১৬. পিযৱগ্গো

১. তযোজনপব্বজিতৱত্থু

অযোগেতি ইমং ধম্মদেসনং সত্থা জেতৱনে ৱিহৰন্তো তযো পব্বজিতে আৰব্ভ কথেসি.

সাৱত্থিযং কিৰ একস্মিং কুলে মাতাপিতূনং একপুত্তকো অহোসি পিযো মনাপো. সো একদিৱসং গেহে নিমন্তিতানং ভিক্খূনং অনুমোদনং কৰোন্তানং ধম্মকথং সুত্ৱা পব্বজিতুকামো হুত্ৱা মাতাপিতৰো পব্বজ্জং যাচি. তে নানুজানিংসু. তস্স এতদহোসি – ‘‘অহং মাতাপিতূনং অপস্সন্তানংযেৱ বহি গন্ত্ৱা পব্বজিস্সামী’’তি. অথস্স পিতা বহি নিক্খমন্তো ‘‘ইমং ৰক্খেয্যাসী’’তি মাতৰং পটিচ্ছাপেসি, মাতা বহি নিক্খমন্তী পিতৰং পটিচ্ছাপেসি. অথস্স একদিৱসং পিতৰি বহি গতে মাতা ‘‘পুত্তং ৰক্খিস্সামী’’তি একং দ্ৱাৰবাহং নিস্সায একং পাদেহি উপ্পীড়েত্ৱা ছমায নিসিন্না সুত্তং কন্ততি. সো ‘‘ইমং ৱঞ্চেত্ৱা গমিস্সামী’’তি চিন্তেত্ৱা, ‘‘অম্ম, থোকং তাৱ অপেহি, সৰীৰৱলঞ্জং কৰিস্সামী’’তি ৱত্ৱা তায পাদে সমিঞ্জিতে নিক্খমিত্ৱা ৱেগেন ৱিহাৰং গন্ত্ৱা ভিক্খূ উপসঙ্কমিত্ৱা ‘‘পব্বাজেথ মং, ভন্তে’’তি যাচিত্ৱা তেসং সন্তিকে পব্বজি.

অথস্স পিতা আগন্ত্ৱা মাতৰং পুচ্ছি – ‘‘কহং মে পুত্তো’’তি? ‘‘সামি, ইমস্মিং পদেসে অহোসী’’তি. সো ‘‘কহং নু খো মে পুত্তো’’তি ওলোকেন্তো তং অদিস্ৱা ‘‘ৱিহাৰং গতো ভৱিস্সতী’’তি ৱিহাৰং গন্ত্ৱা পুত্তং পব্বজিতং দিস্ৱা কন্দিত্ৱা ৰোদিত্ৱা, ‘‘তাত, কিং মং নাসেসী’’তি ৱত্ৱা ‘‘মম পুত্তে পব্বজিতে অহং ইদানি গেহে কিং কৰিস্সামী’’তি সযম্পি ভিক্খূ যাচিত্ৱা পব্বজি. অথস্স মাতাপি ‘‘কিং নু খো মে পুত্তো চ পতি চ চিৰাযন্তি, কচ্চি ৱিহাৰং গন্ত্ৱা পব্বজিতা’’তি তে ওলোকেন্তী ৱিহাৰং গন্ত্ৱা উভোপি পব্বজিতে দিস্ৱা ‘‘ইমেসং পব্বজিতকালে মম গেহেন কো অত্থো’’তি সযম্পি ভিক্খুনিউপস্সযং গন্ত্ৱা পব্বজি. তে পব্বজিত্ৱাপি ৱিনা ভৱিতুং ন সক্কোন্তি, ৱিহাৰেপি ভিক্খুনিউপস্সযেপি একতোৱ নিসীদিত্ৱা সল্লপন্তা দিৱসং ৱীতিনামেন্তি. তেন ভিক্খূপি ভিক্খূনিযোপি উব্বাড়্হা হোন্তি.

অথেকদিৱসং ভিক্খূ নেসং কিৰিযং সত্থুং আৰোচেসুং. সত্থা তে পক্কোসাপেত্ৱা ‘‘সচ্চং কিৰ তুম্হে এৱং কৰোথা’’তি পুচ্ছিত্ৱা ‘‘সচ্চ’’ন্তি ৱুত্তে ‘‘কস্মা এৱং কৰোথ? ন হি এস পব্বজিতানং যোগো’’তি. ‘‘ভন্তে, ৱিনা ভৱিতুং ন সক্কোমা’’তি. ‘‘পব্বজিতকালতো পট্ঠায এৱং কৰণং অযুত্তং. পিযানঞ্হি অদস্সনং, অপ্পিযানঞ্চ দস্সনং দুক্খমেৱ. তস্মা সত্তেসু চ সঙ্খাৰেসু চ কঞ্চি পিযং ৱা অপ্পিযং ৱা কাতুং ন ৱট্টতী’’তি ৱত্ৱা ইমা গাথা অভাসি –

২০৯. ‘‘অযোগে যুঞ্জমত্তানং, যোগস্মিঞ্চ অযোজযং;

অত্থং হিত্ৱা পিযগ্গাহী, পিহেতত্তানুযোগিনং.

২১০. ‘‘মা পিযেহি সমাগঞ্ছি, অপ্পিযেহি কুদাচনং;

পিযানং অদস্সনং দুক্খং, অপ্পিযানঞ্চ দস্সনং.

২১১. ‘‘তস্মা পিযং ন কযিৰাথ, পিযাপাযো হি পাপকো;

গন্থা তেসং ন ৱিজ্জন্তি, যেসং নত্থি পিযাপ্পিয’’ন্তি.

তত্থ অযোগেতি অযুঞ্জিতব্বে অযোনিসোমনসিকাৰে. ৱেসিযাগোচৰাদিভেদস্স হি ছব্বিধস্স অগোচৰস্স সেৱনং ইধ অযোনিসোমনসিকাৰো নাম, তস্মিং অযোনিসোমনসিকাৰে অত্তানং যুঞ্জন্তোতি অত্থো. যোগস্মিন্তি তব্বিপৰীতে চ যোনিসোমনসিকাৰে অযুঞ্জন্তোতি অত্থো. অত্থং হিত্ৱাতি পব্বজিতকালতো পট্ঠায অধিসীলাদিসিক্খত্তযং অত্থো নাম, তং অত্থং হিত্ৱা. পিযগ্গাহীতি পঞ্চকামগুণসঙ্খাতং পিযমেৱ গণ্হন্তো. পিহেতত্তানুযোগিনন্তি তায পটিপত্তিযা সাসনতো চুতো গিহিভাৱং পত্ৱা পচ্ছা যে অত্তানুযোগং অনুযুত্তা সীলাদীনি সম্পাদেত্ৱা দেৱমনুস্সানং সন্তিকা সক্কাৰং লভন্তি, তেসং পিহেতি, ‘‘অহো ৱতাহম্পি এৱৰূপো অস্স’’ন্তি ইচ্ছতীতি অত্থো.

