১৩. সেৰেয্যৱগ্গো

১. সেৰেয্যকত্থেৰঅপদানৱণ্ণনা

অজ্ঝাযকো মন্তধৰোতিআদিকং আযস্মতো সেৰেয্যকত্থেৰস্স অপদানং. অযম্পি পুৰিমজিনৱৰেসু কতাধিকাৰো ততো পৰেসু অত্তভাৱসহস্সেসু ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে ব্ৰাহ্মণকুলে নিব্বত্তো ৱিঞ্ঞুতং পত্ৱা তিণ্ণং ৱেদানং পাৰং গন্ত্ৱা ইতিহাসাদিসকলব্ৰাহ্মণধম্মেসু কোটিপ্পত্তো একস্মিং দিৱসে অব্ভোকাসে সপৰিৱাৰো ঠিতো ভগৱন্তং দিস্ৱা পসন্নমানসো সেৰেয্যপুপ্ফং গহেত্ৱা আকাসে খিপন্তো পূজেসি. তানি পুপ্ফানি আকাসে ৱিতানং হুত্ৱা সত্তাহং ঠত্ৱা পচ্ছা অন্তৰধাযিংসু. সো তং অচ্ছৰিযং দিস্ৱা অতীৱ পসন্নমানসো তেনেৱ পীতিসোমনস্সেন কালং কত্ৱা তুসিতাদীসু নিব্বত্তো তত্থ দিব্বসুখমনুভৱিত্ৱা ততো মনুস্সসুখমনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱিঞ্ঞুতং পাপুণিত্ৱা পুব্বৱাসনাবলেন সত্থৰি পসন্নো পব্বজিত্ৱা নচিৰস্সেৱ অৰহা অহোসি.

১. সো অপৰভাগে পুৰাকতকুসলং সৰিত্ৱা সোমনস্সজাতো পুব্বচৰিতাপদানং পকাসেন্তো অজ্ঝাযকো মন্তধৰোতিআদিমাহ. তং হেট্ঠা ৱুত্তত্থমেৱ.

৩. সেৰেয্যকং গহেত্ৱানাতি সিৰিসে ভৱং জাতিপুপ্ফং সেৰেয্যং, সেৰেয্যমেৱ সেৰেয্যকং, তং সেৰেয্যকং গহেত্ৱানাতি সম্বন্ধো. ভগৱতি পসন্নো জাতিসুমনমকুড়চম্পকাদীনি পুপ্ফানি পতিট্ঠপেত্ৱা পূজেতুং কালং নত্থিতায তত্থ সম্পত্তং তং সেৰেয্যকং পুপ্ফং গহেত্ৱা পূজেসিন্তি অত্থো. সেসং সব্বত্থ উত্তানমেৱাতি.

সেৰেয্যকত্থেৰঅপদানৱণ্ণনা সমত্তা.

২. পুপ্ফথূপিযত্থেৰঅপদানৱণ্ণনা

হিমৱন্তস্সাৱিদূৰেতিআদিকং আযস্মতো পুপ্ফথূপিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিবুদ্ধস্স ভগৱতো কালে ব্ৰাহ্মণকুলে নিব্বত্তো ৱিঞ্ঞুতং পত্ৱা সকসিপ্পে নিপ্ফত্তিং পত্তো তত্থ সাৰং অপস্সন্তো গেহং পহায হিমৱন্তং পৱিসিত্ৱা অত্তনা সহগতেহি পঞ্চসিস্সসহস্সেহি সদ্ধিং পঞ্চাভিঞ্ঞা অট্ঠ সমাপত্তিযো নিব্বত্তেত্ৱা কুক্কুৰনামপব্বতসমীপে পণ্ণসালং কাৰেত্ৱা পটিৱসতি. তদা বুদ্ধুপ্পাদভাৱং সুত্ৱা সিস্সেহি সহ বুদ্ধস্স সন্তিকং গন্তুকামো কেনচি ব্যাধিনা পীড়িতো পণ্ণসালং পৱিসিত্ৱা সিস্সসন্তিকা বুদ্ধস্সানুভাৱং লক্খণঞ্চ সুত্ৱা পসন্নমানসো হিমৱন্ততো চম্পকাসোকতিলককেটকাদ্যনেকে পুপ্ফে আহৰাপেত্ৱা থূপং কত্ৱা বুদ্ধং ৱিয পূজেত্ৱা কালং কত্ৱা ব্ৰহ্মলোকূপগো অহোসি. অথ তে সিস্সা তস্স আড়হনং কত্ৱা বুদ্ধসন্তিকং গন্ত্ৱা তং পৱত্তিং আৰোচেসুং. অথ ভগৱা বুদ্ধচক্খুনা ওলোকেত্ৱা অনাগতংসঞাণেন পাকটীকৰণমকাসি. সো অপৰভাগে ইমস্মিং বুদ্ধুপ্পাদে সাৱত্থিযং কুলগেহে নিব্বত্তো ৱিঞ্ঞুতং পত্তো পুব্বৱাসনাবলেন সত্থৰি পসন্নো পব্বজিত্ৱা নচিৰস্সেৱ অৰহা অহোসি.

