১৭. সুপাৰিচৰিযৱগ্গো

১. সুপাৰিচৰিযত্থেৰঅপদানৱণ্ণনা

পদুমো নাম নামেনাতিআদিকং আযস্মতো সুপাৰিচৰিযত্থেৰস্স অপদানং. অযম্পি পুৰিমমুনিপুঙ্গৱেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে যক্খযোনিযং নিব্বত্তো হিমৱতি যক্খসমাগমং গতো ভগৱতো দেৱযক্খগন্ধব্বনাগানং ধম্মদেসনং সুত্ৱা পসন্নমানসো উভো হত্থে আভুজিত্ৱা অপ্ফোটেসি নমস্সি চ. সো তেন পুঞ্ঞেন ততো চুতো উপৰি দেৱলোকে উপ্পন্নো তত্থ দিব্বসুখং অনুভৱিত্ৱা মনুস্সেসু চ চক্কৱতিআদিসম্পত্তিযো অনুভৱিত্ৱা ইমস্মিং বুদ্ধুপ্পাদে সাৱত্থিযং গহপতিকুলে নিব্বত্তো অড্ঢো মহদ্ধনো মহাভোগো ৰতনত্তযে পসন্নো সত্থু ধম্মদেসনং সুত্ৱা সদ্ধাজাতো পব্বজিত্ৱা নচিৰস্সেৱ অৰহত্তং পাপুণি.

১. সো একদিৱসং অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পদুমো নাম নামেনাতিআদিমাহ. তত্থ পদুমোতি যস্স পাদনিক্খেপসমযে পথৱিং ভিন্দিত্ৱা পদুমং উগ্গন্ত্ৱা পাদতলং সম্পটিচ্ছতি, তেন সঞ্ঞাণেন সো ভগৱা পদুমোতি সঙ্খং গতো, ইধ পদুমুত্তৰো ভগৱা অধিপ্পেতো. সো ভগৱা পৱনা ৱসনৱিহাৰা অভিনিক্খম্ম ৱনমজ্ঝং পৱিসিত্ৱা ধম্মং দেসেতীতি সম্বন্ধো.

যক্খানং সমযোতি দেৱানং সমাগমো আসি অহোসীতি অত্থো. অজ্ঝাপেক্খিংসু তাৱদেতি তস্মিং দেসনাকালে অধিঅপেক্খিংসু, ৱিসেসেন পস্সনসীলা অহেসুন্তি অত্থো. সেসং পাকটমেৱাতি.

সুপাৰিচৰিযত্থেৰঅপদানৱণ্ণনা সমত্তা.

২. কণৱেৰপুপ্ফিযত্থেৰঅপদানৱণ্ণনা

সিদ্ধত্থো নাম ভগৱাতিআদিকং আযস্মতো কণৱেৰপুপ্ফিযত্থেৰস্স অপদানং. অযম্পি পুৰিমবুদ্ধেসু কতাধিকাৰো সিদ্ধত্থস্স ভগৱতো কালে সুদ্দকুলে নিব্বত্তো ৱুদ্ধিমন্ৱায ৰঞ্ঞো অন্তেপুৰপালকো অহোসি. তস্মিং সমযে সিদ্ধত্থো ভগৱা ভিক্খুসঙ্ঘপৰিৱুতো ৰাজৱীথিং পটিপজ্জি. অথ সো অন্তেপুৰপালকো চৰমানং ভগৱন্তং দিস্ৱা পসন্নমানসো হুত্ৱা কণৱেৰপুপ্ফেন ভগৱন্তং পূজেত্ৱা নমস্সমানো অট্ঠাসি. সো তেন পুঞ্ঞেন সুগতিসম্পত্তিযোযেৱ অনুভৱিত্ৱা ইমস্মিং বুদ্ধুপ্পাদে একস্মিং কুলে নিব্বত্তিত্ৱা ৱুদ্ধিপ্পত্তো সত্থু ধম্মদেসনং সুত্ৱা পটিলদ্ধসদ্ধো পব্বজিত্ৱা নচিৰস্সেৱ অৰহা অহোসি.