মা পিযেহীতি পিযেহি সত্তেহি ৱা সঙ্খাৰেহি ৱা কুদাচনং একক্খণেপি ন সমাগচ্ছেয্য, তথা অপ্পিযেহি. কিং কাৰণা? পিযা নঞ্হি ৱিযোগৱসেন অদস্সনং অপ্পিযানঞ্চ উপসঙ্কমনৱসেন দস্সনং নাম দুক্খং. তস্মাতি যস্মা ইদং উভযম্পি দুক্খং, তস্মা কঞ্চি সত্তং ৱা সঙ্খাৰং ৱা পিযং নাম ন কৰেয্য. পিযাপাযো হীতি পিযেহি অপাযো ৱিযোগো. পাপকোতি লামকো. গন্থা তেসং ন ৱিজ্জন্তীতি যেসং পিযং নত্থি, তেসং অভিজ্ঝাকাযগন্থো পহীযতি. যেসং অপ্পিযং নত্থি, তেসং ব্যাপাদো কাযগন্থো. তেসু পন দ্ৱীসু পহীনেসু সেসগন্থা পহীনা হোন্তি. তস্মা পিযং ৱা অপ্পিযং ৱা ন কত্তব্বন্তি অত্থো.

দেসনাৱসানে বহূ সোতাপত্তিফলাদীনি পাপুণিংসূতি. তেন পন তযো জনা ‘‘মযং ৱিনা ভৱিতুং ন সক্কোমা’’তি ৱিব্ভমিত্ৱা গেহমেৱ অগমিংসূতি.

তযোজনপব্বজিতৱত্থু পঠমং.

২. অঞ্ঞতৰকুটুম্বিকৱত্থু

পিযতো জাযতীতি ইমং ধম্মদেসনং সত্থা জেতৱনে ৱিহৰন্তো অঞ্ঞতৰং কুটুম্বিকং আৰব্ভ কথেসি.

সো হি অত্তনো পুত্তে কালকতে পুত্তসোকাভিভূতো আড়াহনং গন্ত্ৱা ৰোদতি, পুত্তসোকং সন্ধাৰেতুং ন সক্কোতি. সত্থা পচ্চূসকালে লোকং ৱোলোকেন্তো তস্স সোতাপত্তিমগ্গস্সূপনিস্সযং দিস্ৱা পিণ্ডপাতপটিক্কন্তো একং পচ্ছাসমণং গহেত্ৱা তস্স গেহদ্ৱাৰং অগমাসি. সো সত্থু আগতভাৱং সুত্ৱা ‘‘মযা সদ্ধিং পটিসন্থাৰং কাতুকামো ভৱিস্সতী’’তি সত্থাৰং পৱেসেত্ৱা গেহমজ্ঝে আসনং পঞ্ঞাপেত্ৱা সত্থৰি নিসিন্নে আগন্ত্ৱা একমন্তং নিসীদি. অথ নং সত্থা ‘‘কিং নু খো, উপাসক, দুক্খিতোসী’’তি পুচ্ছিত্ৱা তেন পুত্তৱিযোগদুক্খে আৰোচিতে, ‘‘উপাসক, মা চিন্তযি, ইদং মৰণং নাম ন একস্মিংযেৱ ঠানে, ন চ একস্সেৱ হোতি, যাৱতা পন ভৱুপ্পত্তি নাম অত্থি, সব্বসত্তানং হোতিযেৱ. একসঙ্খাৰোপি নিচ্চো নাম নত্থি. তস্মা ‘মৰণধম্মং মতং, ভিজ্জনধম্মং ভিন্ন’ন্তি যোনিসো পচ্চৱেক্খিতব্বং, ন সোচিতব্বং. পোৰাণপণ্ডিতাপি হি পুত্তস্স মতকালে ‘মৰণধম্মং মতং, ভিজ্জনধম্মং ভিন্ন’ন্তি সোকং অকত্ৱা মৰণস্সতিমেৱ ভাৱযিংসূ’’তি ৱত্ৱা, ‘‘ভন্তে, কে এৱমকংসু, কদা চ অকংসু, আচিক্খথ মে’’তি যাচিতো তস্সত্থস্স পকাসনত্থং অতীতং আহৰিত্ৱা –

‘‘উৰগোৱ তচং জিণ্ণং, হিত্ৱা গচ্ছতি সং তনুং;

এৱং সৰীৰে নিব্ভোগে, পেতে কালকতে সতি.

‘‘ডয্হমানো ন জানাতি, ঞাতীনং পৰিদেৱিতং;

তস্মা এতং ন সোচামি, গতো সো তস্স যা গতী’’তি. (জা. ১.৫.১৯-২০) –

ইমং পঞ্চকনিপাতে উৰগজাতকং ৱিত্থাৰেত্ৱা ‘‘এৱং পুব্বে পণ্ডিতা পিযপুত্তে কালকতে যথা এতৰহি ত্ৱং কম্মন্তে ৱিস্সজ্জেত্ৱা নিৰাহাৰো ৰোদন্তো ৱিচৰসি, তথা অৱিচৰিত্ৱা মৰণস্সতিভাৱনাবলেন সোকং অকত্ৱা আহাৰং পৰিভুঞ্জিংসু, কম্মন্তঞ্চ অধিট্ঠহিংসু. তস্মা ‘পিযপুত্তো মে কালকতো’তি মা চিন্তযি. উপ্পজ্জমানো হি সোকো ৱা ভযং ৱা পিযমেৱ নিস্সায উপ্পজ্জতী’’তি ৱত্ৱা ইমং গাথমাহ –

২১২. ‘‘পিযতো জাযতী সোকো, পিযতো জাযতী ভযং;

পিযতো ৱিপ্পমুত্তস্স, নত্থি সোকো কুতো ভয’’ন্তি.

তত্থ পিযতোতি ৱট্টমূলকো হি সোকো ৱা ভযং ৱা উপ্পজ্জমানং পিযমেৱ সত্তং ৱা সঙ্খাৰং ৱা নিস্সায উপ্পজ্জতি, ততো পন ৱিপ্পমুত্তস্স উভযম্পেতং নত্থীতি অত্থো.

