১৪. সোভিতৱগ্গো

১. সোভিতত্থেৰঅপদানৱণ্ণনা

পদুমুত্তৰো নাম জিনোতিআদিকং আযস্মতো সোভিতত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে একস্মিং কুলগেহে নিব্বত্তো ৱিঞ্ঞুতং পত্তো ঘৰাৱাসং সণ্ঠপেত্ৱা একদিৱসং সত্থাৰা ধম্মে দেসিযমানে সোমনস্সেন পসন্নমানসো নানপ্পকাৰেহি থোমেসি. সো তেনেৱ সোমনস্সেন কালং কত্ৱা দেৱেসু নিব্বত্তো তত্থ দিব্বসুখং অনুভৱিত্ৱা মনুস্সেসু চ মনুস্সসুখং অনুভৱিত্ৱা ইমস্মিং বুদ্ধুপ্পাদে সাৱত্থিযং কুলগেহে নিব্বত্তো সত্তৱস্সিকোৱ পব্বজিত্ৱা নচিৰস্সেৱ ছড়ভিঞ্ঞো অৰহা অহোসি.

১. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পদুমুত্তৰো নাম জিনোতিআদিমাহ. তং সব্বং হেট্ঠা ৱুত্তনযত্তা সুৱিঞ্ঞেয্যমেৱাতি.

সোভিতত্থেৰঅপদানৱণ্ণনা সমত্তা.

২. সুদস্সনত্থেৰঅপদানৱণ্ণনা

ৱিত্থতায নদীতীৰেতিআদিকং আযস্মতো সুদস্সনত্থেৰস্স অপদানং. অযম্পি পুৰিমজিনৱৰেসু কতাধিকাৰো তত্থ তত্থ ভৱে কতপুঞ্ঞূপচযো সিখিস্স ভগৱতো কালে কুলগেহে নিব্বত্তো ৱুদ্ধিপ্পত্তো ঘৰাৱাসং সণ্ঠপেত্ৱা ৱসন্তো ৱিত্থতায নাম গঙ্গায সমীপে পিলক্খুফলিতং পৰিযেসন্তো তস্সা তীৰে নিসিন্নং জলমানঅগ্গিসিখং ইৱ সিখিং সম্মাসম্বুদ্ধং দিস্ৱা পসন্নমানসো কেতকীপুপ্ফং ৱণ্টেনেৱ ছিন্দিত্ৱা পূজেন্তো এৱমাহ – ‘‘ভন্তে, যেন ঞাণেন ত্ৱং এৱং মহানুভাৱো সব্বঞ্ঞুবুদ্ধো জাতো, তং ঞাণং অহং পূজেমী’’তি. অথ ভগৱা অনুমোদনমকাসি. সো তেন পুঞ্ঞেন দেৱমনুস্সেসু জাতো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো সত্থৰি পসন্নো পব্বজিত্ৱা নচিৰস্সেৱ অৰহা অহোসি.

১০. সো অত্তনো কতকুসলং সৰিত্ৱা সোমনস্সজাতো পুব্বচৰিতাপদানং পকাসেন্তো ৱিত্থতায নদীতীৰেতিআদিমাহ. তত্থ ৱিত্থতাযাতি ৱিত্থৰতি পত্থৰতি ৱিত্থিণ্ণা হোতীতি ৱিত্থতা, নদন্তি সদ্দং কৰোন্তি ইতা গতা পৱত্তাতি নদী, নদিং তৰন্তা এতং পত্ৱা তিণ্ণা নাম হোন্তীতি তীৰং, তস্সা ৱিত্থতায নদিযা তীৰে তীৰসমীপেতি অত্থো. কেতকিং পুপ্ফিতং দিস্ৱাতি কুচ্ছিতাকাৰেন গণ্হন্তানং হত্থং কণ্ডকো ছিন্দতি ৱিজ্ঝতীতি কেতং, কেতস্স এসা কেতকীপুপ্ফং, তং দিস্ৱা ৱণ্টং ছিন্দিত্ৱাতি সম্বন্ধো.