১০. অথ সো অত্তনো পুব্বকুসলং সৰিত্ৱা সোমনস্সজাতো পুব্বচৰিতাপদানং পকাসেন্তো হিমৱন্তস্সাৱিদূৰেতিআদিমাহ. তং হেট্ঠা ৱুত্তত্থমেৱ. কুক্কুৰো নাম পব্বতোতি পব্বতস্স সিখৰং কুক্কুৰাকাৰেন সুনখাকাৰেন সণ্ঠিতত্তা ‘‘কুক্কুৰপব্বতো’’তি সঙ্খ্যং গতো, তস্স সমীপে পণ্ণসালং কত্ৱা পঞ্চতাপসসহস্সেহি সহ ৱসমানোতি অত্থো. নযানুসাৰেন সেসং সব্বং উত্তানত্থমেৱাতি.

পুপ্ফথূপিযত্থেৰঅপদানৱণ্ণনা সমত্তা.

৩. পাযসদাযকত্থেৰঅপদানৱণ্ণনা

সুৱণ্ণৱণ্ণো সম্বুদ্ধোতিআদিকং আযস্মতো পাযসদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে একস্মিং ৱিভৱসম্পন্নে কুলগেহে নিব্বত্তো ৱিঞ্ঞুতং পত্ৱা ঘৰাৱাসং ৱসন্তো হত্থিঅস্সধনধঞ্ঞসত্তৰতনাদিৱিভৱসম্পন্নো সদ্ধাসম্পন্নো কম্মফলং সদ্দহিত্ৱা সহস্সমত্তা সুৱণ্ণপাতিযো কাৰেত্ৱা তস্মিং খীৰপাযসসহস্সস্স পূৰেত্ৱা তা সব্বা গাহাপেত্ৱা সিম্বলিৱনং অগমাসি. তস্মিং সমযে ৱিপস্সী ভগৱা ছব্বণ্ণৰংসিযো ৱিস্সজ্জেত্ৱা আকাসে চঙ্কমং মাপেত্ৱা চঙ্কমতি. সো পন সেট্ঠি তং অচ্ছৰিযং দিস্ৱা অতীৱ পসন্নো পাতিযো ঠপেত্ৱা ৱন্দিত্ৱা আৰোচেসি পটিগ্গহণায. অথ ভগৱা অনুকম্পং উপাদায পটিগ্গহেসি, পটিগ্গহেত্ৱা চ পন তস্স সোমনুস্সুপ্পাদনত্থং সহস্সমত্তেহি ভিক্খুসঙ্ঘেহি সদ্ধিং পৰিভুঞ্জি, তদৱসেসং অনেকসহস্সভিক্খূ পৰিভুঞ্জিংসু. সো তেন পুঞ্ঞেন সুগতীসুযেৱ সংসৰন্তো ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো সদ্ধাজাতো পব্বজিত্ৱা নচিৰস্সেৱ অৰহা অহোসি.

২৬. সো অপৰভাগে অত্তনো কুসলং পচ্চৱেক্খমানো তং সৰিত্ৱা সোমনস্সজাতো পুব্বচৰিতাপদানং পকাসেন্তো সুৱণ্ণৱণ্ণো সম্বুদ্ধোতিআদিমাহ. তং হেট্ঠা ৱুত্তমেৱ.

