১৫. ছত্তৱগ্গো

১. অতিছত্তিযত্থেৰঅপদানৱণ্ণনা

পৰিনিব্বুতে ভগৱতীতিআদিকং আযস্মতো অতিছত্তিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো অত্থদস্সিস্স ভগৱতো কালে একস্মিং কুলগেহে নিব্বত্তো ধৰমানস্স ভগৱতো অদিট্ঠত্তা পৰিনিব্বুতকালে ‘‘অহো মম পৰিহানী’’তি চিন্তেত্ৱা ‘‘মম জাতিং সফলং কৰিস্সামী’’তি কতসন্নিট্ঠানো ছত্তাধিছত্তং কাৰেত্ৱা তস্স ভগৱতো সৰীৰধাতুং নিহিতধাতুগব্ভং পূজেসি. অপৰভাগে পুপ্ফচ্ছত্তং কাৰেত্ৱা তমেৱ ধাতুগব্ভং পূজেসি. সো তেনেৱ পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে গহপতিকুলে নিব্বত্তো ৱিঞ্ঞুতং পত্তো সত্থৰি পসন্নো পব্বজিত্ৱা কম্মট্ঠানং গহেত্ৱা ৱাযমন্তো নচিৰস্সেৱ অৰহত্তং পাপুণি.

১. সো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পৰিনিব্বুতে ভগৱতীতিআদিমাহ. তত্থ ছত্তাতিছত্তন্তি ছাদিযতি সংৱৰিযতি আতপাদিন্তি ছত্তং, ছত্তস্স অতিছত্তং ছত্তস্স উপৰি কতছত্তং ছত্তাতিছত্তং, ছত্তস্স উপৰূপৰি ছত্তন্তি অত্থো. থূপম্হি অভিৰোপযিন্তি থূপিযতি ৰাসিকৰীযতীতি থূপো, অথ ৱা থূপতি থিৰভাৱেন ৱুদ্ধিং ৱিৰূড়্হিং ৱেপুল্লং আপজ্জমানো পতিট্ঠাতীতি থূপো, তস্মিং থূপম্হি মযা কাৰিতং ছত্তং উপৰূপৰি ঠপনৱসেন অভি ৱিসেসেন আৰোপযিং পূজেসিন্তি অত্থো.

২. পুপ্ফচ্ছদনং কত্ৱানাতি ৱিকসিতেহি সুগন্ধেহি অনেকেহি ফুপ্ফেহি ছদনং ছত্তুপৰি ৱিতানং কত্ৱা পূজেসিন্তি অত্থো. সেসং সব্বত্থ উত্তানত্থমেৱাতি.

অতিছত্তিযত্থেৰঅপদানৱণ্ণনা সমত্তা.

২. থম্ভাৰোপকত্থেৰঅপদানৱণ্ণনা

নিব্বুতে লোকনাথম্হীতিআদিকং আযস্মতো থম্ভাৰোপকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ধম্মদস্সিস্স ভগৱতো কালে কুলগেহে নিব্বত্তো সদ্ধো পসন্নো পৰিনিব্বুতে ভগৱতি তস্স ভগৱতো ধাতুগব্ভমাড়কে থম্ভং নিখনিত্ৱা ধজং আৰোপেসি. বহূনি জাতিসুমনপুপ্ফানি গন্থিত্ৱা নিস্সেণিযা আৰোহিত্ৱা পূজেসি.

৫. সো যাৱতাযুকং ঠত্ৱা কালং কত্ৱা দেৱমনুস্সেসু সংসৰন্তো উভযসম্পত্তিযো অনুভৱিত্ৱা সব্বত্থ পূজিতো ইমস্মিং বুদ্ধুপ্পাদে একস্মিং কুলগেহে নিব্বত্তো দহৰকালতো পভুতি পূজনীযো সাসনে বদ্ধসদ্ধো পব্বজিত্ৱা সহ পটিসম্ভিদাহি অৰহত্তং পত্তো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো নিব্বুতে লোকনাথম্হীতিআদিমাহ. তত্থ নিব্বুতে লোকনাথম্হীতি সকললোকস্স নাথে পধানভূতে পটিসৰণে চ সত্থৰি খন্ধপৰিনিব্বানেন নিব্বুতে নিব্বুতদীপসিখা ৱিয অদস্সনং গতেতি অত্থো. ধম্মদস্সীনৰাসভেতি চতুসচ্চধম্মং পস্সতীতি ধম্মদস্সী, অথ ৱা সতিপট্ঠানাদিকে সত্ততিংসবোধিপক্খিযধম্মে দস্সনসীলো পস্সনসীলোতি ধম্মদস্সী, নৰানং আসভো পৱৰো উত্তমোতি নৰাসভো, ধম্মদস্সী চ সো নৰাসভো চেতি ধম্মদস্সীনৰাসভো, তস্মিং ধম্মদস্সীনৰাসভে. আৰোপেসিং ধজং থম্ভন্তি চেতিযমাড়কে থম্ভং নিখনিত্ৱা তত্থ ধজং আৰোপেসিং বন্ধিত্ৱা ঠপেসিন্তি অত্থো.