১১. সিখিনো লোকবন্ধুনোতি সিখী ৱুচ্চতি অগ্গি, সিখীসদিসা নীলপীতাদিভেদা জলমানা ছব্বণ্ণঘনৰংসিযো যস্স সো সিখী, লোকস্স সকললোকত্তযস্স বন্ধু ঞাতকোতি লোকবন্ধু, তস্স সিখিনো লোকবন্ধুনো কেতকীপুপ্ফং ৱণ্টে ছিন্দিত্ৱা পূজেসিন্তি সম্বন্ধো. সেসং উত্তানত্থমেৱাতি.

সুদস্সনত্থেৰঅপদানৱণ্ণনা সমত্তা.

৩. চন্দনপূজনকত্থেৰঅপদানৱণ্ণনা

চন্দভাগানদীতীৰেতিআদিকং আযস্মতো চন্দনপূজনকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো অত্থদস্সিস্স ভগৱতো কালে হিমৱন্তে চন্দভাগানদিযা সমীপে কিন্নৰযোনিযং নিব্বত্তো পুপ্ফভক্খো পুপ্ফনিৱসনো চন্দনঅগৰুআদীসু গন্ধৱিভূসিতো হিমৱন্তে ভুম্মদেৱতা ৱিয উয্যানকীড়জলকীড়াদিঅনেকসুখং অনুভৱন্তো ৱাসং কপ্পেসি. তদা অত্থদস্সী ভগৱা তস্সানুকম্পায হিমৱন্তং গন্ত্ৱা আকাসতো ওৰুয্হ সঙ্ঘাটিং পঞ্ঞাপেত্ৱা নিসীদি. সো কিন্নৰো তং ভগৱন্তং ৱিজ্জোতমানং তত্থ নিসিন্নং দিস্ৱা পসন্নমানসো সুগন্ধচন্দনেন পূজেসি. তস্স ভগৱা অনুমোদনং অকাসি.

১৭. সো তেন পুঞ্ঞেন তেন সোমনস্সেন যাৱতাযুকং ঠত্ৱা ততো চুতো দেৱলোকে নিব্বত্তো অপৰাপৰং ছ কামাৱচৰসম্পত্তিযো অনুভৱিত্ৱা মনুস্সেসু চক্কৱত্তিৰজ্জপদেসৰজ্জসম্পত্তিযো অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো পব্বজিত্ৱা নচিৰস্সেৱ অৰহত্তং পত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো চন্দভাগানদীতীৰেতিআদিমাহ. তত্থ চন্দং মনং ৰুচিং অজ্ঝাসযং ঞত্ৱা ৱিয জাতোতি চন্দো. চন্দমণ্ডলেন পসন্ননিম্মলোদকেন উভোসু পস্সেসু মুত্তাদলসদিসসন্থৰধৱলপুলিনতলেন চ সমন্নাগতত্তা চন্দেন ভাগা সদিসাতি চন্দভাগা, তস্সা চন্দভাগায নদিযা তীৰে সমীপেতি অত্থো. সেসং সব্বং হেট্ঠা ৱুত্তনযত্তা সুৱিঞ্ঞেয্যমেৱাতি.

চন্দনপূজনকত্থেৰঅপদানৱণ্ণনা সমত্তা.

অট্ঠমভাণৱাৰৱণ্ণনা সমত্তা.

