১২. মহাপৰিৱাৰৱগ্গো

১. মহাপৰিৱাৰকত্থেৰঅপদানৱণ্ণনা

ৱিপস্সী নাম ভগৱাতিআদিকং আযস্মতো মহাপৰিৱাৰকত্থেৰস্স অপদানং. অযম্পি পুৰিমজিনৱৰেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো উপ্পন্নসমযে যক্খযোনিযং নিব্বত্তো অনেকযক্খসতসহস্সপৰিৱাৰো একস্মিং খুদ্দকদীপে দিব্বসুখমনুভৱন্তো ৱিহৰতি. তস্মিঞ্চ দীপে চেতিযাভিসোভিতো ৱিহাৰো অত্থি, তত্থ ভগৱা অগমাসি. অথ সো যক্খসেনাধিপতি তং ভগৱন্তং তত্থ গতভাৱং দিস্ৱা দিব্বৱত্থানি গহেত্ৱা গন্ত্ৱা ভগৱন্তং ৱন্দিত্ৱা দিব্বৱত্থেহি পূজেসি, সপৰিৱাৰো সৰণমগমাসি. সো তেন পুঞ্ঞকম্মেন ততো চুতো দেৱলোকে নিব্বত্তিত্ৱা তত্থ ছ কামাৱচৰসুখমনুভৱিত্ৱা ততো চুতো মনুস্সেসু অগ্গচক্কৱত্তিআদিসুখমনুভৱিত্ৱা অপৰভাগে ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

১-২. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো ৱিপস্সী নাম ভগৱাতিআদিমাহ. তত্থ ৱিসেসং পৰমত্থং নিব্বানং পস্সতীতি ৱিপস্সী, ৱিৱিধে সতিপট্ঠানাদযো সত্ততিংসবোধিপক্খিযধম্মে পস্সতীতি ৱা ৱিপস্সী, ৱিৱিধে অনেকপ্পকাৰে বোধনেয্যসত্তে ৱিসুং ৱিসুং পস্সতীতি ৱা ৱিপস্সী, সো ৱিপস্সী ভগৱা দীপচেতিযং দীপে পূজনীযট্ঠানং ৱিহাৰমগমাসীতি অত্থো. সেসং সব্বত্থ উত্তানমেৱাতি.

মহাপৰিৱাৰকত্থেৰঅপদানৱণ্ণনা সমত্তা.

২. সুমঙ্গলত্থেৰঅপদানৱণ্ণনা

অত্থদস্সী জিনৱৰোতিআদিকং আযস্মতো সুমঙ্গলত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো অত্থদস্সিস্স ভগৱতো কালে একস্মিং তড়াকসমীপে ৰুক্খদেৱতা হুত্ৱা নিব্বত্তি. তস্মিং সমযে ভগৱা ৱিহাৰতো নিক্খমিত্ৱা নহাযিতুকামো তস্স তড়াকস্স তীৰং গন্ত্ৱা তত্থ ন্হত্ৱা একচীৱৰো জলমানো ব্ৰহ্মা ৱিয সূৰিযো ৱিয সুৱণ্ণবিম্বং ৱিয অট্ঠাসি. অথ সো দেৱপুত্তো সোমনস্সজাতো পঞ্জলিকো থোমনমকাসি, অত্তনো দিব্বগীততূৰিযেহি উপহাৰঞ্চ অকাসি. সো তেন পুঞ্ঞকম্মেন দেৱমনুস্সেসু সম্পত্তিযো অনুভৱিত্ৱা অপৰভাগে ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো সত্থৰি পসীদিত্ৱা পব্বজিত্ৱা নচিৰস্সেৱ অৰহা অহোসি.

১১. সো পচ্ছা পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো অত্থদস্সী জিনৱৰোতিআদিমাহ. তত্থ পৰমত্থং নিব্বানং দক্খতি পস্সতীতি অত্থদস্সী, অথ ৱা সব্বসত্তানং চতুৰাৰিযসচ্চসঙ্খাতং অত্থপযোজনং দস্সনসীলোতি অত্থদস্সী, কিলেসে অজিনি জিনাতি জিনিস্সতীতি জিনো. ৱৰিতব্বো পত্থেতব্বো সব্বসত্তেহীতি ৱৰো, অত্থদস্সী জিনো চ সো ৱৰো চাতি অত্থদস্সী জিনৱৰো. লোকজেট্ঠোতি লুজ্জতি পলুজ্জতীতি লোকো, লোকীযতি পস্সীযতি বুদ্ধাদীহি পাৰপ্পত্তোতি ৱা লোকো, লোকো চ লোকো চ লোকো চাতি লোকো. একসেসসমাসৱসেন ‘‘লোকা’’তি ৱত্তব্বে ‘‘লোকো’’তি ৱুত্তো. লোকস্স জেট্ঠো লোকজেট্ঠো, সো লোকজেট্ঠো নৰাসভোতি অত্থো. সেসং সব্বত্থ উত্তানমেৱাতি.