দেসনাৱসানে কুটুম্বিকো সোতাপত্তিফলে পতিট্ঠহি, সম্পত্তানম্পি সাত্থিকা ধম্মদেসনা অহোসীতি.

অঞ্ঞতৰকুটুম্বিকৱত্থু দুতিযং.

৩. ৱিসাখাৱত্থু

পেমতো জাযতীতি ইমং ধম্মদেসনং সত্থা জেতৱনে ৱিহৰন্তো ৱিসাখং উপাসিকং আৰব্ভ কথেসি.

সা কিৰ পুত্তস্স ধীতৰং সুদত্তং নাম কুমাৰিকং অত্তনো ঠানে ঠপেত্ৱা গেহে ভিক্খুসঙ্ঘস্স ৱেয্যাৱচ্চং কাৰেসি. সা অপৰেন সমযেন কালমকাসি. সা তস্সা সৰীৰনিক্খেপং কাৰেত্ৱা সোকং সন্ধাৰেতুং অসক্কোন্তী দুক্খিনী দুম্মনা সত্থু সন্তিকং গন্ত্ৱা ৱন্দিত্ৱা একমন্তং নিসীদি. অথ নং সত্থা ‘‘কিং নু খো ত্ৱং, ৱিসাখে, দুক্খিনী দুম্মনা অস্সুমুখা ৰোদমানা নিসিন্না’’তি আহ. সা তমত্থং আৰোচেত্ৱা ‘‘পিযা মে, ভন্তে, সা কুমাৰিকা ৱত্তসম্পন্না, ইদানি তথাৰূপং ন পস্সামী’’তি আহ. ‘‘কিত্তকা পন, ৱিসাখে, সাৱত্থিযং মনুস্সা’’তি? ‘‘ভন্তে, তুম্হেহিযেৱ মে কথিতং সত্ত জনকোটিযো’’তি. ‘‘সচে পনাযং এত্তকো জনো তৱ নত্তায সদিসো ভৱেয্য, ইচ্ছেয্যাসি ন’’ন্তি? ‘‘আম, ভন্তে’’তি. ‘‘কতি পন জনা সাৱত্থিযং দেৱসিকং কালং কৰোন্তী’’তি? ‘‘বহূ, ভন্তে’’তি. ‘‘ননু এৱং, ভন্তে, তৱ অসোচনকালো ন ভৱেয্য, ৰত্তিন্দিৱং ৰোদন্তীযেৱ ৱিচৰেয্যাসী’’তি. ‘‘হোতু, ভন্তে, ঞাতং মযা’’তি. অথ নং সত্থা ‘‘তেন হি মা সোচি, সোকো ৱা ভযং ৱা পেমতোৱ জাযতী’’তি ৱত্ৱা ইমং গাথমাহ –

২১৩. ‘‘পেমতো জাযতী সোকো, পেমতো জাযতী ভযং;

পেমতো ৱিপ্পমুত্তস্স, নত্থি সোকো কুতো ভয’’ন্তি.

তত্থ পেমতোতি পুত্তধীতাদীসু কতং পেমমেৱ নিস্সায সোকো জাযতীতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

ৱিসাখাৱত্থু ততিযং.

৪. লিচ্ছৱীৱত্থু

ৰতিযা জাযতীতি ইমং ধম্মদেসনং সত্থা ৱেসালিং নিস্সায কূটাগাৰসালাযং ৱিহৰন্তো লিচ্ছৱী আৰব্ভ কথেসি.

তে কিৰ একস্মিং ছণদিৱসে অঞ্ঞমঞ্ঞং অসদিসেহি অলঙ্কাৰেহি অলঙ্কৰিত্ৱা উয্যানগমনত্থায নগৰা নিক্খমিংসু. সত্থা পিণ্ডায পৱিসন্তো তে দিস্ৱা ভিক্খূ আমন্তেসি – ‘‘পস্সথ, ভিক্খৱে, লিচ্ছৱযো, যেহি দেৱা তাৱতিংসা ন দিট্ঠপুব্বা, তে ইমে ওলোকেন্তূ’’তি ৱত্ৱা নগৰং পাৱিসি. তেপি উয্যানং গচ্ছন্তা একং নগৰসোভিনিং ইত্থিং আদায গন্ত্ৱা তং নিস্সায ইস্সাভিভূতা অঞ্ঞমঞ্ঞং পহৰিত্ৱা লোহিতং নদিং ৱিয পৱত্তযিংসু. অথ নে মঞ্চেনাদায উক্খিপিত্ৱা আগমংসু. সত্থাপি কতভত্তকিচ্চো নগৰা নিক্খমি. ভিক্খূপি লিচ্ছৱযো তথা নীযমানে দিস্ৱা সত্থাৰং আহংসু – ‘‘ভন্তে, লিচ্ছৱিৰাজানো পাতোৱ অলঙ্কতপটিযত্তা দেৱা ৱিয নগৰা নিক্খমিত্ৱা ইদানি একং ইত্থিং নিস্সায ইমং ব্যসনং পত্তা’’তি. সত্থা, ‘‘ভিক্খৱে, সোকো ৱা ভযং ৱা উপ্পজ্জমানং ৰতিং নিস্সায উপ্পজ্জতিযেৱা’’তি ৱত্ৱা ইমং গাথমাহ –

২১৪. ‘‘ৰতিযা জাযতী সোকো, ৰতিযা জাযতী ভযং;

ৰতিযা ৱিপ্পমুত্তস্স, নত্থি সোকো কুতো ভয’’ন্তি.

তত্থ ৰতিযাতি পঞ্চকামগুণৰতিতো, তং নিস্সাযাতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

লিচ্ছৱীৱত্থু চতুত্থং.

৫. অনিত্থিগন্ধকুমাৰৱত্থু

কামতোতি ইমং ধম্মদেসনং সত্থা জেতৱনে ৱিহৰন্তো অনিত্থিগন্ধকুমাৰং নাম আৰব্ভ কথেসি.

