৯. অলীনসত্তুচৰিযাৱণ্ণনা

৭৪. নৱমে পঞ্চালৰট্ঠেতি এৱংনামকে জনপদে. নগৰৱৰে, কপিলাযন্তি ‘‘কপিলা’’তি এৱংলদ্ধনামে উত্তমনগৰে. ‘‘নগৰৱৰে’’তি ৱত্ৱা পুন ‘‘পুৰুত্তমে’’তি ৱচনং তস্মিং কালে জম্বুদীপে সব্বনগৰানং তস্স নগৰস্স অগ্গনগৰভাৱদস্সনত্থং. জযদ্দিসো নামাতি ৰঞ্ঞা অত্তনো পচ্চত্থিকে জিতে জাতো, অত্তনো ৱা পচ্চামিত্তভূতং যক্খিনীসঙ্খাতং জযদ্দিসং জিতোতি এৱংলদ্ধনামো. সীলগুণমুপাগতোতি আচাৰসীলঞ্চেৱ উস্সাহসম্পত্তিযাদিৰাজগুণঞ্চ উপাগতো, তেন সমন্নাগতোতি অত্থো.

৭৫. তস্স ৰঞ্ঞোতি জযদ্দিসৰাজস্স, অহং পুত্তো অহোসিন্তি ৱচনসেসো. সুতধম্মোতি যাৱতা ৰাজপুত্তেন সোতব্বধম্মো নাম, তস্স সব্বস্স সুতত্তা সুতধম্মো, বহুস্সুতোতি অত্থো. অথ ৱা সুতধম্মোতি ৱিস্সুতধম্মো, ধম্মচৰিযায সমচৰিযায পকাসো পঞ্ঞাতো, লোকে পত্থটকিত্তিধম্মোতি অত্থো. অলীনসত্তোতি এৱংনামো. গুণৱাতি উড়াৰেহি মহাপুৰিসগুণেহি সমন্নাগতো. অনুৰক্খপৰিজনো সদাতি সদ্ধাদিগুণৱিসেসযোগতো চতূহি সঙ্গহৱত্থূহি সম্মদেৱ সঙ্গহণতো চ সব্বকালং সম্ভত্তপৰিৱাৰজনো.

৭৬. পিতা মে মিগৱং গন্ত্ৱা, পোৰিসাদং উপাগমীতি ময্হং পিতা জযদ্দিসৰাজা মিগৱং চৰন্তো অৰঞ্ঞমজ্ঝং গন্ত্ৱা পোৰিসাদং মনুস্সখাদকং যক্খিনিপুত্তং উপগঞ্ছি, তেন সমাগমি.

জযদ্দিসৰাজা কিৰ একদিৱসং ‘‘মিগৱং গমিস্সামী’’তি তদনুৰূপেন মহতা পৰিৱাৰেন কপিলনগৰতো নিক্খমি. তং নিক্খন্তমত্তমেৱ তক্কসিলাৱাসী নন্দো নাম ব্ৰাহ্মণো চতস্সো সতাৰহা গাথা নাম কথেতুং আদায উপসঙ্কমিত্ৱা অত্তনো আগমনকাৰণং ৰঞ্ঞো আৰোচেসি. ৰাজা ‘‘নিৱত্তিত্ৱা সুণিস্সামী’’তি তস্স ৱসনগেহং পৰিব্বযঞ্চ দাপেত্ৱা অৰঞ্ঞং পৱিট্ঠো ‘‘যস্স পস্সেন মিগো পলাযতি, তস্সেৱ সো গীৱা’’তি ৱত্ৱা মিগে পৰিযেসন্তো ৱিচৰতি. অথেকো পসদমিগো মহাজনস্স পদসদ্দেন আসযতো নিক্খমিত্ৱা ৰঞ্ঞো অভিমুখো গন্ত্ৱা পলাযি. অমচ্চা পৰিহাসং কৰিংসু. ৰাজা তং অনুবন্ধিত্ৱা তিযোজনমত্থকে তং পৰিক্খীণজৱং ঠিতং ৱিজ্ঝিত্ৱা পাতেসি. পতিতং খগ্গেন দ্ৱিধা কত্ৱা অনত্থিকোপি ‘‘মংসেন মিগং গহেতুং নাসক্খী’’তি ৱচনমোচনত্থং কাজে কত্ৱা আগচ্ছন্তো একস্স নিগ্ৰোধস্স মূলে দব্বতিণেসু নিসীদিত্ৱা থোকং ৱিস্সমিত্ৱা গন্তুং আৰভি.

