৬. পমত্তাপমত্তদ্ৱেসহাযকৱত্থু

অপ্পমত্তো পমত্তেসূতি ইমং ধম্মদেসনং সত্থা জেতৱনে ৱিহৰন্তো দ্ৱে সহাযকে ভিক্খূ আৰব্ভ কথেসি.

তে কিৰ সত্থু সন্তিকে কম্মট্ঠানং গহেত্ৱা আৰঞ্ঞকৱিহাৰং পৱিসিংসু. তেসু একো কিৰ কালস্সেৱ দাৰূনি আহৰিত্ৱা অঙ্গাৰকপল্লং সজ্জেত্ৱা দহৰসামণেৰেহি সদ্ধিং সল্লপন্তো পঠমযামং ৱিসিব্বমানো নিসীদতি. একো অপ্পমত্তো সমণধম্মং কৰোন্তো ইতৰং ওৱদতি, ‘‘আৱুসো, মা এৱং কৰি, পমত্তস্স হি চত্তাৰো অপাযা সকঘৰসদিসা. বুদ্ধা নাম সাঠেয্যেন আৰাধেতুং ন সক্কা’’তি সো তস্সোৱাদং ন সুণাতি. ইতৰো ‘‘নাযং ৱচনক্খমো’’তি তং অৱত্ৱা অপ্পমত্তোৱ সমণধম্মমকাসি. অলসত্থেৰোপি পঠমযামে ৱিসিব্বেত্ৱা ইতৰস্স চঙ্কমিত্ৱা গব্ভং পৱিট্ঠকালে পৱিসিত্ৱা, ‘‘মহাকুসীত, ত্ৱং নিপজ্জিত্ৱা সযনত্থায অৰঞ্ঞং পৱিট্ঠোসি, কিং বুদ্ধানং সন্তিকে কম্মট্ঠানং গহেত্ৱা উট্ঠায সমণধম্মং কাতুং ৱট্টতী’’তি ৱত্ৱা অত্তনো ৱসনট্ঠানং পৱিসিত্ৱা নিপজ্জিত্ৱা সুপতি. ইতৰোপি মজ্ঝিমযামে ৱিস্সমিত্ৱা পচ্ছিমযামে পচ্চুট্ঠায সমণধম্মং কৰোতি. সো এৱং অপ্পমত্তো ৱিহৰন্তো ন চিৰস্সেৱ সহ পটিসম্ভিদাহি অৰহত্তং পাপুণি. ইতৰো পমাদেনেৱ কালং ৱীতিনামেসি. তে ৱুট্ঠৱস্সা সত্থু সন্তিকং গন্ত্ৱা সত্থাৰং ৱন্দিত্ৱা একমন্তং নিসীদিংসু. সত্থা তেহি সদ্ধিং পটিসন্থাৰং কত্ৱা, ‘‘কচ্চি, ভিক্খৱে, অপ্পমত্তা সমণধম্মং কৰিত্থ, কচ্চি ৱো পব্বজিতকিচ্চং মত্থকং পত্ত’’ন্তি পুচ্ছি. পঠমং পমত্তো ভিক্খু আহ – ‘‘কুতো, ভন্তে, এতস্স অপ্পমাদো, গতকালতো পট্ঠায নিপজ্জিত্ৱা নিদ্দাযন্তো কালং ৱীতিনামেসী’’তি. ‘‘ত্ৱং পন ভিক্খূ’’তি. ‘‘অহং, ভন্তে, কালস্সেৱ দাৰূনি আহৰিত্ৱা অঙ্গাৰকপল্লং সজ্জেত্ৱা পঠমযামে ৱিসিব্বেন্তো নিসীদিত্ৱা অনিদ্দাযন্তোৱ কালং ৱীতিনামেসি’’ন্তি. অথ নং সত্থা ‘‘ত্ৱং পমত্তো কালং ৱীতিনামেত্ৱা ‘অপ্পমত্তোম্হী’তি ৱদসি, অপ্পমত্তং পন পমত্তং কৰোসী’’তি আহ. পুন পমাদে দোসে, অপ্পমাদে আনিসংসে পকাসেতুং, ‘‘ত্ৱং মম পুত্তস্স সন্তিকে জৱচ্ছিন্নো দুব্বলস্সো ৱিয, এস পন তৱ সন্তিকে সীঘজৱস্সো ৱিযা’’তি ৱত্ৱা ইমং গাথমাহ –

২৯. ‘‘অপ্পমত্তো পমত্তেসু, সুত্তেসু বহুজাগৰো;

অবলস্সংৱ সীঘস্সো, হিত্ৱা যাতি সুমেধসো’’তি.

তত্থ অপ্পমত্তোতি সতিৱেপুল্লপ্পত্ততায অপ্পমাদসম্পন্নে খীণাসৱো. পমত্তেসূতি সতিৱোসগ্গে ঠিতেসু সত্তেসু. সুত্তেসূতি সতিজাগৰিযাভাৱেন সব্বিৰিযাপথেসু নিদ্দাযন্তেসু. বহুজাগৰোতি মহন্তে সতিৱেপুল্লে জাগৰিযে ঠিতো. অবলস্সংৱাতি কুণ্ঠপাদং ছিন্নজৱং দুব্বলস্সং সীঘজৱো সিন্ধৱাজানীযো ৱিয. সুমেধসোতি উত্তমপঞ্ঞো. তথাৰূপং পুগ্গলং আগমেনপি অধিগমেনপি হিত্ৱা যাতি. মন্দপঞ্ঞস্মিঞ্হি একং সুত্তং গহেতুং ৱাযমন্তেযেৱ সুমেধসো একং ৱগ্গং গণ্হাতি, এৱং তাৱ আগমেন হিত্ৱা যাতি. মন্দপঞ্ঞে পন ৰত্তিট্ঠানদিৱাট্ঠানানি কাতুং ৱাযমন্তেযেৱ কম্মট্ঠানং উগ্গহেত্ৱা সজ্ঝাযন্তেযেৱ চ সুমেধসো পুব্বভাগেপি পৰেন কতং ৰত্তিট্ঠানং ৱা দিৱাট্ঠানং ৱা পৱিসিত্ৱা কম্মট্ঠানং সম্মসন্তো সব্বকিলেসে খেপেত্ৱা নেৱ লোকুত্তৰধম্মে হত্থগতে কৰোতি, এৱং অধিগমেনপি হিত্ৱা যাতি. ৱট্টে পন নং হিত্ৱা ছড্ডেত্ৱা ৱট্টতো নিস্সৰন্তো যাতিযেৱাতি.

গাথাপৰিযোসানে বহূ সোতাপত্তিফলাদীনি পাপুণিংসূতি.

পমত্তাপমত্তদ্ৱেসহাযকৱত্থু ছট্ঠং.