সো কিৰ ব্ৰহ্মলোকা চুতসত্তো সাৱত্থিযং মহাভোগকুলে নিব্বত্তো জাতদিৱসতো পট্ঠায ইত্থিসমীপং উপগন্তুং ন ইচ্ছতি, ইত্থিযা গয্হমানো ৰোদতি. ৱত্থচুম্বটকেন নং গহেত্ৱা থঞ্ঞং পাযেন্তি. সো ৱযপ্পত্তো মাতাপিতূহি, ‘‘তাত, আৱাহং তে কৰিস্সামা’’তি ৱুত্তে ‘‘ন মে ইত্থিযা অত্থো’’তি পটিক্খিপিত্ৱা পুনপ্পুনং যাচিযমানো পঞ্চসতে সুৱণ্ণকাৰে পক্কোসাপেত্ৱা ৰত্তসুৱণ্ণনিক্খসহস্সং দাপেত্ৱা অতিৱিয পাসাদিকং ঘনকোট্টিমং ইত্থিৰূপং কাৰেত্ৱা পুন মাতাপিতূহি, ‘‘তাত, তযি আৱাহং অকৰোন্তে কুলৱংসো ন পতিট্ঠহিস্সতি, কুমাৰিকং তে আনেস্সামা’’তি ৱুত্তে ‘‘তেন হি সচে মে এৱৰূপং কুমাৰিকং আনেস্সথ, কৰিস্সামি ৱো ৱচন’’ন্তি তং সুৱণ্ণৰূপকং দস্সেতি. অথস্স মাতাপিতৰো অভিঞ্ঞাতে ব্ৰাহ্মণে পক্কোসাপেত্ৱা ‘‘অম্হাকং পুত্তো মহাপুঞ্ঞো, অৱস্সং ইমিনা সদ্ধিং কতপুঞ্ঞা কুমাৰিকা ভৱিস্সতি, গচ্ছথ ইমং সুৱণ্ণৰূপকং গহেত্ৱা এৱৰূপং কুমাৰিকং আহৰথা’’তি পহিণিংসু. তে ‘‘সাধূ’’তি চাৰিকং চৰন্তা মদ্দৰট্ঠে সাগলনগৰং গতা. তস্মিঞ্চ নগৰে একা সোড়সৱস্সুদ্দেসিকা অভিৰূপা কুমাৰিকা অহোসি, তং মাতাপিতৰো সত্তভূমিকস্স পাসাদস্সূপৰিমতলে পৰিৱাসেসুং. তেপি খো ব্ৰাহ্মণা ‘‘সচে ইধ এৱৰূপা কুমাৰিকা ভৱিস্সতি, ইমং দিস্ৱা ‘অযং অসুকস্স কুলস্স ধীতা ৱিয অভিৰূপা’তি ৱক্খন্তী’’তি তং সুৱণ্ণৰূপকং তিত্থমগ্গে ঠপেত্ৱা একমন্তং নিসীদিংসু.

অথস্স কুমাৰিকায ধাতী তং কুমাৰিকং ন্হাপেত্ৱা সযম্পি ন্হাযিতুকামা হুত্ৱা তিত্থং আগতা তং ৰূপকং দিস্ৱা ‘‘ধীতা মে’’তি সঞ্ঞায ‘‘দুব্বিনীতাসি, ইদানেৱাহং ন্হাপেত্ৱা নিক্খন্তা, ত্ৱং মযা পুৰেতৰং ইধাগতাসী’’তি হত্থেন পহৰিত্ৱা থদ্ধভাৱঞ্চেৱ নিব্বিকাৰতঞ্চ ঞত্ৱা ‘‘অহং মে, ধীতাতি সঞ্ঞমকাসিং, কিং নামেত’’ন্তি আহ. অথ নং তে ব্ৰাহ্মণা ‘‘এৱৰূপা তে, অম্ম, ধীতা’’তি পুচ্ছিংসু. অযং মম ধীতু সন্তিকে কিং অগ্ঘতীতি? তেন হি তে ধীতৰং অম্হাকং দস্সেহীতি. সা তেহি সদ্ধিং গেহং গন্ত্ৱা সামিকানং আৰোচেসি. তে ব্ৰাহ্মণেহি সদ্ধিং কতপটিসম্মোদনা ধীতৰং ওতাৰেত্ৱা হেট্ঠাপাসাদে সুৱণ্ণৰূপকস্স সন্তিকে ঠপেসুং. সুৱণ্ণৰূপকং নিপ্পভং অহোসি, কুমাৰিকা সপ্পভা অহোসি. ব্ৰাহ্মণা তং তেসং দত্ৱা কুমাৰিকং পটিচ্ছাপেত্ৱা গন্ত্ৱা অনিত্থিগন্ধকুমাৰস্স মাতাপিতূনং আৰোচযিংসু. তে তুট্ঠমানসা ‘‘গচ্ছথ, নং সীঘং আনেথা’’তি মহন্তেন সক্কাৰেন পহিণিংসু.

কুমাৰোপি তং পৱত্তিং সুত্ৱা ‘‘কঞ্চনৰূপতোপি কিৰ অভিৰূপতৰা দাৰিকা অত্থী’’তি সৱনৱসেনেৱ সিনেহং উপ্পাদেত্ৱা ‘‘সীঘং আনেন্তূ’’তি আহ. সাপি খো যানং আৰোপেত্ৱা আনীযমানা অতিসুখুমালতায যানুগ্ঘাতেন সমুপ্পাদিতৱাতৰোগা অন্তৰামগ্গেযেৱ কালমকাসি. কুমাৰোপি ‘‘আগতা’’তি নিৰন্তৰং পুচ্ছতি, তস্স অতিসিনেহেন পুচ্ছন্তস্স সহসাৱ অনাৰোচেত্ৱা কতিপাহং ৱিক্খেপং কত্ৱা তমত্থং আৰোচযিংসু. সো ‘‘তথাৰূপায নাম ইত্থিযা সদ্ধিং সমাগমং নালত্থ’’ন্তি উপ্পন্নদোমনস্সো পব্বতেন ৱিয সোকদুক্খেন অজ্ঝোত্থটো অহোসি. সত্থা তস্সূপনিস্সযং দিস্ৱা পিণ্ডায চৰন্তো তং গেহদ্ৱাৰং অগমাসি. অথস্স মাতাপিতৰো সত্থাৰং অন্তোগেহং পৱেসেত্ৱা সক্কচ্চং পৰিৱিসিংসু. সত্থা ভত্তকিচ্চাৱসানে ‘‘কহং অনিত্থিগন্ধকুমাৰো’’তি পুচ্ছি. ‘‘এসো, ভন্তে, আহাৰূপচ্ছেদং কত্ৱা অন্তোগব্ভে নিসিন্নো’’তি. ‘‘পক্কোসথ ন’’ন্তি. সো আগন্ত্ৱা সত্থাৰং ৱন্দিত্ৱা একমন্তং নিসীদি. সত্থা ‘‘কিং নু খো, কুমাৰ, বলৱসোকো উপ্পন্নো’’তি ৱুত্তে, ‘‘আম, ভন্তে, ‘এৱৰূপা নাম ইত্থী অন্তৰামগ্গে কালকতা’তি সুত্ৱা বলৱসোকো উপ্পন্নো, ভত্তম্পি মে নচ্ছাদেতী’’তি. অথ নং সত্থা ‘‘জানাসি পন ত্ৱং, কুমাৰ, কিং তে নিস্সায সোকো উপ্পন্নো’’তি? ‘‘ন জানামি, ভন্তে’’তি. ‘‘কামং নিস্সায, কুমাৰ, বলৱসোকো উপ্পন্নো, সোকো ৱা ভযং ৱা কামং নিস্সায উপ্পজ্জতী’’তি ৱত্ৱা ইমং গাথমাহ –

২১৫. ‘‘কামতো জাযতী সোকো, কামতো জাযতী ভযং;

কামতো ৱিপ্পমুত্তস্স, নত্থি সোকো কুতো ভয’’ন্তি.