৬. নিস্সেণিং মাপযিত্ৱানাতি নিস্সায তং ইণন্তি গচ্ছন্তি আৰোহন্তি উপৰীতি নিস্সেণি, তং নিস্সেণিং মাপযিত্ৱা কাৰেত্ৱা বন্ধিত্ৱা থূপসেট্ঠং সমাৰুহিন্তি সম্বন্ধো. জাতিপুপ্ফং গহেত্ৱানাতি জাযমানমেৱ জনানং সুন্দৰং মনং কৰোতীতি জাতিসুমনং, জাতিসুমনমেৱ পুপ্ফং ‘‘জাতিসুমনপুপ্ফ’’ন্তি ৱত্তব্বে গাথাবন্ধসুখত্থং সুমনসদ্দস্স লোপং কত্ৱা ‘‘জাতিপুপ্ফ’’ন্তি ৱুত্তং, তং জাতিসুমনপুপ্ফং গহেত্ৱা গন্থিত্ৱা থূপম্হি আৰোপযিং, আৰোপেত্ৱা পূজেসিন্তি অত্থো. সেসং সুৱিঞ্ঞেয্যমেৱাতি.

থম্ভাৰোপকত্থেৰঅপদানৱণ্ণনা সমত্তা.

৩. ৱেদিকাৰকত্থেৰঅপদানৱণ্ণনা

নিব্বুতে লোকনাথম্হীতিআদিকং আযস্মতো ৱেদিকাৰকত্থেৰস্স অপদানং. অযম্পি পুৰিমজিনৱৰেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পিযদস্সিস্স ভগৱতো কালে ৱিভৱসম্পন্নে একস্মিং কুলে নিব্বত্তো ৱিঞ্ঞুতং পত্ৱা ঘৰাৱাসং সণ্ঠপেত্ৱা নিব্বুতে সত্থৰি পসন্নো তস্স চেতিযে ৱলযং কাৰেসি, সত্তহি ৰতনেহি পৰিপূৰেত্ৱা মহাপূজং কাৰেসি. সো তেন পুঞ্ঞেন দেৱমনুস্সেসু সংসৰন্তো অনেকেসু জাতিসতসহস্সেসু পূজনীযো মহদ্ধনো মহাভোগো উভযসুখং অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱিভৱসম্পন্নো পব্বজিত্ৱা ৱাযমন্তো নচিৰস্সেৱ অৰহা অহোসি.

১০. সো একদিৱসং অত্তনো পুব্বে কতকুসলং সৰিত্ৱা সোমনস্সজাতো পুব্বচৰিতাপদানং পকাসেন্তো নিব্বুতে লোকনাথম্হীতিআদিমাহ. তং হেট্ঠা ৱুত্তত্থমেৱ. পিযদস্সীনৰুত্তমেতি পিযং সোমনস্সাকাৰং দস্সনং যস্স সো পিযদস্সী, আৰোহপৰিণাহদ্ৱত্তিংসমহাপুৰিসলক্খণঅসীতানুব্যঞ্জনব্যামপ্পভামণ্ডলেহি সাধু মহাজনপ্পসাদং জনযনাকাৰদস্সনোতি অত্থো. নৰানং উত্তমোতি নৰুত্তমো, পিযদস্সী চ সো নৰুত্তমো চেতি পিযদস্সীনৰুত্তমো, তস্মিং পিযদস্সীনৰুত্তমে নিব্বুতে ধাতুগব্ভম্হি মুত্তৱেদিং অহং অকাসিন্তি সম্বন্ধো. পুপ্ফাধাৰত্থায পৰিযোসানে ৱেদিকাৱলযং অকাসিন্তি অত্থো.

