১৪. চিত্তগহপতিৱত্থু

অসন্তং ভাৱনমিচ্ছেয্যাতি ইমং ধম্মদেসনং সত্থা জেতৱনে ৱিহৰন্তো সুধম্মত্থেৰং আৰব্ভ কথেসি. দেসনা মচ্ছিকাসণ্ডে সমুট্ঠায সাৱত্থিযং নিট্ঠিতা.

মচ্ছিকাসণ্ডনগৰস্মিঞ্হি চিত্তো নাম গহপতি পঞ্চৱগ্গিযানং অব্ভন্তৰং মহানামত্থেৰং নাম পিণ্ডায চৰমানং দিস্ৱা তস্স ইৰিযাপথে পসীদিত্ৱা পত্তং আদায গেহং পৱেসেত্ৱা ভোজেত্ৱা ভত্তকিচ্চাৱসানে ধম্মকথং সুণন্তো সোতাপত্তিফলং পত্ৱা অচলসদ্ধো হুত্ৱা অম্বাটকৱনং নাম অত্তনো উয্যানং সঙ্ঘাৰামং কত্তুকামো থেৰস্স হত্থে উদকং পাতেত্ৱা নিয্যাদেসি. তস্মিং খণে ‘‘পতিট্ঠিতং বুদ্ধসাসন’’ন্তি উদকপৰিযন্তং কত্ৱা মহাপথৱী কম্পি. মহাসেট্ঠি উয্যানে মহাৱিহাৰং কাৰেত্ৱা সব্বদিসাহি আগতানং ভিক্খূনং ৱিৱটদ্ৱাৰো অহোসি. মচ্ছিকাসণ্ডে সুধম্মত্থেৰো নাম নেৱাসিকো অহোসি.

অপৰেন সমযেন চিত্তস্স গুণকথং সুত্ৱা দ্ৱে অগ্গসাৱকা তস্স সঙ্গহং কত্তুকামা মচ্ছিকাসণ্ডং অগমংসু. চিত্তো গহপতি তেসং আগমনং সুত্ৱা অড্ঢযোজনমগ্গং পচ্চুগ্গন্ত্ৱা তে আদায অত্তনো ৱিহাৰং পৱেসেত্ৱা আগন্তুকৱত্তং কত্ৱা, ‘‘ভন্তে, থোকং ধম্মকথং সোতুকামোম্হী’’তি ধম্মসেনাপতিং যাচি. অথ নং থেৰো, ‘‘উপাসক, অদ্ধানেন আগতাম্হা কিলন্তৰূপা. অপিচ থোকং সুণাহী’’তি তস্স ধম্মং কথেসি. সো থেৰস্স ধম্মং সুণন্তোৱ অনাগামিফলং পাপুণি. সো দ্ৱে অগ্গসাৱকে ৱন্দিত্ৱা, ‘‘ভন্তে, স্ৱে ভিক্খুসহস্সেন সদ্ধিং মম গেহে ভিক্খং গণ্হথা’’তি নিমন্তেত্ৱা পচ্ছা নেৱাসিকং সুধম্মত্থেৰং ‘‘তুম্হেপি, ভন্তে, স্ৱে থেৰেহি সদ্ধিং আগচ্ছেয্যাথা’’তি নিমন্তেসি. সো ‘‘অযং মং পচ্ছা নিমন্তেতী’’তি কুদ্ধো পটিক্খিপিত্ৱা পুনপ্পুনং যাচিযমানোপি পটিক্খিপি এৱ. উপাসকো ‘‘পঞ্ঞাযিস্সথ, ভন্তে’’তি পক্কমিত্ৱা পুনদিৱসে অত্তনো নিৱেসনে মহাদানং সজ্জেসি. সুধম্মত্থেৰোপি পচ্চূসকালেযেৱ ‘‘কীদিসো নু খো গহপতিনা অগ্গসাৱকানং সক্কাৰো সজ্জিতো, স্ৱে গন্ত্ৱা পস্সিস্সামী’’তি চিন্তেত্ৱা পাতোৱ পত্তচীৱৰং আদায তস্স গেহং অগমাসি.

