১০. সসপণ্ডিতচৰিযাৱণ্ণনা

১২৫-৬. দসমে যদা হোমি, সসকোতি অহং, সাৰিপুত্ত, বোধিপৰিযেসনং চৰমানো যদা সসপণ্ডিতো হোমি. বোধিসত্তা হি কম্মৱসিপ্পত্তাপি তাদিসানং তিৰচ্ছানানং অনুগ্গণ্হনত্থং তিৰচ্ছানযোনিযং নিব্বত্তন্তি. পৱনচাৰকোতি মহাৱনচাৰী. দব্বাদিতিণানি ৰুক্খগচ্ছেসু পণ্ণানি যংকিঞ্চি সাকং ৰুক্খতো পতিতফলানি চ ভক্খো এতস্সাতি তিণপণ্ণসাকফলভক্খো. পৰহেঠনৱিৱজ্জিতোতি পৰপীড়াৱিৰহিতো. সুত্তপোতো চাতি উদ্দপোতো চ. অহং তদাতি যদাহং সসকো হোমি, তদা এতে মক্কটাদযো তযো সহাযে ওৱদামি.

১২৭. কিৰিযে কল্যাণপাপকেতি কুসলে চেৱ অকুসলে চ কম্মে. পাপানীতি অনুসাসনাকাৰদস্সনং. তত্থ পাপানি পৰিৱজ্জেথাতি পাণাতিপাতো…পে… মিচ্ছাদিট্ঠীতি ইমানি পাপানি পৰিৱজ্জেথ. কল্যাণে অভিনিৱিস্সথাতি দানং সীলং…পে… দিট্ঠুজুকম্মন্তি ইদং কল্যাণং, ইমস্মিং কল্যাণে অত্তনো কাযৱাচাচিত্তানি অভিমুখভাৱেন নিৱিস্সথ, ইমং কল্যাণপটিপত্তিং পটিপজ্জথাতি অত্থো.

এৱং মহাসত্তো তিৰচ্ছানযোনিযং নিব্বত্তোপি ঞাণসম্পন্নতায কল্যাণমিত্তো হুত্ৱা তেসং তিণ্ণং জনানং কালেন কালং উপগতানং ওৱাদৱসেন ধম্মং দেসেসি. তে তস্স ওৱাদং সম্পটিচ্ছিত্ৱা অত্তনো ৱসনট্ঠানং পৱিসিত্ৱা ৱসন্তি. এৱং কালে গচ্ছন্তে বোধিসত্তো আকাসং ওলোকেত্ৱা চন্দপাৰিপূৰিং দিস্ৱা ‘‘উপোসথকম্মং কৰোথা’’তি ওৱদি. তেনাহ –

১২৮. ‘‘উপোসথম্হি দিৱসে, চন্দং দিস্ৱান পূৰিতং;

এতেসং তত্থ আচিক্খিং, দিৱসো অজ্জুপোসথো.

১২৯. ‘‘দানানি পটিযাদেথ, দক্খিণেয্যস্স দাতৱে;

দত্ৱা দানং দক্খিণেয্যে, উপৱস্সথুপোসথ’’ন্তি.

তত্থ চন্দং দিস্ৱা ন পূৰিতন্তি জুণ্হপক্খচাতুদ্দসিযং ঈসকং অপৰিপুণ্ণভাৱেন চন্দং ন পৰিপূৰিতং দিস্ৱা ততো ৱিভাতায ৰত্তিযা অৰুণুগ্গমনৱেলাযমেৱ উপোসথম্হি দিৱসে পন্নৰসে এতেসং মক্কটাদীনং ময্হং সহাযানং দিৱসো অজ্জুপোসথো. তস্মা ‘‘দানানি পটিযাদেথা’’তিআদিনা তত্থ উপোসথদিৱসে পটিপত্তিৱিধানং আচিক্খিন্তি যোজেতব্বং. তত্থ দানানীতি দেয্যধম্মে. পটিযাদেথাতি যথাসত্তি যথাবলং সজ্জেথ. দাতৱেতি দাতুং. উপৱস্সথাতি উপোসথকম্মং কৰোথ, উপোসথসীলানি ৰক্খথ, সীলে পতিট্ঠায দিন্নদানং মহপ্ফলং হোতি, তস্মা যাচকে সম্পত্তে তুম্হেহি খাদিতব্বাহাৰতো দত্ৱা খাদেয্যাথাতি দস্সেতি.