৭. সো পত্তঅগ্গফলো পুব্বে কতকুসলং সৰিত্ৱা সঞ্জাতসোমনস্সো পুব্বচৰিতাপদানং পকাসেন্তো সিদ্ধত্থো নাম ভগৱাতিআদিমাহ. তং সব্বং হেট্ঠা ৱুত্তত্তা উত্তানত্থমেৱাতি.

কণৱেৰপুপ্ফিযত্থেৰঅপদানৱণ্ণনা সমত্তা.

৩. খজ্জকদাযকত্থেৰঅপদানৱণ্ণনা

তিস্সস্স খো ভগৱতোতিআদিকং আযস্মতো খজ্জকদাযকত্থেৰস্স অপদানং. অযম্পি পুৰিমজিনৱৰেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো তিস্সস্স ভগৱতো কালে সুদ্দকুলে নিব্বত্তো ভগৱন্তং দিস্ৱা পসন্নমানসো অম্বজম্বুআদিমনেকং মধুৰফলাফলং নাড়িকেৰং পূৱখজ্জকঞ্চ অদাসি. ভগৱা তস্স পসাদৱড্ঢনত্থায পস্সন্তস্সেৱ পৰিভুঞ্জি. সো তেন পুঞ্ঞেন সুগতিসম্পত্তিযোযেৱ অনুভৱিত্ৱা ইমস্মিং বুদ্ধুপ্পাদে সাৱত্থিযং কুলগেহে নিব্বত্তো ৱিঞ্ঞুতং পত্ৱা সত্থু ধম্মদেসনং সুত্ৱা সঞ্জাতসদ্ধো পসাদবহুমানো পব্বজিত্ৱা ৱত্তপটিপত্তিযা সাসনং সোভেন্তো সীলালঙ্কাৰপটিমণ্ডিতো নচিৰস্সেৱ অৰহত্তং পাপুণি.

১৩. সো পুব্বকম্মং সৰন্তো ‘‘পুব্বে মযা সুখেত্তে কুসলং কতং সুন্দৰ’’ন্তি সোমনস্সজাতো পুব্বচৰিতাপদানং পকাসেন্তো তিস্সস্স খো ভগৱতোতিআদিমাহ. তত্থ তিস্সোপি ভৱসম্পত্তিযো দদমানো জাতোতি মাতাপিতূহি কতনামৱসেন তিস্সো. অথ ৱা তীহি সৰণগমনেহি অস্সাসেন্তো ওৱদন্তো হেতুসম্পন্নপুগ্গলে সগ্গমোক্খদ্ৱযে পতিট্ঠাপেন্তো বুদ্ধো জাতোতি তিস্সো. সমাপত্তিগুণাদীহি ভগেহি যুত্তোতি ভগৱা, তস্স তিস্সস্স ভগৱতো পুব্বে অহং ফলং অদাসিন্তি সম্বন্ধো. নাড়িকেৰঞ্চ পাদাসিন্তি নাড়িকাকাৰেন পৱত্তং ফলং নাড়িকেৰং, তঞ্চ ফলং অদাসিন্তি অত্থো. খজ্জকং অভিসম্মতন্তি খাদিতব্বং খজ্জকং অভি ৱিসেসেন মধুসক্কৰাদীহি সম্মিস্সং কত্ৱা নিপ্ফাদিতং সুন্দৰং মধুৰন্তি সম্মতং ঞাতং অভিসম্মতং খজ্জকঞ্চ অদাসিন্তি অত্থো. সেসং সুৱিঞ্ঞেয্যমেৱাতি.

খজ্জকদাযকত্থেৰঅপদানৱণ্ণনা সমত্তা.