তেন চ সমযেন তস্সেৱ ৰঞ্ঞো জেট্ঠভাতা জাতদিৱসে এৱ একায যক্খিনিযা খাদিতুং গহিতো আৰক্খমনুস্সেহি অনুবদ্ধায তায নিদ্ধমনমগ্গেন গচ্ছন্তিযা উৰে ঠপিতো মাতুসঞ্ঞায মুখেন থনগ্গহণেন পুত্তসিনেহং উপ্পাদেত্ৱা সংৱড্ঢিযমানো তদাহাৰোপযোগিতায মনুস্সমংসং খাদন্তো অনুক্কমেন ৱুদ্ধিপ্পত্তো অত্তানং অন্তৰধাপনত্থং যক্খিনিযা দিন্নওসধমূলানুভাৱেন অন্তৰহিতো হুত্ৱা মনুস্সমংসং খাদিত্ৱা জীৱন্তো তায যক্খিনিযা মতায তং ওসধমূলং অত্তনো পমাদেন নাসেত্ৱা দিস্সমানৰূপোৱ মনুস্সমংসং খাদন্তো নগ্গো উব্বিগ্গৱিৰূপদস্সনো ৰাজপুৰিসেহি পস্সিত্ৱা অনুবদ্ধো পলাযিত্ৱা অৰঞ্ঞং পৱিসিত্ৱা তস্স নিগ্ৰোধস্স মূলে ৱাসং কপ্পেন্তো ৰাজানং দিস্ৱা ‘‘ভক্খোসি মে’’তি হত্থে অগ্গহেসি. তেন ৱুত্তং ‘‘সো মে পিতুমগ্গহেসি, ভক্খোসি মম মা চলী’’তিআদি.

তত্থ সো মে পিতুমগ্গহেসীতি সো পোৰিসাদো মম পিতৰং জযদ্দিসৰাজানং অত্তনো নিসিন্নৰুক্খসমীপমাগতং ‘‘মম ভক্খো ত্ৱং আগতোসি, হত্থপৰিপ্ফন্দনাদিৱসেন মা চলি, চলন্তম্পি অহং তং খাদিস্সামী’’তি হত্থে অগ্গহেসি.

৭৭. তস্সাতি তস্স যক্খিনিপুত্তস্স. তসিতৱেধিতোতি চিত্তুত্ৰাসেন তসিতো সৰীৰপৰিকম্পেন ৱেধিতো. ঊৰুক্খম্ভোতি উভিন্নং ঊৰূনং থদ্ধভাৱো, যেন সো ততো পলাযিতুং নাসক্খি.

মিগৱং গহেত্ৱা মুঞ্চস্সূতি এত্থ মিগৱন্তি মিগৱৱসেন লদ্ধত্তা তং মিগমংসং ‘‘মিগৱ’’ন্তি আহ, ইমং মিগমংসং গহেত্ৱা মং মুঞ্চস্সূতি অত্থো. সো হি ৰাজা নং যক্খিনিপুত্তং দিস্ৱা ভীতো ঊৰুক্খম্ভং পত্ৱা খাণুকো ৱিয অট্ঠাসি. সো ৱেগেন গন্ত্ৱা তং হত্থে গহেত্ৱা ‘‘ভক্খোসি মে আগতোসী’’তি আহ. অথ নং ৰাজা সতিং পচ্চুপট্ঠপেত্ৱা ‘‘সচে আহাৰত্থিকো, ইমং তে মংসং দদামি, তং গহেত্ৱা খাদ, মং মুঞ্চাহী’’তি আহ. তং সুত্ৱা পোৰিসাদো ‘‘কিমিদং ময্হমেৱ সন্তকং দত্ৱা মযা ৱোহাৰং কৰোসি, ননু ইমং মংসঞ্চ ত্ৱঞ্চ মম হত্থগতকালতো পট্ঠায ময্হমেৱ সন্তকং, তস্মা তং পঠমং খাদিত্ৱা পচ্ছা মংসং খাদিস্সামী’’তি আহ.