সুমঙ্গলত্থেৰঅপদানৱণ্ণনা সমত্তা.

৩. সৰণগমনিযত্থেৰঅপদানৱণ্ণনা

উভিন্নং দেৱৰাজূনন্ত্যাদিকং আযস্মতো সৰণগমনিযত্থেৰস্স অপদানং. অযম্পি পুৰিমবুদ্ধেসু কতাধিকাৰো উপ্পন্নুপ্পন্নভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰে ভগৱতি উপ্পন্নে অযং হিমৱন্তে দেৱৰাজা হুত্ৱা নিব্বত্তি, তস্মিং অপৰেন যক্খদেৱৰঞ্ঞা সদ্ধিং সঙ্গামত্থায উপট্ঠিতে দ্ৱে অনেকযক্খসহস্সপৰিৱাৰা ফলকাৱুধাদিহত্থা সঙ্গামত্থায সমুপব্যূড়্হা অহেসুং. তদা পদুমুত্তৰো ভগৱা তেসু সত্তেসু কাৰুঞ্ঞং উপ্পাদেত্ৱা আকাসেন তত্থ গন্ত্ৱা সপৰিৱাৰানং দ্ৱিন্নং দেৱৰাজূনং ধম্মং দেসেসি. তদা তে সব্বে ফলকাৱুধানি ছড্ডেত্ৱা ভগৱন্তং গাৰৱবহুমানেন ৱন্দিত্ৱা সৰণমগমংসু. তেসং অযং পঠমং সৰণমগমাসি. সো তেন পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱুদ্ধিমন্ৱায সত্থৰি পসন্নো পব্বজিত্ৱা নচিৰস্সেৱ অৰহা অহোসি.

২০. সো অপৰভাগে পুব্বকুসলং সৰিত্ৱা সোমনস্সজাতো পুব্বচৰিতাপদানং পকাসেন্তো উভিন্নং দেৱৰাজূনন্তিআদিমাহ. তত্থ সুচিলোমখৰলোমআড়ৱককুম্ভীৰকুৱেৰাদযো ৱিয নামগোত্তেন অপাকটা দ্ৱে যক্খৰাজানো অঞ্ঞাপদেসেন দস্সেন্তো ‘‘উভিন্নং দেৱৰাজূন’’ন্তিআদিমাহ. সঙ্গামো সমুপট্ঠিতোতি সং সুট্ঠু গামো কলহত্থায উপগমনন্তি সঙ্গামো, সো সঙ্গামো সং সুট্ঠু উপট্ঠিতো, একট্ঠানে উপগন্ত্ৱা ঠিতোতি অত্থো. অহোসি সমুপব্যূড়্হোতি সং সুট্ঠু উপসমীপে ৰাসিভূতোতি অত্থো.

২১. সংৱেজেসি মহাজনন্তি তেসং ৰাসিভূতানং যক্খানং আকাসে নিসিন্নো ভগৱা চতুসচ্চধম্মদেসনায সং সুট্ঠু ৱেজেসি, আদীনৱদস্সনেন গণ্হাপেসি ৱিঞ্ঞাপেসি বোধেসীতি অত্থো. সেসং সব্বত্থ উত্তানমেৱাতি.

সৰণগমনিযত্থেৰঅপদানৱণ্ণনা সমত্তা.

