৯. তিমিৰৱগ্গো

১. তিমিৰপুপ্ফিযত্থেৰঅপদানৱণ্ণনা

চন্দভাগানদীতীৰেতিআদিকং আযস্মতো তিমিৰপুপ্ফিযত্থেৰস্স অপদানং. কা উপ্পত্তি? অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে একস্মিং কুলগেহে নিব্বত্তো ৱুদ্ধিপ্পত্তো ঘৰাৱাসং সণ্ঠপেত্ৱা ৱসন্তো কামেসু আদীনৱং দিস্ৱা ঘৰাৱাসং পহায তাপসপব্বজ্জং পব্বজিত্ৱা চন্দভাগায নদিযা সমীপে ৱসতি, ৱিৱেককামতায হিমৱন্তং গন্ত্ৱা নিসিন্নং সিদ্ধত্থং ভগৱন্তং দিস্ৱা ৱন্দিত্ৱা তস্স গুণং পসীদিত্ৱা তিমিৰপুপ্ফং গহেত্ৱা পূজেসি. সো তেন পুঞ্ঞেন দেৱেসু চ মনুস্সেসু চ সম্পত্তিমনুভৱন্তো সংসৰিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱুদ্ধিমন্ৱায সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

১. সো অপৰভাগে পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো চন্দভাগানদীতীৰেতিআদিমাহ. তস্সত্থো হেট্ঠা ৱুত্তোৱ. অনুভোতং ৱজামহন্তি গঙ্গায আসন্নে ৱসনভাৱেন সব্বত্থ ৰম্মভাৱেন গঙ্গাতো হেট্ঠা সোতানুসাৰেন অহং ৱজামি গচ্ছামি তত্থ তত্থ ৱসামীতি অত্থো. নিসিন্নং সমণং দিস্ৱাতি সমিতপাপত্তা সোসিতপাপত্তা সমণসঙ্খাতং সম্মাসম্বুদ্ধং দিস্ৱাতি অত্থো.

২. এৱং চিন্তেসহং তদাতি অযং ভগৱা সযং তিণ্ণো সব্বসত্তে তাৰযিস্সতি সংসাৰতো উত্তাৰেতি সযং কাযদ্ৱাৰাদীহি দমিতো অযং ভগৱা পৰে দমেতি.

৩. সযং অস্সত্থো অস্সাসম্পত্তো, কিলেসপৰিড়াহতো মুত্তো সব্বসত্তে অস্সাসেতি, সন্তভাৱং আপাপেতি. সযং সন্তো সন্তকাযচিত্তো পৰেসং সন্তকাযচিত্তং পাপেতি. সযং মুত্তো সংসাৰতো মুচ্চিতো পৰে সংসাৰতো মোচযিস্সতি. সো অযং ভগৱা সযং নিব্বুতো কিলেসগ্গীহি নিব্বুতো পৰেসম্পি কিলেসগ্গীহি নিব্বাপেস্সতীতি অহং তদা এৱং চিন্তেসিন্তি অত্থো.

৪. গহেত্ৱা তিমিৰপুপ্ফন্তি সকলং ৱনন্তং নীলকাড়ৰংসীহি অন্ধকাৰং ৱিয কুৰুমানং খাযতীতি তিমিৰং পুপ্ফং তং গহেত্ৱা কণ্ণিকাৱণ্টং গহেত্ৱা মত্থকে সীসস্স উপৰি আকাসে ওকিৰিং পূজেসিন্তি অত্থো. সেসং উত্তানত্থমেৱাতি.

তিমিৰপুপ্ফিযত্থেৰঅপদানৱণ্ণনা সমত্তা.

২. গতসঞ্ঞকত্থেৰঅপদানৱণ্ণনা

জাতিযা সত্তৱস্সোহন্তিআদিকং আযস্মতো গতসঞ্ঞকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো তিস্সস্স ভগৱতো কালে একস্মিং কুলগেহে নিব্বত্তো পুৰাকতৱাসনাৱসেন সদ্ধাজাতো সত্তৱস্সিককালেযেৱ পব্বজিতো ভগৱতো পণামকৰণেনেৱ পাকটো অহোসি. সো একদিৱসং অতীৱ নীলমণিপ্পভানি নঙ্গলকসিতট্ঠানে উট্ঠিতসত্তপুপ্ফানি গহেত্ৱা আকাসে পূজেসি. সো যাৱতাযুকং সমণধম্মং কত্ৱা তেন পুঞ্ঞেন দেৱমনুস্সেসু সংসৰন্তো ইমস্মিং বুদ্ধুপ্পাদে একস্মিং কুলগেহে নিব্বত্তো ৱিঞ্ঞুতং পত্তো সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

