৯. ৱট্টপোতকচৰিযাৱণ্ণনা

৭২. নৱমে মগধে ৱট্টপোতকোতিআদীসু অযং সঙ্খেপত্থো – মগধৰট্ঠে অঞ্ঞতৰস্মিং অৰঞ্ঞপ্পদেসে ৱট্টকযোনিযং নিব্বত্তিত্ৱা অণ্ডকোসং পদালেত্ৱা অচিৰনিক্খন্ততায তৰুণো মংসপেসিভূতো, ততো এৱ অজাতপক্খো ৱট্টকচ্ছাপকো যদা অহং কুলাৱকেযেৱ হোমি.

৭৩. মুখতুণ্ডকেনাহৰিত্ৱাতি ময্হং মাতা অত্তনো মুখতুণ্ডকেন কালেন কালং গোচৰং আহৰিত্ৱা মং পোসেতি. তস্সা ফস্সেন জীৱামীতি পৰিসেদনত্থঞ্চেৱ পৰিভাৱনত্থঞ্চ সম্মদেৱ কালেন কালং মমং অধিসযনৱসেন ফুসন্তিযা তস্সা মম মাতুযা সৰীৰসম্ফস্সেন জীৱামি ৱিহৰামি অত্তভাৱং পৱত্তেমি. নত্থি মে কাযিকং বলন্তি ময্হং পন অতিতৰুণতায কাযসন্নিস্সিতং বলং নত্থি.

৭৪. সংৱচ্ছৰেতি সংৱচ্ছৰে সংৱচ্ছৰে. গিম্হসমযেতি গিম্হকালে. সুক্খৰুক্খসাখানং অঞ্ঞমঞ্ঞং সঙ্ঘট্টনসমুপ্পন্নেন অগ্গিনা তস্মিং পদেসে দৱডাহো পদিপ্পতি পজ্জলতি, সো তথা পদীপিতো. উপগচ্ছতি অম্হাকন্তি ময্হং মাতাপিতূনঞ্চাতি অম্হাকং ৱসনট্ঠানপ্পদেসং অত্তনো পতিট্ঠানস্স অসুদ্ধস্সাপি সুদ্ধভাৱকৰণেন পাৱনতো পাৱকোতি চ গতমগ্গে ইন্ধনস্স ভস্মভাৱাৱহনতো কণ্হৱত্তনীতি চ লদ্ধনামো অগ্গি ৱনৰুক্খগচ্ছে দহন্তো কালেন কালং উপগচ্ছতি.

৭৫. এৱং উপগমনতো তদাপি সদ্দাযন্তোতি ‘‘ধমধম’’ইতি এৱং সদ্দং কৰোন্তো, অনুৰৱদস্সনঞ্হেতং দাৱগ্গিনো. মহাসিখীতি পব্বতকূটসদিসানং ইন্ধনানং ৱসেন মহতিযো সিখা এতস্সাতি মহাসিখী. অনুপুব্বেন অনুক্কমেন তং অৰঞ্ঞপ্পদেসং ঝাপেন্তো দহন্তো অগ্গি মম সমীপট্ঠানং উপাগমি.

৭৬. অগ্গিৱেগভযাতি ৱেগেন আগচ্ছতো অগ্গিনো ভযেন ভীতা. তসিতাতি চিত্তুত্ৰাসসমুট্ঠিতেন কাযস্স ছম্ভিতত্তেন চ উত্ৰাসা. মাতাপিতাতি মাতাপিতৰো. অত্তানং পৰিমোচযুন্তি অগ্গিনা অনুপদ্দুতট্ঠানগমনেন অত্তনো সোত্থিভাৱমকংসু. মহাসত্তো হি তদা মহাগেণ্ডুকপ্পমাণো মহাসৰীৰো অহোসি. তং মাতাপিতৰো কেনচি উপাযেন গহেত্ৱা গন্তুং অসক্কুণন্তা অত্তসিনেহেন চ অভিভুয্যমানা পুত্তসিনেহং ছড্ডেত্ৱা পলাযিংসু.