অথ ৰাজা ‘‘মংসনিক্কযেনাযং ন মং মুঞ্চতি, মযা চ মিগৱং আগচ্ছন্তেন তস্স ব্ৰাহ্মণস্স ‘আগন্ত্ৱা তে ধনং দস্সামী’তি পটিঞ্ঞা কতা. সচাযং যক্খো অনুজানিস্সতি, সচ্চং অনুৰক্খন্তো গেহং গন্ত্ৱা তং পটিঞ্ঞং মোচেত্ৱা পুন ইমস্স যক্খস্স ভত্তত্থং আগচ্ছেয্য’’ন্তি চিন্তেত্ৱা তস্স তমত্থং আৰোচেসি. তং সুত্ৱা পোৰিসাদো ‘‘সচে ত্ৱং সচ্চং অনুৰক্খন্তো গন্তুকামোসি, গন্ত্ৱা তস্স ব্ৰাহ্মণস্স দাতব্বং ধনং দত্ৱা সচ্চং অনুৰক্খন্তো সীঘং পুন আগচ্ছেয্যাসী’’তি ৱত্ৱা ৰাজানং ৱিস্সজ্জেসি. সো তেন ৱিস্সট্ঠো ‘‘ত্ৱং মা চিন্তযি, অহং পাতোৱ আগমিস্সামী’’তি ৱত্ৱা মগ্গনিমিত্তানি সল্লক্খেন্তো অত্তনো বলকাযং উপগন্ত্ৱা তেন পৰিৱুতো নগৰং পৱিসিত্ৱা নন্দব্ৰাহ্মণং পক্কোসাপেত্ৱা মহাৰহে আসনে নিসীদাপেত্ৱা তা গাথা সুত্ৱা চত্তাৰি সহস্সানি দত্ৱা যানং আৰোপেত্ৱা ‘‘ইমং তক্কসিলমেৱ নেথা’’তি মনুস্সে দত্ৱা ব্ৰাহ্মণং উয্যোজেত্ৱা দুতিযদিৱসে পোৰিসাদস্স সন্তিকং গন্তুকামো পুত্তং ৰজ্জে পতিট্ঠপেতুং অনুসাসনিঞ্চ দেন্তো তমত্থং আৰোচেসি. তেন ৱুত্তং –

৭৮. ‘‘মিগৱং গহেত্ৱা মুঞ্চস্সু, কত্ৱা আগমনং পুন;

ব্ৰাহ্মণস্স ধনং দত্ৱা, পিতা আমন্তযী মমং.

৭৯. ‘‘ৰজ্জং পুত্ত পটিপজ্জ, মা পমজ্জি পুৰং ইদং;

কতং মে পোৰিসাদেন, মম আগমনং পুনা’’তি.

তত্থ আগমনং পুনাতি পুন আগমনং পটিঞ্ঞাতস্স পোৰিসাদস্স সঙ্গৰং কত্ৱা. ব্ৰাহ্মণস্স ধনং দত্ৱাতি তক্কসিলতো আগতস্স নন্দনামস্স ব্ৰাহ্মণস্স তা গাথা সুত্ৱা চতুসহস্সপৰিমাণং ধনং দত্ৱা. পিতা আমন্তযী মমন্তি মম পিতা জযদ্দিসৰাজা মং আমন্তেসি.

