১৮. কুমুদৱগ্গো

১. কুমুদমালিযত্থেৰঅপদানৱণ্ণনা

পব্বতে হিমৱন্তম্হীতিআদিকং আযস্মতো কুমুদমালিযত্থেৰস্স অপদানং. অযম্পি থেৰো পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো অত্থদস্সিস্স ভগৱতো কালে হিমৱন্তপব্বতসমীপে জাতস্সৰস্স আসন্নে ৰক্খসো হুত্ৱা নিব্বত্তো অত্থদস্সিং ভগৱন্তং তত্থ উপগতং দিস্ৱা পসন্নমানসো কুমুদপুপ্ফানি ওচিনিত্ৱা ভগৱন্তং পূজেসি. ভগৱা অনুমোদনং কত্ৱা পক্কামি.

১. সো তেন পুঞ্ঞেন ততো চৱিত্ৱা দেৱলোকং উপপন্নো ছ কামাৱচৰসম্পত্তিযো অনুভৱিত্ৱা মনুস্সেসু চ চক্কৱত্তিআদিসম্পত্তিযো অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱুদ্ধিপ্পত্তো ৰতনত্তযে পসন্নো পব্বজিত্ৱা ৱাযমন্তো ব্ৰহ্মচৰিযপৰিযোসানং অৰহত্তং পত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পব্বতে হিমৱন্তম্হীতিআদিমাহ. তত্থ তত্থজো ৰক্খসো আসিন্তি তস্মিং জাতস্সৰসমীপে জাতো নিব্বত্তো ৰক্খসো পৰৰুধিৰমংসখাদকো নিদ্দযো ঘোৰৰূপো ভযানকসভাৱো মহাবলো মহাথামো কক্খড়ো যক্খো আসিং অহোসিন্তি অত্থো.

কুমুদং পুপ্ফতে তত্থাতি তস্মিং মহাসৰে সূৰিযৰংসিযা অভাৱে সতি সাযন্হে মকুড়িতং কুঞ্চিতাকাৰেন নিপ্পভং অৱণ্ণং হোতীতি ‘‘কুমুদ’’ন্তি লদ্ধনামং পুপ্ফং পুপ্ফতে ৱিকসতীতি অত্থো. চক্কমত্তানি জাযৰেতি তানি পুপ্ফানি ৰথচক্কপমাণানি হুত্ৱা জাযন্তীতি অত্থো. সেসং সুৱিঞ্ঞেয্যমেৱাতি.

কুমুদমালিযত্থেৰঅপদানৱণ্ণনা সমত্তা.

২. নিস্সেণিদাযকত্থেৰঅপদানৱণ্ণনা

কোণ্ডঞ্ঞস্স ভগৱতোতিআদিকং আযস্মতো নিস্সেণিদাযকত্থেৰস্স অপদানং. অযম্পি পুৰিমজিনৱৰেসু কতাধিকাৰো অনেকাসু জাতীসু ৱিৱট্টূপনিস্সযানি পুঞ্ঞানি উপচিনন্তো কোণ্ডঞ্ঞস্স ভগৱতো কালে ৱড্ঢকিকুলে নিব্বত্তো সদ্ধো পসন্নো ভগৱতো ধম্মদেসনং সুত্ৱা পসন্নমানসো ভগৱতো ৱসনপাসাদস্সাৰোহনত্থায সাৰকট্ঠমযং নিস্সেণিং কত্ৱা উস্সাপেত্ৱা ঠপেসি. ভগৱা তস্স পসাদসংৱড্ঢনত্থায পস্সন্তস্সেৱ উপৰিপাসাদং আৰুহি. সো অতীৱ পসন্নো তেনেৱ পীতিসোমনস্সেন কালং কত্ৱা দেৱলোকে নিব্বত্তো তত্থ দিব্বসম্পত্তিং অনুভৱিত্ৱা মনুস্সেসু জাযমানো নিস্সেণিদাননিস্সন্দেন উচ্চকুলে নিব্বত্তো মনুস্সসুখং অনুভৱিত্ৱা ইমস্মিং বুদ্ধুপ্পাদে একস্মিং কুলে নিব্বত্তো সত্থু ধম্মদেসনং সুত্ৱা সদ্ধাজাতো পব্বজিতো নচিৰস্সেৱ অৰহা অহোসি.

