১৬. বন্ধুজীৱকৱগ্গো

১. বন্ধুজীৱকত্থেৰঅপদানৱণ্ণনা

চন্দংৱ ৱিমলং সুদ্ধন্তিআদিকং আযস্মতো বন্ধুজীৱকত্থেৰস্স অপদানং. অযম্পাযস্মা পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিখিস্স ভগৱতো কালে কুলগেহে নিব্বত্তো ৱিঞ্ঞুতং পত্তো ঘৰাৱাসং সণ্ঠপেত্ৱা ৱসন্তো সিখিস্স ভগৱতো ৰূপকাযসম্পত্তিং দিস্ৱা পসন্নমানসো বন্ধুজীৱকপুপ্ফানি গহেত্ৱা ভগৱতো পাদমূলে পূজেসি. ভগৱা তস্স চিত্তপ্পসাদৱড্ঢনত্থায অনুমোদনমকাসি. সো যাৱতাযুতং ঠত্ৱা তেনেৱ পুঞ্ঞেন দেৱলোকে নিব্বত্তো ছ কামাৱচৰসম্পত্তিযো অনুভৱিত্ৱা মনুস্সেসু চ চক্কৱত্তিআদিসম্পত্তিযো অনুভৱিত্ৱা ইমস্স অম্হাকং সম্মাসম্বুদ্ধস্স উপ্পন্নকালে গহপতিকুলে নিব্বত্তো ৰূপগ্গযসগ্গপ্পত্তো সত্থু ধম্মদেসনং সুত্ৱা সদ্ধাজাতো গেহং পহায পব্বজিতো অৰহত্তং পাপুণি.

১. সো পুব্বেনিৱাসঞাণেন পুব্বে কতকুসলকম্মং অনুস্সৰিত্ৱা সোমনস্সজাতো পুব্বচৰিতাপদানং পকাসেন্তো চন্দংৱ ৱিমলং সুদ্ধন্তিআদিমাহ. তত্থ চন্দংৱ ৱিমলং সুদ্ধন্তি অব্ভা, মহিকা, ধুমো, ৰজো, ৰাহূতি ইমেহি উপক্কিলেসমলেহি ৱিমুত্তং চন্দং ইৱ দিযড্ঢসহস্সুপক্কিলেসমলানং পহীনত্তা ৱিমলং নিক্কিলেসত্তা সুদ্ধং পসন্নং সিখিং সম্বুদ্ধন্তি সম্বন্ধো. কিলেসকদ্দমানং অভাৱেন অনাৱিলং. নন্দীভৱসঙ্খাতায বলৱস্নেহায পৰিসমন্ততো খীণত্তা নন্দীভৱপৰিক্খীণং. তিণ্ণং লোকেতি লোকত্তযতো তিণ্ণং উত্তিণ্ণং অতিক্কন্তং. ৱিসত্তিকন্তি ৱিসত্তিকং ৱুচ্চতি তণ্হা, নিত্তণ্হন্তি অত্থো.

২. নিব্বাপযন্তং জনতন্তি ধম্মৱস্সং ৱস্সন্তো জনতং জনসমূহং কিলেসপৰিড়াহাভাৱেন নিব্বাপযন্তং ৱূপসমেন্তং. সযং সংসাৰতো তিণ্ণং, সব্বসত্তে সংসাৰতো তাৰযন্তং অতিক্কমেন্তং চতুন্নং সচ্চানং মুননতো জাননতো মুনিং সিখিং সম্বুদ্ধন্তি সম্বন্ধো. ৱনস্মিং ঝাযমানন্তি আৰম্মণূপনিজ্ঝানলক্খণূপনিজ্ঝানেহি ঝাযন্তং চিন্তেন্তং চিত্তেন ভাৱেন্তং ৱনমজ্ঝেতি অত্থো. একগ্গং একগ্গচিত্তং সুসমাহিতং সুট্ঠু আৰম্মণে আহিতং ঠপিতচিত্তং সিখিং মুনিং দিস্ৱাতি সম্বন্ধো.

৩. বন্ধুজীৱকপুপ্ফানীতি বন্ধূনং ঞাতীনং জীৱকং জীৱিতনিস্সযং হদযমংসলোহিতং বন্ধুজীৱকং হদযমংসলোহিতসমানৱণ্ণং পুপ্ফং বন্ধুজীৱকপুপ্ফং গহেত্ৱা সিখিনো লোকবন্ধুনো পূজেসিন্তি অত্থো. সেসং উত্তানত্থমেৱাতি.