২৮. চঙ্কমং সুসমাৰূড়্হোতি চদিনন্তো পদৱিক্খেপং কৰোন্তো কমতি গচ্ছতীতি চঙ্কমং, চঙ্কমস্স পদৱিক্খেপস্স আধাৰভূতপথৱিপদেসো চঙ্কমং নামাতি অত্থো, এতং চঙ্কমংসু ৱিসেসেন আৰূড়্হোতি সম্বন্ধো. অম্বৰে অনিলাযনেতি ৱৰীযতি ছাদিযতি অনেনাতি ৱৰং, ন বৰন্তি অম্বৰং, সেতৱত্থসদিসং আকাসন্তি অত্থো. নত্থি নিলীযনং গোপনং এত্থাতি অনিলং, আ সমন্ততো যন্তি গচ্ছন্তি অনেন ইদ্ধিমন্তোতি আযনং, অনিলঞ্চ তং আযনঞ্চেতি অনিলাযনং, তস্মিং অম্বৰে অনিলাযনে চঙ্কমং মাপযিন্তি অত্থো. সেসং সব্বত্থ উত্তানমেৱাতি.

পাযসদাযকত্থেৰঅপদানৱণ্ণনা সমত্তা.

৪. গন্ধোদকিযত্থেৰঅপদানৱণ্ণনা

নিসজ্জ পাসাদৱৰেতিআদিকং আযস্মতো গন্ধোদকিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে নিব্বানূপনিস্সযানি পুঞ্ঞানি উপচিনন্তো ৱিপস্সীভগৱতো কালে সেট্ঠিকুলে নিব্বত্তো ৱিঞ্ঞুতং পত্ৱা মহদ্ধনো মহাভোগো দিব্বসুখমনুভৱন্তো ৱিয মনুস্সসুখমনুভৱন্তো একস্মিং দিৱসে পাসাদৱৰে নিসিন্নো হোতি. তদা ভগৱা সুৱণ্ণমহামেৰু ৱিয ৱীথিযা ৱিচৰতি, তং ৱিচৰমানং ভগৱন্তং দিস্ৱা পসন্নমানসো গন্ত্ৱা ৱন্দিত্ৱা সুগন্ধোদকেন ভগৱন্তং ওসিঞ্চমানো পূজেসি. সো তেন পুঞ্ঞেন দেৱমনুস্সেসু সংসৰন্তো ইমস্মিং বুদ্ধুপ্পাদে একস্মিং কুলগেহে নিব্বত্তো ৱিঞ্ঞুতং পত্তো ঘৰাৱাসেন অনল্লীনো সত্থু সন্তিকে পব্বজিত্ৱা কম্মট্ঠানং গহেত্ৱা ৱিপস্সনং ৱড্ঢেত্ৱা নচিৰস্সেৱ অৰহা অহোসি.

৩৫. সো অপৰভাগে অত্তনো পুব্বকুসলং সৰিত্ৱা সোমনস্সজাতো পুব্বচৰিতাপদানং পকাসেন্তো নিসজ্জ পাসাদৱৰেতিআদিমাহ. তত্থ পাসাদোতি পসাদং সোমনস্সং জনেতি উপ্পাদেতীতি পাসাদো, মালাকম্মচিত্তকম্মসুৱণ্ণকম্মাদ্যনেকৱিচিত্তং দিস্ৱা তত্থ পৱিট্ঠানং জনানং পসাদং জনযতীতি অত্থো. পাসাদো চ সো পত্থেতব্বট্ঠেন ৱৰো চাতি পাসাদৱৰো, তস্মিং পাসাদৱৰে নিসজ্জ নিসীদিত্ৱা ৱিপস্সিং জিনৱৰং অদ্দসন্তি সম্বন্ধো. সেসং সব্বত্থ উত্তানমেৱাতি.

গন্ধোদকিযত্থেৰঅপদানৱণ্ণনা সমত্তা.