৪. দেসপূজকত্থেৰঅপদানৱণ্ণনা

অত্থদস্সী তু ভগৱাতিআদিকং আযস্মতো দেসপূজকত্থেৰস্স অপদানং. অযম্পি থেৰো পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো অত্থদস্সিস্স ভগৱতো কালে কুলগেহে নিব্বত্তো ৱুদ্ধিমন্ৱায সদ্ধো পসন্নো বুদ্ধমামকো ধম্মমামকো সঙ্ঘমামকো অহোসি. তদা অত্থদস্সী ভগৱা ভিক্খুসঙ্ঘপৰিৱুতো চন্দো ৱিয সূৰিযো ৱিয চ আকাসেন গচ্ছতি. সো উপাসকো ভগৱতো গতদিসাভাগং গন্ধমালাদীহি পূজেন্তো অঞ্জলিং পগ্গয্হ নমস্সমানো অট্ঠাসি.

১৮. সো তেন পুঞ্ঞেন দেৱলোকে নিব্বত্তো সগ্গসম্পত্তিং অনুভৱিত্ৱা মনুস্সেসু চ মনুস্সসম্পত্তিং অনুভৱিত্ৱা ইমস্মিং বুদ্ধুপ্পাদে একস্মিং কুলে নিব্বত্তো ৱুদ্ধিপ্পত্তো উপভোগপৰিভোগসম্পন্নো সত্থু ধম্মদেসনং সুত্ৱা পসন্নমানসো ঘৰাৱাসে অনল্লীনো পব্বজিত্ৱা ৱত্তসম্পন্নো নচিৰস্সেৱ অৰহা হুত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো অত্থদস্সী তু ভগৱাতিআদিমাহ. তং হেট্ঠা ৱুত্তত্থমেৱ. অনিলঞ্জসেতি ‘‘মগ্গো পন্থো পথো পজ্জো, অঞ্জসং ৱটুমাযন’’ন্তি (চূড়নি. পাৰাযনত্থুতিগাথানিদ্দেস ১০১) পৰিযাযস্স ৱুত্তত্তা অনিলস্স ৱাতস্স অঞ্জসং গমনমগ্গোতি অনিলঞ্জসং, তস্মিং অনিলঞ্জসে, আকাসেতি অত্থো. সেসং উত্তানত্থমেৱাতি.

দেসপূজকত্থেৰঅপদানৱণ্ণনা সমত্তা.

৫. কণিকাৰছত্তিযত্থেৰঅপদানৱণ্ণনা

ৱেস্সভূ নাম সম্বুদ্ধোতিআদিকং আযস্মতো কণিকাৰছত্তিযত্থেৰস্স অপদানং. অযম্পি থেৰো পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱেস্সভুস্স ভগৱতো কালে কুলগেহে নিব্বত্তো ৱিঞ্ঞুতং পত্তো সদ্ধাসম্পন্নো অহোসি. তস্মিং সমযে ৱেস্সভূ ভগৱা ৱিৱেককামো মহাৱনং পৱিসিত্ৱা নিসীদি. অথ সোপি উপাসকো কেনচিদেৱ কৰণীযেন তত্থ গন্ত্ৱা ভগৱন্তং অগ্গিক্খন্ধং ৱিয জলমানং নিসিন্নং দিস্ৱা পসন্নমানসো কণিকাৰপুপ্ফং ওচিনিত্ৱা ছত্তং কত্ৱা ভগৱতো নিসিন্নট্ঠানে ৱিতানং কত্ৱা পূজেসি, তং ভগৱতো আনুভাৱেন সত্তাহং অমিলাতং হুত্ৱা তথেৱ অট্ঠাসি. ভগৱাপি ফলসমাপত্তিং নিৰোধসমাপত্তিঞ্চ সমাপজ্জিত্ৱা ৱিহাসি, সো তং অচ্ছৰিযং দিস্ৱা সোমনস্সজাতো ভগৱন্তং ৱন্দিত্ৱা অঞ্জলিং পগ্গয্হ অট্ঠাসি. ভগৱা সমাপত্তিতো ৱুট্ঠহিত্ৱা ৱিহাৰমেৱ অগমাসি.