বন্ধুজীৱকত্থেৰঅপদানৱণ্ণনা সমত্তা.

২. তম্বপুপ্ফিযত্থেৰঅপদানৱণ্ণনা

পৰকম্মাযনে যুত্তোতিআদিকং আযস্মতো তম্বপুপ্ফিযত্থেৰস্স অপদানং. অযম্পি আযস্মা পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পিযদস্সিস্স ভগৱতো কালে কেনচি পুৰে কতেন অকুসলকম্মেন দুগ্গতকুলে নিব্বত্তো ৱুদ্ধিপ্পত্তো পৰেসং কম্মং কত্ৱা ভতিযা জীৱিকং কপ্পেসি. সো এৱং দুক্খেন ৱসন্তো পৰেসং অপৰাধং কত্ৱা মৰণভযেন পলাযিত্ৱা ৱনং পাৱিসি. তত্থ গতট্ঠানে পাটলিবোধিং দিস্ৱা ৱন্দিত্ৱা সম্মজ্জিত্ৱা একস্মিং ৰুক্খে তম্বৱণ্ণং পুপ্ফং দিস্ৱা তং সব্বং কণ্ণিকে ওচিনিত্ৱা বোধিপূজং অকাসি. তত্থ চিত্তং পসাদেত্ৱা ৱন্দিত্ৱা পল্লঙ্কমাভুজিত্ৱা নিসীদি. তস্মিং খণে তে মনুস্সা পদানুপদিকং অনুবন্ধিত্ৱা তত্থ অগমংসু. সো তে দিস্ৱা বোধিং আৱজ্জেন্তোৱ পলাযিত্ৱা ভযানকে গীৰিদুগ্গপপাতে পতিত্ৱা মৰি.

৭. সো বোধিপূজায অনুস্সৰিতত্তা তেনেৱ পীতিসোমনস্সেন তাৱতিংসাদীসু উপপন্নো ছ কামাৱচৰসম্পত্তিং অনুভৱিত্ৱা মনুস্সেসু চ চক্কৱত্তিআদিসম্পত্তিং অনুভৱিত্ৱা ইমস্মিং বুদ্ধুপ্পাদে ৱিভৱসম্পন্নে কুলে নিব্বত্তো ৱুদ্ধিপ্পত্তো সত্থু ধম্মদেসনং সুত্ৱা পসন্নমানসো পব্বজিত্ৱা নচিৰস্সেৱ অৰহা হুত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পৰকম্মাযনে যুত্তোতিআদিমাহ. তত্থ পৰেসং কম্মানি পৰকম্মানি, পৰকম্মানং আযনে কৰণে ৱাহনে ধাৰণে যুত্তো যোজিতো অহোসিন্তি অত্থো. সেসং পাকটমেৱাতি.

তম্বপুপ্ফিযত্থেৰঅপদানৱণ্ণনা সমত্তা.

৩. ৱীথিসম্মজ্জকত্থেৰঅপদানৱণ্ণনা

উদেন্তং সতৰংসিং ৱাতিআদিকং আযস্মতো ৱীথিসম্মজ্জকত্থেৰস্স অপদানং. অযম্পি পুৰিমবুদ্ধেসু কতাধিকাৰো অনেকেসু জাতিসতেসু কতপুঞ্ঞসঞ্চযো সিখিস্স ভগৱতো কালে কুলগেহে নিব্বত্তো ঘৰাৱাসং ৱসন্তো নগৰৱাসীহি সদ্ধিং ৱীথিং সজ্জেত্ৱা নীযমানং ভগৱন্তং দিস্ৱা পসন্নমানসো ৱীথিং সমং কত্ৱা ধজং তত্থ উস্সাপেসি.

১৫. সো তেনেৱ পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে একস্মিং কুলে নিব্বত্তো ৱিঞ্ঞুতং পত্ৱা সত্থু ধম্মদেসনং সুত্ৱা পটিলদ্ধসদ্ধো বহুমানহদযো পব্বজিত্ৱা লদ্ধূপসম্পদো নচিৰস্সেৱ অৰহা হুত্ৱা অত্তনো পুব্বকম্মং অনুস্সৰন্তো পচ্চক্খতো জানিত্ৱা পুব্বচৰিতাপদানং পকাসেন্তো উদেন্তং সতৰংসিং ৱাতিআদিমাহ. তত্থ উদেন্তং উগ্গচ্ছন্তং সতৰংসিং সতপভং. সতৰংসীতি দেসনাসীসমত্তং, অনেকসতসহস্সপভং সূৰিযং ইৱাতি অত্থো. পীতৰংসিংৱ ভাণুমন্তি পীতৰংসিং সংকুচিতপভং ভাণুমং পভাৱন্তং চন্দমণ্ডলং ইৱ সম্বুদ্ধং দিস্ৱাতি অত্থো. সেসং সুৱিঞ্ঞেয্যমেৱাতি.

