১১. ভিক্খদাযিৱগ্গো

১. ভিক্খাদাযকত্থেৰঅপদানৱণ্ণনা

সুৱণ্ণৱণ্ণং সম্বুদ্ধন্তিআদিকং আযস্মতো ভিক্খাদাযকত্থেৰস্স অপদানং. অযম্পি পুৰিমজিনৱৰেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে একস্মিং কুলগেহে নিব্বত্তো ৱুদ্ধিমন্ৱায ৱিভৱসম্পন্নো সদ্ধাজাতো ৱিহাৰতো নিক্খমিত্ৱা পিণ্ডায চৰমানং সিদ্ধত্থং ভগৱন্তং দিস্ৱা পসন্নমানসো আহাৰমদাসি. ভগৱা তং পটিগ্গহেত্ৱা অনুমোদনং ৱত্ৱা পক্কামি. সো তেনেৱ কুসলেন যাৱতাযুকং ঠত্ৱা আযুপৰিযোসানে দেৱলোকে নিব্বত্তো তত্থ ছ কামাৱচৰসম্পত্তিযো অনুভৱিত্ৱা মনুস্সেসু চ মনুস্সসম্পত্তিমনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱুদ্ধিমন্ৱায সদ্ধাজাতো পব্বজিত্ৱা নচিৰস্সেৱ অৰহা অহোসি.

১. সো অপৰভাগে অত্তনো পুব্বকম্মং অনুস্সৰিত্ৱা সোমনস্সজাতো পুব্বচৰিতাপদানং পকাসেন্তো সুৱণ্ণৱণ্ণং সম্বুদ্ধন্তিআদিমাহ. তং সব্বং হেট্ঠা ৱুত্তনযমেৱ. পৱৰা অভিনিক্খন্তন্তি পকাৰেন ৱৰিতব্বং পত্থেতব্বন্তি পৱৰং, ৰম্মভূততো ৱিৱেকভূততো সকৱিহাৰতো অভি ৱিসেসেন নিক্খন্তন্তি অত্থো. ৱানা নিব্বানমাগতন্তি ৱানং ৱুচ্চতি তণ্হা, ততো নিক্খন্তত্তা নিব্বানং, ৱাননামং তণ্হং পধানং কত্ৱা সব্বকিলেসে পহায নিব্বানং পত্তন্তি অত্থো.

২. কটচ্ছুভিক্খং দত্ৱানাতি কৰতলেন গহেতব্বা দব্বি কটচ্ছু, ভিক্খীযতি আযাচীযতীতি ভিক্খা, অভি ৱিসেসেন খাদিতব্বা ভক্খিতব্বাতি ৱা ভিক্খা, কটচ্ছুনা গহেতব্বা ভিক্খা কটচ্ছুভিক্খা, দব্বিযা ভত্তং দত্ৱাতি অত্থো. সেসং সব্বত্থ উত্তানত্থমেৱাতি.

ভিক্খাদাযকত্থেৰঅপদানৱণ্ণনা সমত্তা.

২. ঞাণসঞ্ঞিকত্থেৰঅপদানৱণ্ণনা

সুৱণ্ণৱণ্ণং সম্বুদ্ধন্তিআদিকং আযস্মতো ঞাণসঞ্ঞিকত্থেৰস্স অপদানং. কা উপ্পত্তি? অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে কুলগেহে নিব্বত্তো ৱুদ্ধিমন্ৱায সদ্ধাজাতো সদ্ধম্মস্সৱনে সাদৰো সালযো ভগৱতো ধম্মদেসনানুসাৰেন ঞাণং পেসেত্ৱা ঘোসপমাণত্তা ভগৱতো ঞাণে পসন্নো পঞ্চঙ্গঅট্ঠঙ্গনমক্কাৰৱসেন পণামং কত্ৱা পক্কামি. সো ততো চুতো দেৱলোকেসু উপ্পন্নো তত্থ ছ কামাৱচৰে দিব্বসম্পত্তিমনুভৱন্তো ততো চৱিত্ৱা মনুস্সলোকে জাতো তত্থগ্গভূতা চক্কৱত্তিসম্পদাদযো অনুভৱিত্ৱা ইমস্মিং বুদ্ধুপ্পাদে ৱিভৱসম্পন্নে একস্মিং কুলগেহে নিব্বত্তো ৱুদ্ধিমন্ৱায সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

৭. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো সুৱণ্ণৱণ্ণং সম্বুদ্ধন্তিআদিমাহ. তং ৱুত্তত্থমেৱ. নিসভাজানিযং যথাতি গৱসতসহস্সজেট্ঠো নিসভো, নিসভো চ সো আজানিযো সেট্ঠো উত্তমো চেতি নিসভাজানিযো. যথা নিসভাজানিযো, তথেৱ ভগৱাতি অত্থো. লোকৱিসযসঞ্ঞাতং পঞ্ঞত্তিৱসেন এৱং ৱুত্তং. অনুপমেয্যো হি ভগৱা. সেসং সব্বত্থ উত্তানত্থমেৱাতি.