৪. পুপ্ফচ্ছদনিযত্থেৰঅপদানৱণ্ণনা

সুনন্দো নাম নামেনাতিআদিকং আযস্মতো পুপ্ফচ্ছদনিযত্থেৰস্স অপদানং. অযম্পি পুৰিমবুদ্ধেসু কতাধিকাৰো অনেকেসু ভৱেসু ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে ব্ৰাহ্মণকুলে নিব্বত্তো ৱিঞ্ঞুতং পত্ৱা সকসিপ্পেসু নিপ্ফত্তিং পত্তো মহাভোগো মহাযসো দানাভিৰতো অহোসি. একদিৱসং সো ‘‘সকলজম্বুদীপে ইমে যাচকা নাম ‘অহং দানং ন লদ্ধোস্মী’তি ৱত্তুং মা লভন্তূ’’তি মহাদানং সজ্জেসি. তদা পদুমুত্তৰো ভগৱা সপৰিৱাৰো আকাসেন গচ্ছতি. ব্ৰাহ্মণো তং দিস্ৱা পসন্নচিত্তো সকসিস্সে পক্কোসাপেত্ৱা পুপ্ফানি আহৰাপেত্ৱা আকাসে উক্খিপিত্ৱা পূজেসি. তানি সকলনগৰং ছাদেত্ৱা সত্ত দিৱসানি অট্ঠংসু.

২৬. সো তেন পুঞ্ঞকম্মেন দেৱমনুস্সেসু সুখং অনুভৱিত্ৱা ইমস্মিং বুদ্ধুপ্পাদে সাৱত্থিযং একস্মিং কুলগেহে নিব্বত্তো সদ্ধাজাতো পব্বজিত্ৱা খুৰগ্গেযেৱ অৰহত্তং পত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো সুনন্দো নাম নামেনাতিআদিমাহ. তং হেট্ঠা ৱুত্তনযত্তা সুৱিঞ্ঞেয্যমেৱাতি.

পুপ্ফচ্ছদনিযত্থেৰঅপদানৱণ্ণনা সমত্তা.

৫. ৰহোসঞ্ঞকত্থেৰঅপদানৱণ্ণনা

হিমৱন্তস্সাৱিদূৰেতিআদিকং আযস্মতো ৰহোসঞ্ঞকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো একস্মিং বুদ্ধসুঞ্ঞকালে মজ্ঝিমদেসে ব্ৰাহ্মণকুলে নিব্বত্তো ৱুদ্ধিমন্ৱায সকসিপ্পেসু নিপ্ফত্তিং পত্ৱা তত্থ সাৰং অপস্সন্তো কেৱলং উদৰং পূৰেত্ৱা কোধমদমানাদযো অকুসলেযেৱ দিস্ৱা ঘৰাৱাসং পহায হিমৱন্তং পৱিসিত্ৱা ইসিপব্বজ্জং পব্বজিত্ৱা অনেকতাপসসতপৰিৱাৰো ৱসভপব্বতসমীপে অস্সমং মাপেত্ৱা তীণি ৱস্সসহস্সানি হিমৱন্তেযেৱ ৱসমানো ‘‘অহং এত্তকানং সিস্সানং আচৰিযোতি সম্মতো গৰুট্ঠানিযো গৰুকাতব্বো ৱন্দনীযো, আচৰিযো মে নত্থী’’তি দোমনস্সপ্পত্তো তে সব্বে সিস্সে সন্নিপাতেত্ৱা বুদ্ধানং অভাৱে নিব্বানাধিগমাভাৱং পকাসেত্ৱা সযং এককো ৰহো ৱিৱেকট্ঠানেৱ নিসিন্নো বুদ্ধস্স সম্মুখা নিসিন্নো ৱিয বুদ্ধসঞ্ঞং মনসি কৰিত্ৱা বুদ্ধাৰম্মণং পীতিং উপ্পাদেত্ৱা সালাযং পল্লঙ্কং আভুজিত্ৱা নিসিন্নো কালং কত্ৱা ব্ৰহ্মলোকে নিব্বত্তি.

৩৪. সো তত্থ ঝানসুখেন চিৰং ৱসিত্ৱা ইমস্মিং বুদ্ধুপ্পাদে কুলগেহে নিব্বত্তো কামেসু অনল্লীনো সত্তৱস্সিকো পব্বজিত্ৱা খুৰগ্গেযেৱ অৰহত্তং পত্ৱা ছড়ভিঞ্ঞো হুত্ৱা পুব্বেনিৱাসঞাণেন অত্তনো পুব্বকম্মং সৰিত্ৱা সঞ্জাতসোমনস্সো পুব্বচৰিতাপদানং পকাসেন্তো হিমৱন্তস্সাৱিদূৰেতিআদিমাহ. ৱসভো নাম পব্বতোতি হিমৱন্তপব্বতং ৱিনা সেসপব্বতানং উচ্চতৰভাৱেন সেট্ঠতৰভাৱেন ৱসভোতি সঙ্খং গতো পব্বতোতি অত্থো. সেসং সব্বত্থ উত্তানত্থমেৱাতি.