৫. সম্মুখাথৱিকত্থেৰঅপদানৱণ্ণনা

জাযমানে ৱিপস্সিম্হীতিআদিকং আযস্মতো সম্মুখাথৱিকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে ব্ৰাহ্মণকুলে নিব্বত্তো সত্তৱস্সিককালেযেৱ সকসিপ্পে নিপ্ফত্তিং পত্তো ঘৰাৱাসং সণ্ঠপেত্ৱা ৱসন্তো ৱিপস্সিম্হি বোধিসত্তে উপ্পন্নে সব্ববুদ্ধানং লক্খণানি ৱেদত্তযে দিস্সমানানি তানি ৰাজপ্পমুখস্স জনকাযস্স ৱিপস্সীবোধিসত্তস্স লক্খণঞ্চ বুদ্ধভাৱঞ্চ ব্যাকৰিত্ৱা জনানং মানসং নিব্বাপেসি, অনেকানি চ থুতিৱচনানি নিৱেদেসি. সো তেন কুসলকম্মেন ছ কামাৱচৰসম্পত্তিযো অনুভৱিত্ৱা মনুস্সেসু চ চক্কৱত্তিসম্পত্তিযো অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো সদ্ধাজাতো পব্বজিত্ৱা নচিৰস্সেৱ অৰহা অহোসি. কতকুসলনামেন সম্মুখাথৱিকত্থেৰোতি পাকটো.

৪১. সো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো জাযমানে ৱিপস্সিম্হীতিআদিমাহ. ৱিপস্সিম্হি সম্মাসম্বুদ্ধে জাযমানে উপ্পজ্জমানে মাতুকুচ্ছিতো নিক্খন্তে অহং পাতুভূতং নিমিত্তং কাৰণং বুদ্ধভাৱস্স হেতুং ব্যাকৰিং কথেসিং, অনেকানি অচ্ছৰিযানি পাকটানি অকাসিন্তি অত্থো. সেসং ৱুত্তনযানুসাৰেন সুৱিঞ্ঞেয্যমেৱাতি.

সম্মুখাথৱিকত্থেৰঅপদানৱণ্ণনা সমত্তা.

৬. কুসুমাসনিযত্থেৰঅপদানৱণ্ণনা

নগৰে ধঞ্ঞৱতিযাতিআদিকং আযস্মতো কুসুমাসনিযত্থেৰস্স অপদানং. অযম্পি পুৰিমজিনৱৰেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে ব্ৰাহ্মণকুলে নিব্বত্তো ৱিঞ্ঞুতং পত্তো মহদ্ধনো মহাভোগো তিণ্ণং ৱেদানং পাৰং গতো ব্ৰাহ্মণসিপ্পেসু কোটিপ্পত্তো সকপৰসমযকুসলো মাতাপিতৰো পূজেতুকামো পঞ্চ উপ্পলকলাপে অত্তনো সমীপে ঠপেত্ৱা নিসিন্নো ভিক্খুসঙ্ঘপৰিৱুতং ৱিপস্সিং ভগৱন্তং আগচ্ছন্তং দিস্ৱা নীলপীতাদিঘনবুদ্ধৰস্মিযো চ দিস্ৱা পসন্নমানসো আসনং পঞ্ঞাপেত্ৱা তত্থ তানি পুপ্ফানি সন্থৰিত্ৱা ভগৱন্তং তত্থ নিসীদাপেত্ৱা সকঘৰে মাতু অত্থায পটিযত্তানি সব্বানি খাদনীযভোজনীযানি গহেত্ৱা সপৰিৱাৰং ভগৱন্তং সহত্থেন সন্তপ্পেন্তো ভোজেসি. ভোজনাৱসানে একং উপ্পলহত্থং অদাসি. তেন সোমনস্সজাতো পত্থনং অকাসি. ভগৱাপি অনুমোদনং কত্ৱা পকামি. সো তেন পুঞ্ঞেন দেৱমনুস্সেসু দ্ৱে সম্পত্তিযো অনুভৱিত্ৱা ইমস্মিং বুদ্ধুপ্পাদে সাৱত্থিযং ৱিভৱসম্পন্নে একস্মিং কুলে নিব্বত্তো ৱিঞ্ঞুতং পত্তো ভোগযসেহি ৱড্ঢিতো কামেসু আদীনৱং দিস্ৱা ঘৰাৱাসং পহায পব্বজিতো নচিৰস্সেৱ অৰহা অহোসি.

