১০. সুধাৱগ্গো

১. সুধাপিণ্ডিযত্থেৰঅপদানৱণ্ণনা

পূজাৰহে পূজযতোতিআদিকং আযস্মতো সুধাপিণ্ডিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে ভগৱতি ধৰমানে পুঞ্ঞং কাতুমসক্কোন্তো পৰিনিব্বুতে ভগৱতি তস্স ধাতুং নিদহিত্ৱা চেতিযে কৰীযমানে সুধাপিণ্ডমদাসি. সো তেন পুঞ্ঞেন চতুন্নৱুতিকপ্পতো পট্ঠায এত্থন্তৰে চতুৰাপাযমদিস্ৱা দেৱমনুস্সসম্পত্তিযো অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱিঞ্ঞুতং পত্ৱা সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

১-২. সো অপৰভাগে অত্তনো পুব্বকম্মং সৰিত্ৱা সোমনস্সজাতো অত্তনো পুব্বচৰিতাপদানং পকাসেন্তো পূজাৰহেতিআদিমাহ. তত্থ পূজাৰহা নাম বুদ্ধপচ্চেকবুদ্ধঅৰিযসাৱকাচৰিযুপজ্ঝাযমাতাপিতুগৰুআদযো, তেসু পূজাৰহেসু মালাদিপদুমৱত্থাভৰণচতুপচ্চযাদীহি পূজযতো পূজযন্তস্স পুগ্গলস্স পুঞ্ঞকোট্ঠাসং সহস্সসতসহস্সাদিৱসেন সঙ্খ্যং কাতুং কেনচি মহানুভাৱেনাপি ন সক্কাতি অত্থো. ন কেৱলমেৱ ধৰমানে বুদ্ধাদযো পূজযতো, পৰিনিব্বুতস্সাপি ভগৱতো চেতিযপটিমাবোধিআদীসুপি এসেৱ নযো.

৩. তং দীপেতুং চতুন্নমপি দীপানন্তিআদিমাহ. তত্থ চতুন্নমপি দীপানন্তি জম্বুদীপঅপৰগোযানউত্তৰকুৰুপুব্বৱিদেহসঙ্খাতানং চতুন্নং দীপানং তদনুগতানং দ্ৱিসহস্সপৰিত্তদীপানঞ্চ একতো কত্ৱা সকলচক্কৱাড়গব্ভে ইস্সৰং চক্কৱত্তিৰজ্জং কৰেয্যাতি অত্থো. একিস্সা পূজনাযেতন্তি ধাতুগব্ভে চেতিযে কতায একিস্সা পূজায এতং সকলজম্বুদীপে সত্তৰতনাদিকং সকলং ধনং. কলং নাগ্ঘতি সোড়সিন্তি চেতিযে কতপূজায সোড়সক্খত্তুং ৱিভত্তস্স সোড়সমকোট্ঠাসস্স ন অগ্ঘতীতি অত্থো.

৪. সিদ্ধত্থস্স…পে… ফলিতন্তৰেতি নৰানং অগ্গস্স সেট্ঠস্স সিদ্ধত্থস্স ভগৱতো চেতিযে ধাতুগব্ভম্হি সুধাকম্মে কৰীযমানে পৰিচ্ছেদানং উভিন্নমন্তৰে ৱেমজ্ঝে, অথ ৱা পুপ্ফদানট্ঠানানং অন্তৰে ফলন্তিযা মযা সুধাপিণ্ডো দিন্নো মক্খিতোতি সম্বন্ধো. সেসং সব্বত্থ উত্তানমেৱাতি.

সুধাপিণ্ডিযত্থেৰঅপদানৱণ্ণনা সমত্তা.

২. সুচিন্তিকত্থেৰঅপদানৱণ্ণনা

তিস্সস্স লোকনাথস্সাতিআদিকং আযস্মতো সুচিন্তিকত্থেৰস্স অপদানং. অযম্পি পুৰিমবুদ্ধেসু কতাধিকাৰো অনেকাসু জাতীসু নিব্বানাধিগমায পুঞ্ঞং উপচিনিত্ৱা তিস্সস্স ভগৱতো কালে একস্মিং কুলগেহে নিব্বত্তো ৱুদ্ধিমন্ৱায সত্থৰি পসীদিত্ৱা সত্থু নিসীদনত্থায পৰিসুদ্ধং সিলিট্ঠং কট্ঠমযমনগ্ঘপীঠমদাসি. সো তেন পুঞ্ঞকম্মেন সুগতিসুখমনুভৱিত্ৱা তত্থ তত্থ সংসৰন্তো ইমস্মিং বুদ্ধুপ্পাদে একস্মিং কুলগেহে নিব্বত্তো ৱুদ্ধিমন্ৱায সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

৮. সো পত্তঅৰহত্তফলো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো তিস্সস্স লোকনাথস্সাতিআদিমাহ. তং সব্বং উত্তানত্থমেৱাতি.