৯. সো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো কোণ্ডঞ্ঞস্স ভগৱতোতিআদিমাহ. তত্থ কোণ্ডঞ্ঞস্সাতি কুচ্ছিতো হুত্ৱা ডেতি পৱত্ততীতি কোণ্ডো, লামকসত্তো, কোণ্ডতো অঞ্ঞোতি কোণ্ডঞ্ঞো, অলামকো উত্তমপুৰিসোতি অত্থো. অথ ৱা ব্ৰাহ্মণগোত্তেসু কোণ্ডঞ্ঞগোত্তে উপ্পন্নত্তা ‘‘কোণ্ডঞ্ঞো’’তি গোত্তৱসেন তস্স নামং, তস্স কোণ্ডঞ্ঞস্স. সেসং পাকটমেৱাতি.

নিস্সেণিদাযকত্থেৰঅপদানৱণ্ণনা সমত্তা.

৩. ৰত্তিপুপ্ফিযত্থেৰঅপদানৱণ্ণনা

মিগলুদ্দো পুৰে আসিন্তিআদিকং আযস্মতো ৰত্তিপুপ্ফিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে নেসাদকুলে উপ্পন্নো মিগৱধায অৰঞ্ঞে ৱিচৰমানো তস্স কাৰুঞ্ঞেন অৰঞ্ঞে চৰমানং ৱিপস্সিং ভগৱন্তং দিস্ৱা পসন্নমানসো পুপ্ফিতং ৰত্তিকং নাম পুপ্ফং কুটজপুপ্ফঞ্চ সহ ৱণ্টেন ওচিনিত্ৱা সোমনস্সচিত্তেন পূজেসি. ভগৱা অনুমোদনং কত্ৱা পক্কামি.

১৩. সো তেনেৱ পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো ৰতনত্তযে পসন্নো সত্থু ধম্মদেসনং সুত্ৱা কামেসু আদীনৱং দিস্ৱা পব্বজিত্ৱা নচিৰস্সেৱ অৰহত্তং পত্তো অত্তনো পুব্বকম্মং সৰিত্ৱা ‘‘নেসাদভূতেন মযা কতকুসলং সুন্দৰ’’ন্তি সোমনস্সজাতো পুব্বচৰিতাপদানং পকাসেন্তো মিগলুদ্দো পুৰে আসিন্তিআদিমাহ. তত্থ মিগানং লুদ্দো সাহসিকো মাৰকোতি মিগলুদ্দো, মিগেসু ৱা লুদ্দো লোভীতি মিগলুদ্দো, নেসাদো আসিং পুৰেতি অত্থো.

১৪. ৰত্তিকং পুপ্ফিতং দিস্ৱাতি পদুমপুপ্ফাদীনি অনেকানি পুপ্ফানি সূৰিযৰংসিসম্ফস্সেন দিৱা পুপ্ফন্তি ৰত্তিযং মকুড়িতানি হোন্তি. জাতিসুমনমল্লিকাদীনি অনেকানি পুপ্ফানি পন ৰত্তিযং পুপ্ফন্তি নো দিৱা. তস্মা ৰত্তিযং পুপ্ফনতো ৰত্তিপুপ্ফনামকানি অনেকানি সুগন্ধপুপ্ফানি চ কুটজপুপ্ফানি চ গহেত্ৱা পূজেসিন্তি অত্থো. সেসং উত্তানত্থমেৱাতি.

ৰত্তিপুপ্ফিযত্থেৰঅপদানৱণ্ণনা সমত্তা.

