৬. পাৱেয্যকাজীৱকৱত্থু

ন পৰেসং ৱিলোমানীতি ইমং ধম্মদেসনং সত্থা সাৱত্থিযং ৱিহৰন্তো পাৱেয্যং নাম আজীৱকং আৰব্ভ কথেসি.

সাৱত্থিযং কিৰেকা গহপতানী পুত্তট্ঠানে ঠপেত্ৱা পাৱেয্যং নাম আজীৱকং পটিজগ্গি. তস্সানন্তৰঘৰেসু মনুস্সা সত্থু ধম্মদেসনং সুত্ৱা আগন্ত্ৱা, ‘‘অহো অচ্ছৰিযা বুদ্ধানং ধম্মদেসনা’’তি নানপ্পকাৰেহি বুদ্ধগুণে ৱণ্ণেন্তি. সা বুদ্ধানং গুণকথং সুত্ৱা ৱিহাৰং গন্ত্ৱা ধম্মং সোতুকামা আজীৱকস্স এতমত্থং কথেত্ৱা, ‘‘গচ্ছিস্সামি অহং বুদ্ধসন্তিকং, অয্যা’’তি আহ. সো ‘‘মা গচ্ছাহী’’তি নিৱাৰেত্ৱা তং পুনপ্পুনং যাচমানম্পি নিৱাৰেসি এৱ. সা ‘‘অযং মম ৱিহাৰং গন্ত্ৱা ধম্মং সোতুং ন দেতি, সত্থাৰং নিমন্তেত্ৱা ইধেৱ ধম্মং সুণিস্সামী’’তি সাযন্হসমযে পুত্তং পক্কোসিত্ৱা, ‘‘গচ্ছ, তাত, স্ৱাতনায সত্থাৰং নিমন্তেহী’’তি পেসেসি. সো গচ্ছন্তো পঠমতৰং আজীৱকস্স ৱসনট্ঠানং গন্ত্ৱা তং ৱন্দিত্ৱা নিসীদি. অথ নং সো ‘‘কহং গচ্ছসী’’তি আহ. ‘‘মাতু ৱচনেন সত্থাৰং নিমন্তেতুং গচ্ছামী’’তি আহ. ‘‘মা তস্স সন্তিকং গচ্ছাহী’’তি. ‘‘অলং, অয্য, মম মাতু ভাযামি, গচ্ছিস্সামহ’’ন্তি. ‘‘এতস্স কতসক্কাৰং উভোপি খাদিস্সাম, মা গচ্ছাহী’’তি. ‘‘অলং, অয্য, মাতা মে তজ্জেস্সতী’’তি. তেন হি গচ্ছ, গন্ত্ৱা পন নিমন্তেত্ৱা, ‘‘অম্হাকং গেহং অসুকট্ঠানে ৱা অসুকৱীথিযং ৱা অসুকমগ্গেন ৱা গন্তব্ব’’ন্তি মা আচিক্খি. ‘‘সন্তিকে ঠিতো ৱিয অঞ্ঞেন মগ্গেন গচ্ছন্তো ৱিয পলাযিত্ৱা এহী’’তি. সো আজীৱকস্স ৱচনং সুত্ৱা সত্থু সন্তিকং গন্ত্ৱা নিমন্তেত্ৱা আজীৱকেন ৱুত্তনিযামেনেৱ সব্বং কত্ৱা তস্স সন্তিকং গন্ত্ৱা, ‘‘কিং তে কত’’ন্তি পুট্ঠো, ‘‘সব্বং কতং, অয্যা’’তি আহ. ‘‘ভদ্দকং তে কতং, তস্স সক্কাৰং উভোপি খাদিস্সামা’’তি ৱত্ৱা পুনদিৱসে আজীৱকো পাতোৱ তং গেহং অগমাসি. তং গহেত্ৱা পচ্ছাগব্ভে নিসীদাপেসুং.