৪. একাসনিযত্থেৰঅপদানৱণ্ণনা

ৱৰুণো নাম নামেনাতিআদিকং আযস্মতো একাসনিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো অত্থদস্সিস্স ভগৱতো কালে ৱৰুণো নাম দেৱৰাজা হুত্ৱা নিব্বত্তি. সো ভগৱন্তং দিস্ৱা পসন্নমানসো গন্ধমালাদীহি গীতৱাদিতেহি চ উপট্ঠযমানো সপৰিৱাৰো পূজেসি. ততো অপৰভাগে ভগৱতি পৰিনিব্বুতে তস্স মহাবোধিৰুক্খং বুদ্ধদস্সনং ৱিয সব্বতূৰিযতাড়াৱচৰেহি সপৰিৱাৰো উপহাৰমকাসি. সো তেন পুঞ্ঞেন ততো কালঙ্কত্ৱা নিম্মানৰতিদেৱলোকে উপ্পজ্জি. এৱং দেৱসম্পত্তিমনুভৱিত্ৱা মনুস্সেসু চ মনুস্সভূতো চক্কৱত্তিসম্পত্তিং অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্ৱা সত্থু সাসনে পব্বজিত্ৱা নচিৰস্সেৱ অৰহা অহোসি.

৩১. সো পচ্ছা সককম্মং সৰিত্ৱা তং তথতো ঞত্ৱা সোমনস্সজাতো পুব্বচৰিতাপদানং পকাসেন্তো ৱৰুণো নাম নামেনাতিআদিমাহ. তত্থ যদা অহং সম্বোধনত্থায বুদ্ধং বোধিঞ্চ পূজেসিং, তদা ৱৰুণো নাম দেৱৰাজা অহোসিন্তি সম্বন্ধো.

৩৪. ধৰণীৰুহপাদপন্তি এত্থ ৰুক্খলতাপব্বতসত্থৰতনাদযো ধাৰেতীতি ধৰণী, তস্মিং ৰুহতি পতিট্ঠহতীতি ধৰণীৰুহো. পাদেন পিৱতীতি পাদপো, সিঞ্চিতসিঞ্চিতোদকং পাদেন মূলেন পিৱতি ৰুক্খক্খন্ধসাখাৱিটপেহি আপোৰসং পত্থৰিযতীতি অত্থো, তং ধৰণীৰুহপাদপং বোধিৰুক্খন্তি সম্বন্ধো.

৩৫. সককম্মাভিৰদ্ধোতি অত্তনো কুসলকম্মেন অভিৰদ্ধো পসন্নো উত্তমে বোধিম্হি পসন্নোতি সম্বন্ধো. সেসং সব্বত্থ উত্তানমেৱাতি.

একাসনিযত্থেৰঅপদানৱণ্ণনা সমত্তা.

৫. সুৱণ্ণপুপ্ফিযত্থেৰঅপদানৱণ্ণনা

ৱিপস্সী নাম ভগৱাতিআদিকং আযস্মতো সুৱণ্ণপুপ্ফিযত্থেৰস্স অপদানং. অযম্পি পুৰিমজিনৱৰেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে একস্মিং ঠানে ভূমট্ঠকদেৱপুত্তো হুত্ৱা নিব্বত্তো তস্স ভগৱতো ধম্মং সুত্ৱা পসন্নমানসো চতূহি সুৱণ্ণপুপ্ফেহি পূজেসি. তানি পুপ্ফানি আকাসে সুৱণ্ণৱিতানং হুত্ৱা ছাদেসুং, সুৱণ্ণপভা চ বুদ্ধস্স সৰীৰপভা চ একতো হুত্ৱা মহাওভাসো অহোসি. সো অতিৰেকতৰং পসন্নো সকভৱনং গতোপি সৰতিযেৱ. সো তেন পুঞ্ঞকম্মেন তুসিতভৱনাদিসুগতীসুযেৱ সংসৰন্তো দিব্বসম্পত্তিং অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো সত্থু ধম্মদেসনং সুত্ৱা সাসনে উৰং দত্ৱা পব্বজিতো নচিৰস্সেৱ অৰহা অহোসি.

৪০. সো অপৰভাগে পুব্বকম্মং সৰিত্ৱা সোমনস্সজাতো অত্তনো পুব্বচৰিতাপদানং পকাসেন্তো ৱিপস্সী নাম ভগৱাতিআদিমাহ. তং হেট্ঠা ৱুত্তত্থমেৱ.

৪৪. পামোজ্জং জনযিত্ৱানাতি বলৱপীতিং উপ্পাদেত্ৱা ‘‘পামোজ্জং আমোদনা পমোদনা হাসো পহাসো ৱিত্তি ওদগ্যং অত্তমনতা চিত্তস্সা’’তিআদীসু (ধ. স. ৯, ৮৬; মহানি. ১) ৱিয অত্তমনতা সকভাৱং উপ্পাদেত্ৱাতি অত্থো. সেসং সব্বত্থ উত্তানমেৱাতি.