৬৫. সো অপৰভাগে পুব্বে কতকুসলং পুব্বেনিৱাসঞাণেন সৰিত্ৱা সোমনস্সপ্পত্তো পুব্বচৰিতাপদানং পকাসেন্তো নগৰে ধঞ্ঞৱতিযাতিআদিমাহ. ধঞ্ঞানং পুঞ্ঞৱন্তানং খত্তিযব্ৰাহ্মণগহপতিমহাসালানং অনেকেসং কুলানং আকৰত্তা ধঞ্ঞৱতী, অথ ৱা মুত্তামণিআদিসত্তৰতনানং সত্তৱিধধঞ্ঞানং উপভোগপৰিভোগানং আকৰত্তা ধঞ্ঞৱতী, অথ ৱা ধঞ্ঞানং বুদ্ধপচ্চেকবুদ্ধখীণাসৱানং ৱসনট্ঠানং আৰামৱিহাৰাদীনং আকৰত্তা ধঞ্ঞৱতী, তস্সা ধঞ্ঞৱতিযা. নগৰন্তি পত্থেন্তি এত্থ উপভোগপৰিভোগত্থিকা জনাতি নগৰং, ন গচ্ছতীতি ৱা নগং, ৰাজযুৱৰাজমহামত্তাদীনং ৱসনট্ঠানং. নগং ৰাতি আদদাতি গণ্হাতীতি নগৰং, ৰাজাদীনং ৱসনট্ঠানসমূহভূতং পাকাৰপৰিখাদীহি পৰিক্খিত্তং পৰিচ্ছিন্নট্ঠানং নগৰং নামাতি অত্থো. নগৰে যদা অহং ৱিপস্সিস্স ভগৱতো সন্তিকে ব্যাকৰণং অলভিং, তদা তস্মিং ধঞ্ঞৱতিযা নগৰে ব্ৰাহ্মণো অহোসিন্তি সম্বন্ধো. সেসং সব্বত্থ উত্তানমেৱাতি.

কুসুমাসনিযত্থেৰঅপদানৱণ্ণনা সমত্তা.

৭. ফলদাযকত্থেৰঅপদানৱণ্ণনা

অজ্ঝাযকো মন্তধৰোতিআদিকং আযস্মতো ফলদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো অনেকেসু ভৱেসু ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে ব্ৰাহ্মণকুলে নিব্বত্তো ৱিঞ্ঞুতং পত্ৱা ৱেদত্তযাদিসকসিপ্পেসু পাৰপ্পত্তো অনেকেসং ব্ৰাহ্মণসহস্সানিং পামোক্খো আচৰিযো সকসিপ্পানং পৰিযোসানং অদিস্ৱা তত্থ চ সাৰং অপস্সন্তো ঘৰাৱাসং পহায ইসিপব্বজ্জং পব্বজিত্ৱা হিমৱন্তস্স অৱিদূৰে অস্সমং কাৰেত্ৱা সহ সিস্সেহি ৱাসং কপ্পেসি, তস্মিং সমযে পদুমুত্তৰো ভগৱা ভিক্খায চৰমানো তস্সানুকম্পায তং পদেসং সম্পাপুণি. তাপসো ভগৱন্তং দিস্ৱা পসন্নমানসো অত্তনো অত্থায পুটকে নিক্খিপিত্ৱা ৰুক্খগ্গে লগ্গিতানি মধুৰানি পদুমফলানি মধুনা সহ অদাসি. ভগৱা তস্স সোমনস্সুপ্পাদনত্থং পস্সন্তস্সেৱ পৰিভুঞ্জিত্ৱা আকাসে ঠিতো ফলদানানিসংসং কথেত্ৱা পক্কামি.

৭৫. সো তেন পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে ৱিভৱসম্পন্নে একস্মিং কুলগেহে নিব্বত্তো সত্তৱস্সিকোযেৱ অৰহত্তং পত্ৱা পুব্বে কতকুসলকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো অজ্ঝাযকো মন্তধৰোতিআদিমাহ. তত্থ অজ্ঝেতি চিন্তেতীতি অজ্ঝাযি, অজ্ঝাযিযেৱ অজ্ঝাযকো. এত্থ হি অকাৰো ‘‘পটিসেধে ৱুদ্ধিতব্ভাৱে…পে… অকাৰো ৱিৰহপ্পকে’’তি এৱং ৱুত্তেসু দসসু অত্থেসু তব্ভাৱে ৱত্ততি. সিস্সানং সৱনধাৰণাদিৱসেন হিতং অজ্ঝেতি চিন্তেতি সজ্ঝাযং কৰোতীতি অজ্ঝাযকো, চিন্তকোতি অত্থো. আচৰিযস্স সন্তিকে উগ্গহিতং সব্বং মন্তং মনেন ধাৰেতি পৱত্তেতীতি মন্তধৰো. তিণ্ণং ৱেদান পাৰগূতি ৱেদং ৱুচ্চতি ঞাণং, ৱেদেন ৱেদিতব্বা বুজ্ঝিতব্বাতি ৱেদা, ইৰুৱেদযজুৱেদসামৱেদসঙ্খাতা তযো গন্থা, তেসং ৱেদানং পাৰং পৰিযোসানং কোটিং গতো পত্তোতি পাৰগূ. সেসং পাকটমেৱাতি