ঞাণসঞ্ঞিকত্থেৰঅপদানৱণ্ণনা সমত্তা.

৩. উপ্পলহত্থিযত্থেৰঅপদানৱণ্ণনা

তিৱৰাযং নিৱাসীহন্তিআদিকং আযস্মতো উপ্পলহত্থকত্থেৰস্স অপদানং. অযম্পি পুৰিমজিনৱৰেসু কতকুসলো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে মালাকাৰকুলে নিব্বত্তো ৱুদ্ধিমন্ৱায মালাকাৰকম্মেন অনেকানি পুপ্ফানি ৱিক্কিণন্তো জীৱতি. অথেকদিৱসং পুপ্ফানি গহেত্ৱা চৰন্তো ভগৱন্তং ৰতনগ্ঘিকমিৱ চৰমানং দিস্ৱা ৰত্তুপ্পলকলাপেন পূজেসি. সো ততো চুতো তেনেৱ পুঞ্ঞেন সুগতীসু পুঞ্ঞমনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱুদ্ধিমন্ৱায সদ্ধাজাতো পব্বজিত্ৱা নচিৰস্সেৱ অৰহা অহোসি.

১৩. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো তিৱৰাযং নিৱাসীহন্তিআদিমাহ. তত্থ তিৱৰাতি তীহি ৱাৰেহি কাৰিতং সঞ্চৰিতং পটিচ্ছন্নং নগৰং, তস্সং তিৱৰাযং নিৱাসী, ৱসনসীলো নিৱাসনট্ঠানগেহে ৱা ৱসন্তো অহন্তি অত্থো. অহোসিং মালিকো তদাতি তদা নিব্বানত্থায পুঞ্ঞসম্ভাৰকৰণসমযে মালিকো মালাকাৰোৱ পুপ্ফানি কযৱিক্কযং কত্ৱা জীৱন্তো অহোসিন্তি অত্থো.

১৪. পুপ্ফহত্থমদাসহন্তি সিদ্ধত্থং ভগৱন্তং দিস্ৱা উপ্পলকলাপং অদাসিং পূজেসিন্তি অত্থো. সেসং সব্বত্থ উত্তানত্থমেৱাতি.

উপ্পলহত্থকত্থেৰঅপদানৱণ্ণনা সমত্তা.

৪. পদপূজকত্থেৰঅপদানৱণ্ণনা

সিদ্ধত্থস্স ভগৱতোতিআদিকং আযস্মতো পদপূজকত্থেৰস্স অপদানং. অযম্পি পুৰিমবুদ্ধেসু কতাধিকাৰো সিদ্ধত্থস্স ভগৱতো কালে কুলগেহে নিব্বত্তো ৱুদ্ধিমন্ৱায সত্থৰি পসন্নো সুমনপুপ্ফেন পাদমূলে পূজেসি. সো তেন পুঞ্ঞেন দেৱমনুস্সেসু সংসৰন্তো সক্কসম্পত্তিং অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱুদ্ধিমন্ৱায সত্থৰি পসীদিত্ৱা পব্বজিতো ৱিপস্সনং ৱড্ঢেত্ৱা অৰহত্তফলে পতিট্ঠাসি.

১৯. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো সিদ্ধত্থস্স ভগৱতোতিআদিমাহ. জাতিপুপ্ফমদাসহন্তি জাতিসুমনপুপ্ফং অদাসিং অহন্তি ৱত্তব্বে গাথাবন্ধসুখত্থং সুমনসদ্দস্স লোপং কত্ৱা ৱুত্তং. তত্থ জাতিযা নিব্বত্তো ৱিকসমানোযেৱ সুমনং জনানং সোমনস্সং কৰোতীতি সুমনং, পুপ্ফনট্ঠেন ৱিকসনট্ঠেন পুপ্ফং, সুমনঞ্চ তং পুপ্ফঞ্চাতি সুমনপুপ্ফং, তানি সুমনপুপ্ফানি সিদ্ধত্থস্স ভগৱতো অহং পূজেসিন্তি অত্থো. সেসং সব্বত্থ উত্তানমেৱাতি.