৭৭. পাদে পক্খে পজহামীতি অত্তনো উভো পাদে উভো পক্খে চ ভূমিযং আকাসে চ গমনসজ্জে কৰোন্তো পসাৰেমি ইৰিযামি ৱাযমামি. ‘‘পটীহামী’’তিপি পাঠো, ৱেহাসগমনযোগ্গে কাতুং ঈহামীতি অত্থো. ‘‘পতীহামী’’তিপি পঠন্তি. তস্সত্থো – পাদে পক্খে চ পতি ৱিসুং ঈহামি, গমনত্থং ৱাযমামি, তং পন ৱাযামকৰণত্থমেৱ. কস্মা? যস্মা নত্থি মে কাযিকং বলং. সোহং অগতিকো তত্থাতি সো অহং এৱংভূতো পাদপক্খৱেকল্লেন গমনৱিৰহিতো মাতাপিতূনং অপগমনেন ৱা অপ্পটিসৰণো, তত্থ দাৱগ্গিউপদ্দুতে ৱনে, তস্মিং ৱা কুলাৱকে ঠিতোৱ এৱং ইদানি ৱত্তব্বাকাৰেন তদা চিন্তেসিং. দুতিযঞ্চেত্থ অহন্তি নিপাতমত্তং দট্ঠব্বং.

৭৮. ইদানি তদা অত্তনো চিন্তিতাকাৰং দস্সেতুং ‘‘যেসাহ’’ন্তিআদিমাহ;

তত্থ যেসাহং উপধাৱেয্যং, ভীতো তসিতৱেধিতোতি মৰণভযেন ভীতো ততো এৱ চিত্তুত্ৰাসেন তসিতো সৰীৰকম্পনেন ৱেধিতো যেসমহং পক্খন্তৰং এতৰহি দাৱগ্গিউপদ্দুতো জলদুগ্গং ৱিয মঞ্ঞমানো পৱিসিতুং উপধাৱেয্যং তে মম মাতাপিতৰো মং এককং এৱ ওহায জহিত্ৱা পক্কন্তা. কথং মে অজ্জ কাতৱেতি কথং নু খো মযা অজ্জ কাতব্বং, পটিপজ্জিতব্বন্তি অত্থো.

এৱং মহাসত্তো ইতিকত্তব্বতাসম্মূড়্হো হুত্ৱা ঠিতো পুন চিন্তেসি – ‘‘ইমস্মিং লোকে সীলগুণো নাম অত্থি, সচ্চগুণো নাম অত্থি, অতীতে পাৰমিযো পূৰেত্ৱা বোধিতলে নিসীদিত্ৱা অভিসম্বুদ্ধা সীলসমাধিপঞ্ঞাৱিমুত্তিৱিমুত্তিঞাণদস্সনসম্পন্না সচ্চানুদযকাৰুঞ্ঞখন্তিসমন্নাগতা সব্বসত্তেসু সমপ্পৱত্তমেত্তাভাৱনা সব্বঞ্ঞুবুদ্ধা নাম অত্থি, তেহি চ পটিৱিদ্ধো একন্তনিয্যানগুণো ধম্মো অত্থি, মযি চাপি একং সচ্চং অত্থি. সংৱিজ্জমানো একো সভাৱধম্মো পঞ্ঞাযতি, তস্মা অতীতবুদ্ধে চেৱ তেহি পটিৱিদ্ধগুণে চ আৱজ্জেত্ৱা মযি ৱিজ্জমানং সচ্চং সভাৱধম্মং গহেত্ৱা সচ্চকিৰিযং কত্ৱা অগ্গিং পটিক্কমাপেত্ৱা অজ্জ মযা অত্তনো চেৱ ইধ ৱাসীনং সেসপাণীনঞ্চ সোত্থিভাৱং কাতুং ৱট্টতী’’তি. এৱং পন চিন্তেত্ৱা মহাসত্তো অত্তনো আনুভাৱে ঠত্ৱা যথাচিন্তিতং পটিপজ্জি. তেন ৱুত্তং –

৭৯. ‘‘অত্থি লোকে সীলগুণো, সচ্চং সোচেয্যনুদ্দযা;

তেন সচ্চেন কাহামি, সচ্চকিৰিযমুত্তমং.

৮০. ‘‘আৱজ্জেত্ৱা ধম্মবলং, সৰিত্ৱা পুব্বকে জিনে;

সচ্চবলমৱস্সায, সচ্চকিৰিযমকাসহ’’ন্তি.

৮১. তত্থ মহাসত্তো অতীতে পৰিনিব্বুতানং বুদ্ধানং গুণে আৱজ্জেত্ৱা অত্তনি ৱিজ্জমানং সচ্চসভাৱং আৰব্ভ যং গাথং ৱত্ৱা তদা সচ্চকিৰিযমকাসি, তং দস্সেতুং ‘‘সন্তি পক্খা’’তিআদি ৱুত্তং.