ৰহোসঞ্ঞকত্থেৰঅপদানৱণ্ণনা সমত্তা.

৬. চম্পকপুপ্ফিযত্থেৰঅপদানৱণ্ণনা

কণিকাৰংৱ জোতন্তন্তিআদিকং আযস্মতো চম্পকপুপ্ফিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱেস্সভুস্স ভগৱতো কালে ব্ৰাহ্মণকুলে নিব্বত্তো ৱুদ্ধিপ্পত্তো সকসিপ্পেসু নিপ্ফত্তিং পত্ৱা তত্থ সাৰং অপস্সন্তো ঘৰাৱাসং পহায তাপসপব্বজ্জং পব্বজিত্ৱা ৱনন্তৰে ৱসন্তো ৱেস্সভুং ভগৱন্তং উদ্দিস্স সিস্সেহি আনীতেহি চম্পকপুপ্ফেহি পূজেসি. ভগৱা অনুমোদনং অকাসি. সো তেনেৱ কুসলেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পাপুণিত্ৱা পুব্বৱাসনাবলেন ঘৰাৱাসে অনল্লীনো পব্বজিত্ৱা নচিৰস্সেৱ অৰহা অহোসি.

৪১. সো অপৰভাগে অত্তনো পুব্বপুঞ্ঞকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো কণিকাৰংৱ জোতন্তন্তিআদিমাহ. তত্থ কণিকাৰন্তি সকলপত্তপলাসানি পৰিভজ্জ পাতেত্ৱা পুপ্ফগহণসমযে কণ্ণিকাবদ্ধো হুত্ৱা পুপ্ফমকুড়ানং গহণতো কণ্ণিকাকাৰেন পকতোতি কণিকাৰো, ‘‘কণ্ণিকাৰো’’তি ৱত্তব্বে নিৰুত্তিনযেন একস্স পুব্ব ণ-কাৰস্স লোপং কত্ৱা ‘‘কণিকাৰ’’ন্তি ৱুত্তন্তি দট্ঠব্বং. তং পুপ্ফিতং কণিকাৰৰুক্খং ইৱ জোতন্তং বুদ্ধং অদ্দসন্তি অত্থো. সেসং উত্তানত্থমেৱাতি.

চম্পকপুপ্ফিযত্থেৰঅপদানৱণ্ণনা সমত্তা.

৭. অত্থসন্দস্সকত্থেৰঅপদানৱণ্ণনা

ৱিসালমাড়ে আসীনোতিআদিকং আযস্মতো অত্থসন্দস্সকত্থেৰস্স অপদানং. অযম্পি পুৰিমবুদ্ধেসু কতাধিকাৰো অনেকেসু অত্তভাৱেসু কতপুঞ্ঞূপচযো পদুমুত্তৰস্স ভগৱতো কালে ব্ৰাহ্মণকুলে নিব্বত্তো ৱুদ্ধিমন্ৱায সকসিপ্পেসু নিপ্ফত্তিং পত্তো তত্থ সাৰং অপস্সন্তো গেহং পহায হিমৱন্তং গন্ত্ৱা ৰমণীযে ঠানে পণ্ণসালং কত্ৱা পটিৱসতি, তদা সত্তানুকম্পায হিমৱন্তমাগতং পদুমুত্তৰভগৱন্তং দিস্ৱা পসন্নমানসো পঞ্চঙ্গসমন্নাগতো ৱন্দিত্ৱা থুতিৱচনেহি থোমেসি. সো তেন পুঞ্ঞেন যাৱতাযুকং কত্ৱা কালঙ্কত্ৱা ব্ৰহ্মলোকূপগো অহোসি. সো অপৰভাগে ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো সত্থু ধম্মদেসনং সুত্ৱা পটিলদ্ধসদ্ধো পব্বজিত্ৱা অৰহত্তং পাপুণি.

