৮. সচ্চতাপসচৰিযাৱণ্ণনা

অট্ঠমে তাপসো সচ্চসৱ্হযোতি সচ্চসদ্দেন অৱ্হাতব্বো সচ্চনামকো তাপসো যদা যস্মিং কালে হোমি, তদা. সচ্চেন লোকং পালেসিন্তি অত্তনো অৱিসংৱাদিভাৱেন সত্তলোকং জম্বুদীপে তত্থ তত্থ সত্তনিকাযং পাপতো নানাৱিধা অনত্থতো চ ৰক্খিং. সমগ্গং জনমকাসহন্তি তত্থ তত্থ কলহৱিগ্গহৱিৱাদাপন্নং মহাজনং কলহে আদীনৱং দস্সেত্ৱা সামগ্গিযং আনিসংসকথনেন সমগ্গং অৱিৱদমানং সম্মোদমানং অহমকাসিং.

তদা হি বোধিসত্তো বাৰাণসিযং অঞ্ঞতৰস্মিং ব্ৰাহ্মণমহাসালকুলে নিব্বত্তি. তস্স ‘‘সচ্চো’’তি নামং কৰিংসু. সো ৱযপ্পত্তো তক্কসিলং গন্ত্ৱা দিসাপামোক্খস্স আচৰিযস্স সন্তিকে সিপ্পং উগ্গণ্হিত্ৱা নচিৰস্সেৱ সব্বসিপ্পানং নিপ্ফত্তিং পত্তো. আচৰিযেন অনুঞ্ঞাতো বাৰাণসিং পচ্চাগন্ত্ৱা মাতাপিতৰো ৱন্দিত্ৱা তেহি অভিনন্দিযমানো তেসং চিত্তানুৰক্খণত্থং কতিপাহং তেসং সন্তিকে ৱসি. অথ নং মাতাপিতৰো পতিৰূপেন দাৰেন সংযোজেতুকামা সব্বং ৱিভৱজাতং আচিক্খিত্ৱা ঘৰাৱাসেন নিমন্তেসুং.

মহাসত্তো নেক্খম্মজ্ঝাসযো অত্তনো নেক্খম্মপাৰমিং পৰিব্ৰূহেতুকামো ঘৰাৱাসে আদীনৱং পব্বজ্জায আনিসংসঞ্চ নানপ্পকাৰতো কথেত্ৱা মাতাপিতূনং অস্সুমুখানং ৰোদমানানং অপৰিমাণং ভোগক্খন্ধং অনন্তং যসং মহন্তঞ্চ ঞাতিপৰিৱট্টং পহায মহানাগোৱ অযসঙ্খলিকং ঘৰবন্ধনং ছিন্দন্তো নিক্খমিত্ৱা হিমৱন্তপ্পদেসং পৱিসিত্ৱা ইসিপব্বজ্জং পব্বজিত্ৱা ৱনমূলফলাফলেহি যাপেন্তো নচিৰস্সেৱ অট্ঠ সমাপত্তিযো পঞ্চ চ অভিঞ্ঞাযো নিব্বত্তেত্ৱা ঝানকীড়ং কীড়যমানো সমাপত্তিৱিহাৰেন ৱিহৰতি.

সো একদিৱসং দিব্বচক্খুনা লোকং ওলোকেন্তো অদ্দস সকলজম্বুদীপে মনুস্সে যেভুয্যেন পাণাতিপাতাদিদসঅকুসলকম্মপথপসুতে কামনিদানং কামাধিকৰণং অঞ্ঞমঞ্ঞং ৱিৱাদাপন্নে. দিস্ৱা এৱং চিন্তেসি – ‘‘ন খো পন মেতং পতিৰূপং, যদিদং ইমে সত্তে এৱং পাপপসুতে ৱিৱাদাপন্নে চ দিস্ৱা অজ্ঝুপেক্খণং. অহঞ্হি ‘সত্তে সংসাৰপঙ্কতো উদ্ধৰিত্ৱা নিব্বানথলে পতিট্ঠপেস্সামী’তি মহাসম্বোধিযানং পটিপন্নো, তস্মা তং পটিঞ্ঞং অৱিসংৱাদেন্তো যংনূনাহং মনুস্সপথং গন্ত্ৱা তে তে সত্তে পাপতো ওৰমাপেয্যং, ৱিৱাদঞ্চ নেসং ৱূপসমেয্য’’ন্তি.

এৱং পন চিন্তেত্ৱা মহাসত্তো মহাকৰুণায সমুস্সাহিতো সন্তং সমাপত্তিসুখং পহায ইদ্ধিযা তত্থ তত্থ গন্ত্ৱা তেসং চিত্তানুকূলং ধম্মং দেসেন্তো কলহৱিগ্গহৱিৱাদাপন্নে সত্তে দিট্ঠধম্মিকঞ্চ সম্পৰাযিকঞ্চ ৱিৰোধে আদীনৱং দস্সেত্ৱা অঞ্ঞমঞ্ঞং সমগ্গে সহিতে অকাসি. অনেকাকাৰৱোকাৰঞ্চ পাপে আদীনৱং ৱিভাৱেন্তো ততো সত্তে ৱিৱেচেত্ৱা একচ্চে দসসু কুসলকম্মপথধম্মেসু পতিট্ঠাপেসি. একচ্চে পব্বাজেত্ৱা সীলসংৱৰে ইন্দ্ৰিযগুত্তিযং সতিসম্পজঞ্ঞে পৱিৱেকৱাসে ঝানাভিঞ্ঞাসু চ যথাৰহং পতিট্ঠাপেসি. তেন ৱুত্তং –

৭১. ‘‘পুনাপৰং যদা হোমি, তাপসো সচ্চসৱ্হযো;

সচ্চেন লোকং পালেসিং, সমগ্গং জনমকাসহ’’ন্তি.

ইধাপি মহাপুৰিসস্স হেট্ঠা ৱুত্তনযেনেৱ সেসপাৰমিযো নিদ্ধাৰেতব্বা. তথা গুণানুভাৱা চ ৱিভাৱেতব্বাতি.

সচ্চতাপসচৰিযাৱণ্ণনা নিট্ঠিতা.