২৩. সো তেন পুঞ্ঞেন দেৱমনুস্সেসু সম্পত্তিযো অনুভৱিত্ৱা ইমস্মিং বুদ্ধুপ্পাদে সাৱত্থিযং কুলগেহে নিব্বত্তো ৱুদ্ধিমন্ৱায সদ্ধাসম্পন্নো সত্থু ধম্মদেসনং সুত্ৱা ঘৰাৱাসে অনল্লীনো পব্বজিত্ৱা ৱত্তপটিপত্তিযা জিনসাসনং সোভেন্তো নচিৰস্সেৱ অৰহা হুত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো ৱেস্সভূ নাম সম্বুদ্ধোতিআদিমাহ. তত্থ ৱেস্সভূতি ৱেস্সে ৱেস্সজনে ভুনাতি অভিভৱতীতি ৱেস্সভূ. অথ ৱা ৱেস্সে পঞ্চৱিধমাৰে অভিভুনাতি অজ্ঝোত্থৰতীতি ৱেস্সভূ. সামংযেৱ বুজ্ঝিতা সচ্চানীতি সম্বুদ্ধো, নামেন ৱেস্সভূ নাম সম্বুদ্ধোতি অত্থো. দিৱাৱিহাৰায মুনীতি দিব্বতি পকাসেতি তং তং ৱত্থুং পাকটং কৰোতীতি দিৱা. সূৰিযুগ্গমনতো পট্ঠায যাৱ অত্থঙ্গমো, তাৱ পৰিচ্ছিন্নকালো, ৱিহৰণং চতূহি ইৰিযাপথেহি পৱত্তনং ৱিহাৰো, দিৱায ৱিহাৰো দিৱাৱিহাৰো, তস্স দিৱাৱিহাৰায লোকজেট্ঠো নৰাসভো বুদ্ধমুনি মহাৱনং ওগাহিত্ৱা পৱিসিত্ৱাতি অত্থো. সেসং উত্তানত্থমেৱাতি.

কণিকাৰছত্তিযত্থেৰঅপদানৱণ্ণনা সমত্তা.

৬. সপ্পিদাযকত্থেৰঅপদানৱণ্ণনা

ফুস্সো নামাথ ভগৱাতিআদিকং আযস্মতো সপ্পিদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো অনেকেসু ভৱেসু ৱিৱট্টূপনিস্সযানি পুঞ্ঞানি উপচিনন্তো ফুস্সস্স ভগৱতো কালে কুলগেহে নিব্বত্তো অহোসি. তদা ভগৱা ভিক্খুসঙ্ঘপৰিৱুতো ৱীথিযং চৰমানো তস্স উপাসকস্স গেহদ্ৱাৰং সম্পাপুণি. অথ সো উপাসকো ভগৱন্তং দিস্ৱা পসন্নমানসো ৱন্দিত্ৱা পত্তপূৰং সপ্পিতেলং অদাসি, ভগৱা অনুমোদনং কত্ৱা পক্কামি. সো তেনেৱ সোমনস্সেন যাৱতাযুকং ঠত্ৱা ততো চুতো তেন পুঞ্ঞেন দেৱলোকে উপ্পন্নো তত্থ দিব্বসুখং অনুভৱিত্ৱা মনুস্সেসু চ নিব্বত্তো উপ্পন্নুপ্পন্নভৱে সপ্পিতেলমধুফাণিতাদিমধুৰাহাৰসমঙ্গী সুখং অনুভৱিত্ৱা ইমস্মিং বুদ্ধুপ্পাদে সাৱত্থিযং একস্মিং কুলে নিব্বত্তো ৱুদ্ধিপ্পত্তো সদ্ধো বুদ্ধিসম্পন্নো সত্থু ধম্মদেসনং সুত্ৱা পসন্নমানসো পব্বজিত্ৱা ৱত্তসম্পন্নো নচিৰস্সেৱ অৰহা অহোসি.