সুৱণ্ণপুপ্ফিযত্থেৰঅপদানৱণ্ণনা সমত্তা.

৬. চিতকপূজকত্থেৰঅপদানৱণ্ণনা

ৱসামি ৰাজাযতনেতিআদিকং আযস্মতো চিতকপূজকত্থেৰস্স অপদানং. অযম্পি পুৰিমবুদ্ধেসু কতাধিকাৰো ততো পৰং উপ্পন্নুপ্পন্নভৱে ৱিৱট্টূপনিস্সযানি পুঞ্ঞানি উপচিনন্তো সিখিস্স ভগৱতো কালে ৰাজাযতনৰুক্খদেৱতা হুত্ৱা নিব্বত্তো অন্তৰন্তৰা দেৱতাহি সদ্ধিং ধম্মং সুত্ৱা পসন্নো ভগৱতি পৰিনিব্বুতে সপৰিৱাৰো গন্ধদীপধূপপুপ্ফভেৰিআদীনি গাহাপেত্ৱা ভগৱতো আড়হনট্ঠানং গন্ত্ৱা দীপাদীনি পূজেত্ৱা অনেকেহি তূৰিযেহি অনেকেহি ৱাদিতেহি তং পূজেসি. ততো পট্ঠায সকভৱনং উপৱিট্ঠোপি ভগৱন্তমেৱ সৰিত্ৱা সম্মুখা ৱিয ৱন্দতি. সো তেনেৱ পুঞ্ঞেন তেন চিত্তপ্পসাদেন ৰাজাযতনতো কালং কতো তুসিতাদীসু নিব্বত্তো দিব্বসম্পত্তিং অনুভৱিত্ৱা ততো মনুস্সেসু মনুস্সসম্পত্তিং অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো ভগৱতি উপ্পন্নচিত্তপ্পসাদো ভগৱতো সাসনে পব্বজিত্ৱা নচিৰস্সেৱ অৰহা অহোসি.

৪৯. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো ৱসামি ৰাজাযতনেতিআদিমাহ. ৰাজাযতনেতি দেৱৰাজূনং আযতনং ৰাজাযতনং, তস্স ৰুক্খস্স নামধেয্যো ৱা. পৰিনিব্বুতে ভগৱতীতি পৰিসমন্ততো কিঞ্চি অনৱসেসেত্ৱা খন্ধপৰিনিব্বানকালে পৰিনিব্বানসমযে পৰিনিব্বানপ্পত্তস্স সিখিনো লোকবন্ধুনোতি সম্বন্ধো.

৫০. চিতকং অগমাসহন্তি চন্দনাগৰুদেৱদাৰুকপ্পূৰতক্কোলাদিসুগন্ধদাৰূহি চিতং ৰাসিগতন্তি চিতং, চিতমেৱ চিতকং, বুদ্ধগাৰৱেন চিতকং পূজনত্থায চিতকস্স সমীপং অহং অগমাসিন্তি অত্থো. তত্থ গন্ত্ৱা কতকিচ্চং দস্সেন্তো তূৰিযং তত্থ ৱাদেত্ৱাতিআদিমাহ. তং সব্বং সুৱিঞ্ঞেয্যমেৱাতি.

চিতকপূজকত্থেৰঅপদানৱণ্ণনা সমত্তা.

৭. বুদ্ধসঞ্ঞকত্থেৰঅপদানৱণ্ণনা

যদা ৱিপস্সী লোকগ্গোতিআদিকং আযস্মতো বুদ্ধসঞ্ঞকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে একস্মিং ভূমট্ঠকৱিমানে দেৱপুত্তো হুত্ৱা নিব্বত্তি. তদা ৱিপস্সী ভগৱা আযুসঙ্খাৰং ৱোস্সজ্জি. অথ সকলদসসহস্সিলোকধাতু সসাগৰপব্বতা পকম্পিত্থ. তদা তস্স দেৱপুত্তস্স ভৱনম্পি কম্পিত্থ. তস্মিং খণে সো দেৱপুত্তো সংসযজাতো – ‘‘কিং নু খো পথৱীকম্পায নিব্বত্তী’’তি চিন্তেত্ৱা বুদ্ধস্স আযুসঙ্খাৰৱোস্সজ্জভাৱং ঞত্ৱা মহাসোকং দোমনস্সং উপ্পাদেসি. তদা ৱেস্সৱণো মহাৰাজা আগন্ত্ৱা ‘‘মা চিন্তযিত্থা’’তি অস্সাসেসি. সো দেৱপুত্তো ততো চুতো তেন পুঞ্ঞেন দেৱমনুস্সেসু সংসৰন্তো ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো ঘৰাৱাসং পহায পব্বজিত্ৱা নচিৰস্সেৱ অৰহা অহোসি.

