৬. ৰুৰুমিগৰাজচৰিযাৱণ্ণনা

৪৮. ছট্ঠে সুতত্তকনকসন্নিভোতি যথা সুট্ঠু অপগতসব্বকাড়কো হোতি, এৱং অগ্গিম্হি পক্খিপিত্ৱা সুতত্তকনকসন্নিভো. মিগৰাজা ৰুৰু নামাতি জাতিসিদ্ধেন নামেন ৰুৰু নাম মিগৰাজা, জাতিতো ৰুৰু, মিগানঞ্চ ৰাজাতি অত্থো. পৰমসীলসমাহিতোতি উত্তমসীলসমাহিতো, ৱিসুদ্ধসীলো চেৱ সমাহিতচিত্তো চ, ৱিসুদ্ধসীলে ৱা সম্মা আহিতচিত্তোতি এৱমেত্থ অত্থো ৱেদিতব্বো.

তদা বোধিসত্তো ৰুৰুমিগযোনিযং নিব্বত্তি. তস্স সৰীৰচ্ছৱি সুট্ঠু তাপেত্ৱা মজ্জিতকঞ্চনপট্টৱণ্ণো অহোসি, হত্থপাদা লাখাৰসপৰিকম্মকতা ৱিয, নঙ্গুট্ঠং চমৰীনঙ্গুট্ঠং ৱিয, সিঙ্গানি ৰজতদামৱণ্ণানি অক্খীনি সুমজ্জিতমণিগুড়িকা ৱিয, মুখং ওদহিত্ৱা ঠপিতৰত্তকম্বলগেণ্ডুকা ৱিয. সো জনসংসগ্গং পহায ৱিৱেকৱাসং ৱসিতুকামো পৰিৱাৰং ছড্ডেত্ৱা এককোৱ গঙ্গানিৱত্তনে ৰমণীযে সালমিস্সকে সুপুপ্ফিতপৱনে ৱসতি. তেন ৱুত্তং –

৪৯. ‘‘ৰম্মে পদেসে ৰমণীযে, ৱিৱিত্তে অমনুস্সকে;

তত্থ ৱাসং উপগঞ্ছিং, গঙ্গাকূলে মনোৰমে’’তি.

তত্থ ৰম্মে পদেসেতি মুত্তাতলসদিসৱালুকাচুণ্ণপণ্ডৰেহি ভূমিভাগেহি সিনিদ্ধহৰিততিণসঞ্চৰিতেহি ৱনত্থলেহি চিত্তত্থৰণেহি ৱিয নানাৱণ্ণৱিচিত্তেহি সিলাতলেহি মণিক্খন্ধনিম্মলসলিলেহি জলাসযেহি চ সমন্নাগতত্তা যেভুয্যেন চ ইন্দগোপকৱণ্ণায ৰত্তায সুখসম্ফস্সায তিণজাতিযা সঞ্ছন্নত্তা ৰম্মে অৰঞ্ঞপ্পদেসে. ৰম্মণীযেতি পুপ্ফফলপল্লৱালঙ্কতৱিপুলসাখাৱিনদ্ধেহি নানাৱিধদিজগণূপকূজিতেহি ৱিৱিধতৰুলতাৱনৱিৰাজিতেহি যেভুয্যেন অম্বসালৱনসণ্ডমণ্ডিতেহি ৱনগহনেহি উপসোভিতত্তা তত্থ পৱিট্ঠস্স জনস্স ৰতিজননট্ঠেন ৰমণীযে. ৱুত্তম্পি চেতং ৰুৰুমিগৰাজজাতকে –

‘‘এতস্মিং ৱনসণ্ডস্মিং, অম্বা সালা চ পুপ্ফিতা;

ইন্দগোপকসঞ্ছন্নো, এত্থেসো তিট্ঠতে মিগো’’তি. (জা. ১.১৩.১১৯);

ৱিৱিত্তেতি জনৱাসৱিৰহেন সুঞ্ঞে. অমনুস্সকেতি সঞ্চৰণমনুস্সানম্পি তত্থ অভাৱেন মনুস্সৰহিতে. মনোৰমেতি যথাৱুত্তগুণসম্পত্তিযা ৱিসেসতো পৱিৱেককামানং মনো ৰমেতীতি মনোৰমে.