২৮. সো অত্তনো পুব্বকম্মং সৰিত্ৱা জাতসোমনস্সো পুব্বচৰিতাপদানং পকাসেন্তো ফুস্সো নামাথ ভগৱাতিআদিমাহ. তত্থ ফুস্সোতি ফুস্সনক্খত্তযোগেন জাতত্তা মাতাপিতূহি কতনামধেয্যেন ফুস্সো. অথ ৱা নিব্বানং ফুসি পস্সি সচ্ছি অকাসীতি ফুস্সো. অথ ৱা সমতিংসপাৰমিতাসত্ততিংসবোধিপক্খিযধম্মে সকলে চ তেপিটকে পৰিযত্তিধম্মে ফুসি পস্সি অঞ্ঞাসীতি ফুস্সো. ভগ্গৱা ভগ্যৱা যুত্তোতিআদিপুঞ্ঞকোট্ঠাসসমঙ্গিতায ভগৱা. আহুতীনং পটিগ্গহোতি আহুতিনো ৱুচ্চন্তি পূজাসক্কাৰা, তেসং আহুতীনং পটিগ্গহেতুং অৰহতীতি আহুতীনং পটিগ্গহো. মহাজনং নিব্বাপেন্তো ৱীৰো ফুস্সো নাম ভগৱা ৱীথিযং অথ তদা গচ্ছতেতি সম্বন্ধো. সেসং পাকটমেৱাতি.

সপ্পিদাযকত্থেৰঅপদানৱণ্ণনা সমত্তা.

৭. যূথিকাপুপ্ফিযত্থেৰঅপদানৱণ্ণনা

চন্দভাগানদীতীৰেতিআদিকং আযস্মতো যূথিকাপুপ্ফিযত্থেৰস্স অপদানং. অযম্পি আযস্মা পুৰিমমুনিন্দেসু কতাধিকাৰো অনেকেসু চ জাতিসতেসু ৱিৱট্টূপনিস্সযানি পুঞ্ঞানি উপচিনন্তো ফুস্সস্সেৱ ভগৱতো কালে সুদ্দকুলে নিব্বত্তো ৱুদ্ধিপ্পত্তো চন্দভাগায নদিযা তীৰে কেনচিদেৱ কৰণীযেন অনুসোতং চৰমানো ফুস্সং ভগৱন্তং ন্হাযিতুকামং অগ্গিক্খন্ধং ৱিয জলমানং দিস্ৱা সোমনস্সজাতো তত্থ জাতং যূথিকাপুপ্ফং ওচিনিত্ৱা ভগৱন্তং পূজেসি. ভগৱা তস্স অনুমোদনমকাসি.

৩৩. সো তত্থ তেন পুঞ্ঞকোট্ঠাসেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱুদ্ধিপ্পত্তো ভগৱতো ধম্মদেসনং সুত্ৱা পসন্নমানসো পব্বজিত্ৱা ৱত্তপটিপত্তিযা সাসনং সোভেন্তো নচিৰস্সেৱ অৰহা হুত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো চন্দভাগানদীতীৰেতিআদিমাহ. তং সব্বং উত্তানত্থমেৱাতি.

যূথিকাপুপ্ফিযত্থেৰঅপদানৱণ্ণনা সমত্তা.