তত্থ কামতোতি ৱত্থুকামকিলেসকামতো, দুৱিধম্পেতং কামং নিস্সাযাতি অত্থো.

দেসনাৱসানে অনিত্থিগন্ধকুমাৰো সোতাপত্তিফলে পতিট্ঠহি.

অনিত্থিগন্ধকুমাৰৱত্থু পঞ্চমং.

৬. অঞ্ঞতৰব্ৰাহ্মণৱত্থু

তণ্হায জাযতীতি ইমং ধম্মদেসনং সত্থা জেতৱনে ৱিহৰন্তো অঞ্ঞতৰং ব্ৰাহ্মণং আৰব্ভ কথেসি.

সো কিৰ মিচ্ছাদিট্ঠিকো একদিৱসং নদীতীৰং গন্ত্ৱা খেত্তং সোধেতি. সত্থা তস্স উপনিস্সযসম্পত্তিং দিস্ৱা তস্স সন্তিকং অগমাসি. সো সত্থাৰং দিস্ৱাপি সামীচিকম্মং অকত্ৱা তুণ্হী অহোসি. অথ নং সত্থা পুৰেতৰং আলপিত্ৱা, ‘‘ব্ৰাহ্মণ, কিং কৰোসী’’তি আহ. ‘‘খেত্তং, ভো গোতম, সোধেমী’’তি. সত্থা এত্তকমেৱ ৱত্ৱা গতো. পুনদিৱসেপি তস্স খেত্তং কসিতুং আগতস্স সন্তিকং গন্ত্ৱা, ‘‘ব্ৰাহ্মণ, কিং কৰোসী’’তি পুচ্ছিত্ৱা ‘‘খেত্তং কসামি, ভো গোতমা’’তি সুত্ৱা পক্কামি. পুনদিৱসাদীসুপি তথেৱ গন্ত্ৱা পুচ্ছিত্ৱা, ‘‘ভো গোতম, খেত্তং ৱপামি নিদ্দেমি ৰক্খামী’’তি সুত্ৱা পক্কামি. অথ নং একদিৱসং ব্ৰাহ্মণো আহ – ‘‘ভো গোতম, ত্ৱং মম খেত্তসোধনদিৱসতো পট্ঠায আগতো. সচে মে সস্সং সম্পজ্জিস্সতি, তুয্হম্পি সংৱিভাগং কৰিস্সামি, তুয্হং অদত্ৱা সযং ন খাদিস্সামি, ইতো দানি পট্ঠায ত্ৱং মম সহাযো’’তি.

অথস্স অপৰেন সমযেন সস্সং সম্পজ্জি, তস্স ‘‘সম্পন্নং মে সস্সং, স্ৱে দানি লাযাপেস্সামী’’তি লাযনত্থং কত্তব্বকিচ্চস্স ৰত্তিং মহামেঘো ৱস্সিত্ৱা সব্বং সস্সং হৰি, খেত্তং তচ্ছেত্ৱা ঠপিতসদিসং অহোসি. সত্থা পন পঠমদিৱসংযেৱ ‘‘তং সস্সং ন সম্পজ্জিস্সতী’’তি অঞ্ঞাসি. ব্ৰাহ্মণো পাতোৱ ‘‘খেত্তং ওলোকেস্সামী’’তি গতো তুচ্ছং খেত্তং দিস্ৱা উপ্পন্নবলৱসোকো চিন্তেসি – ‘‘সমণো গোতমো মম খেত্তসোধনকালতো পট্ঠায আগতো, অহম্পি নং ‘ইমস্মিং সস্সে নিপ্ফন্নে তুয্হম্পি সংৱিভাগং কৰিস্সামি, তুয্হং অদত্ৱা সযং ন খাদিস্সামি, ইতো পট্ঠায দানি ত্ৱং মম সহাযো’তি অৱচং. সোপি মে মনোৰথো মত্থকং ন পাপুণী’’তি আহাৰূপচ্ছেদং কত্ৱা মঞ্চকে নিপজ্জি. অথস্স সত্থা গেহদ্ৱাৰং অগমাসি. সো সত্থু আগমনং সুত্ৱা ‘‘সহাযং মে আনেত্ৱা ইধ নিসীদাপেথা’’তি আহ. পৰিজনো তথা অকাসি. সত্থা নিসীদিত্ৱা ‘‘কহং ব্ৰাহ্মণো’’তি পুচ্ছিত্ৱা ‘‘গব্ভে নিপন্নো’’তি ৱুত্তে ‘‘পক্কোসথ ন’’ন্তি পক্কোসাপেত্ৱা আগন্ত্ৱা একমন্তং নিসিন্নং আহ ‘‘কিং, ব্ৰাহ্মণা’’তি? ভো গোতম, তুম্হে মম খেত্তসোধনদিৱসতো পট্ঠায আগতা, অহম্পি ‘‘সস্সে নিপ্ফন্নে তুম্হাকং সংৱিভাগং কৰিস্সামী’’তি অৱচং. সো মে মনোৰথো অনিপ্ফন্নো, তেন মে সোকো উপ্পন্নো, ভত্তম্পি মে নচ্ছাদেতীতি. অথ নং সত্থা ‘‘জানাসি পন, ব্ৰাহ্মণ, কিং তে নিস্সায সোকো উপ্পন্নো’’তি পুচ্ছিত্ৱা ‘‘ন জানামি, ভো গোতম, ত্ৱং পন জানাসী’’তি ৱুত্তে, ‘‘আম, ব্ৰাহ্মণ, উপ্পজ্জমানো সোকো ৱা ভযং ৱা তণ্হং নিস্সায উপ্পজ্জতী’’তি ৱত্ৱা ইমং গাথমাহ –

২১৬. ‘‘তণ্হায জাযতী সোকো, তণ্হায জাযতী ভযং;

তণ্হায ৱিপ্পমুত্তস্স, নত্থি সোকো কুতো ভয’’ন্তি.