১০. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো জাতিযা সত্তৱস্সোহন্তিআদিমাহ. তত্থ জাতিযা সত্তৱস্সোতি মাতুগব্ভতো নিক্খন্তকালতো পট্ঠায পৰিপুণ্ণসত্তৱস্সিকোতি অত্থো. পব্বজিং অনগাৰিযন্তি অগাৰস্স হিতং আগাৰিযং কসিৱাণিজ্জাদিকম্মং নত্থি আগাৰিযন্তি অনগাৰিযং, বুদ্ধসাসনে পব্বজিং অহন্তি অত্থো.

১২. সুগতানুগতং মগ্গন্তি বুদ্ধেন গতং মগ্গং. অথ ৱা সুগতেন দেসিতং ধম্মানুধম্মপটিপত্তিপূৰণৱসেন হট্ঠমানসো তুট্ঠচিত্তো পূজেত্ৱাতি সম্বন্ধো. সেসং সব্বত্থ উত্তানত্থমেৱাতি.

গতসঞ্ঞকত্থেৰঅপদানৱণ্ণনা সমত্তা.

৩. নিপন্নঞ্জলিকত্থেৰঅপদানৱণ্ণনা

ৰুক্খমূলে নিসিন্নোহন্তিআদিকং আযস্মতো নিপন্নঞ্জলিকত্থেৰস্স অপদানং. অযম্পি পুৰিমবুদ্ধেসু কতাধিকাৰো অনেকেসু ভৱেসু ৱিৱট্টূপনিস্সযানি পুঞ্ঞানি উপচিনন্তো তিস্সস্স ভগৱতো কালে কুলগেহে নিব্বত্তো ৱুদ্ধিপ্পত্তো পব্বজিত্ৱা ৰুক্খমূলিকঙ্গং পূৰযমানো অৰঞ্ঞে ৱিহৰতি. তস্মিং সমযে খৰো আবাধো উপ্পজ্জি, তেন পীড়িতো পৰমকাৰুঞ্ঞপ্পত্তো অহোসি. তদা ভগৱা তস্স কাৰুঞ্ঞেন তত্থ অগমাসি. অথ সো নিপন্নকোৱ উট্ঠিতুং অসক্কোন্তো সিৰসি অঞ্জলিং কত্ৱা ভগৱতো পণামং অকাসি. সো ততো চুতো তুসিতভৱনে উপ্পন্নো তত্থ সম্পত্তিমনুভৱিত্ৱা এৱং ছ কামাৱচৰসম্পত্তিযো অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱুদ্ধিপ্পত্তো সত্থৰি পসীদিত্ৱা পব্বজিতো নচিৰস্সেৱ অৰহা অহোসি, পুৰাকতপুঞ্ঞৱসেন নিপন্নঞ্জলিকত্থেৰোতি পাকটো.

১৬. সো অপৰভাগে অত্তনো পুঞ্ঞসম্পত্তিযো ওলোকেত্ৱা সোমনস্সজাতো পুব্বচৰিতাপদানং পকাসেন্তো ৰুক্খমূলে নিসিন্নোহন্তিআদিমাহ. তত্থ ৰুহতি পটিৰুহতি উদ্ধমুদ্ধং আৰোহতীতি ৰুক্খো, তস্স ৰুক্খস্স মূলে সমীপেতি অত্থো. ব্যাধিতো পৰমেন চাতি পৰমেন অধিকেন খৰেন কক্খড়েন ব্যাধিনা ৰোগেন ব্যাধিতো, ব্যাধিনা অহং সমন্নাগতোতি অত্থো. পৰমকাৰুঞ্ঞপ্পত্তোম্হীতি পৰমং অধিকং কাৰুঞ্ঞং দীনভাৱং দুক্খিতভাৱং পত্তোম্হি অৰঞ্ঞে কাননেতি সম্বন্ধো.