৫০. অথ উপৰিগঙ্গাযাতি এত্থ অথাতি অধিকাৰে নিপাতো, তেন মযি তত্থ তথা ৱসন্তে ইদং অধিকাৰন্তৰং উপ্পন্নন্তি দীপেতি. উপৰিগঙ্গাযাতি গঙ্গায নদিযা উপৰিসোতে. ধনিকেহি পৰিপীড়িতোতি ইণং গহেত্ৱা তং দাতুং অসক্কোন্তো ইণাযিকেহি চোদিযমানো.

একো কিৰ বাৰাণসিসেট্ঠি অত্তনো পুত্তং ‘‘অযং সিপ্পং উগ্গণ্হন্তো কিলমিস্সতী’’তি কিঞ্চি সিপ্পং ন উগ্গণ্হাপেসি. গীতৱাদিতনচ্চখাদনভোজনতো উদ্ধং ন কিঞ্চি অঞ্ঞাসি. তং ৱযপ্পত্তং পতিৰূপেন দাৰেন সংযোজেত্ৱা ধনং নিয্যাতেত্ৱা মাতাপিতৰো কালমকংসু. সো তেসং অচ্চযেন ইত্থিধুত্তসুৰাধুত্তাদিপৰিৱুতো নানাব্যসনমুখেহি সব্বং ধনং ৱিদ্ধংসেত্ৱা তত্থ তত্থ ইণং আদায তম্পি দাতুং অসক্কোন্তো ধনিকেহি চোদিযমানো ‘‘কিং ময্হং জীৱিতেন, তেনেৱম্হি অত্তভাৱেন অঞ্ঞো ৱিয জাতো, মৰণং মে সেয্যো’’তি চিন্তেত্ৱা ইণাযিকে আহ – ‘‘তুম্হাকং ইণপণ্ণানি গহেত্ৱা আগচ্ছথ, গঙ্গাতীৰে মে নিহিতং কুলসন্তকং ধনং অত্থি, তং ৱো দস্সামী’’তি. তে তেন সদ্ধিং অগমংসু. সো ‘‘ইধ ধনং, এত্থ ধন’’ন্তি নিধিট্ঠানং আচিক্খন্তো ৱিয ‘‘এৱং মে ইণমোক্খো ভৱিস্সতী’’তি পলাযিত্ৱা গঙ্গাযং পতি. সো চণ্ডসোতেন ৱুয্হন্তো কাৰুঞ্ঞৰৱং ৰৱি. তেন ৱুত্তং ‘‘অথ উপৰিগঙ্গাযা’’তিআদি.

তত্থ জীৱামি ৱা মৰামি ৱাতি ইমস্মিং গঙ্গাসোতে পতিতো জীৱামি ৱা মৰামি ৱা, জীৱিতং ৱা মে এত্থ হোতু মৰণং ৱা, উভযথাপি ইণাযিকপীড়া ন হোতীতি অধিপ্পাযো.

৫১. মজ্ঝে গঙ্গায গচ্ছতীতি সো পুৰিসো ৰত্তিন্দিৱং গঙ্গায ৱুয্হমানো জীৱিতপেমস্স ৱিজ্জমানত্তা মৰণং অপ্পত্তো মৰণভযতজ্জিতো হুত্ৱা কৰুণং ৰৱং ৰৱন্তো গঙ্গায মজ্ঝে মহোদকেন গচ্ছতি.