তত্থ সন্তি পক্খা অপতনাতি ময্হং পক্খা নাম অত্থি উপলব্ভন্তি, নো চ খো সক্কা এতেহি উপ্পতিতুং আকাসেন গন্তুন্তি অপতনা. সন্তি পাদা অৱঞ্চনাতি পাদাপি মে অত্থি, তেহি পন ৱঞ্চিতুং পদৱাৰগমনেন গন্তুং ন সক্কাতি অৱঞ্চনা. মাতাপিতা চ নিক্খন্তাতি যে মং অঞ্ঞত্থ নেয্যুং, তেপি মৰণভযেন মম মাতাপিতৰো নিক্খন্তা. জাতৱেদাতি অগ্গিং আলপতি. সো হি জাতোৱ ৱেদিযতি, ধূমজালুট্ঠানেন পঞ্ঞাযতি, তস্মা ‘‘জাতৱেদো’’তি ৱুচ্চতি. পটিক্কমাতি পটিগচ্ছ নিৱত্তাতি জাতৱেদং আণাপেতি.

ইতি মহাসত্তো ‘‘সচে ময্হং পক্খানং অত্থিভাৱো, তে চ পসাৰেত্ৱা আকাসে অপতনভাৱো, পাদানং অত্থিভাৱো, তে চ উক্খিপিত্ৱা অৱঞ্চনভাৱো, মাতাপিতূনং মং কুলাৱকেযেৱ ছড্ডেত্ৱা পলাতভাৱো চ সচ্চসভাৱভূতো এৱ, জাতৱেদ, এতেন সচ্চেন ত্ৱং ইতো পটিক্কমা’’তি কুলাৱকে নিপন্নোৱ সচ্চকিৰিযং অকাসি. তস্স সহ সচ্চকিৰিযায সোড়সকৰীসমত্তে ঠানে জাতৱেদো পটিক্কমি. পটিক্কমন্তো চ ন ঝাযমানোৱ অৰঞ্ঞং গতো, উদকে পন ওপিলাপিতউক্কা ৱিয তত্থেৱ নিব্বাযি. তেন ৱুত্তং –

৮২. ‘‘সহ সচ্চে কতে ময্হং, মহাপজ্জলিতো সিখী;

ৱজ্জেসি সোড়সকৰীসানি, উদকং পত্ৱা যথা সিখী’’তি.

সা পনেসা বোধিসত্তস্স ৱট্টকযোনিযং তস্মিং সমযে বুদ্ধগুণানং আৱজ্জনপুব্বিকা সচ্চকিৰিযা অনঞ্ঞসাধাৰণাতি আহ ‘‘সচ্চেন মে সমো নত্থি, এসা মে সচ্চপাৰমী’’তি. তেনেৱ হি তস্স ঠানস্স সকলেপি ইমস্মিং কপ্পে অগ্গিনা অনভিভৱনীযত্তা তং কপ্পট্ঠিযপাটিহাৰিযং নাম জাতং.

এৱং মহাসত্তো সচ্চকিৰিযৱসেন অত্তনো তত্থ ৱাসীনং সত্তানঞ্চ সোত্থিং কত্ৱা জীৱিতপৰিযোসানে যথাকম্মং গতো.

তদা মাতাপিতৰো এতৰহি মাতাপিতৰো অহেসুং, ৱট্টকৰাজা পন লোকনাথো.

তস্স হেট্ঠা ৱুত্তনযেনেৱ সেসপাৰমিযোপি যথাৰহং নিদ্ধাৰেতব্বা. তথা দাৱগ্গিম্হি তথা ভেৰৱাকাৰেন অৱত্থৰিত্ৱা আগচ্ছন্তে তস্মিং ৱযে এককো হুত্ৱাপি সাৰদং অনাপজ্জিত্ৱা সচ্চাদিধম্মগুণে বুদ্ধগুণে চ অনুস্সৰিত্ৱা অত্তনো এৱ আনুভাৱং নিস্সায সচ্চকিৰিযায তত্থ ৱাসীনম্পি সত্তানং সোত্থিভাৱাপাদনাদযো আনুভাৱা ৱিভাৱেতব্বা.

ৱট্টপোতকচৰিযাৱণ্ণনা নিট্ঠিতা.