তত্থ তণ্হাযাতি ছদ্ৱাৰিকায তণ্হায, এতং তণ্হং নিস্সায উপ্পজ্জতীতি অত্থো.

দেসনাৱসানে ব্ৰাহ্মণো সোতাপত্তিফলে পতিট্ঠহীতি.

অঞ্ঞতৰব্ৰাহ্মণৱত্থু ছট্ঠং.

৭. পঞ্চসতদাৰকৱত্থু

সীলদস্সনসম্পন্নন্তি ইমং ধম্মদেসনং সত্থা ৱেড়ুৱনে ৱিহৰন্তো অন্তৰামগ্গে পঞ্চসতদাৰকে আৰব্ভ কথেসি.

একদিৱসঞ্হি সত্থা অসীতিমহাথেৰেহি সদ্ধিং পঞ্চসতভিক্খুপৰিৱাৰো ৰাজগহং পিণ্ডায পৱিসন্তো একস্মিং ছণদিৱসে পঞ্চসতে দাৰকে পূৱপচ্ছিযো উক্খিপাপেত্ৱা নগৰা নিক্খম্ম উয্যানং গচ্ছন্তে অদ্দস. তেপি সত্থাৰং ৱন্দিত্ৱা পক্কমিংসু, তে একং ভিক্খুম্পি ‘‘পূৱং গণ্হথা’’তি ন ৱদিংসু. সত্থা তেসং গতকালে ভিক্খূ আহ – ‘‘খাদিস্সথ, ভিক্খৱে, পূৱে’’তি. ‘‘কহং ভন্তে, পূৱা’’তি? ‘‘কিং ন পস্সথ তে দাৰকে পূৱপচ্ছিযো উক্খিপাপেত্ৱা অতিক্কন্তে’’তি? ‘‘ভন্তে, এৱৰূপা নাম দাৰকা কস্সচি পূৱং ন দেন্তী’’তি. ‘‘ভিক্খৱে, কিঞ্চাপি এতে মং ৱা তুম্হে ৱা পূৱেহি ন নিমন্তযিংসু, পূৱসামিকো পন ভিক্খু পচ্ছতো আগচ্ছতি, পূৱে খাদিত্ৱাৱ গন্তুং ৱট্টতী’’তি. বুদ্ধানঞ্হি একপুগ্গলেপি ইস্সা ৱা দোসো ৱা নত্থি, তস্মা ইমং ৱত্ৱা ভিক্খুসঙ্ঘং আদায একস্মিং ৰুক্খমূলে ছাযায নিসীদি. দাৰকা মহাকস্সপত্থেৰং পচ্ছতো আগচ্ছন্তং দিস্ৱা উপ্পন্নসিনেহা পীতিৱেগেন পৰিপুণ্ণসৰীৰা হুত্ৱা পচ্ছিযো ওতাৰেত্ৱা থেৰং পঞ্চপতিট্ঠিতেন ৱন্দিত্ৱা পূৱে পচ্ছীহি সদ্ধিংযেৱ উক্খিপিত্ৱা ‘‘গণ্হথ, ভন্তে’’তি থেৰং ৱদিংসু. অথ নে থেৰো আহ – ‘‘এস সত্থা ভিক্খুসঙ্ঘং গহেত্ৱা ৰুক্খমূলে নিসিন্নো, তুম্হাকং দেয্যধম্মং আদায গন্ত্ৱা ভিক্খুসঙ্ঘস্স সংৱিভাগং কৰোথা’’তি. তে ‘‘সাধু, ভন্তে’’তি নিৱত্তিত্ৱা থেৰেন সদ্ধিংযেৱ গন্ত্ৱা পূৱে দত্ৱা ওলোকযমানা একমন্তে ঠত্ৱা পৰিভোগাৱসানে উদকং অদংসু. ভিক্খূ উজ্ঝাযিংসু ‘‘দাৰকেহি মুখোলোকনেন ভিক্খা দিন্না, সম্মাসম্বুদ্ধং ৱা মহাথেৰে ৱা পূৱেহি অনাপুচ্ছিত্ৱা মহাকস্সপত্থেৰং দিস্ৱা পচ্ছীহি সদ্ধিংযেৱ আদায আগমিংসূ’’তি. সত্থা তেসং কথং সুত্ৱা, ‘‘ভিক্খৱে, মম পুত্তেন মহাকস্সপেন সদিসো ভিক্খু দেৱমনুস্সানং পিযো হোতি, তে চ তস্স চতুপচ্চযেন পূজং কৰোন্তিযেৱা’’তি ৱত্ৱা ইমং গাথমাহ –

২১৭. ‘‘সীলদস্সনসম্পন্নং, ধম্মট্ঠং সচ্চৱেদিনং;

অত্তনো কম্ম কুব্বানং, তং জনো কুৰুতে পিয’’ন্তি.

তত্থ সীলদস্সনসম্পন্নন্তি চতুপাৰিসুদ্ধিসীলেন চেৱ মগ্গফলসম্পযুত্তেন চ সম্মাদস্সনেন সম্পন্নং. ধম্মট্ঠন্তি নৱৱিধলোকুত্তৰধম্মে ঠিতং, সচ্ছিকতলোকুত্তৰধম্মন্তি অত্থো. সচ্চৱেদিনন্তি চতুন্নং সচ্চানং সোড়সহাকাৰেহি সচ্ছিকতত্তা সচ্চঞাণেন সচ্চৱেদিনং. অত্তনো কম্ম কুব্বানন্তি অত্তনো কম্মং নাম তিস্সো সিক্খা, তা পূৰযমানন্তি অত্থো. তং জনোতি তং পুগ্গলং লোকিযমহাজনো পিযং কৰোতি, দট্ঠুকামো ৱন্দিতুকামো পচ্চযেন পূজেতুকামো হোতিযেৱাতি অত্থো.

দেসনাৱসানে সব্বেপি তে দাৰকা সোতাপত্তিফলে পতিট্ঠহিংসূতি.

পঞ্চসতদাৰকৱত্থু সত্তমং.

৮. একঅনাগামিত্থেৰৱত্থু

ছন্দজাতোতি ইমং ধম্মদেসনং সত্থা জেতৱনে ৱিহৰন্তো একং অনাগামিত্থেৰং আৰব্ভ কথেসি.