৫২. অথ মহাপুৰিসো অড্ঢৰত্তসমযে তস্স তং কৰুণং পৰিদেৱন্তস্স পৰিদেৱিতসদ্দং সুত্ৱা ‘‘মনুস্সসদ্দো সূযতি, মা মযি ইধ ধৰন্তে মৰতু, জীৱিতমস্স দস্সামী’’তি চিন্তেত্ৱা সযনগুম্বা ৱুট্ঠায নদীতীৰং গন্ত্ৱা ‘‘অম্ভো পুৰিস, মা ভাযি, জীৱিতং তে দস্সামী’’তি ৱত্ৱা অস্সাসেত্ৱা সোতং ছিন্দন্তো গন্ত্ৱা তং পিট্ঠিযং আৰোপেত্ৱা তীৰং পাপেত্ৱা অত্তনো ৱসনট্ঠানং নেত্ৱা পৰিস্সমং ৱিনোদেত্ৱা ফলাফলানি দত্ৱা দ্ৱীহতীহচ্চযেন তং আহ – ‘‘অম্ভো পুৰিস, অহং তং বাৰাণসিগামিমগ্গং পাপেস্সামি, ত্ৱং ‘অসুকট্ঠানে নাম কঞ্চনমিগো ৱসতী’তি মা কস্সচি আৰোচেহী’’তি. সো ‘‘সাধু, সামী’’তি সম্পটিচ্ছি. মহাসত্তো তং অত্তনো পিট্ঠিং আৰোপেত্ৱা বাৰাণসিমগ্গে ওতাৰেত্ৱা নিৱত্তি. তেন ৱুত্তং – ‘‘তস্সাহং সদ্দং সুত্ৱান, কৰুণং পৰিদেৱতো’’তিআদি.

তত্থ কোসি ত্ৱং নৰোতি ত্ৱং কো মনুস্সো অসি, কুতো ইধ ৱুয্হমানো আগতোসীতি অত্থো.

৫৩. অত্তনো কৰণন্তি অত্তনো কিৰিযং. ধনিকেহি ভীতোতি ইণাযিকেহি উব্বিগ্গো. তসিতোতি উত্ৰস্তো.

৫৪. তস্স কত্ৱান কাৰুঞ্ঞং, চজিত্ৱা মম জীৱিতন্তি কাৰুঞ্ঞং কত্ৱা মহাকৰুণায সমুস্সাহিতো মম জীৱিতং তস্স পুৰিসস্স পৰিচ্চজিত্ৱা. পৱিসিত্ৱা নীহৰিং তস্সাতি নদিং পৱিসিত্ৱা সোতং ছিন্দন্তো উজুকমেৱ গন্ত্ৱা মম পিট্ঠিং আৰোপেত্ৱা ততো তং নীহৰিং. তস্সাতি উপযোগত্থে সামিৱচনং. ‘‘তত্থা’’তিপি পাড়ি, তত্থ নদিযন্তি অত্থো. অন্ধকাৰম্হি ৰত্তিযাতি ৰত্তিযা অন্ধকাৰসমযে, কাড়পক্খৰত্তিযন্তি অত্থো.

৫৫. অস্সত্থকালমঞ্ঞাযাতি পৰিস্সমং অপনেত্ৱা ফলাফলানি দত্ৱা দ্ৱীহতীহচ্চযেন কিলমথস্স ৱিগতকালং জানিত্ৱা. একং তং ৱৰং যাচামীতি অহং তং একং ৱৰং যাচামি, ময্হং একং ৱৰং দেহীতি অত্থো. কিং তং ৱৰন্তি চে? আহ – মা মং কস্সচি পাৱদাতি ‘‘অসুকট্ঠানে সুৱণ্ণমিগো ৱসতী’’তি কস্সচি ৰঞ্ঞো ৱা ৰাজমহামত্তস্স ৱা মং মা পাৱদ.

অথ তস্মিং পুৰিসে বাৰাণসিং পৱিট্ঠদিৱসেযেৱ সো ৰাজা ‘‘অহং, দেৱ, সুৱণ্ণৱণ্ণং মিগং ময্হং ধম্মং দেসেন্তং সুপিনেন অদ্দসং, অহঞ্হি সচ্চসুপিনা, অদ্ধা সো ৱিজ্জতি, তস্মা কঞ্চনমিগস্স ধম্মং সোতুকামা লভিস্সামি চে জীৱিস্সামি, নো চে মে জীৱিতং নত্থী’’তি অগ্গমহেসিযা ৱুত্তো তং অস্সাসেত্ৱা ‘‘সচে মনুস্সলোকে অত্থি, লভিস্সসী’’তি ৱত্ৱা ব্ৰাহ্মণে পক্কোসাপেত্ৱা ‘‘সুৱণ্ণমিগা নাম হোন্তী’’তি পুচ্ছিত্ৱা ‘‘আম, দেৱ, হোন্তী’’তি সুত্ৱা সহস্সত্থৱিকং সুৱণ্ণচঙ্কোটকে ঠপেত্ৱা তং হত্থিক্খন্ধং আৰোপেত্ৱা নগৰে ভেৰিং চৰাপেসি – ‘‘যো সুৱণ্ণমিগং আচিক্খিস্সতি, তস্স হত্থিনা সদ্ধিং ইমং দস্সামী’’তি. ততো উত্তৰিম্পি দাতুকামো হুত্ৱা –