২০. পঞ্চেৱাসুং মহাসিখাতি সিৰসি পিড়ন্ধনত্থেন সিখা ৱুচ্চতি চূড়া. মণীতি জোতমানং মকুটং তস্স অত্থীতি সিখো, চক্কৱত্তিনো একনামকা পঞ্চেৱ চক্কৱত্তিনো আসুং অহেসুন্তি অত্থো. সেসং সব্বত্থ উত্তানত্থমেৱাতি.

নিপন্নঞ্জলিকত্থেৰঅপদানৱণ্ণনা সমত্তা.

৪. অধোপুপ্ফিযত্থেৰঅপদানৱণ্ণনা

অভিভূ নাম সো ভিক্খূতিআদিকং আযস্মতো অধোপুপ্ফিযত্থেৰস্স অপদানং. অযম্পি পুৰিমবুদ্ধেসু কতাধিকাৰো অনেকেসু ভৱেসু ৱিৱট্টূপনিস্সযানি পুঞ্ঞানি উপচিনন্তো সিখিস্স ভগৱতো কালে কুলগেহে নিব্বত্তো ৱুদ্ধিপ্পত্তো ঘৰাৱাসং সণ্ঠপেত্ৱা অপৰভাগে কামেসু আদীনৱং দিস্ৱা তং পহায ইসিপব্বজ্জং পব্বজিত্ৱা পঞ্চাভিঞ্ঞাঅট্ঠসমাপত্তিলাভী ইদ্ধীসু চ ৱসীভাৱং পত্ৱা হিমৱন্তস্মিং পটিৱসতি. তস্স সিখিস্স ভগৱতো অভিভূ নাম অগ্গসাৱকো ৱিৱেকাভিৰতো হিমৱন্তমগমাসি. অথ সো তাপসো তং অগ্গসাৱকত্থেৰং দিস্ৱা থেৰস্স ঠিতপব্বতং আৰুহন্তো পব্বতস্স হেট্ঠাতলতো সুগন্ধানি ৱণ্ণসম্পন্নানি সত্ত পুপ্ফানি গহেত্ৱা পূজেসি. অথ সো থেৰো তস্সানুমোদনমকাসি. সোপি তাপসো সকস্সমং অগমাসি. তত্থ একেন অজগৰেন পীড়িতো অপৰভাগে অপৰিহীনজ্ঝানো তেনেৱ উপদ্দৱেন উপদ্দুতো কালং কত্ৱা ব্ৰহ্মলোকপৰাযনো হুত্ৱা ব্ৰহ্মসম্পত্তিং ছকামাৱচৰসম্পত্তিঞ্চ অনুভৱিত্ৱা মনুস্সেসু মনুস্সসম্পত্তিযো চ খেপেত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱুদ্ধিপ্পত্তো ভগৱতো ধম্মং সুত্ৱা পসন্নমানসো পব্বজিত্ৱা নচিৰস্সেৱ অৰহা অহোসি. সো অপৰভাগে অত্তনো কতপুঞ্ঞনামেন অধোপুপ্ফিযত্থেৰোতি পাকটো.

২২. সো একদিৱসং অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো অভিভূ নাম সো ভিক্খূতিআদিমাহ. তত্থ সীলসমাধীহি পৰে অভিভৱতীতি অভিভূ, খন্ধমাৰাদিমাৰে অভিভৱতি অজ্ঝোত্থৰতীতি ৱা অভিভূ, সসন্তানপৰসন্তানগতকিলেসে অভিভৱতি ৱিহেসেতি ৱিদ্ধংসেতীতি ৱা অভিভূ. ভিক্খনসীলো যাচনসীলোতি ভিক্খু, ছিন্নভিন্নপটধৰোতি ৱা ভিক্খু. অভিভূ নাম অগ্গসাৱকো সো ভিক্খূতি অত্থো, সিখিস্স ভগৱতো অগ্গসাৱকোতি সম্বন্ধো.

২৭. অজগৰো মং পীড়েসীতি তথাৰূপং সীলসম্পন্নং ঝানসম্পন্নং তাপসং পুব্বে কতপাপেন ৱেৰেন চ মহন্তো অজগৰসপ্পো পীড়েসি. সো তেনেৱ উপদ্দৱেন উপদ্দুতো অপৰিহীনজ্ঝানো কালং কত্ৱা ব্ৰহ্মলোকপৰাযণো আসি. সেসং সব্বত্থ উত্তানমেৱাতি.