কথং আমন্তেসীতি চে? আহ ‘‘ৰজ্জ’’ন্তিআদি. তস্সত্থো – পুত্ত, ত্ৱং ইমং কুলসন্তকং ৰজ্জং পটিপজ্জ, যথাহং ধম্মেন সমেন ৰজ্জং কাৰেমি, এৱং ত্ৱম্পি ছত্তং উস্সাপেত্ৱা ৰজ্জং কাৰেহি. ত্ৱং ইদং পুৰং ৰক্খন্তো ৰজ্জঞ্চ কাৰেন্তো মা পমাদমাপজ্জি, অসুকস্মিং ঠানে নিগ্ৰোধৰুক্খমূলে পোৰিসাদেন যক্খেন কতমেতং মযা সঙ্গৰং মম পুন তস্স সন্তিকং আগমনং উদ্দিস্স, কেৱলং তস্স ব্ৰাহ্মণস্স ধনদানত্থং ইধাগতো সচ্চং অনুৰক্খন্তো, তস্মা তত্থাহং গমিস্সামীতি.

তং সুত্ৱা মহাসত্তো ‘‘মা খো ত্ৱং, মহাৰাজ, তত্থ অগমাসি, অহং তত্থ গমিস্সামি. সচে পন ত্ৱং, তাত, গমিস্সসিযেৱ, অহম্পি তযা সদ্ধিং গমিস্সামিযেৱা’’তি. ‘‘এৱং সন্তে মযং উভোপি ন ভৱিস্সাম, তস্মা অহমেৱ তত্থ গমিস্সামী’’তি নানপ্পকাৰেন ৱাৰেন্তং ৰাজানং সঞ্ঞাপেত্ৱা মাতাপিতৰো ৱন্দিত্ৱা পিতু অত্থায অত্তানং পৰিচ্চজিত্ৱা সোত্থিভাৱায পিতৰি সাসিতৱাদং পযুঞ্জমানে মাতুভগিনিভৰিযাসু চ সচ্চকিৰিযং কৰোন্তীসু আৱুধং গহেত্ৱা নগৰতো নিক্খমিত্ৱা অস্সুপুণ্ণমুখং মহাজনং অনুবন্ধন্তং আপুচ্ছিত্ৱা পিতৰা অক্খাতনযেন যক্খৱাসমগ্গং পটিপজ্জি. যক্খিনিপুত্তোপি ‘‘খত্তিযা নাম বহুমাযা, কো জানাতি কিং ভৱিস্সতী’’তি ৰুক্খং অভিৰুহিত্ৱা ৰঞ্ঞো আগমনং ওলোকেন্তো নিসিন্নো কুমাৰং আগচ্ছন্তং দিস্ৱা ‘‘পিতৰং নিৱত্তেত্ৱা পুত্তো আগতো ভৱিস্সতি, নত্থি মে ভয’’ন্তি ওতৰিত্ৱা তস্স পিট্ঠিং দস্সেত্ৱাৱ নিসীদি. মহাসত্তো আগন্ত্ৱা তস্স পুৰতো অট্ঠাসি. তেন ৱুত্তং –

৮০. ‘‘মাতাপিতূ চ ৱন্দিত্ৱা, নিম্মিনিত্ৱান অত্তনা;

নিক্খিপিত্ৱা ধনুং খগ্গং, পোৰিসাদং উপাগমি’’ন্তি.

৮১. সসত্থহত্থূপগতন্তি সসত্থহত্থং উপগতং আৱুধপাণিং মং অত্তনো সন্তিকং উপগতং দিস্ৱা. কদাচি সো তসিস্সতীতি সো যক্খো অপি তসেয্য. তেন ভিজ্জিস্সতি সীলন্তি তেন তস্স তাসুপ্পাদনেন ময্হং সীলং ৱিনস্সতি সংকিলিস্সতি. পৰিতাসং কতে মযীতি মযি তস্স পৰিতাসং কতে সতি.

৮২. সীলখণ্ডভযা ময্হং, তস্স দেস্সং ন ব্যাহৰিন্তি যথা চ সীলভেদভযেন নিহিতসত্থো তস্স সন্তিকং অগমাসি, এৱং ময্হং সীলখণ্ডভযা এৱ তস্স পোৰিসাদস্স দেস্সং অনিট্ঠম্পি ন ব্যাহৰিং, কেৱলং পন মেত্তচিত্তেন হিতৱাদী ইদং ইদানি ৱক্খমানং ৱচনং অভাসিং.