‘‘তস্স গামৱৰং দম্মি, নাৰিযো চ অলঙ্কতা;

যো মেতং মিগমক্খাতি, মিগানং মিগমুত্তম’’ন্তি. (জা. ১.১৩.১১৭) –

গাথং সুৱণ্ণপট্টে লিখাপেত্ৱা সকলনগৰে ৱাচাপেসি. অথ সো সেট্ঠিপুত্তো তং গাথং সুত্ৱা ৰাজপুৰিসানং সন্তিকং গন্ত্ৱা ‘‘ৰঞ্ঞো এৱৰূপং মিগং আচিক্খিস্সামি, মং ৰাজানং দস্সেথা’’তি আহ. ৰাজপুৰিসা তং ৰঞ্ঞো সন্তিকং নেত্ৱা তমত্থং আৰোচেসুং. ৰাজা ‘‘সচ্চং, ভো, অদ্দসা’’তি পুচ্ছি. সো ‘‘সচ্চং, দেৱ, মযা সদ্ধিং আগচ্ছতু, অহং তং দস্সেস্সামী’’তি আহ. ৰাজা তমেৱ পুৰিসং মগ্গদেসকং কত্ৱা মহন্তেন পৰিৱাৰেন তং ঠানং গন্ত্ৱা তেন মিত্তদুব্ভিনা পুৰিসেন দস্সিতং পদেসং আৱুধহত্থে পুৰিসে সমন্ততোৱ পৰিৱাৰেত্ৱা ‘‘উক্কুট্ঠিং কৰোথা’’তি ৱত্ৱা সযং কতিপযেহি জনেহি সদ্ধিং একমন্তে অট্ঠাসি. সোপি পুৰিসো অৱিদূৰে অট্ঠাসি. মহাসত্তো সদ্দং সুত্ৱা ‘‘মহতো বলকাযস্স সদ্দো, অদ্ধা তম্হা মে পুৰিসা ভযেন উপ্পন্নেন ভৱিতব্ব’’ন্তি ঞত্ৱা উট্ঠায সকলপৰিসং ওলোকেত্ৱা ‘‘ৰঞ্ঞো ঠিতট্ঠানেযেৱ মে সোত্থি ভৱিস্সতী’’তি ৰাজাভিমুখো পাযাসি. ৰাজা তং আগচ্ছন্তং দিস্ৱা ‘‘নাগবলো অৱত্থৰন্তো আগচ্ছেয্যা’’তি সৰং সন্নয্হিত্ৱা ‘‘ইমং মিগং সন্তাসেত্ৱা সচে পলাযতি, ৱিজ্ঝিত্ৱা দুব্বলং কত্ৱা গণ্হিস্সামী’’তি বোধিসত্তাভিমুখো অহোসি. মহাসত্তো –

‘‘আগমেহি মহাৰাজ, মা মং ৱিজ্ঝি ৰথেসভ;

কো নু তে ইদমক্খাসি, এত্থেসো তিট্ঠতে মিগো’’তি. (জা. ১.১৩.১২১) –

গাথং অভাসি. ৰাজা তস্স মধুৰকথায বজ্ঝিত্ৱা সৰং পটিসংহৰিত্ৱা গাৰৱেন অট্ঠাসি. মহাসত্তোপি ৰাজানং উপসঙ্কমিত্ৱা মধুৰপটিসন্থাৰং অকাসি. মহাজনোপি সব্বাৱুধানি অপনেত্ৱা আগন্ত্ৱা ৰাজানং পৰিৱাৰেসি. তেন ৱুত্তং –

৫৬. ‘‘নগৰং গন্ত্ৱান আচিক্খি, পুচ্ছিতো ধনহেতুকো;

ৰাজানং সো গহেত্ৱান, উপগঞ্ছি মমন্তিক’’ন্তি.