ৱীথিসম্মজ্জকত্থেৰঅপদানৱণ্ণনা সমত্তা.

৪. কক্কাৰুপুপ্ফপূজকত্থেৰঅপদানৱণ্ণনা

দেৱপুত্তো অহং সন্তোতিআদিকং আযস্মতো কক্কাৰুপুপ্ফপূজকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে কতপুঞ্ঞসঞ্চযো সিখিস্স ভগৱতো কালে ভুম্মট্ঠকদেৱপুত্তো হুত্ৱা নিব্বত্তো সিখিং সম্মাসম্বুদ্ধং দিস্ৱা দিব্বকক্কাৰুপুপ্ফং গহেত্ৱা পূজেসি.

২১. সো তেন পুঞ্ঞেন দেৱমনুস্সেসু সংসৰন্তো একতিংসকপ্পব্ভন্তৰে উভযসুখং অনুভৱিত্ৱা ইমস্মিং বুদ্ধুপ্পাদে সাৱত্থিযং কুলগেহে নিব্বত্তো ৱুদ্ধিমন্ৱায সত্থৰি পসন্নো পব্বজিত্ৱা নচিৰস্সেৱ অৰহা হুত্ৱা অত্তনো পুব্বকম্মং পচ্চক্খতো ঞত্ৱা সোমনস্সজাতো পুব্বচৰিতাপদানং পকাসেন্তো দেৱপুত্তো অহং সন্তোতিআদিমাহ. তত্থ দিব্বন্তি কীড়ন্তি পঞ্চহি দিব্বেহি কামগুণেহীতি দেৱা, দেৱানং পুত্তো, দেৱো এৱ ৱা পুত্তো দেৱপুত্তো, অহং দেৱপুত্তো সন্তো ৱিজ্জমানো দিব্বং কক্কাৰুপুপ্ফং পগ্গয্হ পকাৰেন, গহেত্ৱা সিখিস্স ভগৱতো অভিৰোপযিং পূজেসিন্তি অত্থো. সেসং উত্তানত্থমেৱাতি.

কক্কাৰুপুপ্ফপূজকত্থেৰঅপদানৱণ্ণনা সমত্তা.

৫. মন্দাৰৱপুপ্ফপূজকত্থেৰঅপদানৱণ্ণনা

দেৱপুত্তো অহং সন্তোতিআদিকং আযস্মতো মন্দাৰৱপুপ্ফপূজকত্থেৰস্স অপদানং. অযম্পি থেৰো পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিখিস্স ভগৱতো কালে ভুম্মট্ঠকদেৱপুত্তো হুত্ৱা নিব্বত্তো সিখিং ভগৱন্তং দিস্ৱা পসন্নমানসো দিব্বমন্দাৰৱপুপ্ফেহি পূজেসি.

২৫. সো তেন পুঞ্ঞেনাতিআদিকং সব্বং অনন্তৰত্থেৰস্স অপদানৱণ্ণনায ৱুত্তনযেনেৱ ৱেদিতব্বন্তি.

মন্দাৰৱপুপ্ফপূজকত্থেৰঅপদানৱণ্ণনা সমত্তা.

৬. কদম্বপুপ্ফিযত্থেৰঅপদানৱণ্ণনা

হিমৱন্তস্সাৱিদূৰেতিআদিকং আযস্মতো কদম্বপুপ্ফিযত্থেৰস্স অপদানং. অযম্পি পুৰিমজিনৱৰেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সম্মাসম্বুদ্ধসুঞ্ঞে লোকে একস্মিং কুলে নিব্বত্তো ৱুদ্ধিমন্ৱায ঘৰাৱাসং ৱসন্তো তত্থ আদীনৱং দিস্ৱা ঘৰাৱাসং পহায তাপসপব্বজ্জং পব্বজিত্ৱা হিমৱন্তসমীপে কুক্কুটে নাম পব্বতে অস্সমং কত্ৱা ৱিহাসি. সো তত্থ সত্ত পচ্চেকবুদ্ধে দিস্ৱা পসন্নমানসো পুপ্ফিতং কদম্বপুপ্ফং ওচিনিত্ৱা তে পচ্চেকবুদ্ধে পূজেসি. তেপি ‘‘ইচ্ছিতং পত্থিত’’ন্তিআদিনা অনুমোদনং অকংসু.

