১১. কণ্হদীপাযনচৰিযাৱণ্ণনা

৯২. একাদসমে কণ্হদীপাযনো ইসীতি এৱংনামকো তাপসো. বোধিসত্তো হি তদা দীপাযনো নাম অত্তনো সহাযং মণ্ডব্যতাপসং সূলে উত্তাসিতং উপসঙ্কমিত্ৱা তস্স সীলগুণেন তং অৱিজহন্তো তিযামৰত্তিং সূলং নিস্সায ঠিতো তস্স সৰীৰতো পগ্ঘৰিত্ৱা পতিতপতিতেহি লোহিতবিন্দূহি সুক্খেহি কাড়ৱণ্ণসৰীৰতায ‘‘কণ্হদীপাযনো’’তি পাকটো অহোসি. পৰোপঞ্ঞাসৱস্সানীতি সাধিকানি পঞ্ঞাসৱস্সানি, অচ্চন্তসংযোগে উপযোগৱচনং. অনভিৰতো চৰিং অহন্তি পন্তসেনাসনেসু চেৱ অধিকুসলধম্মেসু চ অনভিৰতিৱাসং ৱসন্তো অহং ব্ৰহ্মচৰিযং অচৰিং. পব্বজিত্ৱা সত্তাহমেৱ হি তদা মহাসত্তো অভিৰতো ব্ৰহ্মচৰিযং চৰি. ততো পৰং অনভিৰতিৱাসং ৱসি.

কস্মা পন মহাপুৰিসো অনেকসতসহস্সেসু অত্তভাৱেসু নেক্খম্মজ্ঝাসযো ব্ৰহ্মচৰিযৱাসং অভিৰমিত্ৱা ইধ তং নাভিৰমি? পুথুজ্জনভাৱস্স চঞ্চলভাৱতো. কস্মা চ পুন ন অগাৰং অজ্ঝাৱসীতি? পঠমং নেক্খম্মজ্ঝাসযেন কামেসু দোসং দিস্ৱা পব্বজি. অথস্স অযোনিসোমনসিকাৰেন অনভিৰতি উপ্পজ্জি. সো তং ৱিনোদেতুমসক্কোন্তোপি কম্মঞ্চ ফলঞ্চ সদ্দহিত্ৱা তাৱ মহন্তং ৱিভৱং পহায অগাৰস্মা নিক্খমন্তো যং পজহি, পুন তদত্থমেৱ নিৱত্তো, ‘‘এড়মূগো চপলো ৱতাযং কণ্হদীপাযনো’’তি ইমং অপৱাদং জিগুচ্ছন্তো অত্তনো হিৰোত্তপ্পভেদভযেন. অপি চ পব্বজ্জাপুঞ্ঞং নামেতং ৱিঞ্ঞূহি বুদ্ধাদীহি পসত্থং, তেহি চ অনুট্ঠিতং, তস্মাপি সহাপি দুক্খেন সহাপি দোমনস্সেন অস্সুমুখো ৰোদমানোপি ব্ৰহ্মচৰিযৱাসং ৱসি, ন তং ৱিস্সজ্জেসি. ৱুত্তঞ্চেতং –

‘‘সদ্ধায নিক্খম্ম পুন নিৱত্তো, সো এড়মূগো চপলো ৱতাযং;

এতস্স ৱাদস্স জিগুচ্ছমানো, অকামকো চৰামি ব্ৰহ্মচৰিযং;

ৱিঞ্ঞুপ্পসত্থঞ্চ সতঞ্চ ঠানং, এৱম্পহং পুঞ্ঞকৰো ভৱামী’’তি. (জা. ১.১০.৬৬);

৯৩. ন কোচি এতং জানাতীতি এতং মম অনভিৰতিমনং ব্ৰহ্মচৰিযৱাসে অভিৰতিৱিৰহিতচিত্তং কোচি মনুস্সভূতো ন জানাতি. কস্মা? অহঞ্হি কস্সচি নাচিক্খিং মম মানসে চিত্তে অৰতি চৰতি পৱত্ততীতি কস্সচিপি ন কথেসিং, তস্মা ন কোচি মনুস্সভূতো এতং জানাতীতি.

৯৪. ‘‘সব্ৰহ্মচাৰী মণ্ডব্যো, সহাযো মে মহাইসি;

পুব্বকম্মসমাযুত্তো, সূলমাৰোপনং লভি.

.