সো গহপতিনা ‘‘নিসীদথ, ভন্তে’’তি ৱুচ্চমানোপি ‘‘নাহং নিসীদামি, পিণ্ডায চৰিস্সামী’’তি ৱত্ৱা অগ্গসাৱকানং পটিযাদিতং সক্কাৰং ওলোকেত্ৱা গহপতিং জাতিযা ঘট্টেতুকামো ‘‘উড়াৰো তে, গহপতি, সক্কাৰো, অপিচেত্থ একঞ্ঞেৱ নত্থী’’তি আহ. ‘‘কিং, ভন্তে’’তি? ‘‘তিলসংগুড়িকা, গহপতী’’তি ৱত্ৱা গহপতিনা কাকোপমায অপসাদিতো কুজ্ঝিত্ৱা ‘‘এসো তে, গহপতি, আৱাসো, পক্কমিস্সামহ’’ন্তি ৱত্ৱা যাৱততিযং ৱাৰিযমানোপি পক্কমিত্ৱা সত্থু সন্তিকং গন্ত্ৱা চিত্তেন চ অত্তনা চ ৱুত্তৱচনং আৰোচেসি. সত্থা ‘‘তযা উপাসকো সদ্ধো পসন্নো হীনেন খুংসিতো’’তি তস্সেৱ দোসং আৰোপেত্ৱা পটিসাৰণীযকম্মং কাৰাপেত্ৱা ‘‘গচ্ছ, চিত্তগহপতিং খমাপেহী’’তি পেসেসি. সো তত্থ গন্ত্ৱা, ‘‘গহপতি, ময্হমেৱ সো দোসো, খমাহি মে’’তি ৱত্ৱাপি ‘‘নাহং খমামী’’তি তেন পটিক্খিত্তো মঙ্কুভূতো তং খমাপেতুং নাসক্খি. পুনদেৱ সত্থু সন্তিকং পচ্চাগমাসি. সত্থা ‘‘নাস্স উপাসকো খমিস্সতী’’তি জানন্তোপি ‘‘মানথদ্ধো এস, তিংসযোজনং তাৱ মগ্গং গন্ত্ৱা পচ্চাগচ্ছতূ’’তি খমনূপাযং অনাচিক্খিত্ৱাৱ উয্যোজেসি. অথস্স পুনাগতকালে নিহতমানস্স অনুদূতং দত্ৱা ‘‘গচ্ছ, ইমিনা সদ্ধিং গন্ত্ৱা উপাসকং খমাপেহী’’তি ৱত্ৱা ‘‘সমণেন নাম ‘ময্হং ৱিহাৰো, ময্হং নিৱাসট্ঠানং, ময্হং উপাসকো, ময্হং উপাসিকা’তি মানং ৱা ইস্সং ৱা কাতুং ন ৱট্টতি. এৱং কৰোন্তস্স হি ইচ্ছামানাদযো কিলেসা ৱড্ঢন্তী’’তি অনুসন্ধিং ঘট্টেত্ৱা ধম্মং দেসেন্তো ইমা গাথা অভাসি –

৭৩. ‘‘অসন্তং ভাৱনমিচ্ছেয্য, পুৰেক্খাৰঞ্চ ভিক্খুসু;

আৱাসেসু ইস্সৰিযং, পূজা পৰকুলেসু চ.

৭৪. ‘‘মমেৱ কত মঞ্ঞন্তু, গিহী পব্বজিতা উভো.

মমেৱাতিৱসা অস্সু, কিচ্চাকিচ্চেসু কিস্মিচি;

ইতি বালস্স সঙ্কপ্পো, ইচ্ছা মানো চ ৱড্ঢতী’’তি.