ফলদাযকত্থেৰঅপদানৱণ্ণনা সমত্তা.

৮. ঞাণসঞ্ঞিকত্থেৰঅপদানৱণ্ণনা

পব্বতে হিমৱন্তম্হীতিআদিকং আযস্মতো ঞাণসঞ্ঞিকত্থেৰস্স অপদানং. অযম্পি পুৰিমবুদ্ধেসু কতাধিকাৰো তস্মিং তস্মিং উপ্পন্নুপ্পন্নে ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে কুলগেহে নিব্বত্তো ৱুদ্ধিপ্পত্তো ঘৰাৱাসং পহায তাপসপব্বজ্জং পব্বজিত্ৱা হিমৱন্তস্স অৱিদূৰে পব্বতন্তৰে পণ্ণসালং কাৰেত্ৱা পঞ্চাভিঞ্ঞাঅট্ঠসমাপত্তিযো নিব্বত্তেত্ৱা ৱসন্তো একদিৱসং পৰিসুদ্ধং পণ্ডৰং পুলিনতলং দিস্ৱা ‘‘ঈদিসা পৰিসুদ্ধা বুদ্ধা, ঈদিসংৱ পৰিসুদ্ধং বুদ্ধঞাণ’’ন্তি বুদ্ধঞ্চ তস্স ঞাণঞ্চ অনুস্সৰি থোমেসি চ.

৮৪. সো তেন পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱিঞ্ঞুতং পত্ৱা সাসনে পব্বজিত্ৱা নচিৰস্সেৱ অৰহত্তং পত্তো পুব্বে কতপুঞ্ঞং অনুস্সৰিত্ৱা সোমনস্সজাতো পুব্বচৰিতাপদানং পকাসেন্তো ‘‘পব্বতে হিমৱন্তম্হী’’তিআদিমাহ. পুলিনং সোভনং দিস্ৱাতি পৰিপুণ্ণকতং ৱিয পুলাকাৰেন পৰিসোধিতাকাৰেন পৱত্তং ঠিতন্তি পুলিনং, সোভনং ৱালুকং দিস্ৱা সেট্ঠং বুদ্ধং অনুস্সৰিন্তি অত্থো. সেসং সুৱিঞ্ঞেয্যমেৱাতি.

ঞাণসঞ্ঞিকত্থেৰঅপদানৱণ্ণনা সমত্তা.

৯. গণ্ঠিপুপ্ফিযত্থেৰঅপদানৱণ্ণনা

সুৱণ্ণৱণ্ণো সম্বুদ্ধোতিআদিকং আযস্মতো গণ্ঠিপুপ্ফিযত্থেৰস্স অপদানং. অযম্পি পুৰিমবুদ্ধেসু কতাধিকাৰো অনেকাসু জাতীসু কতপুঞ্ঞসঞ্চযো ৱিপস্সিস্স ভগৱতো কালে একস্মিং কুলগেহে নিব্বত্তো উপভোগপৰিভোগেহি অনূনো একদিৱসং ৱিপস্সিং ভগৱন্তং সগণং দিস্ৱা পসন্নমানসো লাজাপঞ্চমেহি পুপ্ফেহি পূজেসি. সো তেনেৱ চিত্তপ্পসাদেন যাৱতাযুকং ঠত্ৱা ততো দেৱলোকে নিব্বত্তো দিব্বসম্পত্তিং অনুভৱিত্ৱা অপৰভাগে মনুস্সেসু মনুস্সসম্পত্তিং অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো সদ্ধাজাতো পব্বজিত্ৱা নচিৰস্সেৱ অৰহত্তং পাপুণি.

