৯. নিগমৱাসিতিস্সত্থেৰৱত্থু

অপ্পমাদৰতোতি ইমং ধম্মদেসনং সত্থা জেতৱনে ৱিহৰন্তো নিগমৱাসিতিস্সত্থেৰং নাম আৰব্ভ কথেসি.

একস্মিঞ্হি সাৱত্থিতো অৱিদূৰে নিগমগামে জাতসংৱড্ঢো একো কুলপুত্তো সত্থু সাসনে পব্বজিত্ৱা লদ্ধূপসম্পদো ‘‘নিগমৱাসিতিস্সত্থেৰো নাম অপ্পিচ্ছো সন্তুট্ঠো পৱিৱিত্তো আৰদ্ধৱীৰিযো’’তি পঞ্ঞাযি. সো নিবদ্ধং ঞাতিগামেযেৱ পিণ্ডায ৱিচৰতি. অনাথপিণ্ডিকাদীসু মহাদানানি কৰোন্তেসু, পসেনদিকোসলে অসদিসদানং কৰোন্তেপি সাৱত্থিং নাগচ্ছতি. ভিক্খূ ‘‘অযং নিগমৱাসিতিস্সত্থেৰো উট্ঠায সমুট্ঠায ঞাতিসংসট্ঠো ৱিহৰতি, অনাথপিণ্ডিকাদীসু মহাদানাদীনি কৰোন্তেসু, পসেনদিকোসলে অসদিসদানং কৰোন্তেপি নেৱ আগচ্ছতী’’তি কথং সমুট্ঠাপেত্ৱা সত্থু আৰোচযিংসু. সত্থা তং পক্কোসাপেত্ৱা, ‘‘সচ্চং কিৰ ত্ৱং, ভিক্খু, এৱং কৰোসী’’তি পুচ্ছিত্ৱা, ‘‘নত্থি, ভন্তে, ময্হং ঞাতিসংসগ্গো, অহং এতে মনুস্সে নিস্সায অজ্ঝোহৰণীযমত্তং আহাৰং লভামি লূখে ৱা পণীতে ৱা. যাপনমত্তে লদ্ধে পুন কিং আহাৰপৰিযেসনেনাতি ন গচ্ছামি, ঞাতীহি পন মে সংসগ্গো নাম নত্থি, ভন্তে’’তি ৱুত্তে সত্থা পকতিযাপি তস্স অজ্ঝাসযং ৱিজানন্তো – ‘‘সাধু সাধু, ভিক্খূ’’তি তস্স সাধুকাৰং দত্ৱা, ‘‘অনচ্ছৰিযং খো পনেতং ভিক্খু, যং ত্ৱং মাদিসং আচৰিযং লভিত্ৱা অপ্পিচ্ছো অহোসি. অযঞ্হি অপ্পিচ্ছতা নাম মম তন্তি, মম পৱেণী’’তি ৱত্ৱা ভিক্খূহি যাচিতো অতীতং আহৰি –