তত্থ অসন্তন্তি যো বালো ভিক্খু অৱিজ্জমানং সম্ভাৱনং ইচ্ছেয্য, ‘‘অস্সদ্ধোৱ সমানো ‘সদ্ধোতি মং জনো জানাতূ’তি ইচ্ছতী’’তি. পাপিচ্ছতানিদ্দেসে (ৱিভ. ৮৫১) ৱুত্তনযেনেৱ বালো ‘‘অসদ্ধো দুস্সীলো অপ্পস্সুতো অপ্পৱিৱিত্তো কুসীতো অনুপট্ঠিতস্সতি অসমাহিতো দুপ্পঞ্ঞো অখীণাসৱোৱ সমানো ‘অহো ৱত মং জনো অযং সদ্ধো, সীলৱা, বহুস্সুতো, পৱিৱিত্তো, আৰদ্ধৱীৰিযো, উপট্ঠিতস্সতি, সমাহিতো, পঞ্ঞৱা, খীণাসৱো’তি জানেয্যা’’তি ইদং অসন্তসম্ভাৱনং ইচ্ছতি. পুৰেক্খাৰন্তি পৰিৱাৰং. ‘‘অহো ৱত মং সকলৱিহাৰে ভিক্খূ পৰিৱাৰেত্ৱা পঞ্হং পুচ্ছন্তা ৱিহৰেয্যু’’ন্তি এৱং ইচ্ছাচাৰে ঠত্ৱা পুৰেক্খাৰঞ্চ ভিক্খূসু ইচ্ছতি. আৱাসেসূতি সঙ্ঘিকেসু চ আৱাসেসু যানি ৱিহাৰমজ্ঝে পণীতসেনাসনানি, তানি অত্তনো সন্দিট্ঠসম্ভত্তাদীনং ভিক্খূনং ‘‘তুম্হে ইধ ৱসথা’’তি ৱিচাৰেন্তো সযম্পি ৱৰতৰং সেনাসনং পলিবোধেন্তো, সেসানং আগন্তুকভিক্খূনং পচ্চন্তিমানি লামকসেনাসনানি চেৱ অমনুস্সপৰিগ্গহিতানি চ ‘‘তুম্হে ইধ ৱসথা’’তি ৱিচাৰেন্তো আৱাসেসু ইস্সৰিযং ইচ্ছতি. পূজা পৰকুলেসু চাতি নেৱ মাতাপিতূনং ন ঞাতকানং পৰেসুযেৱ কুলেসু ‘‘অহো ৱতিমে ময্হমেৱ দদেয্যুং, ন অঞ্ঞেস’’ন্তি এৱং চতুপ্পচ্চযেহি পূজং ইচ্ছতি.

মমেৱ কত মঞ্ঞন্তূতি যস্স চ বালস্স ‘‘যংকিঞ্চি ৱিহাৰে উপোসথাগাৰাদিকৰণৱসেন কতং নৱকম্মং, তং সব্বং অম্হাকং থেৰেন কতন্তি এৱং গিহী চ পব্বজিতা চ উভোপি মমেৱ নিস্সায কতং পৰিকম্মং নিট্ঠিতং মঞ্ঞন্তূ’’তি সঙ্কপ্পো উপ্পজ্জতি. মমেৱাতিৱসা অস্সূতি ‘‘গিহী চ পব্বজিতা চ সব্বেপি মমেৱ ৱসে ৱত্তন্তু, সকটগোণৱাসিফৰসুআদীনি ৱা লদ্ধব্বানি হোন্তু, অন্তমসো যাগুমত্তম্পি তাপেত্ৱা পিৱনাদীনি ৱা, এৱৰূপেসু কিচ্চাকিচ্চেসু খুদ্দকমহন্তেসু কৰণীযেসু কিস্মিঞ্চি এককিচ্চেপি মমেৱ ৱসে ৱত্তন্তু, মমেৱ আপুচ্ছিত্ৱা কৰোন্তূ’’তি সঙ্কপ্পো উপ্পজ্জতি. ইতি বালস্সাতি যস্স বালস্স সা চ ইচ্ছা অযঞ্চ এৱৰূপো সঙ্কপ্পো উপ্পজ্জতি, তস্স নেৱ ৱিপস্সনা, ন মগ্গফলানি ৱড্ঢন্তি. কেৱলং পনস্স চন্দোদযে সমুদ্দস্স উদকং ৱিয ছসু দ্ৱাৰেসু উপ্পজ্জমানা তণ্হা চেৱ নৱৱিধমানো চ ৱড্ঢতীতি.

দেসনাৱসানে বহূ সোতাপত্তিফলাদীনি পাপুণিংসূতি.

