৫. মহাকস্সপত্থেৰৱত্থু

পমাদং অপ্পমাদেনাতি ইমং ধম্মদেসনং সত্থা জেতৱনে ৱিহৰন্তো মহাকস্সপত্থেৰং আৰব্ভ কথেসি.

একস্মিঞ্হি দিৱসে থেৰো পিপ্ফলিগুহাযং ৱিহৰন্তো ৰাজগহে পিণ্ডায চৰিত্ৱা পচ্ছাভত্তং পিণ্ডপাতপটিক্কন্তো আলোকং ৱড্ঢেত্ৱা পমত্তে চ অপ্পমত্তে চ উদকপথৱীপব্বতাদীসু চৱনকে উপপজ্জনকে চ সত্তে দিব্বেন চক্খুনা ওলোকেন্তো নিসীদি. সত্থা জেতৱনে নিসিন্নকোৱ ‘‘কেন নু খো ৱিহাৰেন অজ্জ মম পুত্তো কস্সপো ৱিহৰতী’’তি দিব্বেন চক্খুনা উপধাৰেন্তো ‘‘সত্তানং চুতূপপাতং ওলোকেন্তো ৱিহৰতী’’তি ঞত্ৱা ‘‘সত্তানং চুতূপপাতো নাম বুদ্ধঞাণেনপি অপৰিচ্ছিন্নো, মাতুকুচ্ছিযং পটিসন্ধিং গহেত্ৱা মাতাপিতৰো অজানাপেত্ৱা চৱনসত্তানং পৰিচ্ছেদো কাতুং ন সক্কা, তে জানিতুং তৱ অৱিসযো, কস্সপ, অপ্পমত্তকো তৱ ৱিসযো, সব্বসো পন চৱন্তে চ উপপজ্জন্তে চ জানিতুং পস্সিতুং বুদ্ধানমেৱ ৱিসযো’’তি ৱত্ৱা ওভাসং ফৰিত্ৱা সম্মুখে নিসিন্নো ৱিয হুত্ৱা ইমং গাথমাহ –

২৮. ‘‘পমাদং অপ্পমাদেন, যদা নুদতি পণ্ডিতো;

পঞ্ঞাপাসাদমাৰুয্হ, অসোকো সোকিনিং পজং;

পব্বতট্ঠোৱ ভূমট্ঠে, ধীৰো বালে অৱেক্খতী’’তি.

তত্থ নুদতীতি যথা নাম পোক্খৰণিং পৱিসন্তং নৱোদকং পুৰাণোদকং খোভেত্ৱা তস্সোকাসং অদত্ৱা তং অত্তনো মত্থকমত্থকেন পলাযন্তং নুদতি নীহৰতি, এৱমেৱ পণ্ডিতো অপ্পমাদলক্খণং ব্ৰূহেন্তো পমাদস্সোকাসং অদত্ৱা যদা অপ্পমাদৱেগেন তং নুদতি নীহৰতি, অথ সো পনুন্নপমাদো অচ্চুগ্গতত্থেন পৰিসুদ্ধং দিব্বচক্খুসঙ্খাতং পঞ্ঞাপাসাদং তস্স অনুচ্ছৱিকং পটিপদং পূৰেন্তো তায পটিপদায নিস্সেণিযা পাসাদং ৱিয আৰুয্হ পহীনসোকসল্লতায অসোকো, অপ্পহীনসোকসল্লতায সোকিনিং পজং সত্তনিকাযং চৱমানঞ্চেৱ উপপজ্জমানঞ্চ দিব্বচক্খুনা অৱেক্খতি পস্সতি. যথা কিং? পব্বতট্ঠোৱ ভূমট্ঠেতি পব্বতমুদ্ধনি ঠিতো ভূমিযং ঠিতে, উপৰিপাসাদে ৱা পন ঠিতো পাসাদপৰিৱেণে ঠিতে অকিচ্ছেন অৱেক্খতি, তথা সোপি ধীৰো পণ্ডিতো মহাখীণাসৱো অসমুচ্ছিন্নৱট্টবীজে বালে চৱন্তে চ উপপজ্জন্তে চ অকিচ্ছেন অৱেক্খতীতি.

গাথাপৰিযোসানে বহূ সোতাপত্তিফলাদীনি সচ্ছিকৰিংসূতি.

মহাকস্সপত্থেৰৱত্থু পঞ্চমং.