সব্ৰহ্মচাৰীতি তাপসপব্বজ্জায সমানসিক্খতায সব্ৰহ্মচাৰী. মণ্ডব্যোতি এৱংনামকো. সহাযোতি গিহিকালে পব্বজিতকালে চ দড়্হমিত্ততায পিযসহাযো. মহাইসীতি মহানুভাৱো ইসি. পুব্বকম্মসমাযুত্তো, সূলমাৰোপনং লভীতি কতোকাসেন অত্তনো পুব্বকম্মেন যুত্তো সূলাৰোপনং লভি, সূলং উত্তাসিতোতি.

তত্ৰাযং অনুপুব্বিকথা – অতীতে ৱংসৰট্ঠে কোসম্বিযং কোসম্বিকো নাম ৰাজা ৰজ্জং কাৰেসি. তদা বোধিসত্তো অঞ্ঞতৰস্মিং নিগমে অসীতিকোটিৱিভৱস্স ব্ৰাহ্মণমহাসালস্স পুত্তো হুত্ৱা নিব্বত্তি, নামেন দীপাযনো নাম. তাদিসস্সেৱ ব্ৰাহ্মণমহাসালস্স পুত্তো ব্ৰাহ্মণকুমাৰো তস্স পিযসহাযো অহোসি, নামেন মণ্ডব্যো নাম. তে উভোপি অপৰভাগে মাতাপিতূনং অচ্চযেন কামেসু দোসং দিস্ৱা মহাদানং পৱত্তেত্ৱা কামে পহায ঞাতিমিত্তপৰিজনস্স ৰোদন্তস্স পৰিদেৱন্তস্স নিক্খমিত্ৱা হিমৱন্তপ্পদেসে অস্সমং কত্ৱা পব্বজিত্ৱা উঞ্ছাচৰিযায ৱনমূলফলাহাৰেন যাপেন্তো পৰোপণ্ণাসৱস্সানি ৱসিংসু, কামচ্ছন্দং ৱিক্খম্ভেতুং নাসক্খিংসু, তে ঝানমত্তম্পি ন নিব্বত্তেসুং.

তে লোণম্বিলসেৱনত্থায জনপদচাৰিকং চৰন্তা কাসিৰট্ঠং সম্পাপুণিংসু. তত্ৰেকস্মিং নিগমে দীপাযনস্স গিহিসহাযো মণ্ডব্যো নাম পটিৱসতি. তে উভোপি তস্স সন্তিকং উপসঙ্কমিংসু. সো তে দিস্ৱা অত্তমনো পণ্ণসালং কাৰেত্ৱা চতূহি পচ্চযেহি উপট্ঠহি. তে তত্থ তীণি চত্তাৰি ৱস্সানি ৱসিত্ৱা তং আপুচ্ছিত্ৱা চাৰিকং চৰন্তা বাৰাণসিসমীপে অতিমুত্তকসুসানে ৱসিংসু. তত্থ দীপাযনো যথাভিৰন্তং ৱিহৰিত্ৱা পুন তস্মিং নিগমে মণ্ডব্যস্স অত্তনো সহাযস্স সন্তিকং গতো. মণ্ডব্যতাপসো তত্থেৱ ৱসি.

অথেকদিৱসং একো চোৰো অন্তোনগৰে চোৰিকং কত্ৱা ধনসাৰং আদায নিক্খন্তো পটিবুদ্ধেহি গেহসামিকেহি নগৰাৰক্খকমনুস্সেহি চ অনুবদ্ধো নিদ্ধমনেন নিক্খমিত্ৱা ৱেগেন সুসানং পৱিসিত্ৱা তাপসস্স পণ্ণসালদ্ৱাৰে ভণ্ডিকং ছড্ডেত্ৱা পলাযি. মনুস্সা ভণ্ডিকং দিস্ৱা ‘‘অৰে দুট্ঠজটিল, ৰত্তিং, চোৰিকং কত্ৱা দিৱা তাপসৱেসেন চৰসী’’তি তজ্জেত্ৱা পোথেত্ৱা তং আদায ৰঞ্ঞো দস্সযিংসু. ৰাজা অনুপপৰিক্খিত্ৱাৱ ‘‘সূলে উত্তাসেথা’’তি আহ. তং সুসানং নেত্ৱা খদিৰসূলে আৰোপযিংসু. তাপসস্স সৰীৰে সূলং ন পৱিসতি. ততো নিম্বসূলং আহৰিংসু, তম্পি ন পৱিসতি. ততো অযসূলং আহৰিংসু, তম্পি ন পৱিসতি. তাপসো ‘‘কিং নু খো মে পুব্বকম্ম’’ন্তি চিন্তেসি. তস্স জাতিস্সৰঞাণং উপ্পজ্জি. তেন পুব্বকম্মং অদ্দস – সো কিৰ পুৰিমত্তভাৱে ৱড্ঢকীপুত্তো হুত্ৱা পিতু ৰুক্খতচ্ছনট্ঠানং গন্ত্ৱা একং মক্খিকং গহেত্ৱা কোৱিড়াৰসকলিকায সূলেন ৱিয ৱিজ্ঝি. তস্স তং পাপং ইমস্মিং ঠানে ওকাসং লভি. সো ‘‘ন সক্কা ইতো পাপতো মুচ্চিতু’’ন্তি ঞত্ৱা ৰাজপুৰিসে আহ – ‘‘সচে মং সূলে উত্তাসেতুকামত্থ, কোৱিড়াৰসূলং আহৰথা’’তি. তে তথা কত্ৱা তং সূলে উত্তাসেত্ৱা আৰক্খং দত্ৱা পক্কমিংসু.