তস্সত্থো – যো মিত্তদুব্ভী পাপপুৰিসো জীৱিতং পৰিচ্চজিত্ৱা তথা মযা পাণসংসযতো মোচিতো বাৰাণসিনগৰং গন্ত্ৱা অত্তনা লদ্ধব্বধননিমিত্তং ৰঞ্ঞো মং আচিক্খি, আচিক্খিত্ৱা সো ৰঞ্ঞো গাহাপেতুং মগ্গদেসকো হুত্ৱা ৰাজানং গহেত্ৱা মম সন্তিকমুপাগমীতি.

মহাসত্তো সুৱণ্ণকিঙ্কিণিকং চালেন্তো ৱিয মধুৰস্সৰেন ৰাজানং পুন পুচ্ছি – ‘‘কো নু তে ইদমক্খাসি, এত্থেসো তিট্ঠতে মিগো’’তি. তস্মিং খণে সো পাপপুৰিসো থোকং পটিক্কমিত্ৱা সোতপথে অট্ঠাসি. ৰাজা ‘‘ইমিনা মে ত্ৱং দস্সিতো’’তি তং পুৰিসং নিদ্দিসি. ততো বোধিসত্তো –

‘‘সচ্চং কিৰেৱ মাহংসু, নৰা একচ্চিযা ইধ;

কট্ঠং নিপ্লৱিতং সেয্যো, ন ত্ৱেৱেকচ্চিযো নৰো’’তি. (জা. ১.১৩.১২৩) –

গাথমাহ. তং সুত্ৱা ৰাজা সংৱেগজাতো –

‘‘কিং নু ৰুৰু গৰহসি মিগানং, কিং পক্খীনং কিং পন মানুসানং;

ভযঞ্হি মং ৱিন্দতিনপ্পৰূপং, সুত্ৱান তং মানুসিং ভাসমান’’ন্তি. (জা. ১.১৩.১২৪) –

গাথমাহ. ততো মহাপুৰিসো ‘‘মহাৰাজ, ন মিগং ন পক্খিং গৰহামি, মনুস্সং পন গৰহামী’’তি দস্সেন্তো –

‘‘যমুদ্ধৰিং ৱাহনে ৱুয্হমানং, মহোদকে সলিলে সীঘসোতে;

ততোনিদানং ভযমাগতং মম, দুক্খো হৱে ৰাজ অসব্ভি সঙ্গমো’’তি. (জা. ১.১৩.১২৫) –

আহ.

তত্থ নিপ্লৱিতন্তি উদ্ধৰিতং, একচ্চিযোতি একচ্চো মিত্তদুব্ভী পাপপুৰিসো উদকে পতন্তোপি উত্তাৰিতো নত্ৱেৱ সেয্যো. কট্ঠঞ্হি নানপ্পকাৰেন উপকাৰায সংৱত্ততি, মিত্তদুব্ভী পন ৱিনাসায, তস্মা ততো কট্ঠমেৱ ৱৰতৰন্তি. মিগানন্তি ৰুৰুমিগৰাজ, মিগানং কিং অঞ্ঞতৰং গৰহসি, উদাহু পক্খীনং মনুস্সানন্তি পুচ্ছতি. ভযঞ্হি মং ৱিন্দতিনপ্পৰূপন্তি মহন্তং ভযং মং পটিলভতি, অত্তনো সন্তকং ৱিয কৰোতীতি অত্থো.