সুধম্মত্থেৰোপি ইমং ওৱাদং সুত্ৱা সত্থাৰং ৱন্দিত্ৱা উট্ঠাযাসনা পদক্খিণং কত্ৱা তেন অনুদূতেন ভিক্খুনা সদ্ধিং গন্ত্ৱা উপাসকস্স চক্খুপথে আপত্তিং পটিকৰিত্ৱা উপাসকং খমাপেসি. সো উপাসকেন ‘‘খমামহং, ভন্তে, সচে ময্হং দোসো অত্থি, খমথ মে’’তি পটিখমাপিতো সত্থাৰা দিন্নে ওৱাদে ঠত্ৱা কতিপাহেনেৱ সহ পটিসম্ভিদাহি অৰহত্তং পাপুণি. উপাসকোপি চিন্তেসি – ‘‘মযা সত্থাৰং অদিস্ৱাৱ সোতাপত্তিফলং পত্তং, অদিস্ৱা এৱ অনাগামিফলে পতিট্ঠিতো, সত্থাৰং মে দট্ঠুং ৱট্টতী’’তি. সো তিলতণ্ডুলসপ্পিফাণিতৱত্থচ্ছাদনাদীহি পৰিপূৰানি পঞ্চ সকটসতানি যোজাপেত্ৱা ‘‘সত্থাৰং দট্ঠুকামা আগচ্ছন্তু, পিণ্ডপাতাদীহি ন কিলমিস্সন্তী’’তি ভিক্খুসঙ্ঘস্স আৰোচাপেত্ৱা ভিক্খুনীসঙ্ঘস্সাপি উপাসকানম্পি উপাসিকানম্পি আৰোচাপেসি. তেন সদ্ধিং পঞ্চসতা পঞ্চসতা ভিক্খূ চ ভিক্খুনিযো চ উপাসকা চ উপাসিকাযো চ নিক্খমিংসু. সো তেসঞ্চেৱ অত্তনো পৰিসায চাতি তিণ্ণং জনসহস্সানং যথা তিংসযোজনে মগ্গে যাগুভত্তাদীহি কিঞ্চি ৱেকল্লং ন হোতি, তথা সংৱিদহি. তস্স পন নিক্খন্তভাৱং ঞত্ৱা যোজনে যোজনে দেৱতা খন্ধাৱাৰং বন্ধিত্ৱা দিব্বেহি যাগুখজ্জকভত্তপানকাদীহি তং মহাজনং উপট্ঠহিংসু, কস্সচি কেনচি ৱেকল্লং ন হোতি. এৱং দেৱতাহি উপট্ঠিযমানো দেৱসিকং যোজনং গচ্ছন্তো মাসেন সাৱত্থিং পাপুণি, পঞ্চ সকটসতানি যথাপূৰিতানেৱ অহেসুং. দেৱতাহি চেৱ মনুস্সেহি চ অভিহটং পণ্ণাকাৰং ৱিস্সজ্জেন্তোৱ অগমাসি.

সত্থা আনন্দত্থেৰং আহ – ‘‘আনন্দ, অজ্জ ৱড্ঢমানকচ্ছাযায চিত্তো গহপতি পঞ্চহি উপাসকসতেহি পৰিৱুতো আগন্ত্ৱা মং ৱন্দিস্সতী’’তি. ‘‘কিং পন, ভন্তে, তস্স তুম্হাকং ৱন্দনকালে কিঞ্চি পাটিহাৰিযং ভৱিস্সতী’’তি? ‘‘ভৱিস্সতি, আনন্দা’’তি. ‘‘কিং, ভন্তে’’তি? তস্স আগন্ত্ৱা ‘‘মং ৱন্দনকালে ৰাজমানেন অট্ঠকৰীসমত্তে পদেসে জণ্ণুকমত্তেন ওধিনা পঞ্চৱণ্ণানং দিব্বপুপ্ফানং ঘনৱস্সং ৱস্সিস্সতী’’তি. তং কথং সুত্ৱা নগৰৱাসিনো ‘‘এৱং মহাপুঞ্ঞো কিৰ চিত্তো নাম গহপতি আগন্ত্ৱা অজ্জ সত্থাৰং ৱন্দিস্সতি, এৱৰূপং কিৰ পাটিহাৰিযং ভৱিস্সতি, মযম্পি তং মহাপুঞ্ঞং দট্ঠুং লভিস্সামা’’তি পণ্ণাকাৰং আদায মগ্গস্স উভোসু পস্সেসু অট্ঠংসু. ৱিহাৰসমীপে আগতকালে পঞ্চ ভিক্খুসতানি পঠমং আগমিংসু. চিত্তো গহপতি, ‘‘অম্মা, তুম্হে পচ্ছতো আগচ্ছথা’’তি মহাউপাসিকাযো ঠপেত্ৱা পঞ্চহি উপাসকসতেহি পৰিৱুতো সত্থু সন্তিকং অগমাসি. বুদ্ধানং সম্মুখট্ঠানে পন ঠিতা ৱা নিসিন্না ৱা ইতো ৱা এত্তো ৱা ন হোন্তি, বুদ্ধৱীথিযা দ্ৱীসু পস্সেসু নিচ্চলাৱ তিট্ঠন্তি. চিত্তো গহপতি মহন্তং বুদ্ধৱীথিং ওক্কমি. তীণি ফলানি পত্তেন অৰিযসাৱকেন ওলোকিতোলোকিতট্ঠানং কম্পি. ‘‘এসো কিৰ চিত্তো গহপতী’’তি মহাজনো ওলোকেসি. সো সত্থাৰং উপসঙ্কমিত্ৱা ছব্বণ্ণানং বুদ্ধৰস্মীনং অন্তো পৱিসিত্ৱা দ্ৱীসু গোপ্ফকেসু সত্থু পাদে গহেত্ৱা ৱন্দি. তং খণঞ্ঞেৱ ৱুত্তপ্পকাৰং পুপ্ফৱস্সং ৱস্সি, সাধুকাৰসহস্সানি পৱত্তযিংসু. সো একমাসং সত্থু সন্তিকে ৱসি, ৱসমানো চ সকলং বুদ্ধপ্পমুখং ভিক্খুসঙ্ঘং ৱিহাৰেযেৱ নিসীদাপেত্ৱা মহাদানং অদাসি, অত্তনা সদ্ধিং আগতেপি অন্তোৱিহাৰেযেৱ কত্ৱা পটিজগ্গি. একদিৱসম্পি অত্তনো সকটেসু কিঞ্চি গহেতব্বং নাহোসি, দেৱমনুস্সেহি আভতপণ্ণাকাৰেনেৱ দানং অদাসি, সব্বকিচ্চানি অকাসি. সো সত্থাৰং ৱন্দিত্ৱা আহ – ‘‘ভন্তে, অহং ‘তুম্হাকং দানং দস্সামী’তি আগচ্ছন্তো মাসং অন্তৰামগ্গে অহোসিং. ইধেৱ মে মাসো ৱীতিৱত্তো, মযা আভতং পণ্ণাকাৰং কিঞ্চি গহেতুং ন লভামি, এত্তকং কালং দেৱমনুস্সেহি আভতপণ্ণাকাৰেনেৱ দানং অদাসিং, সোহং সচেপি ইধ সংৱচ্ছৰং ৱসিস্সামি, নেৱ মম দেয্যধম্মং দাতুং লভিস্সামি. অহং সকটানি ওতাৰেত্ৱা গন্তুং ইচ্ছামি, পটিসামনট্ঠানং মে আৰোচাপেথা’’তি.