তদা কণ্হদীপাযনো ‘‘চিৰদিট্ঠো মে সহাযো’’তি মণ্ডব্যস্স সন্তিকং আগচ্ছন্তো তং পৱত্তিং সুত্ৱা তং ঠানং গন্ত্ৱা একমন্তং ঠিতো ‘‘কিং, সম্ম, কাৰকোসী’’তি পুচ্ছিত্ৱা ‘‘অকাৰকোম্হী’’তি ৱুত্তে ‘‘অত্তনো মনোপদোসং ৰক্খিতুং সক্খি ন সক্খী’’তি পুচ্ছি. ‘‘সম্ম, যেহি অহং গহিতো, নেৱ তেসং ন ৰঞ্ঞো উপৰি ময্হং মনোপদোসো অত্থী’’তি. ‘‘এৱং সন্তে তাদিসস্স সীলৱতো ছাযা ময্হং সুখা’’তি ৱত্ৱা কণ্হদীপাযনো সূলং নিস্সায নিসীদি. আৰক্খকপুৰিসা তং পৱত্তিং ৰঞ্ঞো আৰোচেসুং. ৰাজা ‘‘অনিসামেত্ৱা মে কত’’ন্তি ৱেগেন তত্থ গন্ত্ৱা ‘‘কস্মা, ভন্তে, ত্ৱং সূলং নিস্সায নিসিন্নোসী’’তি দীপাযনং পুচ্ছি. ‘‘মহাৰাজ, ইমং তাপসং ৰক্খন্তো নিসিন্নোস্মী’’তি. ‘‘কিং পন ত্ৱং ইমস্স কাৰকভাৱং ঞত্ৱা এৱং কৰোসী’’তি. সো কম্মস্স অৱিসোধিতভাৱং আচিক্খি. অথস্স দীপাযনো ‘‘ৰঞ্ঞা নাম নিসম্মকাৰিনা ভৱিতব্বং.

‘‘অলসো গিহী কামভোগী ন সাধু, অসঞ্ঞতো পব্বজিতো ন সাধু;

ৰাজা ন সাধু অনিসম্মকাৰী, যো পণ্ডিতো কোধনো তং ন সাধূ’’তি. (জা. ১.৪.১২৭; ১.৫.৪; ১.১০.১৫৩; ১.১৫.২২৯) –

আদীনি ৱত্ৱা ধম্মং দেসেসি.

ৰাজা মণ্ডব্যতাপসস্স নিদ্দোসভাৱং ঞত্ৱা ‘‘সূলং হৰথা’’তি আণাপেসি. সূলং হৰন্তা হৰিতুং নাসক্খিংসু. মণ্ডব্যো আহ – ‘‘মহাৰাজ, অহং পুব্বে কতকম্মদোসেন এৱৰূপং অযসং পত্তো, মম সৰীৰতো সূলং হৰিতুং ন সক্কা, সচেপি ময্হং জীৱিতং দাতুকামো, ককচেন ইমং সূলং চম্মসমং কত্ৱা ছিন্দাপেহী’’তি. ৰাজা তথা কাৰেসি. সূলং অন্তোযেৱ অহোসি, ন কঞ্চি পীড়ং জনেসি. তদা কিৰ সুখুমং সকলিকহীৰং গহেত্ৱা মক্খিকায ৱচ্চমগ্গং পৱেসেসি, তং তস্স অন্তো এৱ অহোসি. সো তেন কাৰণেন অমৰিত্ৱা, অত্তনো আযুক্খযেনেৱ মৰি, তস্মা অযম্পি ন মতোতি. ৰাজা তাপসে ৱন্দিত্ৱা খমাপেত্ৱা উভোপি উয্যানেযেৱ ৱসাপেন্তো পটিজগ্গি. ততো পট্ঠায সো আণিমণ্ডব্যো নাম জাতো. সো ৰাজানং উপনিস্সায তত্থেৱ ৱসি. দীপাযনো পন তস্স ৱণং ফাসুকং কৰিত্ৱা অত্তনো গিহিসহাযমণ্ডব্যেন কাৰিতং পণ্ণসালমেৱ গতো. তেন ৱুত্তং –