মহাসত্তো চ গন্ত্ৱা পুৰতো ঠিতো. যক্খিনিপুত্তো তং ৱীমংসিতুকামো ‘‘কোসি ত্ৱং, কুতো আগতো, কিং মং ন জানাসি ‘লুদ্দো মনুস্সমংসখাদকো’তি, কস্মা চ ইধাগতোসী’’তি পুচ্ছি. কুমাৰো ‘‘অহং জযদ্দিসৰঞ্ঞো পুত্তো, ত্ৱং পোৰিসাদকোতি জানামি, পিতু জীৱিতং ৰক্খিতুং ইধাগতো, তস্মা তং মুঞ্চ, মং খাদা’’তি আহ. পুন যক্খিনিপুত্তো মুখাকাৰেনেৱ ‘‘তং তস্স পুত্তোতি অহং জানামি, দুক্কৰং পন তযা কতং এৱং আগচ্ছন্তেনা’’তি আহ. কুমাৰো ‘‘ন ইদং দুক্কৰং, যং পিতু অত্থে জীৱিতপৰিচ্চজনং, মাতাপিতুহেতু হি এৱৰূপং পুঞ্ঞং কত্ৱা একন্তেনেৱ সগ্গে পমোদতি, অহঞ্চ ‘অমৰণধম্মো নাম কোচি সত্তো নত্থী’তি জানামি, অত্তনা চ কিঞ্চি কতং পাপং নাম ন সৰামি, তস্মা মৰণতোপি মে ভযং নত্থি, ইদং সৰীৰং মযা তে নিস্সট্ঠং, অগ্গিং জালেত্ৱা খাদা’’তি আহ. তেন ৱুত্তং –

৮৩. ‘‘উজ্জালেহি মহাঅগ্গিং, পপতিস্সামি ৰুক্খতো;

ত্ৱং পক্ককালমঞ্ঞায, ভক্খয মং পিতামহা’’তি.

তং সুত্ৱা যক্খিনিপুত্তো ‘‘ন সক্কা ইমস্স মংসং খাদিতুং, উপাযেন ইমং পলাপেস্সামী’’তি চিন্তেত্ৱা ‘‘তেন হি অৰঞ্ঞং পৱিসিত্ৱা সাৰদাৰূনি আহৰিত্ৱা নিদ্ধূমে অঙ্গাৰে কৰোহি, তত্থ তে মংসং পচিত্ৱা খাদিস্সামী’’তি আহ. মহাসত্তো তথা কত্ৱা তস্স আৰোচেসি. সো তং ওলোকেন্তো ‘‘অযং পুৰিসসীহো মৰণতোপি ভযং নত্থি, এৱং নিব্ভযো নাম ন মযা দিট্ঠপুব্বো’’তি লোমহংসজাতো কুমাৰং ওলোকেসি. কুমাৰো কিস্স মং ওলোকেসি, ন যথাৱুত্তং কৰোসীতি. যক্খিনিপুত্তো মহাসত্তং ‘‘সত্তধা তস্স মুদ্ধা ফলেয্য, যো তং খাদেয্যা’’তি আহ. ‘‘সচে মং ন খাদিতুকামোসি, অথ কস্মা অগ্গিং কাৰেসী’’তি? ‘‘তৱ পৰিগ্গণ্হনত্থ’’ন্তি. ‘‘ত্ৱং ইদানি মং কথং পৰিগ্গণ্হিস্সসি, স্ৱাহং তিৰচ্ছানযোনিযং নিব্বত্তোপি সক্কস্স দেৱৰঞ্ঞো অত্তানং পৰিগ্গণ্হিতুং ন অদাসি’’ন্তি ইমমত্থং দস্সেন্তো –

‘‘ইদঞ্হি সো ব্ৰাহ্মণং মঞ্ঞমানো, সসো অৱাসেসি সকে সৰীৰে;

তেনেৱ সো চন্দিমা দেৱপুত্তো, সসত্থুতো কামদুহজ্জ যক্খা’’তি.(জা. ১.১৬.৯৩) –

গাথমাহ.