৩০. সো তেন পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে সাৱত্থিযং কুলগেহে নিব্বত্তো ৱুদ্ধিমন্ৱায সত্থু ধম্মদেসনং সুত্ৱা পটিলদ্ধসদ্ধো পব্বজিত্ৱা নচিৰস্সেৱ অৰহা হুত্ৱা পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো হিমৱন্তস্সাৱিদূৰেতিআদিমাহ. তং ৱুত্তত্থমেৱ. কুক্কুটো নাম পব্বতোতি তস্স উভোসু পস্সেসু কুক্কুটচূড়াকাৰেন পব্বতকূটানং ৱিজ্জমানত্তা কুক্কুটোতি সঙ্খং গতো. পকাৰেন তিৰো হুত্ৱা পতিট্ঠহতীতি পব্বতো. তম্হি পব্বতপাদম্হীতি তস্মিং পব্বতসমীপে. সত্ত বুদ্ধা ৱসন্তীতি সত্ত পচ্চেকবুদ্ধা তস্মিং কুক্কুটপব্বতপাদে পণ্ণসালাযং ৱসন্তীতি অত্থো.

৩১. দীপৰাজংৱ উগ্গতন্তি দীপানং ৰাজা দীপৰাজা, সব্বেসং দীপানং জলমানানং তাৰকানং ৰাজা চন্দোতি অত্থো. অথ ৱা সব্বেসু জম্বুদীপপুব্বৱিদেহঅপৰগোযানউত্তৰকুৰুসঙ্খাতেসু চতূসু দীপেসু দ্ৱিসহস্সপৰিত্তদীপেসু চ ৰাজা আলোকফৰণতো চন্দো দীপৰাজাতি ৱুচ্চতি, তং নভে উগ্গতং চন্দং ইৱ পুপ্ফিতং ফুল্লিতং কদম্বৰুক্খং দিস্ৱা ততো পুপ্ফং ওচিনিত্ৱা উভোহি হত্থেহি পগ্গয্হ পকাৰেন গহেত্ৱা সত্ত পচ্চেকবুদ্ধে সমোকিৰিং সুট্ঠু ওকিৰিং, আদৰেন পূজেসিন্তি অত্থো. সেসং উত্তানত্থমেৱাতি.

কদম্বপুপ্ফিযত্থেৰঅপদানৱণ্ণনা সমত্তা.

৭. তিণসূলকত্থেৰঅপদানৱণ্ণনা

হিমৱন্তস্সাৱিদূৰেতিআদিকং আযস্মতো তিণসূলকত্থেৰস্স অপদানং. অযম্পি থেৰো পুৰিমজিনৱৰেসু কতপুঞ্ঞসম্ভাৰো উপ্পন্নুপ্পন্নভৱে কুসলানি উপচিনন্তো সিখিস্স ভগৱতো কালে কুলগেহে নিব্বত্তো ঘৰাৱাসং সণ্ঠপেত্ৱা তত্থ দোসং দিস্ৱা তং পহায তাপসপব্বজ্জং পব্বজিত্ৱা ৱসন্তো হিমৱন্তসমীপে ভূতগণে নাম পব্বতে ৱসন্তং একতং ৱিৱেকমনুব্ৰূহন্তং সিখিং সম্বুদ্ধং দিস্ৱা পসন্নমানসো তিণসূলপুপ্ফং গহেত্ৱা পাদমূলে পূজেসি. বুদ্ধোপি তস্স অনুমোদনং অকাসি.

৩৫. সো তেন পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে সাৱত্থিযং ৱিভৱসম্পন্নে একস্মিং কুলে নিব্বত্তো ৱুদ্ধিমন্ৱায সাসনে পসন্নো পব্বজিত্ৱা উপনিস্সযসম্পন্নত্তা নচিৰস্সেৱ অৰহত্তং পাপুণিত্ৱা পুব্বকম্মং সৰিত্ৱা সোমনস্সপ্পত্তো পুব্বচৰিতাপদানং পকাসেন্তো হিমৱন্তস্সাৱিদূৰেতিআদিমাহ. ভূতগণো নাম পব্বতোতি ভূতগণানং দেৱযক্খসমূহানং আৱাসভূতত্তা ভৱনসদিসত্তা অৱিৰূড়্হভাৱেন পৱত্তত্তা চ ভূতগণো নাম পব্বতো, তস্মিং একো অদুতিযো জিনো জিতমাৰো বুদ্ধো ৱসতে দিব্বব্ৰহ্মঅৰিযইৰিযাপথৱিহাৰেহি ৱিহৰতীতি অত্থো.