তে ‘‘সাধূ’’তি বোধিসত্তস্স ওৱাদং সিৰসা সম্পটিচ্ছিত্ৱা উপোসথঙ্গানি অধিট্ঠহিংসু. তেসু উদ্দপোতো পাতোৱ ‘‘গোচৰং পৰিযেসিস্সামী’’তি নদীতীৰং গতো. অথেকো বাড়িসিকো সত্ত ৰোহিতমচ্ছে উদ্ধৰিত্ৱা ৱল্লিযা আৱুণিত্ৱা নদীতীৰে ৱালুকায পটিচ্ছাদেত্ৱা মচ্ছে গণ্হন্তো নদিযা অধো সোতং ভস্সি. উদ্দো মচ্ছগন্ধং ঘাযিত্ৱা ৱালুকং ৱিযূহিত্ৱা মচ্ছে দিস্ৱা নীহৰিত্ৱা ‘‘অত্থি নু খো এতেসং সামিকো’’তি তিক্খত্তুং ঘোসেত্ৱা সামিকং অপস্সন্তো ৱল্লিযং ডংসিত্ৱা অত্তনো ৱসনগুম্বে ঠপেত্ৱা ‘‘ৱেলাযমেৱ খাদিস্সামী’’তি অত্তনো সীলং আৱজ্জেন্তো নিপজ্জি. সিঙ্গালোপি গোচৰং পৰিযেসন্তো একস্স খেত্তগোপকস্স কুটিযং দ্ৱে মংসসূলানি একং গোধং একঞ্চ দধিৱাৰকং দিস্ৱা ‘‘অত্থি নু খো এতেসং সামিকো’’তি তিক্খত্তুং ঘোসেত্ৱা সামিকং অদিস্ৱা দধিৱাৰকস্স উগ্গহণৰজ্জুকং গীৱাযং পৱেসেত্ৱা মংসসূলে চ গোধঞ্চ মুখেন ডংসিত্ৱা অত্তনো ৱসনগুম্বে ঠপেত্ৱা ‘‘ৱেলাযমেৱ খাদিস্সামী’’তি অত্তনো সীলং আৱজ্জেন্তো নিপজ্জি. মক্কটোপি ৱনসণ্ডং পৱিসিত্ৱা অম্বপিণ্ডং আহৰিত্ৱা অত্তনো ৱসনগুম্বে ঠপেত্ৱা ‘‘ৱেলাযমেৱ খাদিস্সামী’’তি অত্তনো সীলং আৱজ্জেন্তো নিপজ্জি. তিণ্ণম্পি ‘‘অহো ইধ নূন যাচকো আগচ্ছেয্যা’’তি চিত্তং উপ্পজ্জি. তেন ৱুত্তং –

১৩০. ‘‘তে মে সাধূতি ৱত্ৱান, যথাসত্তি যথাবলং;

দানানি পটিযাদেত্ৱা, দক্খিণেয্যং গৱেসিসু’’ন্তি.

বোধিসত্তো পন ‘‘ৱেলাযমেৱ নিক্খমিত্ৱা দব্বাদিতিণানি খাদিস্সামী’’তি অত্তনো ৱসনগুম্বেযেৱ নিসিন্নো চিন্তেসি – ‘‘মম সন্তিকং আগতানং যাচকানং তিণানি খাদিতুং ন সক্কা, তিলতণ্ডুলাদযোপি ময্হং নত্থি, সচে মে সন্তিকং যাচকো আগমিস্সতি, অহং তিণেন যাপেমি, অত্তনো সৰীৰমংসং দস্সামী’’তি. তেনাহ ভগৱা –

১৩১. ‘‘অহং নিসজ্জ চিন্তেসিং, দানং দক্খিণনুচ্ছৱং;

যদিহং লভে দক্খিণেয্যং, কিং মে দানং ভৱিস্সতি.

১৩২. ‘‘ন মে অত্থি তিলা মুগ্গা, মাসা ৱা তণ্ডুলা ঘতং;

অহং তিণেন যাপেমি, ন সক্কা তিণ দাতৱে.

১৩৩. ‘‘যদি কোচি এতি দক্খিণেয্যো, ভিক্খায মম সন্তিকে;

দজ্জাহং সকমত্তানং, ন সো তুচ্ছো গমিস্সতী’’তি.