৮. দুস্সদাযকত্থেৰঅপদানৱণ্ণনা

তিৱৰাযং পুৰে ৰম্মেতিআদিকং আযস্মতো দুস্সদাযকত্থেৰস্স অপদানং. অযম্পাযস্মা পুৰিমজিনৱৰেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে ৰাজকুলে নিব্বত্তো ৱুদ্ধিপ্পত্তকালে যুৱৰাজভাৱং পত্ৱা পাকটো একং জনপদং লভিত্ৱা তত্ৰাধিপতিভূতো সকলজনপদৱাসিনো দানপিযৱচনঅত্থচৰিযাসমানত্থতাসঙ্খাতেহি চতূহি সঙ্গহৱত্থূহি সঙ্গণ্হাতি. তস্মিং সমযে সিদ্ধত্থো ভগৱা তং জনপদং সম্পাপুণি. অথ সো যুৱৰাজা পণ্ণাকাৰং লভিত্ৱা তত্থ সুখুমৱত্থেন ভগৱন্তং পূজেসি. ভগৱা তং ৱত্থং হত্থেন পৰামসিত্ৱা আকাসং পক্খন্দি. তম্পি ৱত্থং ভগৱন্তমেৱ অনুবন্ধি. অথ সো যুৱৰাজা তং অচ্ছৰিযং দিস্ৱা অতীৱ পসন্নো অঞ্জলিং পগ্গয্হ অট্ঠাসি. ভগৱতো সম্পত্তসম্পত্তট্ঠানে সব্বে জনা তং অচ্ছৰিযং দিস্ৱা অচ্ছৰিযব্ভুতচিত্তা অঞ্জলিং পগ্গয্হ অট্ঠংসু. ভগৱা ৱিহাৰমেৱ অগমাসি. যুৱৰাজা তেনেৱ কুসলকম্মেন ততো চুতো দেৱলোকে উপ্পন্নো তত্থ দিব্বসম্পত্তিং অনুভৱিত্ৱা মনুস্সেসু চক্কৱত্তিআদিসম্পত্তিযো অনুভৱিত্ৱা ইমস্মিং বুদ্ধুপ্পাদে ৱিভৱসম্পন্নে একস্মিং কুলে নিব্বত্তো ৱিঞ্ঞুতং পত্তো ঘৰাৱাসং সণ্ঠপেত্ৱা ৰতনত্তযে পসন্নো ভগৱতো ধম্মদেসনং সুত্ৱা পটিলদ্ধসদ্ধো পব্বজিত্ৱা ৱাযমন্তো নচিৰস্সেৱ অৰহা অহোসি.

৩৮. সো একদিৱসং অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো তিৱৰাযং পুৰে ৰম্মেতিআদিমাহ. তত্থ তিৱৰনামকে নগৰে ৰমণীযে অহং ৰাজপুত্তো হুত্ৱা সিদ্ধত্থং ভগৱন্তং ৱত্থেন পূজেসিন্তি অত্থো. সেসং সুৱিঞ্ঞেয্যমেৱাতি.

দুস্সদাযকত্থেৰঅপদানৱণ্ণনা সমত্তা.

৯. সমাদপকত্থেৰঅপদানৱণ্ণনা

নগৰে বন্ধুমতিযাতিআদিকং আযস্মতো সমাদপকত্থেৰস্স অপদানং. অযম্পি থেৰো পুৰিমবুদ্ধানং সন্তিকে কতকুসলসম্ভাৰো অনেকেসু ভৱেসু ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে কুলগেহে নিব্বত্তো ৱুদ্ধিমন্ৱায ঘৰাৱাসং সণ্ঠপেত্ৱা পুঞ্ঞানি কৰোন্তো ৱসমানো সদ্ধো পসন্নো বহূ উপাসকে সন্নিপাতেত্ৱা গণজেট্ঠকো হুত্ৱা ‘‘মাড়কং কৰিস্সামা’’তি তে সব্বে সমাদপেত্ৱা একং মাড়কং সমং কাৰেত্ৱা পণ্ডৰপুলিনং ওকিৰিত্ৱা ভগৱতো নিয্যাদেসি. সো তেন পুঞ্ঞেন দেৱলোকে উপ্পন্নো ছ কামাৱচৰসম্পত্তিযো অনুভৱিত্ৱা মনুস্সেসু চ চক্কৱত্তিআদিসম্পত্তিযো অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো ভগৱতি পসন্নো ধম্মং সুত্ৱা পসন্নমানসো সদ্ধাজাতো পব্বজিত্ৱা সীলসম্পন্নো ৱত্তসম্পন্নো নচিৰস্সেৱ অৰহত্তং পাপুণি.