সুচিন্তিকত্থেৰঅপদানৱণ্ণনা সমত্তা.

৩. অড্ঢচেড়কত্থেৰঅপদানৱণ্ণনা

তিস্সস্সাহং ভগৱতোতিআদিকং আযস্মতো অড্ঢচেড়কত্থেৰস্স অপদানং. অযম্পি থেৰো পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো তিস্সস্স ভগৱতো কালে একেনাকুসলেন কম্মেন দুগ্গতকুলগেহে নিব্বত্তো ৱুদ্ধিমন্ৱায সদ্ধম্মদেসনং ঞত্ৱা পসন্নমানসো চীৱৰত্থায অড্ঢভাগং একং দুস্সমদাসি. সো তেনেৱ পীতিসোমনস্সেন কালং কত্ৱা সগ্গে নিব্বত্তো ছ কামাৱচৰসম্পত্তিমনুভৱিত্ৱা ততো চুতো মনুস্সেসু মনুস্সসম্পত্তীনং অগ্গভূতং চক্কৱত্তিসম্পত্তিং অনুভৱিত্ৱা ইমস্মিং বুদ্ধুপ্পাদে একস্মিং অদ্ধকুলে নিব্বত্তো ৱুদ্ধিপ্পত্তো সত্থু ধম্মদেসনং সুত্ৱা পসন্নমানসো পব্বজিত্ৱা নচিৰস্সেৱ অৰহা অহোসি.

১৪. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো তিস্সস্সাহং ভগৱতোতিআদিমাহ. তং সব্বং উত্তানত্থমেৱাতি.

অড্ঢচেড়কত্থেৰঅপদানৱণ্ণনা সমত্তা.

৪. সূচিদাযকত্থেৰঅপদানৱণ্ণনা

কম্মাৰোহং পুৰে আসিন্তিআদিকং আযস্মতো সূচিদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো অন্তৰন্তৰা কুসলবীজানি পূৰেন্তো ৱিপস্সিস্স ভগৱতো কালে অন্তৰন্তৰা কতেন একেন কম্মচ্ছিদ্দেন কম্মাৰকুলে নিব্বত্তো ৱুদ্ধিমন্ৱায সকসিপ্পেসু নিপ্ফত্তিং পত্তো সত্থু ধম্মদেসনং সুত্ৱা পসন্নমানসো চীৱৰসিব্বনত্থায সূচিদানমদাসি, তেন পুঞ্ঞেন দিব্বসম্পত্তিং অনুভৱিত্ৱা অপৰভাগে মনুস্সেসু উপ্পন্নো চক্কৱত্তাদযো সম্পত্তিযো চ অনুভৱন্তো উপ্পন্নুপ্পন্নভৱে তিক্খপঞ্ঞো ৱজীৰঞাণো অহোসি. সো কমেন ইমস্মিং বুদ্ধুপ্পাদে নিব্বত্তো ৱুদ্ধিপ্পত্তো মহদ্ধনো সদ্ধাজাতো তিক্খপঞ্ঞো অহোসি. সো একদিৱসং সত্থু ধম্মদেসনং সুত্ৱা ধম্মানুসাৰেন ঞাণং পেসেত্ৱা নিসিন্নাসনেযেৱ অৰহা অহোসি.

১৯. সো অৰহা সমানো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো কম্মাৰোহং পুৰে আসিন্তিআদিমাহ. তত্থ কম্মাৰোতি অযোকম্মলোহকম্মাদিনা কম্মেন জীৱতি ৰুহতি ৱুদ্ধিং ৱিৰূড়্হিং আপজ্জতীতি কম্মাৰো, পুব্বে পুঞ্ঞকৰণকালে কম্মাৰো আসিং অহোসিন্তি অত্থো. সেসং সব্বত্থ উত্তানমেৱাতি.

সূচিদাযকত্থেৰঅপদানৱণ্ণনা সমত্তা.

৫. গন্ধমালিযত্থেৰঅপদানৱণ্ণনা

সিদ্ধত্থস্স ভগৱতোতিআদিকং আযস্মতো গন্ধমালিযত্থেৰস্স অপদান. অযম্পি পুৰিমবুদ্ধেসু কতাধিকাৰো সিদ্ধত্থস্স ভগৱতো কালে কুলগেহে নিব্বত্তো মহদ্ধনো মহাভোগো অহোসি. সো সত্থৰি পসীদিত্ৱা চন্দনাগৰুকপ্পূৰকস্সতুৰাদীনি অনেকানি সুগন্ধানি ৱড্ঢেত্ৱা সত্থু গন্ধথূপং কাৰেসি. তস্সুপৰি সুমনপুপ্ফেহি ছাদেসি, বুদ্ধঞ্চ অট্ঠঙ্গনমক্কাৰং অকাসি. সো তেন পুঞ্ঞকম্মেন দেৱমনুস্সেসু সম্পত্তিযো অনুভৱিত্ৱা ইমস্মিং বুদ্ধুপ্পাদে ৱিভৱসম্পন্নে একস্মিং কুলগেহে নিব্বত্তো ৱুদ্ধিমন্ৱায সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

২৪. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো সিদ্ধত্থস্স ভগৱতোতিআদিমাহ. তং সব্বং উত্তানত্থমেৱাতি.