ৱাহনেতি পতিতপতিতে ৱহিতুং সমত্থে গঙ্গাৱহে. মহোদকে সলিলেতি মহোদকীভূতে সলিলে. উভযেনাপি গঙ্গাৱহস্স বহূদকতং দস্সেতি. ততো নিদানন্তি, মহাৰাজ, যো ময্হং তযা দস্সিতো পুৰিসো, এসো মযা গঙ্গায ৱুয্হমানো অড্ঢৰত্তসমযে কৰুণং পৰিদেৱন্তো ততো উত্তাৰিতো, ততোনিদানং ইদং ময্হং ভযমাগতং, অসপ্পুৰিসেহি সমাগমো নাম দুক্খোতি.

তং সুত্ৱা ৰাজা তস্স কুজ্ঝিত্ৱা ‘‘এৱং বহূপকাৰস্স নাম গুণং ন জানাতি, দুক্খং উপ্পাদেতি, ৱিজ্ঝিত্ৱা নং জীৱিতক্খযং পাপেস্সামী’’তি সৰং সন্নয্হি. তেন ৱুত্তং –

৫৭. ‘‘যাৱতা কৰণং সব্বং, ৰঞ্ঞো আৰোচিতং মযা;

ৰাজা সুত্ৱান ৱচনং, উসুং তস্স পকপ্পযি;

ইধেৱ ঘাতযিস্সামি, মিত্তদুব্ভিং অনৰিয’’ন্তি.

তত্থ যাৱতা কৰণন্তি যং তস্স মযা কতং উপকাৰকৰণং, তং সব্বং. পকপ্পযীতি সন্নয্হি. মিত্তদুব্ভিন্তি অত্তনো মিত্তেসু উপকাৰীসু দুব্ভনসীলং.

ততো মহাসত্তো ‘‘এস বালো মং নিস্সায মা নস্সী’’তি চিন্তেত্ৱা ‘‘মহাৰাজ, ৱধো নামেস বালস্স ৱা পণ্ডিতস্স ৱা ন সাধূহি পসংসিতো, অঞ্ঞদত্থু গৰহিতো এৱ, তস্মা মা ইমং ঘাতেহি, অযং যথাৰুচি গচ্ছতু, যঞ্চেৱ তস্স ‘দস্সামী’তি তযা পটিঞ্ঞাতং, তম্পি অহাপেত্ৱাৱ দেহী’’তি আহ. ‘‘অহঞ্চ তে যং ইচ্ছিতং, তং কৰিস্সামি, অত্তানং তুয্হং দম্মী’’তি আহ. তেন ৱুত্তং –

৫৮. ‘‘তমহং অনুৰক্খন্তো, নিম্মিনিং মম অত্তনা;

তিট্ঠতেসো মহাৰাজ, কামকাৰো ভৱামি তে’’তি.

তত্থ নিম্মিনিন্তি তং মিত্তদুব্ভিং পাপপুগ্গলং অনুৰক্খন্তো মম অত্তনো অত্তভাৱেন তং পৰিৱত্তেসিং, অত্তানং ৰঞ্ঞো নিয্যাতেত্ৱা ৰাজহত্থতো পত্তং তস্স মৰণং নিৱাৰেসিন্তি অত্থো. তিট্ঠতেসোতিআদি ৱিনিমযাকাৰদস্সনং.

৫৯. ইদানি যদত্থং সো অত্তৱিনিমযো কতো, তং দস্সেতুং ওসানগাথমাহ. তস্সত্থো – তদা মং নিস্সায তং মিত্তদুব্ভিং পুৰিসং তস্মিং ৰঞ্ঞে জীৱিতা ৱোৰোপেতুকামে অহং অত্তানং ৰঞ্ঞো পৰিচ্চজন্তো মম সীলমেৱ অনুৰক্খিং, জীৱিতং পন নাৰক্খিং. যং পনাহমেৱ অত্তনো জীৱিতনিৰপেক্খং সীলৱা আসিং, তং সম্মাসম্বোধিযা এৱ কাৰণাতি.