তত্থ দানং দক্খিণনুচ্ছৱন্তি দক্খিণাভাৱেন অনুচ্ছৱিকং দানং দক্খিণেয্যস্স দাতব্বং দেয্যধম্মং চিন্তেসিং. যদিহং লভেতি যদি অহং কিঞ্চি দক্খিণেয্যং অজ্জ লভেয্যং. কিং মে দানং ভৱিস্সতীতি কিং মম দাতব্বং ভৱিস্সতি. ন সক্কা তিণ দাতৱেতি যদি দক্খিণেয্যস্স দাতুং তিলমুগ্গাদিকং ময্হং নত্থি, যং পন মম আহাৰভূতং, তং ন সক্কা তিণং দক্খিণেয্যস্স দাতুং. দজ্জাহং সকমত্তানন্তি কিং ৱা ময্হং এতায দেয্যধম্মচিন্তায, ননু ইদমেৱ ময্হং অনৱজ্জং অপৰাধীনতায সুলভং পৰেসঞ্চ পৰিভোগাৰহং সৰীৰং সচে কোচি দক্খিণেয্যো মম সন্তিকং আগচ্ছতি, তযিদং সকমত্তানং তস্স দজ্জামহং. এৱং সন্তে ন সো তুচ্ছো মম সন্তিকং আগতো অৰিত্তহত্থো হুত্ৱা গমিস্সতীতি.

এৱং মহাপুৰিসস্স যথাভূতসভাৱং পৰিৱিতক্কেন্তস্স পৰিৱিতক্কানুভাৱেন সক্কস্স পণ্ডুকম্বলসিলাসনং উণ্হাকাৰং দস্সেসি. সো আৱজ্জেন্তো ইমং কাৰণং দিস্ৱা ‘‘সসৰাজং ৱীমংসিস্সামী’’তি পঠমং উদ্দস্স ৱসনট্ঠানং গন্ত্ৱা ব্ৰাহ্মণৱেসেন অট্ঠাসি. তেন ‘‘কিমত্থং, ব্ৰাহ্মণ, ঠিতোসী’’তি চ ৱুত্তে সচে কঞ্চি আহাৰং লভেয্যং, উপোসথিকো হুত্ৱা সমণধম্মং কৰেয্যন্তি. সো ‘‘সাধূতি তে আহাৰং দস্সামী’’তি আহ. তেন ৱুত্তং –

‘‘সত্ত মে ৰোহিতা মচ্ছা, উদকা থলমুব্ভতা;

ইদং ব্ৰাহ্মণ মে অত্থি, এতং ভুত্ৱা ৱনে ৱসা’’তি. (জা. ১.৪.৬১);

ব্ৰাহ্মণো ‘‘পগেৱ তাৱ হোতু, পচ্ছা জানিস্সামী’’তি তথেৱ সিঙ্গালস্স মক্কটস্স চ সন্তিকং গন্ত্ৱা তেহিপি অত্তনো ৱিজ্জমানেহি দেয্যধম্মেহি নিমন্তিতো ‘‘পগেৱ তাৱ হোতু, পচ্ছা জানিস্সামী’’তি আহ. তেন ৱুত্তং –

‘‘দুস্স মে খেত্তপালস্স, ৰত্তিভত্তং অপাভতং;

মংসসূলা চ দ্ৱে গোধা, একঞ্চ দধিৱাৰকং;

ইদং ব্ৰাহ্মণ মে অত্থি, এতং ভুত্ৱা ৱনে ৱসা’’তি.

‘‘অম্বপক্কং দকং সীতং, সীতচ্ছাযা মনোৰমা;

ইদং ব্ৰাহ্মণ মে অত্থি, এতং ভুত্ৱা ৱনে ৱসা’’তি. (জা. ১.৪.৬২-৬৩);

তত্থ দুস্সাতি অমুস্স. ৰত্তিভত্তং অপাভতন্তি ৰত্তিভোজনতো অপনীতং. মংসসূলা চ দ্ৱে গোধাতি অঙ্গাৰপক্কানি দ্ৱে মংসসূলানি একা চ গোধা. দধিৱাৰকন্তি দধিৱাৰকো.

১৩৪. অথ ব্ৰাহ্মণো সসপণ্ডিতস্স সন্তিকং গতো. তেনাপি ‘‘কিমত্থমাগতোসী’’তি ৱুত্তে তথেৱাহ. তেন ৱুত্তং ‘‘মম সঙ্কপ্পমঞ্ঞাযা’’তিআদি.