৩৬. একূনসতসহস্সং, কপ্পং ন ৱিনিপাতিকোতি তেন তিণসূলপুপ্ফপূজাকৰণফলেন নিৰন্তৰং একূনসতসহস্সকপ্পানং অৱিনিপাতকো চতুৰাপাযৱিনিমুত্তো সগ্গসম্পত্তিভৱমেৱ উপপন্নোতি অত্থো. সেসং সুৱিঞ্ঞেয্যমেৱাতি.

তিণসূলকত্থেৰঅপদানৱণ্ণনা সমত্তা.

৮. নাগপুপ্ফিযত্থেৰঅপদানৱণ্ণনা

সুৱচ্ছো নাম নামেনাতিআদিকং আযস্মতো নাগপুপ্ফিযত্থেৰস্স অপদানং. অযম্পি থেৰো পুৰিমজিননিসভেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰভগৱতো কালে ব্ৰাহ্মণকুলে নিব্বত্তো ৱুদ্ধিপ্পত্তো ৱেদত্তযাদীসু সকসিপ্পেসু নিপ্ফত্তিং পত্ৱা তত্থ সাৰং অদিস্ৱা হিমৱন্তং পৱিসিত্ৱা তাপসপব্বজ্জং পব্বজিত্ৱা ঝানসমাপত্তিসুখেন ৱীতিনামেসি. তস্মিং সমযে পদুমুত্তৰো ভগৱা তস্সানুকম্পায তত্থ অগমাসি. সো তাপসো তং ভগৱন্তং দিস্ৱা লক্খণসত্থেসু ছেকত্তা ভগৱতো লক্খণৰূপসম্পত্তিযা পসন্নো ৱন্দিত্ৱা অঞ্জলিং পগ্গয্হ অট্ঠাসি. আকাসতো অনোতিণ্ণত্তা পূজাসক্কাৰে অকতেযেৱ আকাসেনেৱ পক্কামি. অথ সো তাপসো সসিস্সো নাগপুপ্ফং ওচিনিত্ৱা তেন পুপ্ফেন ভগৱতো গতদিসাভাগমগ্গং পূজেসি.

৩৯. সো তেন পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱন্তো সব্বত্থ পূজিতো ইমস্মিং বুদ্ধুপ্পাদে সাৱত্থিযং কুলগেহে নিব্বত্তো ৱুদ্ধিমন্ৱায সদ্ধাসম্পন্নো পব্বজিত্ৱা ৱত্তপটিপত্তিযা সাসনং সোভযমানো নচিৰস্সেৱ অৰহা হুত্ৱা ‘‘কেন নু খো কুসলকম্মেন মযা অযং লোকুত্তৰসম্পত্তি লদ্ধা’’তি অতীতকম্মং সৰন্তো পুব্বকম্মং পচ্চক্খতো ঞত্ৱা সঞ্জাতসোমনস্সো পুব্বচৰিতাপদানং পকাসেন্তো সুৱচ্ছো নাম নামেনাতিআদিমাহ. তত্থ ৱচ্ছগোত্তে জাতত্তা ৱচ্ছো, সুন্দৰো চ সো ৱচ্ছো চেতি সুৱচ্ছো. নামেন সুৱচ্ছো নাম ব্ৰাহ্মণো মন্তপাৰগূ ৱেদত্তযাদিসকলমন্তসত্থে কোটিপ্পত্তোতি অত্থো. সেসং হেট্ঠা ৱুত্তনযত্তা উত্তানত্থমেৱাতি.

নাগপুপ্ফিযত্থেৰঅপদানৱণ্ণনা সমত্তা.

৯. পুন্নাগপুপ্ফিযত্থেৰঅপদানৱণ্ণনা

কাননং ৱনমোগয্হাতিআদিকং আযস্মতো পুন্নাগপুপ্ফিযত্থেৰস্স অপদানং. অযম্পি পুৰিমজিনৱৰেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ফুস্সস্স ভগৱতো কালে নেসাদকুলে নিব্বত্তো মহাৱনং পৱিট্ঠো তত্থ সুপুপ্ফিতপুন্নাগপুপ্ফং দিস্ৱা হেতুসম্পন্নত্তা বুদ্ধাৰম্মণপীতিৱসেন ভগৱন্তং সৰিত্ৱা তং পুপ্ফং সহ কণ্ণিকাহি ওচিনিত্ৱা ৱালুকাহি চেতিযং কত্ৱা পূজেসি.