১১. মণীহি পৰিৱাৰেত্ৱাতি মণতি জোততি পভাসতীতি মণি, অথ ৱা জনানং মনং পূৰেন্তো সোমনস্সং কৰোন্তো ইতো গতো পৱত্তোতি মণি, জাতিৰঙ্গমণিৱেড়ুৰিযমণিআদীহি অনেকেহি মণীহি কতৱেদিকাৱলযং পৰিৱাৰেত্ৱা উত্তমং মহাপূজং অকাসিন্তি অত্থো. সেসং উত্তানত্থমেৱাতি.

ৱেদিকাৰকত্থেৰঅপদানৱণ্ণনা সমত্তা.

৪. সপৰিৱাৰিযত্থেৰঅপদানৱণ্ণনা

পদুমুত্তৰো নাম জিনোতিআদিকং আযস্মতো সপৰিৱাৰিযত্থেৰস্স অপদানং. অযম্পি পুৰিমবুদ্ধেসু কতাধিকাৰো অনেকাসু জাতীসু ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে কুলগেহে নিব্বত্তো ৱিঞ্ঞুতং পত্তো মহদ্ধনো মহাভোগো অহোসি. অথ পদুমুত্তৰে ভগৱতি পৰিনিব্বুতে মহাজনো তস্স ধাতুং নিদহিত্ৱা মহন্তং চেতিযং কাৰেত্ৱা পূজেসি. তস্মিং কালে অযং উপাসকো তস্সুপৰি চন্দনসাৰেন চেতিযঘৰং কৰিত্ৱা মহাপূজং অকাসি. সো তেনেৱ পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱুদ্ধিমন্ৱায কুসলং কত্ৱা সদ্ধায সাসনে পব্বজিত্ৱা নচিৰস্সেৱ অৰহা অহোসি.

১৫-৮. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পদুমুত্তৰো নাম জিনোতিআদিমাহ. তত্থ ওমত্তন্তি লামকভাৱং নীচভাৱং দুক্খিতভাৱং ৱা ন পস্সামি ন জানামি, ন দিট্ঠপুব্বো মযা নীচভাৱোতি অত্থো. সেসং পাকটমেৱাতি.

সপৰিৱাৰিযত্থেৰঅপদানৱণ্ণনা সমত্তা.

৫. উমাপুপ্ফিযত্থেৰঅপদানৱণ্ণনা

নিব্বুতে লোকমহিতেতিআদিকং আযস্মতো উমাপুপ্ফিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে কুলগেহে নিব্বত্তো ৱুদ্ধিপ্পত্তো ঘৰাৱাসং সণ্ঠপেত্ৱা ৱসন্তো নিব্বুতস্স ভগৱতো চেতিযমহে ৱত্তমানে ইন্দনীলমণিৱণ্ণং উমাপুপ্ফং গহেত্ৱা পূজেসি. সো তেন পুঞ্ঞেন সুগতীসুযেৱ সংসৰন্তো দিব্বমানুসসম্পত্তিযো অনুভৱিত্ৱা উপ্পন্নুপ্পন্নভৱে বহুলং নীলৱণ্ণো জাতিসম্পন্নো ৱিভৱসম্পন্নো অহোসি. সো ইমস্মিং বুদ্ধুপ্পাদে ৱিভৱসম্পন্নে একস্মিং কুলগেহে নিব্বত্তো ৱিঞ্ঞুতং পত্ৱা সদ্ধাজাতো পব্বজিতো নচিৰস্সেৱ অৰহত্তং পাপুণি.

২১. সো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো নিব্বুতে লোকমহিতেতিআদি ৱুত্তং. তত্থ লোকমহিতেতি লোকেহি মহিতো পূজিতোতি লোকমহিতো, তস্মিং লোকমহিতে সিদ্ধত্থম্হি ভগৱতি পৰিনিব্বুতেতি সম্বন্ধো. আহুতীনংপটিগ্গহেতি আহুতিনো ৱুচ্চন্তি পূজাসক্কাৰা, তেসং আহুতীনং পটিগ্গহেতুং অৰহতীতি আহুতীনংপটিগ্গহো, অলুত্তকিতন্তসমাসো, তস্মিং আহুতীনংপটিগ্গহে ভগৱতি পৰিনিব্বুতেতি অত্থো.

