্ধংসেত্ৱা দিসাৱিদিসাসু অনুবন্ধি. ৰাজা ৱিহাৰমেৱ অগমাসি.

অথ নং সেট্ঠি দিস্ৱাৱ ‘‘কিং, দেৱা’’তি ৱত্ৱা উট্ঠাযাসনা অট্ঠাসি. গহপতি, কিং ত্ৱং তৱ পুৰিসে ‘‘মযা সদ্ধিং যুজ্ঝথা’’তি আণাপেত্ৱা ইধাগম্ম ধম্মং সুণন্তো ৱিয নিসিন্নোতি. কিং পন দেৱো মম গেহং গণ্হিতুং গতোতি? আম, গতোম্হীতি. মম অনিচ্ছায মম গেহং গণ্হিতুং ৰাজসহস্সম্পি ন সক্কোতি, দেৱাতি. সো ‘‘কিং পন ত্ৱং ৰাজা ভৱিস্সসী’’তি কুজ্ঝি. নাহং ৰাজা, মম সন্তকং পন দসিকসুত্তম্পি মম অনিচ্ছায ৰাজূহি ৱা চোৰেহি ৱা গহেতুং ন সক্কাতি. কিং পনাহং তৱ ৰুচিযা গণ্হিস্সামীতি? তেন হি, দেৱ, ইমা মে দসসু অঙ্গুলীসু ৱীসতি মুদ্দিকা, ইমাহং তুম্হাকং ন দেমি. সচে সক্কোথ, গণ্হথাতি. সো পন ৰাজা ভূমিযং উক্কুটিকং নিসীদিত্ৱা উল্লঙ্ঘন্তো অট্ঠাৰসহত্থং ঠানং অভিৰুহতি, ঠত্ৱা উল্লঙ্ঘন্তো অসীতিহত্থং ঠানং অভিৰুহতি. এৱংমহাবলো সমানোপি ইতো চিতো চ পৰিৱত্তেন্তো একং মুদ্দিকম্পি কড্ঢিতুং নাসক্খি. অথ নং সেট্ঠি ‘‘সাটকং পত্থৰ, দেৱা’’তি ৱত্ৱা অঙ্গুলিযো উজুকা অকাসি, ৱীসতিপি মুদ্দিকা নিক্খমিংসু. অথ নং সেট্ঠি ‘‘এৱং, দেৱ, মম সন্তকং মম অনিচ্ছায ন সক্কা গণ্হিতু’’ন্তি ৱত্ৱা ৰঞ্ঞো কিৰিযায উপ্পন্নসংৱেগো ‘‘পব্বজিতুং মে অনুজান, দেৱা’’তি আহ. সো ‘‘ইমস্মিং পব্বজিতে সুখং পাসাদং গণ্হিস্সামী’’তি চিন্তেত্ৱা একৱচনেনেৱ ‘‘ত্ৱং পব্বজাহী’’তি আহ. সো সত্থু সন্তিকে পব্বজিত্ৱা ন চিৰস্সেৱ অৰহত্তং পত্ৱা জোতিকত্থেৰো নাম অহোসি. তস্স অৰহত্তং পত্তক্খণেযেৱ সব্বাপি সা সম্পত্তি অন্তৰধাযি, তম্পিস্স সতুলকাযিং নাম ভৰিযং দেৱতা উত্তৰকুৰুমেৱ নযিংসু.

অথেকদিৱসং ভিক্খূ তং আমন্তেত্ৱা, ‘‘আৱুসো জোতিক, তস্মিং পন তে পাসাদে ৱা ইত্থিযা ৱা তণ্হা অত্থী’’তি পুচ্ছিত্ৱা ‘‘নত্থাৱুসো’’তি ৱুত্তে সত্থু আৰোচেসুং – ‘‘অযং, ভন্তে, অভূতং ৱত্ৱা অঞ্ঞং ব্যাকৰোতী’’তি. সত্থা ‘‘নত্থেৱ, ভিক্খৱে, মম পুত্তস্স তস্মিং তণ্হা’’তি ৱত্ৱা ইমং গাথমাহ –

৪১৬. ‘‘যোধ তণ্হং পহন্ত্ৱান, অনাগাৰো পৰিব্বজে;

তণ্হাভৱপৰিক্খীণং, তমহং ব্ৰূমি ব্ৰাহ্মণ’’ন্তি.

ইমিস্সা গাথাযত্থো হেট্ঠা জটিলত্থেৰৱত্থুম্হি ৱুত্তনযেনেৱ ৱেদিতব্বো.

দেসনাৱসানে বহূ সোতাপত্তিফলাদীনি পাপুণিংসূতি.

জোতিকত্থেৰৱত্থু চতুতিংসতিমং.