একদিৱসঞ্হি তং থেৰং সদ্ধিৱিহাৰিকা পুচ্ছিংসু – ‘‘অত্থি পন ৱো, ভন্তে, ৱিসেসাধিগমো’’তি. থেৰো ‘‘অনাগামিফলং নাম গহট্ঠাপি পাপুণন্তি, অৰহত্তং পত্তকালেযেৱ তেহি সদ্ধিং কথেস্সামী’’তি হৰাযমানো কিঞ্চি অকথেত্ৱাৱ কালকতো সুদ্ধাৱাসদেৱলোকে নিব্বত্তি. অথস্স সদ্ধিৱিহাৰিকা ৰোদিত্ৱা পৰিদেৱিত্ৱা সত্থু সন্তিকং গন্ত্ৱা সত্থাৰং ৱন্দিত্ৱা ৰোদন্তাৱ একমন্তং নিসীদিংসু. অথ নে সত্থা ‘‘কিং, ভিক্খৱে, ৰোদথা’’তি আহ. ‘‘উপজ্ঝাযো নো, ভন্তে, কালকতো’’তি. ‘‘হোতু, ভিক্খৱে, মা চিন্তযিত্থ, ধুৱধম্মো নামেসো’’তি? ‘‘আম, ভন্তে, মযম্পি জানাম, অপিচ মযং উপজ্ঝাযং ৱিসেসাধিগমং পুচ্ছিম্হা, সো কিঞ্চি অকথেত্ৱাৱ কালকতো, তেনম্হ দুক্খিতা’’তি. সত্থা, ‘‘ভিক্খৱে, মা চিন্তযিত্থ, উপজ্ঝাযেন ৱো অনাগামিফলং পত্তং, সো ‘গিহীপেতং পাপুণন্তি, অৰহত্তং পত্ৱাৱ নেসং কথেস্সামী’তি হৰাযন্তো তুম্হাকং কিঞ্চি অকথেত্ৱা কালং কত্ৱা সুদ্ধাৱাসে নিব্বত্তো, অস্সাসথ, ভিক্খৱে, উপজ্ঝাযো ৱো কামেসু অপ্পটিবদ্ধচিত্ততং পত্তো’’তি ৱত্ৱা ইমং গাথমাহ –

২১৮. ‘‘ছন্দজাতো অনক্খাতে, মনসা চ ফুটো সিযা;

কামেসু চ অপ্পটিবদ্ধচিত্তো, উদ্ধংসোতোতি ৱুচ্চতী’’তি.

তত্থ ছন্দজাতোতি কত্তুকামতাৱসেন জাতছন্দো উস্সাহপত্তো. অনক্খাতেতি নিব্বানে. তঞ্হি ‘‘অসুকেন কতং ৱা নীলাদীসু এৱৰূপং ৱা’’তি অৱত্তব্বতায অনক্খাতং নাম. মনসা চ ফুটো সিযাতি হেট্ঠিমেহি তীহি মগ্গফলচিত্তেহি ফুটো পূৰিতো ভৱেয্য. অপ্পটিবদ্ধচিত্তোতি অনাগামিমগ্গৱসেন কামেসু অপ্পটিবদ্ধচিত্তো. উদ্ধংসোতোতি এৱৰূপো ভিক্খু অৱিহেসু নিব্বত্তিত্ৱা ততো পট্ঠায পটিসন্ধিৱসেন অকনিট্ঠং গচ্ছন্তো উদ্ধংসোতোতি ৱুচ্চতি, তাদিসো ৱো উপজ্ঝাযোতি অত্থো.

দেসনাৱসানে তে ভিক্খূ অৰহত্তফলে পতিট্ঠহিংসু, মহাজনস্সাপি সাত্থিকা ধম্মদেসনা অহোসীতি.

একঅনাগামিত্থেৰৱত্থু অট্ঠমং.

৯. নন্দিযৱত্থু

চিৰপ্পৱাসিন্তি ইমং ধম্মদেসনং সত্থা ইসিপতনে ৱিহৰন্তো নন্দিযং আৰব্ভ কথেসি.

বাৰাণসিযং কিৰ সদ্ধাসম্পন্নস্স কুলস্স নন্দিযো নাম পুত্তো অহোসি, সো মাতাপিতূনং অনুৰূপো সদ্ধাসম্পন্নো সঙ্ঘুপট্ঠাকো অহোসি. অথস্স মাতাপিতৰো ৱযপ্পত্তকালে সম্মুখগেহতো মাতুলধীতৰং ৰেৱতিং নাম আনেতুকামা অহেসুং. সা পন অস্সদ্ধা অদানসীলা, নন্দিযো তং ন ইচ্ছি. অথস্স মাতা ৰেৱতিং আহ – ‘‘অম্ম, ত্ৱং ইমস্মিং গেহে ভিক্খুসঙ্ঘস্স নিসজ্জনট্ঠানং উপলিম্পিত্ৱা আসনানি পঞ্ঞাপেহি, আধাৰকে ঠপেহি, ভিক্খূনং আগতকালে পত্তং গহেত্ৱা নিসীদাপেত্ৱা ধম্মকৰণেন পানীযং পৰিস্সাৱেত্ৱা ভুত্তকালে পত্তে ধোৱ, এৱং মে পুত্তস্স আৰাধিতা ভৱিস্সসী’’তি. সা তথা অকাসি. অথ নং ‘‘ওৱাদক্খমা জাতা’’তি পুত্তস্স আৰোচেত্ৱা তেন সাধূতি সম্পটিচ্ছিতে দিৱসং ঠপেত্ৱা আৱাহং কৰিংসু.

অথ নং নন্দিযো আহ – ‘‘সচে ভিক্খুসঙ্ঘঞ্চ মাতাপিতৰো চ মে উপট্ঠহিস্সসি, এৱং ইমস্মিং গেহে ৱসিতুং লভিস্সসি, অপ্পমত্তা হোহী’’তি. সা ‘‘সাধূ’’তি পটিস্সুণিত্ৱা কতিপাহং সদ্ধা ৱিয হুত্ৱা ভত্তাৰং উপট্ঠহন্তী দ্ৱে পুত্তে ৱিজাযি. নন্দিযস্সাপি মাতাপিতৰো কালমকংসু, গেহে সব্বিস্সৰিযং তস্সাযেৱ অহোসি. নন্দিযোপি মাতাপিতূনং কালকিৰিযতো পট্ঠায মহাদানপতি হুত্ৱা ভিক্খুসঙ্ঘস্স দানং পট্ঠপেসি. কপণদ্ধিকাদীনম্পি গেহদ্ৱাৰে পাকৱত্তং পট্ঠপেসি. সো অপৰভাগে সত্থু ধম্মদেসনং সুত্ৱা আৱাসদানে আনিসংসং সল্লক্খেত্ৱা ইসিপতনে মহাৱিহাৰে চতূহি গব্ভেহি পটিমণ্ডিতং চতুসালং কাৰেত্ৱা মঞ্চপীঠাদীনি অত্থৰাপেত্ৱা তং আৱাসং নিয্যাদেন্তো বুদ্ধপ্পমুখস্স ভিক্খুসঙ্ঘস্স দানং দত্ৱা তথাগতস্স দক্খিণোদকং অদাসি. সত্থু হত্থে দক্খিণোদকপতিট্ঠানেন সদ্ধিংযেৱ তাৱতিংসদেৱলোকে সব্বদিসাসু দ্ৱাদসযোজনিকো উদ্ধং যোজনসতুব্বেধো সত্তৰতনমযো নাৰীগণসম্পন্নো দিব্বপাসাদো উগ্গচ্ছি.