পদপূজকত্থেৰঅপদানৱণ্ণনা সমত্তা.

৫. মুট্ঠিপুপ্ফিযত্থেৰঅপদানৱণ্ণনা

সুদস্সনো নাম নামেনাতিআদিকং আযস্মতো মুট্ঠিপুপ্ফিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে মালাকাৰকুলে নিব্বত্তো ৱুদ্ধিমন্ৱায সকসিপ্পে নিপ্ফত্তিং পত্তো একদিৱসং ভগৱন্তং দিস্ৱা পসন্নমানসো জাতিসুমনপুপ্ফানি উভোহি হত্থেহি ভগৱতো পাদমূলে ওকিৰিত্ৱা পূজেসি. সো তেন কুসলসম্ভাৰেন দেৱমনুস্সেসু সংসৰন্তো উভো সম্পত্তিযো অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱুদ্ধিপ্পত্তো পুব্বৱাসনাৱসেন সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

১৪-২৫. সো অপৰভাগে অত্তনো পুব্বকম্মং অনুস্সৰিত্ৱা সোমনস্সজাতো পুব্বচৰিতাপদানং পকাসেন্তো সুদস্সনো নাম নামেনাতিআদিমাহ. তত্থ সুদস্সনোতি আৰোহপৰিণাহৰূপসণ্ঠানযোব্বঞ্ঞসোভনেন সুন্দৰো দস্সনোতি সুদস্সনো, নামেন সুদস্সনো নাম মালাকাৰো হুত্ৱা জাতিসুমনপুপ্ফেহি পদুমুত্তৰং ভগৱন্তং পূজেসিন্তি অত্থো. সেসং সব্বত্থ উত্তানমেৱাতি.

মুট্ঠিপুপ্ফিযত্থেৰঅপদানৱণ্ণনা সমত্তা.

৬. উদকপূজকত্থেৰঅপদানৱণ্ণনা

সুৱণ্ণৱণ্ণং সম্বুদ্ধন্তিআদিকং আযস্মতো উদকপূজকত্থেৰস্স অপদানং. অযম্পি পুৰিমজিনৱৰেসু পূৰিতকুসলসঞ্চযো তত্থ তত্থ ভৱে ৱিৱট্টূপনিস্সযানি পুঞ্ঞানি পৰিপূৰিযমানো পুদুমুত্তৰস্স ভগৱতো কালে একস্মিং কুলগেহে নিব্বত্তো ৱুদ্ধিমন্ৱায কুসলাকুসলং জানন্তো পদুমুত্তৰস্স ভগৱতো আকাসে গচ্ছতো নিক্খন্তছব্বণ্ণবুদ্ধৰংসীসু পসন্নো উভোহি হত্থেহি উদকং গহেত্ৱা পূজেসি. তেন পূজিতং উদকং ৰজতবুব্বুলং ৱিয আকাসে অট্ঠাসি. সো অভিপ্পসন্নো তেনেৱ সোমনস্সেন তুসিতাদীসু নিব্বত্তো দিব্বসম্পত্তিযো অনুভৱিত্ৱা অপৰভাগে মনুস্সসম্পত্তিযো চ অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

২৯. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো সুৱণ্ণৱণ্ণং সম্বুদ্ধন্তিআদিমাহ. তং হেট্ঠা ৱুত্তমেৱ. ঘতাসনংৱ জলিতন্তি ঘতং ৱুচ্চতি সপ্পি, ঘতস্স আসনং আধাৰন্তি ঘতাসনং, অগ্গি, অথ ৱা তং অসতি ভুঞ্জতীতি ঘতাসনং, অগ্গিযেৱ. যথা ঘতে আসিত্তে অগ্গিম্হি অগ্গিসিখা অতীৱ জলতি, এৱং অগ্গিক্খন্ধং ইৱ জলমানং ভগৱন্তন্তি অত্থো. আদিত্তংৱ হুতাসনন্তি হুতং ৱুচ্চতি পূজাসক্কাৰে, হুতস্স পূজাসক্কাৰস্স আসনন্তি হুতাসনং, জলমানং সূৰিযং ইৱ দ্ৱত্তিংসমহাপুৰিসলক্খণেহি ব্যামপ্পভামণ্ডলেহি ৱিজ্জোতমানং সুৱণ্ণৱণ্ণং সম্বুদ্ধং অনিলঞ্জসে আকাসে গচ্ছন্তং অদ্দসন্তি সম্বন্ধো. সেসং সব্বত্থ উত্তানমেৱাতি.