৯৫. ‘‘তমহং উপট্ঠহিত্ৱান, আৰোগ্যমনুপাপযিং;

আপুচ্ছিত্ৱান আগঞ্ছিং, যং ময্হং সকমস্সম’’ন্তি.

তত্থ আপুচ্ছিত্ৱানাতি ময্হং সহাযং মণ্ডব্যতাপসং আপুচ্ছিত্ৱা. যং ময্হং সকমস্সমন্তি যং তং ময্হং গিহিসহাযেন মণ্ডব্যব্ৰাহ্মণেন কাৰিতং সকং মম সন্তকং অস্সমপদং পণ্ণসালা, তং উপাগঞ্ছিং.

৯৬. তং পন পণ্ণসালং পৱিসন্তং দিস্ৱা সহাযস্স আৰোচেসুং. সো সুত্ৱাৱ তুট্ঠচিত্তো সপুত্তদাৰো বহুগন্ধমালফাণিতাদীনি আদায পণ্ণসালং গন্ত্ৱা দীপাযনং ৱন্দিত্ৱা পাদে ধোৱিত্ৱা পানকং পাযেত্ৱা আণিমণ্ডব্যস্স পৱত্তিং সুণন্তো নিসীদি. অথস্স পুত্তো যঞ্ঞদত্তকুমাৰো নাম চঙ্কমনকোটিযং গেণ্ডুকেন কীড়ি. তত্থ চেকস্মিং ৱম্মিকে আসিৱিসো ৱসতি. কুমাৰেন ভূমিযং পহতগেণ্ডুকো গন্ত্ৱা ৱম্মিকবিলে আসিৱিসস্স মত্থকে পতি. কুমাৰো অজানন্তো বিলে হত্থং পৱেসেসি.

অথ নং কুদ্ধো আসিৱিসো হত্থে ডংসি. সো ৱিসৱেগেন মুচ্ছিতো তত্থেৱ পতি. অথস্স মাতাপিতৰো সপ্পেন দট্ঠভাৱং ঞত্ৱা কুমাৰং উক্খিপিত্ৱা তাপসস্স পাদমূলে নিপজ্জাপেত্ৱা ‘‘ভন্তে, ওসধেন ৱা মন্তেন ৱা পুত্তকং নো নীৰোগং কৰোথা’’তি আহংসু. সো ‘‘অহং ওসধং ন জানামি, নাহং ৱেজ্জকম্মং কৰিস্সামি, পব্বজিতোম্হী’’তি. ‘‘তেন হি, ভন্তে, ইমস্মিং কুমাৰকে মেত্তং কত্ৱা সচ্চকিৰিযং কৰোথা’’তি. তাপসো ‘‘সাধু সচ্চকিৰিযং কৰিস্সামী’’তি ৱত্ৱা যঞ্ঞদত্তস্স সীসে হত্থং ঠপেত্ৱা সচ্চকিৰিযং অকাসি. তেন ৱুত্তং ‘‘সহাযো ব্ৰাহ্মণো ময্হ’’ন্তিআদি.

তত্থ আগঞ্ছুং পাহুনাগতন্তি অতিথিঅভিগমনং অভিগমিংসু.

৯৭. ৱট্টমনুক্খিপন্তি খিপনৱট্টসণ্ঠানতায ‘‘ৱট্ট’’ন্তি লদ্ধনামং গেণ্ডুকং অনুক্খিপন্তো, গেণ্ডুককীড়ং কীড়ন্তোতি অত্থো. আসিৱিসমকোপযীতি ভূমিযং পটিহতো হুত্ৱা ৱম্মিকবিলগতেন গেণ্ডুকেন তত্থ ঠিতং কণ্হসপ্পং সীসে পহৰিত্ৱা ৰোসেসি.