৯১. সো একদিৱসং পুব্বে কতপুঞ্ঞং সৰিত্ৱা সোমনস্সজাতো ‘‘ইমিনা কুসলেনাহং নিব্বানং পত্তো’’তি পুব্বচৰিতাপদানং পকাসেন্তো সুৱণ্ণৱণ্ণো সম্বুদ্ধোতিআদিমাহ. তং সব্বং হেট্ঠা ৱুত্তনযত্তা উত্তানত্থমেৱাতি.

গণ্ঠিপুপ্ফিযত্থেৰঅপদানৱণ্ণনা সমত্তা.

১০. পদুমপূজকত্থেৰঅপদানৱণ্ণনা

হিমৱন্তস্সাৱিদূৰেতিআদিকং আযস্মতো পদুমপূজকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে ব্ৰাহ্মণকুলে নিব্বত্তো ৱিঞ্ঞুতং পত্ৱা সকসিপ্পে নিপ্ফত্তিং পত্ৱা তত্থ সাৰং অপস্সন্তো বুদ্ধুপ্পত্তিতো পুৰেতৰং উপ্পন্নত্তা ওৱাদানুসাসনং অলভিত্ৱা ঘৰাৱাসং পহায ইসিপব্বজ্জং পব্বজিত্ৱা হিমৱন্তস্স অৱিদূৰে গোতমকং নাম পব্বতং নিস্সায অস্সমং কাৰেত্ৱা পঞ্চাভিঞ্ঞা অট্ঠ সমাপত্তিযো নিব্বত্তেত্ৱা ঝানসুখেনেৱ ৱিহাসি. তদা পদুমুত্তৰো ভগৱা বুদ্ধো হুত্ৱা সত্তে সংসাৰতো উদ্ধৰন্তো তস্সানুকম্পায হিমৱন্তং অগমাসি. তাপসো ভগৱন্তং দিস্ৱা পসন্নমানসো সকসিস্সে সমানেত্ৱা তেহি পদুমপুপ্ফানি আহৰাপেত্ৱা পূজেসি. সো তেন পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে সাৱত্থিযং কুলগেহে নিব্বত্তো সদ্ধো পসন্নো পব্বজিত্ৱা নচিৰস্সেৱ অৰহা অহোসি.

৯৭. সো অত্তনো পুঞ্ঞকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো হিমৱন্তস্সাৱিদূৰেতিআদিমাহ. গোতমো নাম পব্বতোতি অনেকেসং যক্খদেৱতানং আৱাসভাৱেন অধিট্ঠানৱসেন গোতমস্স ভৱনত্তা গোতমোতি পাকটো অহোসি. পৱত্ততি তিট্ঠতীতি পব্বতো. নাগৰুক্খেহি সঞ্ছন্নোতি ৰুহতি তিট্ঠতীতি ৰুক্খো. অথ ৱা পথৱিং খনন্তো উদ্ধং ৰুহতীতি ৰুক্খো, নানা অনেকপ্পকাৰা চম্পককপ্পূৰনাগঅগৰুচন্দনাদযো ৰুক্খাতি নানাৰুক্খা, তেহি নানাৰুক্খেহি সঞ্ছন্নো পৰিকিণ্ণো গোতমো পব্বতোতি সম্বন্ধো. মহাভূতগণালযোতি ভৱন্তি জাযন্তি উপ্পজ্জন্তি ৱড্ঢন্তি চাতি ভূতা, মহন্তা চ তে ভূতা চাতি মহাভূতা, মহাভূতানং গণো সমূহোতি মহাভূতগণো, মহাভূতগণস্স আলযো পতিট্ঠাতি মহাভূতগণালযো.

৯৮. ৱেমজ্ঝম্হি চ তস্সাসীতি তস্স গোতমস্স পব্বতস্স ৱেমজ্ঝে অব্ভন্তৰে অস্সমো অভিনিম্মিতো নিপ্ফাদিতো কতোতি অত্থো. সেসং উত্তানমেৱাতি.

পদুমপূজকত্থেৰঅপদানৱণ্ণনা সমত্তা.

তেৰসমৱগ্গৱণ্ণনা সমত্তা.