উদকপূজকত্থেৰঅপদানৱণ্ণনা সমত্তা.

৭. নড়মালিযত্থেৰঅপদানৱণ্ণনা

পদুমুত্তৰবুদ্ধস্সাতিআদিকং আযস্মতো নড়মালিযত্থেৰস্স অপদানং. এসোপি পুৰিমজিনৱৰেসু কতাধিকাৰো অনেকাসু জাতীসু ৱিৱট্টূপনিস্সযানি কুসলকম্মানি উপচিনন্তো পদুমুত্তৰস্স ভগৱতো কালে কুলগেহে নিব্বত্তো ৱুদ্ধিমন্ৱায ঘৰাৱাসং সণ্ঠপেত্ৱা কামে আদীনৱং দিস্ৱা গেহং পহায তাপসপব্বজ্জং পব্বজিত্ৱা হিমৱন্তে ৱসন্তো তত্থাগতং ভগৱন্তং দিস্ৱা পসন্নো ৱন্দিত্ৱা তিণসন্থৰং সন্থৰিত্ৱা তত্থ নিসিন্নস্স ভগৱতো নড়মালেহি বীজনিং কত্ৱা বীজেত্ৱা অদাসি. পটিগ্গহেসি ভগৱা তস্সানুকম্পায, অনুমোদনঞ্চ অকাসি. সো তেন পুঞ্ঞেন দেৱমনুস্সেসু সংসৰন্তো উপ্পন্নুপ্পন্নভৱে পৰিড়াহসন্তাপৱিৱজ্জিতো কাযচিত্তচেতসিকসুখপ্পত্তো অনেকসুখমনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱুদ্ধিমন্ৱায পুব্বৱাসনাবলেন সত্থৰি পসন্নো পব্বজিত্ৱা নচিৰস্সেৱ অৰহা অহোসি.

৩৬. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পদুমুত্তৰবুদ্ধস্সাতিআদিমাহ. তং হেট্ঠা ৱুত্তমেৱ.

৩৭. নড়মালং গহেত্ৱানাতি নড়তি অসাৰো নিস্সাৰো হুত্ৱা ৱেড়ুৱংসতোপি তনুকো সল্লহুকো জাতোতি নড়ো, নড়স্স মালা পুপ্ফং নড়মালং, তেন নড়মালেন বীজনিং কাৰেসিন্তি সম্বন্ধো. বীজিস্সতি জনিস্সতি ৱাতো অনেনাতি বীজনী, তং বীজনিং বুদ্ধস্স উপনামেসিং, পটিগ্গহেসিন্তি অত্থো. সেসং সব্বত্থ উত্তানমেৱাতি.

নড়মালিযত্থেৰঅপদানৱণ্ণনা সমত্তা.

সত্তমভাণৱাৰৱণ্ণনা সমত্তা.

৮. আসনুপট্ঠাহকত্থেৰঅপদানৱণ্ণনা

কাননং ৱনমোগ্গয্হাতিআদিকং আযস্মতো আসনুপট্ঠাহকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো অত্থদস্সিস্স ভগৱতো কালে কুলগেহে নিব্বত্তো ঘৰাৱাসং ৱসন্তো তত্থ দোসং দিস্ৱা ঘৰাৱাসং পহায তাপসপব্বজ্জং পব্বজিত্ৱা হিমৱন্তে ৱসন্তো তত্থ সম্পত্তং ভগৱন্তং দিস্ৱা পসন্নো সীহাসনং অদাসি, তত্থ নিসিন্নং ভগৱন্তং মালাকলাপং গহেত্ৱা পূজেত্ৱা তং পদক্খিণং কত্ৱা পক্কামি. সো তেন পুঞ্ঞেন দেৱমনুস্সেসু সংসৰন্তো নিব্বত্তনিব্বত্তভৱে উচ্চকুলিকো ৱিভৱসম্পন্নো অহোসি. সো কালন্তৰেন ইমস্মিং বুদ্ধুপ্পাদে কুলগেহে নিব্বত্তো ৱুদ্ধিমন্ৱায সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

৪৭. সো অৰহা সমানো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো কাননং ৱনমোগ্গয্হাতিআদিমাহ. তং সব্বং হেট্ঠা ৱুত্তত্থমেৱাতি.