৯৮. ৱট্টগতং মগ্গং, অন্ৱেসন্তোতি তেন ৱট্টেন গতং মগ্গং গৱেসন্তো. আসিৱিসস্স হত্থেন, উত্তমঙ্গং পৰামসীতি ৱম্মিকবিলং পৱেসিতেন অত্তনো হত্থেন আসীৱিসস্স সীসং ফুসি.

৯৯. ৱিসবলস্সিতোতি ৱিসবলনিস্সিতো অত্তনো ৱিসৱেগং নিস্সায উপ্পজ্জনকসপ্পো. অডংসি দাৰকং খণেতি তস্মিং পৰামসিতক্খণে এৱ তং ব্ৰাহ্মণকুমাৰং ডংসি.

১০০. সহদট্ঠোতি ডংসেন সহেৱ, দট্ঠসমকালমেৱ. আসিৱিসেনাতি ঘোৰৱিসেন. তেনাতি তেন দাৰকস্স ৱিসৱেগেন মুচ্ছিতস্স ভূমিযং পতনেন অহং দুক্খিতো অহোসিং. মম ৱাহসি তং দুক্খন্তি তং দাৰকস্স মাতাপিতূনঞ্চ দুক্খং মম ৱাহসি, ময্হং সৰীৰে ৱিয মম কৰুণায ৱাহেসি.

১০১. ত্যাহন্তি তে তস্স দাৰকস্স মাতাপিতৰো অহং ‘‘মা সোচথ, মা পৰিদেৱথা’’তিআদিনা নযেন সমস্সাসেত্ৱা. সোকসল্লিতেতি সোকসল্লৱন্তে. অগ্গন্তি সেট্ঠং ততো এৱ ৱৰং উত্তমং সচ্চকিৰিযং অকাসিং.

১০২. ইদানি তং সচ্চকিৰিযং সৰূপেন দস্সেতুং ‘‘সত্তাহমেৱা’’তি গাথমাহ.

তত্থ সত্তাহমেৱাতি পব্বজিতদিৱসতো পট্ঠায সত্ত অহানি এৱ. পসন্নচিত্তোতি কম্মফলসদ্ধায পসন্নমানসো. পুঞ্ঞত্থিকোতি পুঞ্ঞেন অত্থিকো, ধম্মচ্ছন্দযুত্তো. অথাপৰং যং চৰিতন্তি অথ তস্মা সত্তাহা উত্তৰি যং মম ব্ৰহ্মচৰিযচৰণং.

১০৩. অকামকোৱাহীতি পব্বজ্জং অনিচ্ছন্তো এৱ. এতেন সচ্চেন সুৱত্থি হোতূতি সচে অতিৰেকপঞ্ঞাসৱস্সানি অনভিৰতিৱাসং ৱসন্তেন মযা কস্সচি অজানাপিতভাৱো সচ্চো, এতেন সচ্চেন যঞ্ঞদত্তকুমাৰস্স সোত্থি হোতু, জীৱিতং পটিলভতূতি.

এৱং পন মহাসত্তেন সচ্চকিৰিযায কতায যঞ্ঞদত্তস্স সৰীৰতো ৱিসং ভস্সিত্ৱা পথৱিং পাৱিসি. কুমাৰো অক্খীনি উম্মীলেত্ৱা মাতাপিতৰো ওলোকেত্ৱা ‘‘অম্ম, তাতা’’তি ৱত্ৱা ৱুট্ঠাসি. তেন ৱুত্তং –

১০৪. ‘‘সহ সচ্চে কতে ময্হং, ৱিসৱেগেন ৱেধিতো;

অবুজ্ঝিত্ৱান ৱুট্ঠাসি, অৰোগো চাসি মাণৱো’’তি.

তস্সত্থো – মম সচ্চকৰণেন সহ সমানকালমেৱ ততো পুব্বে ৱিসৱেগেন ৱেধিতো কম্পিতো ৱিসঞ্ঞিভাৱেন অবুজ্ঝিত্ৱা ঠিতো ৱিগতৱিসত্তা পটিলদ্ধসঞ্ঞো সহসা ৱুট্ঠাসি. সো মাণৱো কুমাৰো ৱিসৱেগাভাৱেন অৰোগো চ অহোসীতি.

