২. গতসঞ্ঞকত্থেৰঅপদানৱণ্ণনা

জাতিযা সত্তৱস্সোহন্তিআদিকং আযস্মতো গতসঞ্ঞকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো তিস্সস্স ভগৱতো কালে একস্মিং কুলগেহে নিব্বত্তো পুৰাকতৱাসনাৱসেন সদ্ধাজাতো সত্তৱস্সিককালেযেৱ পব্বজিতো ভগৱতো পণামকৰণেনেৱ পাকটো অহোসি. সো একদিৱসং অতীৱ নীলমণিপ্পভানি নঙ্গলকসিতট্ঠানে উট্ঠিতসত্তপুপ্ফানি গহেত্ৱা আকাসে পূজেসি. সো যাৱতাযুকং সমণধম্মং কত্ৱা তেন পুঞ্ঞেন দেৱমনুস্সেসু সংসৰন্তো ইমস্মিং বুদ্ধুপ্পাদে একস্মিং কুলগেহে নিব্বত্তো ৱিঞ্ঞুতং পত্তো সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

১০. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো জাতিযা সত্তৱস্সোহন্তিআদিমাহ. তত্থ জাতিযা সত্তৱস্সোতি মাতুগব্ভতো নিক্খন্তকালতো পট্ঠায পৰিপুণ্ণসত্তৱস্সিকোতি অত্থো. পব্বজিং অনগাৰিযন্তি অগাৰস্স হিতং আগাৰিযং কসিৱাণিজ্জাদিকম্মং নত্থি আগাৰিযন্তি অনগাৰিযং, বুদ্ধসাসনে পব্বজিং অহন্তি অত্থো.

১২. সুগতানুগতং মগ্গন্তি বুদ্ধেন গতং মগ্গং. অথ ৱা সুগতেন দেসিতং ধম্মানুধম্মপটিপত্তিপূৰণৱসেন হট্ঠমানসো তুট্ঠচিত্তো পূজেত্ৱাতি সম্বন্ধো. সেসং সব্বত্থ উত্তানত্থমেৱাতি.

গতসঞ্ঞকত্থেৰঅপদানৱণ্ণনা সমত্তা.