আসনুপট্ঠাহকত্থেৰঅপদানৱণ্ণনা সমত্তা.

৯. বিড়ালিদাযকত্থেৰঅপদানৱণ্ণনা

হিমৱন্তস্সাৱিদূৰেতিআদিকং আযস্মতো বিড়ালিদাযকত্থেৰস্স অপদানং. অযম্পি পুৰিমজিনৱৰেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে কুলগেহে নিব্বত্তো ৱিঞ্ঞুতং পত্তো ঘৰাৱাসং ৱসন্তো তত্থাদীনৱং দিস্ৱা ঘৰাৱাসং পহায তাপসপব্বজ্জং পব্বজিত্ৱা হিমৱন্তে ৱসন্তো অতীৱ অপ্পিচ্ছসন্তুট্ঠো আলুৱাদীহি যাপেন্তো ৱসতি. তদা পদুমুত্তৰো ভগৱা তস্স অনুকম্পায তং হিমৱন্তং অগমাসি. তং দিস্ৱা পসন্নো ৱন্দিত্ৱা বিড়ালিযো গহেত্ৱা পত্তে ওকিৰি. তং তথাগতো তস্সানুকম্পায সোমনস্সুপ্পাদযন্তো পৰিভুঞ্জি. সো তেন কম্মেন ততো চুতো দেৱমনুস্সেসু উভযসম্পত্তিযো অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তিত্ৱা ৱুদ্ধিমন্ৱায সত্থৰি পসন্নো সাসনে পব্বজিত্ৱা নচিৰস্সেৱ অৰহা অহোসি.

৫৩. সো অপৰভাগে অত্তনো কুসলকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো হিমৱন্তস্সাৱিদূৰেতিআদিমাহ. তং সব্বং হেট্ঠা ৱুত্তনযত্তা উত্তানত্থমেৱ. আলুৱকৰম্ভাদযো তেসং তেসং কন্দজাতীনং নামানেৱাতি.

বিড়ালিদাযকত্থেৰঅপদানৱণ্ণনা সমত্তা.

১০. ৰেণুপূজকত্থেৰঅপদানৱণ্ণনা

সুৱণ্ণৱণ্ণং সম্বুদ্ধন্তিআদিকং আযস্মতো ৰেণুপূজকত্থেৰস্স অপদানং. অযম্পি পুৰিমজিনৱৰেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে কুলগেহে নিব্বত্তো ৱুদ্ধিমন্ৱায সত্থৰি পসন্নো ৱিঞ্ঞুতং পত্তো অগ্গিক্খন্ধং ৱিয ৱিজ্জোতমানং ভগৱন্তং দিস্ৱা পসন্নমানসো নাগপুপ্ফকেসৰং গহেত্ৱা পূজেসি. অথ ভগৱা অনুমোদনমকাসি.

৬২-৩. সো তেন পুঞ্ঞেন ততো চুতো দেৱমনুস্সেসু সংসৰন্তো উভযসম্পত্তিযো অনুভৱিত্ৱা উপ্পন্নুপ্পন্নভৱে সব্বত্থ পূজিতো ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো পুব্বৱাসনাবলেন সত্থৰি পসন্নো সাসনে পব্বজিতো নচিৰস্সেৱ অৰহা হুত্ৱা দিব্বচক্খুনা অত্তনো পুব্বকম্মং দিস্ৱা সোমনস্সজাতো পুব্বচৰিতাপদানং পকাসেন্তো সুৱণ্ণৱণ্ণং সম্বুদ্ধন্তিআদিমাহ. তং হেট্ঠা ৱুত্তত্থমেৱ. সতৰংসিংৱ ভাণুমন্তি সতমত্তা সতপ্পমাণা ৰংসি পভা যস্স সূৰিযস্স সো সতৰংসি, গাথাবন্ধসুখত্থং সতৰংসীতি ৱুত্তং, অনেকসতস্স অনেকসতসহস্সৰংসীতি অত্থো. ভাণু ৱুচ্চতি পভা, ভাণু পভা যস্স সো ভাণুমা, ভাণুমসঙ্খাতং সূৰিযং ইৱ ৱিপস্সিং ভগৱন্তং দিস্ৱা সকেসৰং নাগপুপ্ফং গহেত্ৱা অভিৰোপযিং পূজেসিন্তি অত্থো. সেসং উত্তানমেৱাতি.

ৰেণুপূজকত্থেৰঅপদানৱণ্ণনা সমত্তা.

একাদসমৱগ্গৱণ্ণনা সমত্তা.