অতীতে হিমৱন্তে গঙ্গাতীৰে একস্মিং উদুম্বৰৱনে অনেকসহস্সা সুৱা ৱসিংসু. তত্ৰেকো সুৱৰাজা অত্তনো নিৱাসৰুক্খস্স ফলেসু খীণেসু যং যদেৱ অৱসিট্ঠং হোতি অঙ্কুৰো ৱা পত্তং ৱা তচো ৱা, তং তং খাদিত্ৱা গঙ্গাযং পানীযং পিৱিত্ৱা পৰমপ্পিচ্ছো সন্তুট্ঠো হুত্ৱা অঞ্ঞত্থ ন গচ্ছতি. তস্স অপ্পিচ্ছসন্তুট্ঠভাৱগুণেন সক্কস্স ভৱনং কম্পি. সক্কো আৱজ্জমানো তং দিস্ৱা তস্স ৱীমংসনত্থং অত্তনো আনুভাৱেন তং ৰুক্খং সুক্খাপেসি. ৰুক্খো ওভগ্গো খাণুমত্তো ছিদ্দাৱছিদ্দোৱ হুত্ৱা ৱাতে পহৰন্তে আকোটিতো ৱিয সদ্দং নিচ্ছাৰেন্তো অট্ঠাসি. তস্স ছিদ্দেহি চুণ্ণানি নিক্খমন্তি. সুৱৰাজা তানি খাদিত্ৱা গঙ্গাযং পানীযং পিৱিত্ৱা অঞ্ঞত্থ অগন্ত্ৱা ৱাতাতপং অগণেত্ৱা উদুম্বৰখাণুমত্থকে নিসীদতি. সক্কো তস্স পৰমপ্পিচ্ছভাৱং ঞত্ৱা, ‘‘মিত্তধম্মগুণং কথাপেত্ৱা ৱৰমস্স দত্ৱা উদুম্বৰং অমতফলং কত্ৱা আগমিস্সামী’’তি একো হংসৰাজা হুত্ৱা সুজং অসুৰকঞ্ঞং পুৰতো কত্ৱা উদুম্বৰৱনং গন্ত্ৱা অৱিদূৰে একস্স ৰুক্খস্স সাখায নিসীদিত্ৱা তেন সদ্ধিং কথেন্তো ইমং গাথমাহ –

‘‘সন্তি ৰুক্খা হৰিপত্তা, দুমানেকফলা বহূ;

কস্মা নু সুক্খে কোড়াপে, সুৱস্স নিৰতো মনো’’তি. (জা. ১.৯.৩০);

সব্বং সুৱজাতকং নৱকনিপাতে আগতনযেনেৱ ৱিত্থাৰেতব্বং. অট্ঠুপ্পত্তিযেৱ হি তত্থ চ ইধ চ নানা, সেসং তাদিসমেৱ. সত্থা ইমং ধম্মদেসনং আহৰিত্ৱা, ‘‘তদা সক্কো আনন্দো অহোসি, সুৱৰাজা অহমেৱা’’তি ৱত্ৱা, ‘‘এৱং, ভিক্খৱে, অপ্পিচ্ছতা নামেসা মম তন্তি, মম পৱেণী, অনচ্ছৰিযা মম পুত্তস্স নিগমৱাসিতিস্সস্স মাদিসং আচৰিযং লভিত্ৱা অপ্পিচ্ছতা, ভিক্খুনা নাম নিগমৱাসিতিস্সেন ৱিয অপ্পিচ্ছেনেৱ ভৱিতব্বং. এৱৰূপো হি ভিক্খু অভব্বো সমথৱিপস্সনাধম্মেহি ৱা মগ্গফলেহি ৱা পৰিহানায, অঞ্ঞদত্থু নিব্বানস্সেৱ সন্তিকে হোতী’’তি ৱত্ৱা ইমং গাথমাহ –

৩২. ‘‘অপ্পমাদৰতো ভিক্খু, পমাদে ভযদস্সি ৱা;

অভব্বো পৰিহানায, নিব্বানস্সেৱ সন্তিকে’’তি.

তত্থ অভব্বো পৰিহানাযাতি সো এৱৰূপো ভিক্খু সমথৱিপস্সনাধম্মেহি ৱা মগ্গফলেহি ৱা পৰিহানায অভব্বো, নাপি পত্তেহি পৰিহাযতি, ন অপ্পত্তানি ন পাপুণাতি. নিব্বানস্সেৱ সন্তিকেতি কিলেসপৰিনিব্বানস্সপি অনুপাদাপৰিনিব্বানস্সাপি সন্তিকেযেৱাতি.

গাথাপৰিযোসানে নিগমৱাসিতিস্সত্থেৰো সহ পটিসম্ভিদাহি অৰহত্তং পাপুণি. অঞ্ঞেপি বহূ সোতাপন্নাদযো অহেসুং. মহাজনস্স সাত্থিকা ধম্মদেসনা জাতাতি.

নিগমৱাসিতিস্সত্থেৰৱত্থু নৱমং.

অপ্পমাদৱগ্গৱণ্ণনা নিট্ঠিতা. দুতিযো ৱগ্গো.