অধোপুপ্ফিযত্থেৰঅপদানৱণ্ণনা সমত্তা.

৫. ৰংসিসঞ্ঞকত্থেৰঅপদানৱণ্ণনা

পব্বতে হিমৱন্তম্হীতিআদিকং আযস্মতো ৰংসিসঞ্ঞকত্থেৰস্স অপদানং. অযম্পি পুৰিমবুদ্ধেসু কতাধিকাৰো তেসু তেসু ভৱেসু ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে কুলগেহে নিব্বত্তো ৱুদ্ধিমন্ৱায ঘৰাৱাসং সণ্ঠপেত্ৱা কামেসু আদীনৱং দিস্ৱা ঘৰাৱাসং পহায তাপসপব্বজ্জং পব্বজিত্ৱা অজিনচম্মধৰো হিমৱন্তম্হি ৱাসং কপ্পেসি. তস্মিং সমযে ৱিপস্সী ভগৱা হিমৱন্তমগমাসি. অথ সো তাপসো তমুপগতং ভগৱন্তং দিস্ৱা তস্স ভগৱতো সৰীৰতো নিক্খন্তছব্বণ্ণবুদ্ধৰংসীসু পসীদিত্ৱা অঞ্জলিং পগ্গয্হ পঞ্চঙ্গেন নমক্কাৰমকাসি. সো তেনেৱ পুঞ্ঞেন ইতো চুতো তুসিতাদীসু দিব্বসম্পত্তিযো অনুভৱিত্ৱা অপৰভাগে মনুস্সসম্পত্তিযো চ অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱুদ্ধিমন্ৱায ঘৰাৱাসং সণ্ঠপেত্ৱা তত্থাদীনৱং দিস্ৱা গেহং পহায পব্বজিত্ৱা নচিৰস্সেৱ অৰহা অহোসি.

৩০. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পব্বতে হিমৱন্তম্হীতিআদিমাহ. তত্থ পব্বতেতি পকাৰেন ব্ৰূহতি ৱড্ঢেতীতি পব্বতো, হিমো অস্স অত্থীতি হিমৱন্তো, হিমৱন্তো চ সো পব্বতো চাতি হিমৱন্তপব্বতো. হিমৱন্তপব্বতেতি ৱত্তব্বে গাথাৱচনসুখত্থং ‘‘পব্বতে হিমৱন্তম্হী’’তি ৱুত্তং. তস্মিং হিমৱন্তম্হি পব্বতে ৱাসং কপ্পেসিং পুৰে অহন্তি সম্বন্ধো. সেসং সব্বত্থ নযানুসাৰেন উত্তানমেৱাতি.

ৰংসিসঞ্ঞকত্থেৰঅপদানৱণ্ণনা সমত্তা.

৬. দুতিযৰংসিসঞ্ঞকত্থেৰঅপদানৱণ্ণনা

পব্বতে হিমৱন্তম্হীতিআদিকং আযস্মতো দুতিযৰংসিসঞ্ঞকত্থেৰস্স অপদানং. অযম্পি পুৰিমবুদ্ধেসু কতকুসলো উপ্পন্নুপ্পন্নভৱে ৱিৱট্টূপনিস্সযানি পুঞ্ঞানি উপচিনন্তো ফুস্সস্স ভগৱতো কালে কুলগেহে নিব্বত্তো ৱুদ্ধিপ্পত্তো ঘৰাৱাসং সণ্ঠপেত্ৱা তত্থ দোসং দিস্ৱা তং পহায তাপসপব্বজ্জং পব্বজিত্ৱা হিমৱন্তপব্বতে ৱসন্তো ৱাকচীৰনিৱসনো ৱিৱেকসুখেন ৱিহৰতি. তস্মিং সমযে সো ফুস্সং ভগৱন্তং তং পদেসং সম্পত্তং দিস্ৱা তস্স সৰীৰতো নিক্খন্তছব্বণ্ণবুদ্ধৰংসিযো ইতো চিতো ৱিধাৱন্তিযো দণ্ডদীপিকানিক্খন্তৱিপ্ফুৰন্তমিৱ দিস্ৱা তস্মিং পসন্নো অঞ্জলিং পগ্গহেত্ৱা ৱন্দিত্ৱা চিত্তং পসাদেত্ৱা তেনেৱ পীতিসোমনস্সেন কালং কত্ৱা তুসিতাদীসু নিব্বত্তো তত্থ ছ কামাৱচৰসম্পত্তিযো চ অনুভৱিত্ৱা অপৰভাগে মনুস্সসম্পত্তিযো চ অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱুদ্ধিপ্পত্তো পুব্বৱাসনাৱসেন পব্বজিত্ৱা নচিৰস্সেৱ অৰহা অহোসি.