অথেকদিৱসে মহামোগ্গল্লানত্থেৰো দেৱচাৰিকং গন্ত্ৱা তস্স পাসাদস্স অৱিদূৰে ঠিতো অত্তনো সন্তিকে আগতে দেৱপুত্তে পুচ্ছি – ‘‘কস্সেসো অচ্ছৰাগণপৰিৱুতো দিব্বপাসাদো নিব্বত্তো’’তি. অথস্স দেৱপুত্তা ৱিমানসামিকং আচিক্খন্তা আহংসু – ‘‘ভন্তে, যেন নন্দিযেন নাম গহপতিপুত্তেন ইসিপতনে সত্থু ৱিহাৰং কাৰেত্ৱা দিন্নো, তস্সত্থায এতং ৱিমানং নিব্বত্ত’’ন্তি. অচ্ছৰাসঙ্ঘোপি নং দিস্ৱা পাসাদতো ওৰোহিত্ৱা আহ – ‘‘ভন্তে, মযং ‘নন্দিযস্স পৰিচাৰিকা ভৱিস্সামা’তি ইধ নিব্বত্তা, তং পন অপস্সন্তী অতিৱিয উক্কণ্ঠিতম্হা, মত্তিকপাতিং ভিন্দিত্ৱা সুৱণ্ণপাতিগহণং ৱিয মনুস্সসম্পত্তিং জহিত্ৱা দিব্বসম্পত্তিগহণং, ইধাগমনত্থায নং ৱদেয্যাথা’’তি. থেৰো ততো আগন্ত্ৱা সত্থাৰং উপসঙ্কমিত্ৱা পুচ্ছি – ‘‘নিব্বত্ততি নু খো, ভন্তে, মনুস্সলোকে ঠিতানংযেৱ কতকল্যাণানং দিব্বসম্পত্তী’’তি. ‘‘মোগ্গল্লান, ননু তে দেৱলোকে নন্দিযস্স নিব্বত্তা দিব্বসম্পত্তি সামং দিট্ঠা, কস্মা মং পুচ্ছসী’’তি. ‘‘এৱং, ভন্তে, নিব্বত্ততী’’তি.

অথ নং সত্থা ‘‘মোগ্গল্লানং কিং নামেতং কথেসি. যথা হি চিৰপ্পৱুট্ঠং পুত্তং ৱা ভাতৰং ৱা ৱিপ্পৱাসতো আগচ্ছন্তং গামদ্ৱাৰে ঠিতো কোচিদেৱ দিস্ৱা ৱেগেন গেহং আগন্ত্ৱা ‘অসুকো নাম আগতো’তি আৰোচেয্য, অথস্স ঞাতকা হট্ঠপহট্ঠা ৱেগেন নিক্খমিত্ৱা ‘আগতোসি, তাত, অৰোগোসি, তাতা’তি তং অভিনন্দেয্যুং, এৱমেৱ ইধ কতকল্যাণং ইত্থিং ৱা পুৰিসং ৱা ইমং লোকং জহিত্ৱা পৰলোকং গতং দসৱিধং দিব্বপণ্ণাকাৰং আদায ‘অহং পুৰতো, অহং পুৰতো’তি পচ্চুগ্গন্ত্ৱা দেৱতা অভিনন্দন্তী’’তি ৱত্ৱা ইমা গাথা অভাসি –

২১৯. ‘‘চিৰপ্পৱাসিং পুৰিসং, দূৰতো সোত্থিমাগতং;

ঞাতিমিত্তা সুহজ্জা চ, অভিনন্দন্তি আগতং.

২২০. ‘‘তথেৱ কতপুঞ্ঞম্পি, অস্মা লোকা পৰং গতং;

পুঞ্ঞানি পটিগণ্হন্তি, পিযং ঞাতীৱ আগত’’ন্তি.

তত্থ চিৰপ্পৱাসিন্তি চিৰপ্পৱুট্ঠং. দূৰতো সোত্থিমাগতন্তি ৱণিজ্জং ৱা ৰাজপোৰিসং ৱা কত্ৱা লদ্ধলাভং নিপ্ফন্নসম্পত্তিং অনুপদ্দৱেন দূৰট্ঠানতো আগতং. ঞাতিমিত্তা সুহজ্জা চাতি কুলসম্বন্ধৱসেন ঞাতী চ সন্দিট্ঠাদিভাৱেন মিত্তা চ সুহদযভাৱেন সুহজ্জা চ. অভিনন্দন্তি আগতন্তি নং দিস্ৱা আগতন্তি ৱচনমত্তেন ৱা অঞ্জলিকৰণমত্তেন ৱা গেহসম্পত্তং পন নানপ্পকাৰপণ্ণাকাৰাভিহৰণৱসেন অভিনন্দন্তি. তথেৱাতি তেনেৱাকাৰেন কতপুঞ্ঞম্পি পুগ্গলং ইমস্মা লোকা পৰলোকং গতং দিব্বং আযুৱণ্ণসুখযসআধিপতেয্যং, দিব্বং ৰূপসদ্দগন্ধৰসফোট্ঠব্বন্তি ইমং দসৱিধং পণ্ণাকাৰং আদায মাতাপিতুট্ঠানে ঠিতানি পুঞ্ঞানি অভিনন্দন্তানি পটিগ্গণ্হন্তি. পিযং ঞাতীৱাতি ইধলোকে পিযঞাতকং আগতং সেসঞাতকা ৱিযাতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

নন্দিযৱত্থু নৱমং.

পিযৱগ্গৱণ্ণনা নিট্ঠিতা.

সোড়সমো ৱগ্গো.