তত্থ মম সঙ্কপ্পমঞ্ঞাযাতি পুব্বে ৱুত্তপ্পকাৰং পৰিৱিতক্কং জানিত্ৱা. ব্ৰাহ্মণৱণ্ণিনাতি ব্ৰাহ্মণৰূপৱতা অত্তভাৱেন. আসযন্তি ৱসনগুম্বং.

১৩৫-৭. সন্তুট্ঠোতি সমং সব্বভাগেনেৱ তুট্ঠো. ঘাসহেতূতি আহাৰহেতু. অদিন্নপুব্বন্তি যেহি কেহিচি অবোধিসত্তেহি অদিন্নপুব্বং. দানৱৰন্তি উত্তমদানং. ‘‘অজ্জ দস্সামি তে অহ’’ন্তি ৱত্ৱা তুৱং সীলগুণূপেতো, অযুত্তং তে পৰহেঠনন্তি তং পাণাতিপাততো অপনেত্ৱা ইদানি তস্স পৰিভোগযোগ্গং অত্তানং কত্ৱা দাতুং ‘‘এহি অগ্গিং পদীপেহী’’তিআদিমাহ.

তত্থ অহং পচিস্সমত্তানন্তি তযা কতে অঙ্গাৰগব্ভে অহমেৱ পতিত্ৱা অত্তানং পচিস্সং. পক্কং ত্ৱং ভক্খযিস্সসীতি তথা পন পক্কং ত্ৱং খাদিস্সসি.

১৩৮-৯. নানাকট্ঠে সমানযীতি সো ব্ৰাহ্মণৱেসধাৰী সক্কো নানাদাৰূনি সমানেন্তো ৱিয অহোসি. মহন্তং অকাসি চিতকং, কত্ৱা অঙ্গাৰগব্ভকন্তি ৱীতচ্চিকং ৱিগতধূমং অঙ্গাৰভৰিতব্ভন্তৰং সমন্ততো জলমানং মম সৰীৰস্স নিমুজ্জনপ্পহোনকং তঙ্খণঞ্ঞেৱ মহন্তং চিতকং অকাসি, সহসা ইদ্ধিযা অভিনিম্মিনীতি অধিপ্পাযো. তেনাহ ‘‘অগ্গিং তত্থ পদীপেসি, যথা সো খিপ্পং মহাভৱে’’তি.

তত্থ সোতি সো অগ্গিক্খন্ধো সীঘং মহন্তো যথা ভৱেয্য, তথা পদীপেসি. ফোটেত্ৱা ৰজগতে গত্তেতি ‘‘সচে লোমন্তৰেসু পাণকা অত্থি, তে মা মৰিংসূ’’তি পংসুগতে মম গত্তে তিক্খত্তুং ৱিধুনিত্ৱা. একমন্তং উপাৱিসিন্তি ন তাৱ কট্ঠানি আদিত্তানীতি তেসং আদীপনং উদিক্খন্তো থোকং একমন্তং নিসীদিং.

১৪০. যদা মহাকট্ঠপুঞ্জো, আদিত্তো ধমধমাযতীতি যদা পন সো দাৰুৰাসি সমন্ততো আদিত্তো ৱাযুৱেগসমুদ্ধটানং জালসিখানং ৱসেন ‘‘ধমধমা’’তি এৱং কৰোতি. তদুপ্পতিত্ৱা পততি, মজ্ঝে জালসিখন্তৰেতি তদা তস্মিং কালে ‘‘মম সৰীৰস্স ঝাপনসমত্থো অযং অঙ্গাৰৰাসী’’তি চিন্তেত্ৱা উপ্পতিত্ৱা উল্লঙ্ঘিত্ৱা জালসিখানং অব্ভন্তৰভূতে তস্স অঙ্গাৰৰাসিস্স মজ্ঝে পদুমপুঞ্জে ৰাজহংসো ৱিয পমুদিতচিত্তো সকলসৰীৰং দানমুখে দত্ৱা পততি.