৪৬. সো তেন পুঞ্ঞেন দ্ৱেনৱুতিকপ্পে নিৰন্তৰং দেৱমনুস্সসম্পত্তিযোযেৱ অনুভৱিত্ৱা ইমস্মিং বুদ্ধুপ্পাদে সাৱত্থিযং ৱিভৱসম্পন্নে কুলে নিব্বত্তো ৱুদ্ধিমন্ৱায পুব্বৱাসনাবলেন সাসনে পসন্নো পব্বজিত্ৱা ৱাযমন্তো নচিৰস্সেৱ অৰহা হুত্ৱা পুব্বে কতকুসলং সৰিত্ৱা সোমনস্সজাতো পুব্বচৰিতাপদানং পকাসেন্তো কাননং ৱনমোগয্হাতিআদিমাহ. তং সব্বং হেট্ঠা ৱুত্তত্তা উত্তানত্থমেৱাতি.

পুন্নাগপুপ্ফিযত্থেৰঅপদানৱণ্ণনা সমত্তা.

১০. কুমুদদাযকত্থেৰঅপদানৱণ্ণনা

হিমৱন্তস্সাৱিদূৰেতিআদিকং আযস্মতো কুমুদদাযকত্থেৰস্স অপদানং. অযম্পি থেৰো পুৰিমবুদ্ধেসু কতাধিকাৰো অনেকেসু ভৱেসু ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে হিমৱন্তস্স আসন্নে মহন্তে জাতস্সৰে কুকুত্থো নাম পক্খী হুত্ৱা নিব্বত্তো কেনচি অকুসলেন পক্খী সমানোপি পুব্বে কতসম্ভাৰেন বুদ্ধিসম্পন্নো পুঞ্ঞাপুঞ্ঞেসু ছেকো সীলৱা পাণগোচৰতো পটিৱিৰতো অহোসি. তস্মিং সমযে পদুমুত্তৰো ভগৱা আকাসেনাগন্ত্ৱা তস্স সমীপে চঙ্কমতি. অথ সো সকুণো ভগৱন্তং দিস্ৱা পসন্নচিত্তো কুমুদপুপ্ফং ডংসিত্ৱা ভগৱতো পাদমূলে পূজেসি. ভগৱা তস্স সোমনস্সুপ্পাদনত্থং পটিগ্গহেত্ৱা অনুমোদনমকাসি.

৫১. সো তেন পুঞ্ঞেন দেৱমনুস্সেসু উভযসম্পত্তিসুখং অনুভৱিত্ৱা ইমস্মিং বুদ্ধুপ্পাদে সাৱত্থিযং অঞ্ঞতৰস্মিং কুলে নিব্বত্তো ৱুদ্ধিমন্ৱায মহদ্ধনো মহাভোগো ৰতনত্তযে পসন্নো সত্থু ধম্মদেসনং সুত্ৱা পটিলদ্ধসদ্ধো পব্বজিত্ৱা নচিৰস্সেৱ অৰহা হুত্ৱা অত্তনো পুব্বকম্মং পচ্চক্খতো ঞত্ৱা সোমনস্সজাতো পুব্বচৰিতাপদানং পকাসেন্তো হিমৱন্তস্সাৱিদূৰেতিআদিমাহ. পদুমুপ্পলসঞ্ছন্নোতি এত্থ সতপত্তেহি সম্পুণ্ণো সেতপদুমো চ তীণি নীলৰত্তসেতুপ্পলানি চ পদুমুপ্পলানি তেহি সঞ্ছন্নো গহনীভূতো সম্পুণ্ণো মহাজাতস্সৰো অহূতি সম্বন্ধো. পুণ্ডৰীকসমোত্থটোতি পুণ্ডৰীকেহি ৰত্তপদুমেহি ওত্থটো সম্পুণ্ণোতি অত্থো. সেসং সুৱিঞ্ঞেয্যমেৱাতি.

কুমুদদাযকত্থেৰঅপদানৱণ্ণনা সমত্তা.

সোড়সমৱগ্গৱণ্ণনা সমত্তা.