৪৪. সো অপৰভাগে অত্তনো কতকুসলং সৰিত্ৱা সঞ্জাতসোমনস্সো পুব্বচৰিতাপদানং পকাসেন্তো নগৰে বন্ধুমতিযাতিআদিমাহ. তত্থ বন্ধন্তি ঞাতিগোত্তাদিৱসেন একসম্বন্ধা হোন্তি সকলনগৰৱাসিনোতি বন্ধূ, বন্ধূ এতস্মিং ৱিজ্জন্তীতি বন্ধুমতী, তস্সা বন্ধুমতিযা নাম নগৰে মহাপূগগণো উপাসকসমূহো অহোসীতি অত্থো. মাড়ং কস্সাম সঙ্ঘস্সাতি এত্থ মাতি গণ্হাতি সম্পত্তসম্পত্তজনানং চিত্তন্তি মাড়ং, অথ ৱা সম্পত্তযতিগণানং চিত্তস্স ৱিৱেককৰণে অলন্তি মাড়ং, মাড়মেৱ মাড়কং, ভিক্খুসঙ্ঘস্স ফাসুৱিহাৰত্থায মাড়কং কৰিস্সামাতি অত্থো. সেসং পাকটমেৱাতি.

সমাদপকত্থেৰঅপদানৱণ্ণনা সমত্তা.

১০. পঞ্চঙ্গুলিযত্থেৰঅপদানৱণ্ণনা

তিস্সো নামাসি ভগৱাতিআদিকং আযস্মতো পঞ্চঙ্গুলিযত্থেৰস্স অপদানং. অযম্পি পুৰিমবুদ্ধেসু কতাধিকাৰে তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো তিস্সস্স ভগৱতো কালে একস্মিং কুলে নিব্বত্তো ৱুদ্ধিমন্ৱায ঘৰাৱাসং সণ্ঠপেত্ৱা ৱিভৱসম্পন্নো সদ্ধো পসন্নো ৱীথিতো ৱিহাৰং পটিপন্নং ভগৱন্তং দিস্ৱা জাতিসুমনাদিঅনেকানি সুগন্ধপুপ্ফানি চন্দনাদীনি চ ৱিলেপনানি গাহাপেত্ৱা ৱিহাৰং গতো পুপ্ফেহি ভগৱন্তং পূজেত্ৱা ৱিলেপনেহি ভগৱতো সৰীৰে পঞ্চঙ্গুলিকং কত্ৱা ৱন্দিত্ৱা পক্কামি.

৫০. সো তেন পুঞ্ঞেন দেৱমনুস্সেসু উভযসম্পত্তিযো অনুভৱিত্ৱা ইমস্মিং বুদ্ধুপ্পাদে ৱিভৱসম্পন্নে একস্মিং কুলে নিব্বত্তিত্ৱা ৱুদ্ধিমন্ৱায সত্থু ধম্মদেসনং সুত্ৱা পসন্নমানসো পব্বজিত্ৱা ৱিপস্সনং ৱড্ঢেত্ৱা নচিৰস্সেৱ অৰহা হুত্ৱা পুব্বকম্মং সৰন্তো পচ্চক্খতো ঞত্ৱা ‘‘ইমং নাম কুসলকম্মং কত্ৱা ঈদিসং লোকুত্তৰসম্পত্তিং পত্তোম্হী’’তি পুব্বচৰিতাপদানং পকাসেন্তো তিস্সো নামাসি ভগৱাতিআদিমাহ. তং সব্বং উত্তানত্থমেৱাতি.

পঞ্চঙ্গুলিযত্থেৰঅপদানৱণ্ণনা সমত্তা.

সত্তৰসমৱগ্গৱণ্ণনা সমত্তা.