২২. উমাপুপ্ফন্তি উদ্ধমুদ্ধং নীলপভং মুঞ্চমানং পুপ্ফতি ৱিকসতীতি উমাপুপ্ফং, তং উমাপুপ্ফং গহেত্ৱা চেতিযে পূজং অকাসিন্তি অত্থো. সেসং উত্তানত্থমেৱাতি.

উমাপুপ্ফিযত্থেৰঅপদানৱণ্ণনা সমত্তা.

৬. অনুলেপদাযকত্থেৰঅপদানৱণ্ণনা

অনোমদস্সীমুনিনোতিআদিকং আযস্মতো অনুলেপদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো অনোমদস্সিস্স ভগৱতো কালে কুলগেহে নিব্বত্তো মহদ্ধনো মহাভোগো তস্স ভগৱতো বোধিৰুক্খস্স ৱেদিকাৱলযং কাৰেত্ৱা সুধাকম্মঞ্চ কাৰেত্ৱা ৱালুকসন্থৰণং দদ্দড়্হমানং ৰজতৱিমানমিৱ কাৰেসি. সো তেন পুঞ্ঞেন সুখপ্পত্তো উপ্পন্নুপ্পন্নভৱে ৰজতৱিমানৰজতগেহৰজতপাসাদেসু সুখমনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্ৱা সত্থৰি পসন্নো পব্বজিত্ৱা ৱিপস্সনমনুযুত্তো নচিৰস্সেৱ অৰহা অহোসি.

২৬. সো অপৰভাগে ‘‘কিং নু খো কুসলং কত্ৱা মযা অযং ৱিসেসো অধিগতো’’তি পুব্বেনিৱাসানুস্সতিঞাণেন পটিপাটিযা অনুস্সৰিত্ৱা পুব্বে কতকুসলং জানিত্ৱা সোমনস্সজাতো পুব্বচৰিতাপদানং পকাসেন্তো অনোমদস্সীমুনিনোতিআদিমাহ. তত্থ অনোমং অলামকং দস্সনং দস্সনীযং সৰীৰং যস্স সো অনোমদস্সী, দ্ৱত্তিংসমহাপুৰিসলক্খণঅসীতানুব্যঞ্জনব্যামপ্পভাসমুজ্জলৱিৰাজিতসৰীৰত্তা সুন্দৰদস্সনোতি অত্থো. সুধায পিণ্ডং দত্ৱানাতি বোধিঘৰে ৱেদিকাৱলযং কাৰেত্ৱা সকলে বোধিঘৰে সুধালেপনং কত্ৱাতি অত্থো. পাণিকম্মং অকাসহন্তি সাৰকট্ঠেন ফলকপাণিযো কত্ৱা তাহি পাণীহি মট্ঠকম্মং অকাসিন্তি অত্থো. সেসং সুৱিঞ্ঞেয্যমেৱাতি.

অনুলেপদাযকত্থেৰঅপদানৱণ্ণনা সমত্তা.

৭. মগ্গদাযকত্থেৰঅপদানৱণ্ণনা

উত্তৰিত্ৱান নদিকন্তিআদিকং আযস্মতো মগ্গদাযকত্থেৰস্স অপদানং. অযম্পি পুৰিমজিনৱৰেসু কতাধিকাৰো অনেকেসু ভৱেসু নিব্বানাধিগমত্থায পুঞ্ঞানি উপচিনন্তো সিদ্ধত্থস্স ভগৱতো কালে লোকসম্মতে কুলে নিব্বত্তো ৱুদ্ধিমন্ৱায ঘৰাৱাসং ৱসন্তো একদিৱসং ভগৱন্তং একং নদিং উত্তৰিত্ৱা ৱনন্তৰং গচ্ছন্তং দিস্ৱা পসন্নমানসো ‘‘ইদানি মযা ভগৱতো মগ্গং সমং কাতুং ৱট্টতী’’তি চিন্তেত্ৱা কুদালঞ্চ পিটকঞ্চ আদায ভগৱতো গমনমগ্গং সমং কত্ৱা ৱালুকং ওকিৰিত্ৱা ভগৱতো পাদে ৱন্দিত্ৱা, ‘‘ভন্তে, ইমিনা মগ্গালঙ্কাৰকৰণেন নিব্বত্তনিব্বত্তট্ঠানে পূজনীযো ভৱেয্যং, নিব্বানঞ্চ পাপুণেয্য’’ন্তি পত্থনং অকাসি. ভগৱা ‘‘যথাধিপ্পাযং সমিজ্ঝতূ’’তি অনুমোদনং ৱত্ৱা পক্কামি.