১৪১-২. পৱিট্ঠং যস্স কস্সচীতি যথা ঘম্মকালে সীতলং উদকং যেন কেনচি পৱিট্ঠং তস্স দৰথপৰিড়াহং ৱূপসমেতি, অস্সাদং পীতিঞ্চ উপ্পাদেতি. তথেৱ জলিতং অগ্গিন্তি এৱং তথা পজ্জলিতং অঙ্গাৰৰাসি তদা মম পৱিট্ঠস্স উসুমমত্তম্পি নাহোসি. অঞ্ঞদত্থু দানপীতিযা সব্বদৰথপৰিড়াহৱূপসমো এৱ অহোসি. চিৰস্সং ৱত মে ছৱিচম্মাদিকো সব্বো সৰীৰাৱযৱো দানমুখে জুহিতব্বতং উপগতো অভিপত্থিতো মনোৰথো মত্থকং পত্তোতি. তেন ৱুত্তং –

১৪৩. ‘‘ছৱিং চম্মং মংসং ন্হাৰুং, অট্ঠিং হদযবন্ধনং;

কেৱলং সকলং কাযং, ব্ৰাহ্মণস্স অদাসহ’’ন্তি.

তত্থ হদযবন্ধনন্তি হদযমংসপেসি. তঞ্হি হদযৱত্থুং বন্ধিত্ৱা ৱিয ঠিতত্তা ‘‘হদযবন্ধন’’ন্তি ৱুত্তং. অথ ৱা হদযবন্ধনন্তি হদযঞ্চ বন্ধনঞ্চ, হদযমংসঞ্চেৱ তং বন্ধিত্ৱা ৱিয ঠিতযকনমংসঞ্চাতি অত্থো. কেৱলং সকলং কাযন্তি অনৱসেসং সব্বং সৰীৰং.

এৱং তস্মিং অগ্গিম্হি অত্তনো সৰীৰে লোমকূপমত্তম্পি উণ্হং কাতুং অসক্কোন্তো বোধিসত্তোপি হিমগব্ভং পৱিট্ঠো ৱিয হুত্ৱা ব্ৰাহ্মণৰূপধৰং সক্কং এৱমাহ – ‘‘ব্ৰাহ্মণ, তযা কতো অগ্গি অতিসীতলো, কিং নামেত’’ন্তি? পণ্ডিত, নাহং ব্ৰাহ্মণো, সক্কোহমস্মি, তৱ ৱীমংসনত্থং আগতো এৱমকাসিন্তি. ‘‘সক্ক, ত্ৱং তাৱ তিট্ঠতু, সকলোপি চে লোকো মং দানেন ৱীমংসেয্য, নেৱ মে অদাতুকামতং কথঞ্চিপি উপ্পাদেয্য পস্সেথ ন’’ন্তি বোধিসত্তো সীহনাদং নদি.

অথ নং সক্কো ‘‘সসপণ্ডিত, তৱ গুণা সকলকপ্পম্পি পাকটা হোন্তূ’’তি পব্বতং পীড়েত্ৱা পব্বতৰসং আদায চন্দমণ্ডলে সসলক্খণং আলিখিত্ৱা বোধিসত্তং তস্মিং ৱনসণ্ডে তত্থেৱ ৱনগুম্বে তৰুণদব্বতিণপীঠে নিপজ্জাপেত্ৱা অত্তনো দেৱলোকমেৱ গতো. তেপি চত্তাৰো পণ্ডিতা সমগ্গা সম্মোদমানা নিচ্চসীলং উপোসথসীলঞ্চ পূৰেত্ৱা যথাৰহং পুঞ্ঞানি কত্ৱা যথাকম্মং গতা.

তদা উদ্দো আযস্মা আনন্দো অহোসি, সিঙ্গালো মহামোগ্গল্লানো, মক্কটো সাৰিপুত্তো, সসপণ্ডিতো পন লোকনাথো.

তস্স ইধাপি সীলাদিপাৰমিযো হেট্ঠা ৱুত্তনযেনেৱ যথাৰহং নিদ্ধাৰেতব্বা. তথা সতিপি তিৰচ্ছানুপপত্তিযং কুসলাদিধম্মে কুসলাদিতো যথাভূতাৱবোধো, তেসু অণুমত্তম্পি ৱজ্জং ভযতো দিস্ৱা সুট্ঠু অকুসলতো ওৰমণং, সম্মদেৱ চ কুসলধম্মেসু অত্তনো পতিট্ঠাপনং, পৰেসঞ্চ ‘‘ইমে নাম পাপধম্মা তে এৱং গহিতা এৱং পৰামট্ঠা এৱংগতিকা ভৱন্তি এৱংঅভিসম্পৰাযা’’তি আদীনৱং দস্সেত্ৱা ততো ৱিৰমণে নিযোজনং, ইদং দানং নাম, ইদং সীলং নাম, ইদং উপোসথকম্মং নাম, এত্থ পতিট্ঠিতানং দেৱমনুস্সসম্পত্তিযো হত্থগতা এৱাতিআদিনা পুঞ্ঞকম্মেসু আনিসংসং দস্সেত্ৱা পতিট্ঠাপনং, অত্তনো সৰীৰজীৱিতনিৰপেক্খং, পৰেসং সত্তানং অনুগ্গণ্হনং, উড়াৰো চ দানজ্ঝাসযোতি এৱমাদযো ইধ বোধিসত্তস্স গুণানুভাৱা ৱিভাৱেতব্বা. তেনেতং ৱুচ্চতি – ‘‘এৱং অচ্ছৰিযা হেতে…পে… ধম্মস্স অনুধম্মতো’’তি.