পটিৱিস্সকমনুস্সা তং গেহং অল্লগোমযেন উপলিম্পিত্ৱা লাজপঞ্চমানি পুপ্ফানি ৱিকিৰিত্ৱা সত্থু নিসীদনত্থায মহাৰহং আসনং পঞ্ঞাপেসুং. বুদ্ধেহি সদ্ধিং অপৰিচিতমনুস্সা হি আসনপঞ্ঞত্তিং ন জানন্তি, বুদ্ধানঞ্চ মগ্গদেসকেন কিচ্চং নাম নত্থি, বোধিমূলে দসসহস্সিসোকধাতুং কম্পেত্ৱা সম্বোধিং পত্তদিৱসেযেৱ হি নেসং ‘‘অযং মগ্গো নিৰযং গচ্ছতি, অযং তিৰচ্ছানযোনিং, অযং পেত্তিৱিসযং, অযং মনুস্সলোকং, অযং দেৱলোকং, অযং অমতমহানিব্বান’’ন্তি সব্বে মগ্গা আৱিভূতা. গামনিগমাদীনং পন মগ্গে ৱত্তব্বমেৱ নত্থি. তস্মা সত্থা পাতোৱ পত্তচীৱৰমাদায মহাউপাসিকায গেহদ্ৱাৰং গতো. সা গেহা নিক্খমিত্ৱা সত্থাৰং পঞ্চপতিট্ঠিতেন ৱন্দিত্ৱা অন্তোনিৱেসনং পৱেসেত্ৱা আসনে নিসীদাপেত্ৱা দক্খিণোদকং দত্ৱা পণীতেন খাদনীযেন ভোজনীযেন পৰিৱিসি. উপাসিকা কতভত্তকিচ্চস্স সত্থুনো অনুমোদনং কাৰেতুকামা পত্তং গণ্হি. সত্থা মধুৰস্সৰেন অনুমোদনধম্মকথং আৰভি. উপাসিকা ‘‘সাধু, সাধূ’’তি সাধুকাৰং দদমানা ধম্মং সুণি. আজীৱকোপি পচ্ছাগব্ভে নিসিন্নোৱ তস্সা সাধুকাৰং দত্ৱা ধম্মং সুণন্তিযা সদ্দং সুত্ৱা সন্ধাৰেতুং নাসক্খি. ‘‘ন ইদানেসা ময্হ’’ন্তি নিক্খমিত্ৱা ‘‘নট্ঠাসি কাড়কণ্ণি, এতস্স এৱং সক্কাৰং কৰোতী’’তি নানপ্পকাৰেন উপাসিকঞ্চ সত্থাৰঞ্চ অক্কোসন্তো পলাযি. উপাসিকা তস্স কথায লজ্জিতা অঞ্ঞথত্তং গতং চিত্তং দেসনানুসাৰেন ঞাণং পেসেতুং নাসক্খি. অথ নং সত্থা ‘‘কিং উপাসিকে চিত্তং দেসনানুগতং কাতুং ন সক্কোসী’’তি? ‘‘ভন্তে, এতস্স মে কথায চিত্তং অঞ্ঞথত্তং উপগত’’ন্তি. সত্থা ‘‘এৱৰূপস্স ৱিসভাগজনস্স কথিতং কথং নাম আৱজ্জিতুং ন ৱট্টতি, এৱৰূপং অসমন্নাহৰিত্ৱা অত্তনো কতাকতমেৱ ওলোকেতুং ৱট্টতী’’তি ৱত্ৱা ইমং গাথমাহ –

৫০. ‘‘ন পৰেসং ৱিলোমানি, ন পৰেসং কতাকতং;

অত্তনোৱ অৱেক্খেয্য, কতানি অকতানি চা’’তি.

তত্থ ন পৰেসং ৱিলোমানীতি পৰেসং ৱিলোমানি ফৰুসানি মম্মচ্ছেদকৱচনানি ন মনসিকাতব্বানি. ন পৰেসং কতাকতন্তি ‘‘অসুকো উপাসকো অস্সদ্ধো অপ্পসন্নো, নাপিস্স গেহে কটচ্ছুভিক্খাদীনি দিয্যন্তি, ন সলাকভত্তাদীনি, ন চীৱৰাদিপচ্চযদানং এতস্স অত্থি, তথা অসুকা উপাসিকা অস্সদ্ধা অপ্পসন্না, নাপিস্সা গেহে কটচ্ছুভিক্খাদীনি দিয্যন্তি, ন সলাকভত্তাদীনি, ন চীৱৰাদিপচ্চযদানং এতিস্সা অত্থি, তথা অসুকো ভিক্খু অস্সদ্ধো অপ্পসন্নো, নাপি উপজ্ঝাযৱত্তং কৰোতি, ন আচৰিযৱত্তং, ন আগন্তুকৱত্তং, ন গমিকৱত্তং, ন চেতিযঙ্গণৱত্তং, ন উপোসথাগাৰৱত্তং, ন ভোজনসালাৱত্তং, ন জন্তাঘৰৱত্তাদীনি, নাপিস্স কিঞ্চি ধুতঙ্গং অত্থি, ন ভাৱনাৰামতায উস্সাহমত্তম্পী’’তি এৱং পৰেসং কতাকতং নাম ন ওলোকেতব্বং. অত্তনোৱ অৱেক্খেয্যাতি ‘‘কথং ভূতস্স মে ৰত্তিন্দিৱা ৱীতিৱত্তন্তীতি পব্বজিতেন অভিণ্হং পচ্চৱেক্খিতব্ব’’ন্তি (অ. নি. ১০.৪৮) ইমং ওৱাদং অনুস্সৰন্তো সদ্ধাপব্বজিতো কুলপুত্তো ‘‘কিং নু খো অহং ‘অনিচ্চং দুক্খং অনত্তা’তি তিলক্খণং আৰোপেত্ৱা যোগে কম্মং কাতুং সক্খিং, নাসক্খি’’ন্তি এৱং অত্তনো কতাকতানি ওলোকেয্যাতি.

দেসনাৱসানে সা উপাসিকা সোতাপত্তিফলে পতিট্ঠিতা, দেসনা মহাজনস্স সাত্থিকা জাতাতি.

পাৱেয্যকাজীৱকৱত্থু ছট্ঠং.