৩২-৩. সো তেন পুঞ্ঞেন দেৱমনুস্সেসু সংসৰন্তো সব্বত্থ পূজিতো অহোসি. ইমস্মিং পন বুদ্ধুপ্পাদে পাকটে একস্মিং কুলে নিব্বত্তো সত্থৰি পসন্নো পব্বজিত্ৱা ৱিপস্সনং ৱড্ঢেত্ৱা নচিৰস্সেৱ অৰহত্তং পত্ৱা অত্তনো পুব্বকম্মং পচ্চক্খতো ঞত্ৱা সোমনস্সজাতো পুব্বচৰিতাপদানং পকাসেন্তো উত্তৰিত্ৱান নদিকন্তিআদিমাহ. তত্থ নদতি সদ্দং কৰোতি গচ্ছতীতি নদী, নদীযেৱ নদিকা, তং নদিকং উত্তৰিত্ৱা অতিক্কমিত্ৱাতি অত্থো. কুদালপিটকমাদাযাতি কু ৱুচ্চতি পথৱী, তং ৱিদালনে পদালনে ছিন্দনে অলন্তি কুদালং, পিটকং ৱুচ্চতি পংসুৱালিকাদিৱাহকং, তালপণ্ণৱেত্তলতাদীহি কতভাজনং, কুদালঞ্চ পিটকঞ্চ কুদালপিটকং, তং আদায গহেত্ৱাতি অত্থো. সেসং উত্তানত্থমেৱাতি.

মগ্গদাযকত্থেৰঅপদানৱণ্ণনা সমত্তা.

৮. ফলকদাযকত্থেৰঅপদানৱণ্ণনা

যানকাৰো পুৰে আসিন্তিআদিকং আযস্মতো ফলকদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো অনেকেসু অত্তভাৱেসু কতপুঞ্ঞসম্ভাৰো সিদ্ধত্থস্স ভগৱতো কালে ৱড্ঢকিকুলে নিব্বত্তো ৰতনত্তযে পসন্নো চন্দনেন আলম্বনফলকং কত্ৱা ভগৱতো অদাসি. ভগৱা তস্সানুমোদনং অকাসি.

৩৭. সো তেন পুঞ্ঞেন দেৱমনুস্সেসু সংসৰন্তো সব্বত্থ কালে চিত্তসুখপীণিতো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্ৱা সত্থু ধম্মদেসনং সুত্ৱা সঞ্জাতপ্পসাদো পব্বজিত্ৱা ৱাযমন্তো নচিৰস্সেৱ সহ পটিসম্ভিদাহি অৰহত্তং পত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো যানকাৰো পুৰে আসিন্তিআদিমাহ. তত্থ যানকাৰোতি যন্তি এতেন ইচ্ছিতিচ্ছিতট্ঠানন্তি যানং, তং কৰোতীতি যানকাৰো, পুৰে বুদ্ধদস্সনসমযে অহং যানকাৰো আসিং অহোসিন্তি অত্থো. চন্দনং ফলকং কত্ৱাতি চন্দতি পৰিড়াহং ৱূপসমেতীতি চন্দনং. অথ ৱা চন্দন্তি সুগন্ধৱাসনত্থং সৰীৰং ৱিলিম্পন্তি এতেনাতি চন্দনং, তং আলম্বনফলকং কত্ৱা. লোকবন্ধুনোতি সকললোকস্স বন্ধু ঞাতিভূতোতি লোকবন্ধু, তস্স লোকবন্ধুনো সত্থুস্স অদাসিন্তি অত্থো. সেসং সুৱিঞ্ঞেয্যমেৱাতি.

ফলকদাযকত্থেৰঅপদানৱণ্ণনা সমত্তা.