৪৭. সো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো ৱিসালমাড়ে আসীনোতিআদিমাহ. তত্থ ৱিসালমাড়েতি ৱিসালং পত্থটং ৱিত্থিণ্ণং মহন্তং মাড়ং ৱিসালমাড়ং, তস্মিং ৱিসালমাড়ে আসীনো নিসিন্নো অহং লোকনাযকং অদ্দসন্তি সম্বন্ধো. তেসং সুৱিঞ্ঞেয্যমেৱাতি.

অত্থসন্দস্সকত্থেৰঅপদানৱণ্ণনা সমত্তা.

৮. একপসাদনিযত্থেৰঅপদানৱণ্ণনা

নাৰদো ইতি মে নামন্তিআদিকং আযস্মতো একপসাদনিযত্থেৰস্স অপদানং. অযম্পি পুৰিমবুদ্ধেসু কতাধিকাৰো অনেকাসু জাতীসু কতকুসলো অত্থদস্সিস্স ভগৱতো কালে ব্ৰাহ্মণকুলে নিব্বত্তো কেসৱোতি পাকটো হুত্ৱা ৱিঞ্ঞুতং পত্ৱা ঘৰাৱাসং পহায পব্বজিত্ৱা ৱসন্তো একদিৱসং সত্থু ধম্মদেসনং সুত্ৱা পসন্নমানসো অঞ্জলিং পগ্গয্হ অতিৱিয পীতিসোমনস্সজাতো পক্কামি. সো যাৱতাযুকং ঠত্ৱা তেনেৱ সোমনস্সেন কালং কত্ৱা দেৱেসু নিব্বত্তো তত্থ দিব্বসম্পত্তিং অনুভৱিত্ৱা মনুস্সেসু উপ্পন্নো তত্থ সম্পত্তিযো অনুভৱিত্ৱা ইমস্মিং বুদ্ধুপ্পাদে অঞ্ঞতৰস্মিং কুলগেহে নিব্বত্তো ৱুদ্ধিপ্পত্তো সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

৫৫. সো অপৰভাগে অত্তনো কতকুসলকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো নাৰদো ইতি মে নামন্তিআদিমাহ. তত্থ নাৰদোতি জাতিৱসেন সুদ্ধসৰীৰত্তা নত্থি ৰজো ধূলি মলং এতস্সাতি নাৰদো, জ-কাৰস্স দ-কাৰং কত্ৱা নাৰদোতি কুলদত্তিকং নামং. কেসৱোতি কিসৱচ্ছগোত্তে জাতত্তা কেসৱো নাৰদকেসৱো ইতি মং জনা ৱিদূ জানন্তীতি অত্থো. সেসং পাকটমেৱাতি.

একপসাদনিযত্থেৰঅপদানৱণ্ণনা সমত্তা.

৯. সালপুপ্ফদাযকত্থেৰঅপদানৱণ্ণনা

মিগৰাজা তদা আসিন্তিআদিকং আযস্মতো সালপুপ্ফদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে কতকুসলসঞ্চযো কেনচি কম্মচ্ছিদ্দেন হিমৱন্তে সীহযোনিযং নিব্বত্তো অনেকসীহপৰিৱাৰো ৱিহাসি. তদা সিখী ভগৱা তস্সানুকম্পায হিমৱন্তং অগমাসি. সীহো তং উপগতং দিস্ৱা পসন্নমানসো সাখাভঙ্গেন সকণ্ণিকসালপুপ্ফং গহেত্ৱা পূজেসি. ভগৱা তস্স অনুমোদনং অকাসি.