তত্থ সসো অৱাসেসি সকে সৰীৰেতি অত্তনো সৰীৰহেতু ইমং সৰীৰং খাদিত্ৱা ইধ ৱসাতি এৱং সকে সৰীৰে অত্তনো সৰীৰং দেন্তো তং ব্ৰাহ্মণৰূপং সক্কং তত্থ ৱাসেসি. সসত্থুতোতি ‘‘সসী’’তি এৱং সসসদ্দেন থুতো. কামদুহোতি কামৱড্ঢনো. যক্খাতি দেৱ.

এৱং মহাসত্তো চন্দে সসলক্খণং কপ্পট্ঠিযং পাটিহাৰিযং সক্খিং কত্ৱা অত্তনো সক্কেনপি পৰিগ্গণ্হিতুং অসক্কুণেয্যতং অভাসি. তং সুত্ৱা পোৰিসাদো অচ্ছৰিযব্ভুতচিত্তজাতো –

‘‘চন্দো যথা ৰাহুমুখা পমুত্তো, ৱিৰোচতে পন্নৰসেৱ ভাণুমা;

এৱং তুৱং পোৰিসাদা পমুত্তো, ৱিৰোচ কপিলে মহানুভাৱ;

আমোদযং পিতৰং মাতৰঞ্চ, সব্বো চ তে নন্দতু ঞাতিপক্খো’’তি. (জা. ১.১৬.৯৪) –

গাথং ৱত্ৱা ‘‘গচ্ছ মহাৱীৰা’’তি কুমাৰং ৱিস্সজ্জেসি. সোপি তং নিব্বিসেৱনং কত্ৱা পঞ্চ সীলানি দত্ৱা ‘‘যক্খো নু খো এস, নো’’তি ৱীমংসন্তো ‘‘যক্খানং অক্খীনি ৰত্তানি হোন্তি অনিমিসানি চ, ছাযা চ ন পঞ্ঞাযতি, অসম্ভীতো হোতি, ন ইমস্স তথা. তস্মা নাযং যক্খো মনুস্সো এসো, ময্হং কিৰ পিতু তযো ভাতৰো যক্খিনিযা গহিতা, তেসু তায দ্ৱে খাদিতা ভৱিস্সন্তি, একো পুত্তসিনেহেন পটিজগ্গিতো ভৱিস্সতি. ইমিনা তেন ভৱিতব্ব’’ন্তি নযগ্গাহেন অনুমানেন সব্বঞ্ঞুতঞ্ঞাণেন ৱিয অৱিপৰীততো নিট্ঠং গন্ত্ৱা ‘‘ময্হং পিতু আচিক্খিত্ৱা ৰজ্জে পতিট্ঠাপেস্সামী’’তি চিন্তেত্ৱা ‘‘ন ত্ৱং যক্খো, পিতু মে জেট্ঠভাতিকোসি, এহি মযা সদ্ধিং গন্ত্ৱা কুলসন্তকং ৰজ্জং পটিপজ্জাহী’’তি আহ. তেন ৱুত্তং ‘‘ত্ৱং পিতামহা’’তি, ত্ৱং মম মহাপিতাতি অত্থো. ইতৰেন ‘‘নাহং মনুস্সো’’তি ৱুত্তে তেন সদ্ধাতব্বস্স দিব্বচক্খুকতাপসস্স সন্তিকং নেসি. তাপসেন ‘‘কিং কৰোন্তা পিতা পুত্তা অৰঞ্ঞে ৱিচৰথা’’তি পিতুভাৱে কথিতে পোৰিসাদো সদ্দহিত্ৱা ‘‘গচ্ছ, তাত, ত্ৱং, ন মে ৰজ্জেন অত্থো, পব্বজিস্সামহ’’ন্তি তাপসস্স সন্তিকে ইসিপব্বজ্জং পব্বজি. তেন ৱুত্তং –

৮৪. ‘‘ইতি সীলৱতং হেতু, নাৰক্খিং মম জীৱিতং;

পব্বাজেসিং চহং তস্স, সদা পাণাতিপাতিক’’ন্তি.