৩৫. সো অপৰভাগে পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পব্বতে হিমৱন্তম্হীতিআদিমাহ. তং সব্বং উত্তানত্থমেৱাতি.

দুতিযৰংসিসঞ্ঞকত্থেৰঅপদানৱণ্ণনা সমত্তা.

৭. ফলদাযকত্থেৰঅপদানৱণ্ণনা

পব্বতে হিমৱন্তম্হীতিআদিকং আযস্মতো ফলদাযকত্থেৰস্স অপদানং. অযম্পি পুৰিমবুদ্ধেসু কতকুসলসম্ভাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ফুস্সস্স ভগৱতো কালে একস্মিং কুলগেহে নিব্বত্তো সুখপ্পত্তো তং সব্বং পহায তাপসপব্বজ্জং পব্বজিত্ৱা খৰাজিনচম্মধাৰী হুত্ৱা ৱিহৰতি. তস্মিঞ্চ সমযে ফুস্সং ভগৱন্তং তত্থ সম্পত্তং দিস্ৱা পসন্নমানসো মধুৰানি ফলানি গহেত্ৱা ভোজেসি. সো তেনেৱ কুসলেন দেৱলোকাদীসু পুঞ্ঞসম্পত্তিযো অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱুদ্ধিমন্ৱায সত্থৰি পসীদিত্ৱা পব্বজিত্ৱা নচিৰস্সেৱ অৰহা অহোসি.

৩৯. সো অপৰভাগে অত্তনো পুব্বকম্মং অনুস্সৰিত্ৱা পুব্বচৰিতাপদানং পকাসেন্তো পব্বতে হিমৱন্তম্হীতিআদিমাহ. তং সব্বং হেট্ঠা ৱুত্তনযত্তা উত্তানত্থমেৱাতি.

ফলদাযকত্থেৰঅপদানৱণ্ণনা সমত্তা.

৮. সদ্দসঞ্ঞকত্থেৰঅপদানৱণ্ণনা

পব্বতে হিমৱন্তম্হীতিআদিকং আযস্মতো সদ্দসঞ্ঞকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ফুস্সস্স ভগৱতো কালে একস্মিং কুলগেহে নিব্বত্তো ৱুদ্ধিপ্পত্তো সদ্ধাজাতো তাপসপব্বজ্জং পব্বজিত্ৱা হিমৱন্তম্হি অৰঞ্ঞাৱাসে ৱসন্তো অত্তনো অনুকম্পায উপগতস্স ভগৱতো ধম্মং সুত্ৱা ধম্মেসু চিত্তং পসাদেত্ৱা যাৱতাযুকং ঠত্ৱা অপৰভাগে কালং কত্ৱা তুসিতাদীসু ছসু কামাৱচৰসম্পত্তিযো চ মনুস্সেসু মনুস্সসম্পত্তিযো চ অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱুদ্ধিমন্ৱায সদ্ধাজাতো পব্বজিত্ৱা ৱিপস্সনং ৱড্ঢেত্ৱা অৰহত্তং পাপুণি.

৪৩. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পব্বতে হিমৱন্তম্হীতিআদিমাহ. তং সব্বং উত্তানত্থমেৱাতি.

সদ্দসঞ্ঞকত্থেৰঅপদানৱণ্ণনা সমত্তা.