৫৭. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো যদা ৱিপস্সী লোকগ্গোতিআদিমাহ. আযুসঙ্খাৰমোস্সজ্জীতি আ সমন্ততো যুনোতি পালেতি সত্তেতি আযু, আযুস্স সঙ্খাৰো ৰাসিভাৱো আযুসঙ্খাৰো, তং আযুসঙ্খাৰং ওস্সজ্জি পৰিচ্চজি জহাসীতি অত্থো. তস্মিং আযুসঙ্খাৰৱোস্সজ্জনে. জলমেখলাসাগৰোদকমেখলাসহিতা সকলদসসহস্সচক্কৱাড়পথৱী কম্পিত্থাতি সম্বন্ধো.

৫৮. ওততং ৱিত্থতং ময্হন্তি ময্হং ভৱনং ওততং ৱিত্থতং চিত্তং ৱিচিত্তং সুচি সুপৰিসুদ্ধং চিত্তং অনেকেহি সত্তহি ৰতনেহি ৱিচিত্তং সোভমানং পকম্পিত্থ পকাৰেন কম্পিত্থাতি অত্থো. সেসং সব্বত্থ উত্তানমেৱাতি.

বুদ্ধসঞ্ঞকত্থেৰঅপদানৱণ্ণনা সমত্তা.

৮. মগ্গসঞ্ঞকত্থেৰঅপদানৱণ্ণনা

পদুমুত্তৰবুদ্ধস্সাতিআদিকং আযস্মতো মগ্গসঞ্ঞকত্থেৰস্স অপদানং. অযম্পি পুৰিমবুদ্ধেসু কতাধিকাৰো ততো ওৰং তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে হিমৱন্তে দেৱপুত্তো হুত্ৱা নিব্বত্তো অৰঞ্ঞং গন্ত্ৱা মগ্গমূড়্হানং মগ্গং গৱেসন্তানং তস্স সাৱকানং ভোজেত্ৱা মগ্গং আচিক্খি. সো তেন পুঞ্ঞেন দেৱমনুস্সসম্পত্তিমনুভৱিত্ৱা উপ্পন্নুপ্পন্নভৱে সব্বত্থ অমূড়্হো সঞ্ঞৱা অহোসি. অথ ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো ঘৰাৱাসে অনল্লীনো পব্বজিত্ৱা নচিৰস্সেৱ অৰহা অহোসি.

৬৬. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পদুমুত্তৰবুদ্ধস্সাতিআদিমাহ. সাৱকা ৱনচাৰিনোতি ভগৱতো ৱুত্তৱচনং সম্মা আদৰেন সুণন্তীতি সাৱকা, অথ ৱা ভগৱতো দেসনানুসাৰেন ঞাণং পেসেত্ৱা সদ্ধম্মং সুণন্তীতি সাৱকা. ৱনচাৰিনো ৱনে ৱিচৰণকা সাৱকা ৱিপ্পনট্ঠা মগ্গমূড়্হা মহাঅৰঞ্ঞে অন্ধাৱ চক্খুৱিৰহিতাৱ অনুসুয্যৰে ৱিচৰন্তীতি সম্বন্ধো. সেসং সব্বত্থ উত্তানমেৱাতি.

মগ্গসঞ্ঞকত্থেৰঅপদানৱণ্ণনা সমত্তা.