তত্থ সীলৱতং হেতূতি সীলৱন্তানং মম পিতূনং হেতু. অথ ৱা সীলৱতং হেতূতি সীলৱতহেতু, ময্হং সীলৱতসমাদাননিমিত্তং তস্স অভিজ্জনত্থং. তস্সাতি তং পোৰিসাদং.

অথ মহাসত্তো অত্তনো মহাপিতৰং পব্বজিতং ৱন্দিত্ৱা নগৰস্স সমীপং গন্ত্ৱা ‘‘কুমাৰো কিৰ আগতো’’তি সুত্ৱা হট্ঠতুট্ঠেন ৰঞ্ঞা নাগৰেহি নেগমজানপদেহি চ পচ্চুগ্গতো ৰাজানং ৱন্দিত্ৱা সব্বং পৱত্তিং আৰোচেসি. তং সুত্ৱা ৰাজা তঙ্খণঞ্ঞেৱ ভেৰিং চৰাপেত্ৱা মহন্তেন পৰিৱাৰেন তস্স সন্তিকং গন্ত্ৱা ‘‘এহি, ভাতিক, ৰজ্জং পটিপজ্জাহী’’তি আহ. ‘‘অলং, মহাৰাজা’’তি. ‘‘তেন হি ময্হং উয্যানে ৱসা’’তি. ‘‘ন আগচ্ছামী’’তি. ৰাজা তস্স অস্সমস্স অৱিদূৰে গামং নিৱেসেত্ৱা ভিক্খং পট্ঠপেসি. সো চূড়কম্মাসদম্মনিগমো নাম জাতো.

তদা মাতাপিতৰো মহাৰাজকুলানি অহেসুং, তাপসো সাৰিপুত্তো, পোৰিসাদো অঙ্গুলিমালো, কনিট্ঠা উপ্পলৱণ্ণা, অগ্গমহেসী ৰাহুলমাতা, অলীনসত্তুকুমাৰো লোকনাথো.

তস্স ইধাপি হেট্ঠা ৱুত্তনযেনেৱ যথাৰহং সেসপাৰমিযো নিদ্ধাৰেতব্বা. তথা পিতৰা নিৱাৰিযমানো অত্তনো জীৱিতং পৰিচ্চজিত্ৱা পিতু জীৱিতৰক্খণত্থং ‘‘পোৰিসাদস্স সন্তিকং গমিস্সামী’’তি নিচ্ছযো, তস্স চ সন্তাসপৰিহৰণত্থং নিহিতসত্থস্স গমনং, ‘‘অত্তনো সীলখণ্ডনং মা হোতূ’’তি তেন পিযৱাচায সমুদাচাৰো, তেন চ নানানযেহি পৰিগ্গণ্হিযমানস্স মৰণসন্তাসাভাৱো, পিতু অত্থে ময্হং সৰীৰং সফলং কৰিস্সামীতি হট্ঠতুট্ঠভাৱো, সক্কেনাপি পৰিগ্গণ্হিতুং অসক্কুণেয্যস্স সসজাতিযম্পি পৰিচ্চাগত্থং অত্তনো জীৱিতনিৰপেক্খভাৱস্স জাননং, তেন সমাগমেপি ওস্সট্ঠেপি চিত্তস্স ৱিকাৰাভাৱো, তস্স চ মনুস্সভাৱমহাপিতুভাৱানং অৱিপৰীততো জাননং, ঞাতমত্তে চ তং কুলসন্তকে ৰজ্জে পতিট্ঠাপেতুকামতা, ধম্মদেসনায সংৱেজেত্ৱা সীলেসু পতিট্ঠাপনন্তি. এৱমাদযো ইধ বোধিসত্তস্স গুণানুভাৱা ৱিভাৱেতব্বাতি.

অলীনসত্তুচৰিযাৱণ্ণনা নিট্ঠিতা.