৯. বোধিসিঞ্চকত্থেৰঅপদানৱণ্ণনা

ৱিপস্সিস্স ভগৱতোতিআদিকং আযস্মতো বোধিসিঞ্চকত্থেৰস্স অপদানং. অযম্পি পুৰিমবুদ্ধেসু কতাধিকাৰো অনেকাসু জাতীসু ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে কুলগেহে নিব্বত্তো সাসনে পব্বজিত্ৱা ৱত্তপটিপত্তিযা সাসনং সোভযন্তো মহাজনে বোধিপূজং কুৰুমানে দিস্ৱা অনেকানি পুপ্ফানি সুগন্ধোদকানি চ গাহাপেত্ৱা পূজেসি. সো তেন পুঞ্ঞেন দেৱলোকে নিব্বত্তো ছ কামাৱচৰসম্পত্তিযো অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱুদ্ধিমন্ৱায সদ্ধাজাতো পব্বজিত্ৱা নচিৰস্সেৱ অৰহা অহোসি.

৪৬. সো অৰহা হুত্ৱা ঝানফলসুখেন ৱীতিনামেত্ৱা পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো ৱিপস্সিস্স ভগৱতোতিআদিমাহ. তত্থ ৱিসেসং পৰমত্থং নিব্বানং পস্সতীতি ৱিপস্সী, ৱিসেসেন ভব্বাভব্বজনে পস্সতীতি ৱা ৱিপস্সী, ৱিপস্সন্তো চতুসচ্চং পস্সনদক্খনসীলোতি ৱা ৱিপস্সী, তস্স ৱিপস্সিস্স ভগৱতো মহাবোধিমহো অহূতি সম্বন্ধো. তত্ৰাপি মহাবোধীতি বোধি ৱুচ্চতি চতূসু মগ্গেসু ঞাণং, তমেত্থ নিসিন্নো ভগৱা পটিৱিজ্ঝতীতি কণিকাৰপাদপৰুক্খোপি বোধিচ্চেৱ ৱুচ্চতি, মহিতো চ সো দেৱব্ৰহ্মনৰাসুৰেহি বোধি চেতি মহাবোধি, মহতো বুদ্ধস্স ভগৱতো বোধীতি ৱা মহাবোধি, তস্স মহো পূজা অহোসীতি অত্থো. সেসং সব্বত্থ উত্তানত্থমেৱাতি.

বোধিসিঞ্চকত্থেৰঅপদানৱণ্ণনা সমত্তা.

১০. পদুমপুপ্ফিযত্থেৰঅপদানৱণ্ণনা

পোক্খৰৱনং পৱিট্ঠোতিআদিকং আযস্মতো পদুমপুপ্ফিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ফুস্সস্স ভগৱতো কালে একস্মিং কুলগেহে নিব্বত্তো ৱুদ্ধিমন্ৱায পদুমসম্পন্নং একং পোক্খৰণিং পৱিসিত্ৱা ভিসমুড়ালে খাদন্তো পোক্খৰণিযা অৱিদূৰে গচ্ছমানং ফুস্সং ভগৱন্তং দিস্ৱা পসন্নমানসো ততো পদুমানি ওচিনিত্ৱা আকাসে উক্খিপিত্ৱা ভগৱন্তং পূজেসি, তানি পুপ্ফানি আকাসে ৱিতানং হুত্ৱা অট্ঠংসু. সো ভিয্যোসোমত্তায পসন্নমানসো পব্বজিত্ৱা ৱত্তপটিপত্তিসাৰো সমণধম্মং পূৰেত্ৱা ততো চুতো তুসিতভৱনমলং কুৰুমানো ৱিয তত্থ উপ্পজ্জিত্ৱা কমেন ছ কামাৱচৰসম্পত্তিযো চ মনুস্সসম্পত্তিযো চ অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱুদ্ধিপ্পত্তো সদ্ধাজাতো পব্বজিত্ৱা নচিৰস্সেৱ অৰহা অহোসি.

৫১. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পোক্খৰৱনং পৱিট্ঠোতিআদিমাহ. তত্থ পকাৰেন নড়দণ্ডপত্তাদীহি খৰন্তীতি পোক্খৰা, পোক্খৰানং সমুট্ঠিতট্ঠেন সমূহন্তি পোক্খৰৱনং, পদুমগচ্ছসণ্ডেহি মণ্ডিতং মজ্ঝং পৱিট্ঠো অহন্তি অত্থো. সেসং সব্বত্থ উত্তানমেৱাতি.

পদুমপুপ্ফিযত্থেৰঅপদানৱণ্ণনা সমত্তা.

নৱমৱগ্গৱণ্ণনা সমত্তা.