৯. পচ্চুপট্ঠানসঞ্ঞকত্থেৰঅপদানৱণ্ণনা

অত্থদস্সিম্হি সুগতেতিআদিকং আযস্মতো পচ্চুপট্ঠানসঞ্ঞকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো অত্থদস্সিস্স ভগৱতো কালে যক্খযোনিযং নিব্বত্তো ভগৱতি ধৰমানে দস্সনস্স অলদ্ধত্তা পচ্ছা পৰিনিব্বুতে মহাসোকপ্পত্তো ৱিহাসি. তদা হিস্স ভগৱতো সাগতো নাম অগ্গসাৱকো অনুসাসন্তো ভগৱতো সাৰীৰিকধাতুপূজা ভগৱতি ধৰমানে কতপূজা ৱিয চিত্তপ্পসাদৱসা মহপ্ফলং ভৱতী’’তি ৱত্ৱা ‘‘থূপং কৰোহী’’তি নিযোজিতো থূপং কাৰেসি, তং পূজেত্ৱা ততো চুতো দেৱমনুস্সেসু সক্কচক্কৱত্তিসম্পত্তিমনুভৱিত্ৱা ইমস্মিং বুদ্ধুপ্পাদে সাৱত্থিযং একস্মিং কুলগেহে নিব্বত্তো ৱিঞ্ঞুতং পত্তো সত্থৰি পসীদিত্ৱা পব্বজিত্ৱা নচিৰস্সেৱ অৰহা অহোসি.

৭২. সো অপৰভাগে অত্তনো পুঞ্ঞকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো অত্থদস্সিম্হি সুগতেতিআদিমাহ. তং হেট্ঠা ৱুত্তমেৱ. যক্খযোনিং উপপজ্জিন্তি এত্থ পন অত্তনো সকাসং সম্পত্তসম্পত্তে খাদন্তা যন্তি গচ্ছন্তীতি যক্খা, যক্খানং যোনি জাতীতি যক্খযোনি, যক্খযোনিযং নিব্বত্তোতি অত্থো.

৭৩. দুল্লদ্ধং ৱত মে আসীতি মে মযা লদ্ধযসং দুল্লদ্ধং, বুদ্ধভূতস্স সত্থুনো সক্কাৰং অকতত্তা ৱিৰাধেত্ৱা লদ্ধন্তি অত্থো. দুপ্পভাতন্তি দুট্ঠু পভাতং ৰত্তিযা পভাতকৰণং, ময্হং ন সুট্ঠুং পভাতন্তি অত্থো. দুৰুট্ঠিতন্তি দুউট্ঠিতং, সূৰিযস্স উগ্গমনং ময্হং দুউগ্গমনন্তি অত্থো. সেসং সব্বত্থ উত্তানমেৱাতি.

পচ্চুপট্ঠানসঞ্ঞকত্থেৰঅপদানৱণ্ণনা সমত্তা.

১০. জাতিপূজকত্থেৰঅপদানৱণ্ণনা

জাযং তস্স ৱিপস্সিস্সাতিআদিকং আযস্মতো জাতিপূজকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে কুলগেহে নিব্বত্তো ৱিঞ্ঞুতং পত্তো নক্খত্তপাঠকেহি ৱিপস্সিবোধিসত্তস্স ৱুত্তলক্খণনিমিত্তং সুত্ৱা ‘‘অযং কিৰ কুমাৰো বুদ্ধো হুত্ৱা সকললোকস্স অগ্গো সেট্ঠো সুত্ৱা সব্বসত্তে সংসাৰতো উদ্ধৰিস্সতী’’তি সুত্ৱা তং ভগৱন্তং কুমাৰকালেযেৱ বুদ্ধস্স ৱিয মহাপূজমকাসি. পচ্ছা কমেন কুমাৰকালং ৰাজকুমাৰকালং ৰজ্জকালন্তি কালত্তযমতিক্কম্ম বুদ্ধে জাতেপি মহাপূজং কত্ৱা ততো চুতো তুসিতাদীসু নিব্বত্তো দিব্বসুখমনুভৱিত্ৱা পচ্ছা মনুস্সেসু চক্কৱত্তাদিমনুস্সসুখমনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো সত্তট্ঠৱস্সকালেযেৱ ভগৱতি পসন্নো পব্বজিত্ৱা ৱিপস্সনং ৱড্ঢেত্ৱা নচিৰস্সেৱ অৰহা অহোসি.

৮২. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো জাযং তস্স ৱিপস্সিস্সাতিআদিমাহ. তং হেট্ঠা ৱুত্তত্থমেৱ.

৮৪. নেমিত্তানং সুণিত্ৱানাতি এত্থ নিমিত্তং কাৰণং সুখদুক্খপ্পত্তিহেতুং জানন্তীতি নেমিত্তা, তেসং নেমিত্তানং নক্খত্তপাঠকানং ৱচনং সুণিত্ৱাতি অত্থো. সেসং সব্বত্থ উত্তানমেৱাতি.

জাতিপূজকত্থেৰঅপদানৱণ্ণনা সমত্তা.

দ্ৱাদসমৱগ্গৱণ্ণনা সমত্তা.