ইদানি সত্থা তস্সা অত্তনো সচ্চকিৰিযায পৰমত্থপাৰমিভাৱং দস্সেন্তো ‘‘সচ্চেন মে সমো নত্থি, এসা মে সচ্চপাৰমী’’তি আহ. তং উত্তানত্থমেৱ. জাতকট্ঠকথাযং (জা. অট্ঠ. ৪.১০.৬২) পন ‘‘মহাসত্তস্স সচ্চকিৰিযায কুমাৰস্স থনপ্পদেসতো উদ্ধং ৱিসং ভস্সিত্ৱা ৱিগতং. দাৰকস্স পিতু সচ্চকিৰিযায কটিতো উদ্ধং, মাতু সচ্চকিৰিযায অৱসিট্ঠসৰীৰতো ৱিসং ভস্সিত্ৱা ৱিগত’’ন্তি আগতং. তথা হি ৱুত্তং –

‘‘যস্মা দানং নাভিনন্দিং কদাচি, দিস্ৱানহং অতিথিং ৱাসকালে;

ন চাপি মে অপ্পিযতং অৱেদুং, বহুস্সুতা সমণব্ৰাহ্মণা চ;

অকামকো ৱাপি অহং দদামি, এতেন সচ্চেন সুৱত্থি হোতু;

হতং ৱিসং জীৱতু যঞ্ঞদত্তো.

‘‘আসীৱিসো তাত পহূততেজো, যো তং অদংসী পতৰা উদিচ্চ;

তস্মিঞ্চ মে অপ্পিযতায অজ্জ, পিতৰি চ তে নত্থি কোচি ৱিসেসো;

এতেন সচ্চেন সুৱত্থি হোতু, হতং ৱিসং জীৱতু যঞ্ঞদত্তো’’তি.

তত্থ ৱাসকালেতি ৱসনত্থায গেহং আগতকালে. ন চাপি মে অপ্পিযতং অৱেদুন্তি বহুস্সুতাপি সমণব্ৰাহ্মণা অযং নেৱ দানং অভিনন্দতি, ন অম্হেতি ইমং মম অপ্পিযভাৱং নেৱ জানিংসু. অহঞ্হি তে পিযচক্খূহিযেৱ ওলোকেমীতি দীপেতি. এতেন সচ্চেনাতি সচে অহং দদমানোপি ৱিপাকং অসদ্দহিত্ৱা অত্তনো অনিচ্ছায দেমি, অনিচ্ছভাৱঞ্চ মে পৰে ন জানন্তি, এতেন সচ্চেন সুৱত্থি হোতূতি অত্থো. ইতৰগাথায, তাতাতি পুত্তং আলপতি. পহূততেজোতি বলৱৱিসো. পতৰাতি পদৰা, অযমেৱ ৱা পাঠো. উদিচ্চাতি উদ্ধং গন্ত্ৱা, ৱম্মিকবিলতো উট্ঠহিত্ৱাতি অত্থো. ইদং ৱুত্তং হোতি – তাত যঞ্ঞদত্ত, তস্মিঞ্চ আসিৱিসে তৱ চ পিতৰি অপ্পিযভাৱেন ময্হং কোচি ৱিসেসো নত্থি, তঞ্চ পন অপ্পিযভাৱং ঠপেত্ৱা অজ্জ মযা ন কোচি জানাপিতপুব্বো, সচে এতং সচ্চং, এতেন সচ্চেন সুৱত্থি হোতূতি.

এৱং বোধিসত্তো কুমাৰে অৰোগে জাতে তস্স পিতৰং ‘‘দানং দদন্তেন নাম কম্মঞ্চ ফলঞ্চ সদ্দহিত্ৱা দাতব্ব’’ন্তি কম্মফলসদ্ধায নিৱেসেত্ৱা সযং অনভিৰতিং ৱিনোদেত্ৱা ঝানাভিঞ্ঞাযো উপ্পাদেত্ৱা আযুপৰিযোসানে ব্ৰহ্মলোকপৰাযনো অহোসি.

তদা মণ্ডব্যো আনন্দত্থেৰো অহোসি, তস্স ভৰিযা ৱিসাখা, পুত্তো ৰাহুলত্থেৰো, আণিমণ্ডব্যো সাৰিপুত্তত্থেৰো, কণ্হদীপাযনো লোকনাথো.

তস্স ইধ পাড়িযা আৰুড়্হা সচ্চপাৰমী, সেসা চ পাৰমিযো হেট্ঠা ৱুত্তনযেনেৱ নিদ্ধাৰেতব্বা. তথা অনৱসেসমহাভোগপৰিচ্চাগাদযো গুণানুভাৱা ৱিভাৱেতব্বাতি.

কণ্হদীপাযনচৰিযাৱণ্ণনা নিট্ঠিতা.