সত্থা আনন্দত্থেৰং আহ – ‘‘আনন্দ, উপাসকস্স একং পদেসং তুচ্ছং কাৰেত্ৱা দেহী’’তি. থেৰো তথা অকাসি. কপ্পিযভূমি (মহাৱ. ২৯৫) কিৰ চিত্তস্স গহপতিনো অনুঞ্ঞাতা. উপাসকোপি অত্তনা সদ্ধিং আগতেহি তীহি জনসহস্সেহি সদ্ধিং তুচ্ছসকটেহি পুন মগ্গং পটিপজ্জি. দেৱমনুস্সা উট্ঠায, ‘‘অয্য, তযা তুচ্ছসকটেহি গমনকম্মং কত’’ন্তি সত্তহি ৰতনেহি সকটানি পূৰযিংসু. সো অত্তনো আভতপণ্ণাকাৰেনেৱ মহাজনং পটিজগ্গন্তো অগমাসি. আনন্দত্থেৰো সত্থাৰং ৱন্দিত্ৱা আহ – ‘‘ভন্তে, তুম্হাকং সন্তিকং আগচ্ছন্তোপি মাসেন আগতো, ইধাপি মাসমেৱ ৱুট্ঠো, এত্তকং কালং দেৱমনুস্সেহি অভিহটপণ্ণাকাৰেনেৱ মহাৱদানং অদাসি, ইদানি পঞ্চ সকটসতানি তুচ্ছানি কত্ৱা মাসেনেৱ কিৰ গমিস্সতি, দেৱমনুস্সা পনস্স উট্ঠায, ‘অয্য, তযা তুচ্ছসকটেহি গমনকম্মং কত’ন্তি পঞ্চ সকটসতানি সত্তৰতনেহি পূৰযিংসু. সো পুন অত্তনো আভতপণ্ণাকাৰেনেৱ কিৰ মহাজনং পটিজগ্গন্তো গমিস্সতী’’তি. ‘‘কিং পন, ভন্তে, এতস্স তুম্হাকং সন্তিকং আগচ্ছন্তস্সেৱাযং সক্কাৰো উপ্পজ্জতি, উদাহু অঞ্ঞত্থ গচ্ছন্তস্সাপি উপ্পজ্জতী’’তি? ‘‘আনন্দ, মম সন্তিকং আগচ্ছন্তস্সাপি অঞ্ঞত্থ গচ্ছন্তস্সাপি এতস্স উপ্পজ্জতেৱ. অযঞ্হি উপাসকো সদ্ধো পসন্নো সম্পন্নসীলো, এৱৰূপো পুগ্গলো যং যং পদেসং ভজতি, তত্থ তত্থেৱস্স লাভসক্কাৰো নিব্বত্ততী’’তি ৱত্ৱা সত্থা ইমং পকিণ্ণকৱগ্গে গাথমাহ –