সসপণ্ডিতচৰিযাৱণ্ণনা নিট্ঠিতা.

ইদানি ‘‘অকিত্তিব্ৰাহ্মণো’’তিআদিনা যথাৱুত্তে দসপি চৰিযাৱিসেসে উদানেত্ৱা নিগমেতি. তত্থ অহমেৱ তদা আসিং, যো তে দানৱৰে অদাতি যো তানি উত্তমদানানি অদাসি, সো অকিত্তিব্ৰাহণাদিকো অহমেৱ তদা তস্মিং কালে অহোসিং, ন অঞ্ঞোতি. ইতি তেসু অত্তভাৱেসু সতিপি সীলাদিপাৰমীনং যথাৰহং পূৰিতভাৱে অত্তনো পন তদা দানজ্ঝাসযস্স অতিৱিয উড়াৰভাৱং সন্ধায দানপাৰমিৱসেনেৱ দেসনং আৰোপেসি. এতে দানপৰিক্খাৰা, এতে দানস্স পাৰমীতি যে ইমে অকিত্তিজাতকাদীসু (জা. ১.১৩.৮৩ আদযো) অনেকাকাৰৱোকাৰা মযা পৱত্তিতা দেয্যধম্মপৰিচ্চাগা মম সৰীৰাৱযৱপুত্তদাৰপৰিচ্চাগা পৰমকোটিকা, কিঞ্চাপি তে কৰুণূপাযকোসল্লপৰিগ্গহিতত্তা সব্বঞ্ঞুতঞ্ঞাণমেৱ উদ্দিস্স পৱত্তিতত্তা দানস্স পৰমুক্কংসগমনেন দানপাৰমী এৱ, তথাপি মম দানস্স পৰমত্থপাৰমিভূতস্স পৰিক্খৰণতোসন্তানস্স পৰিভাৱনাৱসেন অভিসঙ্খৰণতো এতে দানপৰিক্খাৰা নাম. যস্স পনেতে পৰিক্খাৰা, তং দস্সেতুং ‘‘জীৱিতং যাচকে দত্ৱা, ইমং পাৰমি পূৰযি’’ন্তি ৱুত্তং. এত্থ হি ঠপেত্ৱা সসপণ্ডিতচৰিযং সেসাসু নৱসু চৰিযাসু যথাৰহং দানপাৰমিদানউপপাৰমিযো ৱেদিতব্বা, সসপণ্ডিতচৰিযে (চৰিযা. ১.১২৫ আদযো) পন দানপৰমত্থপাৰমী. তেন ৱুত্তং –

‘‘ভিক্খায উপগতং দিস্ৱা, সকত্তানং পৰিচ্চজিং;

দানেন মে সমো নত্থি, এসা মে দানপাৰমী’’তি. (চৰিযা. ১.তস্সুদ্দান);

কিঞ্চাপি হি মহাপুৰিসস্স যথাৱুত্তে অকিত্তিব্ৰাহ্মণাদিকালে অঞ্ঞস্মিঞ্চ মহাজনকমহাসুতসোমাদিকালে দানপাৰমিযা পূৰিতত্তভাৱানং পৰিমাণং নাম নত্থি, তথাপি একন্তেনেৱ সসপণ্ডিতকালে দানপাৰমিযা পৰমত্থপাৰমিভাৱো ৱিভাৱেতব্বোতি.

পৰমত্থদীপনিযা চৰিযাপিটকসংৱণ্ণনায

দসৱিধচৰিযাসঙ্গহস্স ৱিসেসতো

দানপাৰমিৱিভাৱনস্স

পঠমৱগ্গস্স অত্থৱণ্ণনা নিট্ঠিতা.