অথ ৰাজা বোধিসত্তেন অত্তনো জীৱিতং পৰিচ্চজিত্ৱা তস্স পুৰিসস্স মৰণে নিৱাৰেন্তে তুট্ঠমানসো ‘‘গচ্ছ, ভো, মিগৰাজস্স অনুগ্গহেন মম হত্থতো মৰণা মুত্তো’’তি ৱত্ৱা যথাপটিঞ্ঞায তঞ্চস্স ধনং দাপেসি. মহাসত্তস্স যথাৰুচিযাৱ অনুজানিত্ৱা তং নগৰং নেত্ৱা নগৰঞ্চ বোধিসত্তঞ্চ অলঙ্কাৰাপেত্ৱা দেৱিযা ধম্মং দেসাপেসি. মহাসত্তো দেৱিং আদিং কত্ৱা ৰঞ্ঞো চ ৰাজপৰিসায চ মধুৰায মনুস্সভাসায ধম্মং দেসেত্ৱা ৰাজানং দসহি ৰাজধম্মেহি ওৱদিত্ৱা মহাজনং অনুসাসিত্ৱা অৰঞ্ঞং পৱিসিত্ৱা মিগগণপৰিৱুতো ৱাসং কপ্পেসি. ৰাজাপি মহাসত্তস্স ওৱাদে ঠত্ৱা সব্বসত্তানং অভযং দত্ৱা দানাদীনি পুঞ্ঞানি কত্ৱা সুগতিপৰাযনো অহোসি.

তদা সেট্ঠিপুত্তো দেৱদত্তো অহোসি, ৰাজা আনন্দো, ৰুৰুমিগৰাজা লোকনাথো.

তস্স ইধাপি হেট্ঠা ৱুত্তনযেনেৱ যথাৰহং সেসপাৰমিযো নিদ্ধাৰেতব্বা. তথা ইধাপি পৱিৱেকাৰামতায জনসংসগ্গং অনিচ্ছতো যূথং পহায এককৱিহাৰো, অড্ঢৰত্তসমযে নদিযা ৱুয্হমানস্স কৰুণং পৰিদেৱন্তস্স পুৰিসস্স অট্টস্সৰং সুত্ৱা সযিতট্ঠানতো ৱুট্ঠায নদীতীৰং গন্ত্ৱা মহাগঙ্গায মহতি উদকোঘে ৱত্তমানে অত্তনো জীৱিতং পৰিচ্চজিত্ৱা ওতৰিত্ৱা সোতং পচ্ছিন্দিত্ৱা তং পুৰিসং অত্তনো পিট্ঠিযং আৰোপেত্ৱা তীৰং পাপেত্ৱা সমস্সাসেত্ৱা ফলাফলাদীনি দত্ৱা পৰিস্সমৱিনোদনং, পুন তং অত্তনো পিট্ঠিং আৰোপেত্ৱা অৰঞ্ঞতো নীহৰিত্ৱা মহামগ্গে ওতাৰণং, সৰং সন্নয্হিত্ৱা ৱিজ্ঝিস্সামীতি অভিমুখে ঠিতস্স ৰঞ্ঞো নিব্ভযেন হুত্ৱা পটিমুখমেৱ গন্ত্ৱা পঠমতৰং মনুস্সভাসায আলপিত্ৱা মধুৰপটিসন্থাৰকৰণং, মিত্তদুব্ভী পাপপুৰিসং হন্তুকামং ৰাজানং ধম্মকথং কত্ৱা পুনপি অত্তনো জীৱিতং পৰিচ্চজিত্ৱা মৰণতো পমোচনং, তস্স চ ৰঞ্ঞো যথাপটিঞ্ঞং ধনদাপনং, ৰঞ্ঞা অত্তনো ৱৰে দীযমানে তেন সব্বসত্তানং অভযদাপনং, ৰাজানঞ্চ দেৱিঞ্চ পমুখং কত্ৱা মহাজনস্স ধম্মং দেসেত্ৱা দানাদীসু পুঞ্ঞেসু তেসং পতিট্ঠাপনং, লদ্ধাভযানং মিগানং ওৱাদং দত্ৱা মনুস্সানং সস্সখাদনতো নিৱাৰণং, পণ্ণসঞ্ঞায চ তস্স যাৱজ্জকালা থাৱৰকৰণন্তি এৱমাদযো মহাসত্তস্স গুণানুভাৱা ৱিভাৱেতব্বাতি.

ৰুৰুমিগৰাজচৰিযাৱণ্ণনা নিট্ঠিতা.