গন্ধমালিযত্থেৰঅপদানৱণ্ণনা সমত্তা.

৬. তিপুপ্ফিযত্থেৰঅপদানৱণ্ণনা

মিগলুদ্দো পুৰে আসিন্তিআদিকং আযস্মতো তিপুপ্ফিযত্থেৰস্স অপদানং. অযম্পি পুৰিমবুদ্ধেসু কতাধিকাৰো অন্তৰা কেনচি অকুসলচ্ছিদ্দেন ৱিপস্সিস্স ভগৱতো কালে নেসাদকুলে নিব্বত্তো মিগলুদ্দো হুত্ৱা অৰঞ্ঞে ৱিহৰতি. তদা ৱিপস্সিস্স ভগৱতো পাটলিবোধিং সম্পুণ্ণপত্তপল্লৱং হৰিতৱণ্ণং নীলোভাসং মনোৰমং দিস্ৱা তীহি পুপ্ফেহি পূজেত্ৱা পুৰাণপত্তং ছড্ডেত্ৱা ভগৱতো সম্মুখা ৱিয পাটলিমহাবোধিং ৱন্দি. সো তেন পুঞ্ঞেন ততো চুতো দেৱলোকে উপ্পন্নো তত্থ দিব্বসম্পত্তিং অপৰাপৰং অনুভৱিত্ৱা ততো চুতো মনুস্সেসু জাতো তত্থ চক্কৱত্তিসম্পত্তিআদযো অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱুদ্ধিমন্ৱায সত্থু ধম্মদেসনং সুত্ৱা পটিলদ্ধসোমনস্সহদযো গেহং পহায পব্বজিত্ৱা নচিৰস্সেৱ অৰহা অহোসি.

৩১. সো এৱং সিদ্ধিপ্পত্তো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো মিগলুদ্দো পুৰে আসিন্তিআদিমাহ. তত্থ মৰণায গচ্ছতি পাপুণাতীতি মিগো, অথ ৱা মগযমানো ইহতি পৱত্ততীতি মিগো, মিগানং মাৰণে লুদ্দো লোভী গেধোতি মিগলুদ্দো, পুৰে ময্হং পুঞ্ঞকৰণসমযে কাননসঙ্খাতে মহাঅৰঞ্ঞে মিগলুদ্দো আসিন্তি সম্বন্ধো. পাটলিং হৰিতং দিস্ৱাতি তত্থ পকাৰেন তলেন ৰত্তৱণ্ণেন ভৱতীতি পাটলি, পুপ্ফানং ৰত্তৱণ্ণতায পাটলীতি ৱোহাৰো, পত্তানং হৰিততায হৰিতং নীলৱণ্ণং পাটলিবোধিং দিস্ৱাতি অত্থো. সেসং সব্বত্থ উত্তানত্থমেৱাতি.

তিপুপ্ফিযত্থেৰঅপদানৱণ্ণনা সমত্তা.

৭. মধুপিণ্ডিকত্থেৰঅপদানৱণ্ণনা

ৱিৱনে কাননে দিস্ৱাতিআদিকং আযস্মতো মধুপিণ্ডিকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে নেসাদযোনিযং নিব্বত্তো মহাঅৰঞ্ঞে পটিৱসতি. তদা ৱিৱেকাভিৰতিযা সম্পত্তং সিদ্ধত্থং ভগৱন্তং দিস্ৱা সমাধিতো ৱুট্ঠিতস্স তস্স সুমধুৰং মধুমদাসি. তত্থ চ পসন্নমানসো ৱন্দিত্ৱা পক্কামি. সো তেনেৱ পুঞ্ঞেন সম্পত্তিং অনুভৱন্তো দেৱমনুস্সেসু সংসৰিত্ৱা ইমস্মিং বুদ্ধুপ্পাদে কুলগেহে নিব্বত্তো ৱুদ্ধিপ্পত্তো সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