৬০. সো তেন পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱিঞ্ঞুতং পত্ৱা সত্থৰি পসন্নো পব্বজিত্ৱা অৰহত্তং পত্তো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো মিগৰাজা তদা আসিন্তিআদিমাহ. তত্থ মৰণং গচ্ছন্তীতি মিগা, অথ ৱা ঘাসং মগ্গন্তি গৱেসন্তীতি মিগা, মিগানং ৰাজা মিগৰাজা. সকলচতুপ্পদানং ৰাজভাৱে সতিপি গাথাবন্ধসুখত্থং মিগে আদিং কত্ৱা মিগৰাজাতি ৱুত্তং. যদা ভগৱন্তং দিস্ৱা সপুপ্ফং সালসাখং ভঞ্জিত্ৱা পূজেসিং, তদা অহং মিগৰাজা অহোসিন্তি অত্থো.

৬২. সকোসং পুপ্ফমাহৰিন্তি সকণ্ণিকং সালপুপ্ফং আহৰিং পূজেসিন্তি অত্থো. সেসং উত্তানত্থমেৱাতি.

সালপুপ্ফদাযকত্থেৰঅপদানৱণ্ণনা সমত্তা.

১০. পিযালফলদাযকত্থেৰঅপদানৱণ্ণনা

পৰোধকো তদা আসিন্তিআদিকং আযস্মতো পিযালফলদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিখিস্স ভগৱতো কালে নেসাদকুলে নিব্বত্তো হিমৱন্তে একস্মিং পব্ভাৰে মিগে ৱধিত্ৱা জীৱিকং কপ্পেত্ৱা ৱসতি. তস্মিং কালে তত্থ গতং সিখিং ভগৱন্তং দিস্ৱা পসন্নমানসো সাযং পাতং নমস্সমানো কঞ্চি দেয্যধম্মং অপস্সন্তো মধুৰানি পিযালফলানি উচ্চিনিত্ৱা অদাসি. ভগৱা তানি পৰিভুঞ্জি. সো নেসাদো বুদ্ধাৰম্মণায পীতিযা নিৰন্তৰং ফুট্ঠসৰীৰো পাপকম্মে ৱিৰত্তচিত্তো মূলফলাহাৰো নচিৰস্সেৱ কালং কত্ৱা দেৱলোকে নিব্বত্তি.

৬৬. সো তত্থ দিব্বসম্পত্তিযো অনুভৱিত্ৱা মনুস্সেসু চ অনেকৱিধসম্পত্তিযো অনুভৱিত্ৱা ইমস্মিং বুদ্ধুপ্পাদে গহপতিকুলে নিব্বত্তো ৱিঞ্ঞুতং পত্তো ঘৰাৱাসং সণ্ঠপেত্ৱা তত্থ অনভিৰতো গেহং পহায সত্থু সন্তিকে পব্বজিত্ৱা ৱিপস্সনং ৱড্ঢেত্ৱা নচিৰস্সেৱ অৰহত্তং পত্তো অত্তনো কতফলদানকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পৰোধকো তদা আসিন্তিআদিমাহ. তত্থ যদা অহং পিযালফলং দত্ৱা চিত্তং পসাদেসিং, তদা অহং পৰোধকো আসিন্তি সম্বন্ধো. পৰোধকোতি পৰসত্তৰোধকো ৱিহেসকো. ‘‘পৰৰোধকো’’তি ৱত্তব্বে পুব্বস্স ৰ-কাৰস্স লোপং কত্ৱা ‘‘পৰোধকো’’তি ৱুত্তং.

৬৯. পৰিচাৰিং ৱিনাযকন্তি তং নিব্বানপাপকং সত্থাৰং, ‘‘ভন্তে, ইমং ফলং পৰিভুঞ্জথা’’তি পৱাৰিং নিমন্তেসিং আৰাধেসিন্তি অত্থো. সেসং সুৱিঞ্ঞেয্যমেৱাতি.

পিযালফলদাযকত্থেৰঅপদানৱণ্ণনা সমত্তা.

চুদ্দসমৱগ্গৱণ্ণনা সমত্তা.