‘‘সদ্ধো সীলেন সম্পন্নো, যসো ভোগসমপ্পিতো;

যং যং পদেসং ভজতি, তত্থ তত্থেৱ পূজিতো’’তি. (ধ. প. ৩০৩);

অত্থো পনস্সা তত্থেৱ আৱিভৱিস্সতি.

এৱং ৱুত্তে আনন্দত্থেৰো চিত্তস্স পুব্বকম্মং পুচ্ছি. অথস্স সত্থা আচিক্খন্তো আহ –

আনন্দ, অযং পদুমুত্তৰস্স ভগৱতো পাদমূলে কতাভিনীহাৰো কপ্পসতসহস্সং দেৱমনুস্সেসু সংসৰিত্ৱা কস্সপবুদ্ধকালে মিগলুদ্দককুলে নিব্বত্তো ৱুদ্ধিমন্ৱায একদিৱসং দেৱে ৱস্সন্তে মিগানং মাৰণত্তায সত্তিং আদায অৰঞ্ঞং গন্ত্ৱা মিগে ওলোকেন্তো একস্মিং অকটপব্ভাৰে সসীসং পাৰুপিত্ৱা একং ভিক্খুং নিসিন্নং দিস্ৱা ‘‘একো, অয্যো, সমণধম্মং কৰোন্তো নিসিন্নো ভৱিস্সতি, ভত্তমস্স আহৰিস্সামী’’তি ৱেগেন গেহং গন্ত্ৱা একস্মিং উদ্ধনে হিয্যো, আভতমংসং, একস্মিং ভত্তং পচাপেত্ৱা অঞ্ঞে পিণ্ডপাতচাৰিকে ভিক্খূ দিস্ৱা তেসম্পি পত্তে আদায পঞ্ঞত্তাসনে নিসীদাপেত্ৱা ভিক্খং সম্পাদেত্ৱা, ‘‘অয্যে, পৰিৱিসথা’’তি অঞ্ঞং আণাপেত্ৱা তং ভত্তং পুটকে পক্খিপিত্ৱা আদায গচ্ছন্তো অন্তৰামগ্গে নানাপুপ্ফানি ওচিনিত্ৱা পত্তপুটে কত্ৱা থেৰস্স নিসিন্নট্ঠানং গন্ত্ৱা ‘‘ময্হং, ভন্তে, সঙ্গহং কৰোথা’’তি ৱত্ৱা পত্তং আদায পূৰেত্ৱা থেৰস্স হত্থে ঠপেত্ৱা তেহি পুপ্ফেহি পূজং কত্ৱা ‘‘যথা মে অযং ৰসপিণ্ডপাতো পুপ্ফপূজায সদ্ধিং চিত্তং তোসেসি, এৱং নিব্বত্তনিব্বত্তট্ঠানে পণ্ণাকাৰসহস্সানি আদায আগন্ত্ৱা ময্হং চিত্তং তোসেন্তু, পঞ্চৱণ্ণকুসুমৱস্সঞ্চ ৱস্সতূ’’তি পত্থনং পট্ঠপেসি. সো যাৱজীৱং কুসলং কত্ৱা দেৱলোকে নিব্বত্তি, নিব্বত্তট্ঠানে জণ্ণুকমত্তেন ওধিনা দিব্বপুপ্ফৱস্সং ৱস্সি. ইদানিপিস্স জাতদিৱসে চেৱ ইধ চ আগতস্স পুপ্ফৱস্সৱস্সনঞ্চ পণ্ণাকাৰাভিহাৰো চ সত্তহি ৰতনেহি সকটপূৰণঞ্চ তস্সেৱ কম্মস্স নিস্সন্দোতি.

চিত্তগহপতিৱত্থু চুদ্দসমং.