৯. ৱটংসকিযত্থেৰঅপদানৱণ্ণনা

সুমেধো নাম নামেনাতিআদিকং আযস্মতো ৱটংসকিযত্থেৰস্স অপদানং. অযম্পি পুৰিমমুনিন্দেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সুমেধস্স ভগৱতো কালে কুলগেহে নিব্বত্তো ৱিঞ্ঞুতং পত্তো ঘৰাৱাসং সণ্ঠপেত্ৱা তত্থ আদীনৱং দিস্ৱা গেহং পহায তাপসপব্বজ্জং পব্বজিত্ৱা মহাৱনে ৱিহাসি. তস্মিং সমযে সুমেধো ভগৱা ৱিৱেককামতায তং ৱনং সম্পাপুণি. অথ সো তাপসো ভগৱন্তং দিস্ৱা পসন্নমানসো ৱিকসিতং সড়লপুপ্ফং গহেত্ৱা ৱটংসকাকাৰেন গন্থেত্ৱা ভগৱতো পাদমূলে ঠপেত্ৱা পূজেসি. ভগৱা তস্স চিত্তপ্পসাদত্থায অনুমোদনমকাসি. সো তেন পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে ৱিভৱসম্পন্নে কুলে জাতো ৱুদ্ধিমন্ৱায সদ্ধো পসন্নো পব্বজিত্ৱা নচিৰস্সেৱ অৰহা অহোসি.

৪৩. সো অপৰভাগে পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো সুমেধো নাম নামেনাতিআদি ৱুত্তং. ৱিৱেকমনুব্ৰূহন্তোতি জনাকিণ্ণতং পহায জনৱিৱেকং চিত্তৱিৱেকঞ্চ অনুব্ৰূহন্তো ৱড্ঢেন্তো বহুলীকৰোন্তো মহাৱনং অজ্ঝোগাহি পাৱিসীতি অত্থো. সেসং উত্তানত্থমেৱাতি.

ৱটংসকিযত্থেৰঅপদানৱণ্ণনা সমত্তা.

১০. পল্লঙ্কদাযকত্থেৰঅপদানৱণ্ণনা

সুমেধস্স ভগৱতোতিআদিকং আযস্মতো পল্লঙ্কদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো অনেকেসু ভৱেসু নিব্বানাধিগমত্থায কতপুঞ্ঞূপচযো সুমেধস্স ভগৱতো কালে গহপতিকুলে নিব্বত্তো ৱুদ্ধিমন্ৱায মহাভোগসম্পন্নো সত্থৰি পসীদিত্ৱা ধম্মং সুত্ৱা তস্স সত্থুনো সত্তৰতনমযং পল্লঙ্কং কাৰেত্ৱা মহন্তং পূজং অকাসি. সো তেন পুঞ্ঞেন দেৱমনুস্সেসু সংসৰন্তো সব্বত্থ পূজিতো অহোসি. সো অনুক্কমেন ইমস্মিং বুদ্ধুপ্পাদে ৱিভৱসম্পন্নে একস্মিং কুলে নিব্বত্তো ৱিঞ্ঞুতং পত্তো ঘৰাৱাসং সণ্ঠপেত্ৱা সত্থু ধম্মদেসনং সুত্ৱা পসন্নো পব্বজিত্ৱা নচিৰস্সেৱ অৰহত্তং পত্ৱা পুব্বে কতপুঞ্ঞনামেন পল্লঙ্কদাযকত্থেৰোতি পাকটো অহোসি. হেট্ঠা ৱিয উপৰিপি পুব্বে কতপুঞ্ঞনামেন থেৰানং নামানি এৱমেৱ ৱেদিতব্বানি.

৪৭. সো একদিৱসং অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো সুমেধস্স ভগৱতোতিআদিমাহ. পল্লঙ্কো হি মযা দিন্নোতি পল্লঙ্কং ঊৰুবদ্ধাসনং কত্ৱা যত্থ উপৱীসন্তি নিসীদন্তি, সো পল্লঙ্কোতি ৱুচ্চতি, সো পল্লঙ্কো সত্তৰতনমযো মযা দিন্নো পূজিতোতি অত্থো. সউত্তৰসপচ্ছদোতি সহ উত্তৰচ্ছদেন সহ পচ্ছদেন সউত্তৰসপচ্ছদো, উপৰিৱিতানং বন্ধিত্ৱা আসনং উত্তমৱত্থেহি অচ্ছাদেত্ৱাতি অত্থো. সেসং পাকটমেৱাতি.

পল্লঙ্কদাযকত্থেৰঅপদানৱণ্ণনা সমত্তা.

পন্নৰসমৱগ্গৱণ্ণনা সমত্তা.