৩৭. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো ৱিৱনে কাননে দিস্ৱাতিআদিমাহ. তত্থ ৱিৱনেতি ৱিসেসেন ৱনং পত্থটং ৱিৱনং, হত্থিঅস্সৰথসদ্দেহি ভেৰিসদ্দেহি চ ৱত্থুকামকিলেসকামেহি চ ৱিগতং ব্যাপগতন্তি অত্থো, কাননসঙ্খাতে মহাঅৰঞ্ঞে ৱিৱনেতি সম্বন্ধো. ওসধিংৱ ৱিৰোচন্তন্তি ভৱৱড্ঢকিজনানং ইচ্ছিতিচ্ছিতং নিপ্ফাদেতীতি ওসধং. ওজানিব্বত্তিকাৰণং পটিচ্চ যায তাৰকায উগ্গতায উদ্ধৰন্তি গণ্হন্তীতি সা ওসধি. ওসধিতাৰকা ইৱ ৱিৰোচন্তীতি ৱত্তব্বে গাথাবন্ধসুখত্থং ‘‘ওসধিংৱ ৱিৰোচন্ত’’ন্তি চ ৱুত্তং. সেসং সব্বত্থ উত্তানমেৱাতি.

মধুপিণ্ডিকত্থেৰঅপদানৱণ্ণনা সমত্তা.

৮. সেনাসনদাযকত্থেৰঅপদানৱণ্ণনা

সিদ্ধত্থস্স ভগৱতোতিআদিকং আযস্মতো সেনাসনদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে কুলগেহে নিব্বত্তো ৱুদ্ধিপ্পত্তো সত্থৰি পসীদিত্ৱা অত্তনো ৱসনট্ঠানং ৱনন্তৰং সম্পত্তস্স ভগৱতো পণামং কত্ৱা পণ্ণসন্থৰং সন্থৰিত্ৱা অদাসি. ভগৱতো নিসিন্নট্ঠানস্স সমন্ততো ভিত্তিপৰিচ্ছেদং কত্ৱা পুপ্ফপূজমকাসি. সো তেন পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱুদ্ধিপ্পত্তো সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

৪৫. সো অপৰভাগে অত্তনো পুব্বকম্মং সৰিত্ৱা সোমনস্সজাতো অত্তনো পুব্বচৰিতাপদানং দস্সেন্তো সিদ্ধত্থস্স ভগৱতোতিআদিমাহ. তং সব্বং হেট্ঠা ৱুত্তনযত্তা উত্তানত্থমেৱাতি.

সেনাসনদাযকত্থেৰঅপদানৱণ্ণনা সমত্তা.

৯. ৱেয্যাৱচ্চকৰত্থেৰঅপদানৱণ্ণনা

ৱিপস্সিস্স ভগৱতোতিআদিকং আযস্মতো ৱেয্যাৱচ্চকৰত্থেৰস্স অপদানং. তস্স উপ্পত্তিআদযো হেট্ঠা ৱুত্তনিযামেনেৱ দট্ঠব্বা.

ৱেয্যাৱচ্চকৰত্থেৰঅপদানৱণ্ণনা সমত্তা.

১০. বুদ্ধুপট্ঠাকত্থেৰঅপদানৱণ্ণনা

ৱিপস্সিস্স ভগৱতোতিআদিকং আযস্মতো বুদ্ধুপট্ঠাকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে সঙ্খধমককুলে নিব্বত্তো ৱুদ্ধিমন্ৱায অত্তনো সিপ্পে সঙ্খধমনে ছেকো অহোসি, নিচ্চকালং ভগৱতো সঙ্খং ধমেত্ৱা সঙ্খসদ্দেনেৱ পূজেসি. সো তেন পুঞ্ঞেন দেৱমনুস্সেসু সংসৰন্তো সব্বত্থ পাকটো মহাঘোসো মহানাদী মধুৰস্সৰো অহোসি, ইমস্মিং বুদ্ধুপ্পাদে একস্মিং পাকটকুলে নিব্বত্তো ৱুদ্ধিপ্পত্তো মধুৰস্সৰোতি পাকটো, সত্থৰি পসীদিত্ৱা পব্বজিতো নচিৰস্সেৱ অৰহা অহোসি, অপৰভাগে মধুৰস্সৰত্থেৰোতি পাকটো.

৫১. সো একদিৱসং অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো ৱিপস্সিস্স ভগৱতোতিআদিমাহ. তং হেট্ঠা ৱুত্তমেৱ. অহোসিং সঙ্খধমকোতি সং সুট্ঠু খনন্তো গচ্ছতীতি সঙ্খো, সমুদ্দজলপৰিযন্তে চৰমানো গচ্ছতি ৱিচৰতীতি অত্থো. তং সঙ্খং ধমতি ঘোসং কৰোতীতি সঙ্খধমকো, সোহং সঙ্খধমকোৱ অহোসিন্তি অত্থো. সেসং সব্বত্থ উত্তানমেৱাতি.

বুদ্ধুপট্ঠাকত্থেৰঅপদানৱণ্ণনা সমত্তা.

দসমৱগ্গৱণ্ণনা সমত্তা.