৪. উদপানদাযকত্থেৰঅপদানৱণ্ণনা

ৱিপস্সিনো ভগৱতোতিআদিকং আযস্মতো উদপানদাযকত্থেৰস্স অপদানং. অযম্পি থেৰো পুৰিমমুনিৱৰেসু কতাধিকাৰো অনেকেসু ভৱেসু কতপুঞ্ঞসঞ্চযো ৱিপস্সিস্স ভগৱতো কালে কুলগেহে নিব্বত্তো ৱুদ্ধিপ্পত্তো ‘‘পানীযদানং মযা দাতব্বং, তঞ্চ নিৰন্তৰং কত্ৱা পৱত্তেতুং ৱট্টতী’’তি চিন্তেত্ৱা একং কূপং খনাপেত্ৱা উদকসম্পত্তকালে ইট্ঠকাহি চিনাপেত্ৱা থিৰং কত্ৱা তত্থ উট্ঠিতেন উদকেন পুণ্ণং তং উদপানং ৱিপস্সিস্স ভগৱতো নিয্যাদেসি. ভগৱা পানীযদানানিসংসদীপকং অনুমোদনং অকাসি. সো তেন পুঞ্ঞেন দেৱমনুস্সেসু সংসৰন্তো নিব্বত্তনিব্বত্তট্ঠানে পোক্খৰণীউদপানপানীযাদিসম্পন্নো সুখমনুভৱিত্ৱা ইমস্মিং বুদ্ধুপ্পাদে একস্মিং কুলে নিব্বত্তো ৱুদ্ধিমন্ৱায সদ্ধো পসন্নো পব্বজিত্ৱা নচিৰস্সেৱ অৰহা অহোসি.

১৮. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো ৱিপস্সিনো ভগৱতোতিআদিমাহ. তত্থ উদপানো কতো মযাতি উদকং পিৱন্তি এত্থাতি উদপানো, কূপপোক্খৰণীতড়াকানমেতং অধিৱচনং. সো উদপানো কূপো ৱিপস্সিস্স ভগৱতো অত্থায কতো খনিতোতি অত্থো. সেসং উত্তানত্থমেৱাতি.

উদপানদাযকত্থেৰঅপদানৱণ্ণনা সমত্তা.

৫. সীহাসনদাযকত্থেৰঅপদানৱণ্ণনা

নিব্বুতে লোকনাথম্হীতিআদিকং আযস্মতো সীহাসনদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে নিব্বানাধিগমত্থায কতপুঞ্ঞূপচযো পদুমুত্তৰস্স ভগৱতো কালে গহপতিকুলে নিব্বত্তো ৱিঞ্ঞুতং পত্তো সত্থু ধম্মদেসনং সুত্ৱা ৰতনত্তযে পসন্নো তস্মিং ভগৱতি পৰিনিব্বুতে সত্তহি ৰতনেহি খচিতং সীহাসনং কাৰাপেত্ৱা বোধিৰুক্খং পূজেসি, বহূহি মালাগন্ধধূপেহি চ পূজেসি.

২১. সো তেন পুঞ্ঞেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা সব্বত্থ পূজিতো ইমস্মিং বুদ্ধুপ্পাদে সাৱত্থিযং কুলগেহে নিব্বত্তো ৱুদ্ধিপ্পত্তো ঘৰাৱাসং ৱসন্তো সত্থু ধম্মদেসনং সুত্ৱা পসন্নমানসো ঞাতিৱগ্গং পহায পব্বজিতো নচিৰস্সেৱ অৰহা হুত্ৱা পুব্বূপচিতকুসলসম্ভাৰং সৰিত্ৱা সঞ্জাতসোমনস্সো পুব্বচৰিতাপদানং পকাসেন্তো নিব্বুতে লোকনাথম্হীতিআদিমাহ. তত্থ সীহাসনমদাসহন্তি সীহৰূপহিৰঞ্ঞসুৱণ্ণৰতনেহি খচিতং আসনং সীহাসনং, সীহস্স ৱা অভীতস্স ভগৱতো নিসিন্নাৰহং, সীহং ৱা সেট্ঠং উত্তমং আসনন্তি সীহাসনং, তং অহং অদাসিং, বোধিৰুক্খং পূজেসিন্তি অত্থো. সেসং সুৱিঞ্ঞেয্যমেৱাতি.

সীহাসনদাযকত্থেৰঅপদানৱণ্ণনা সমত্তা.

৬. মগ্গদত্তিকত্থেৰঅপদানৱণ্ণনা

অনোমদস্সী ভগৱাতিআদিকং আযস্মতো মগ্গদত্তিকত্থেৰস্স অপদানং. অযম্পাযস্মা পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো অনোমদস্সিস্স ভগৱতো কালে কুলগেহে নিব্বত্তো ৱুদ্ধিমন্ৱায ঘৰাৱাসং সণ্ঠপেত্ৱা ৱসন্তো অনোমদস্সিং ভগৱন্তং আকাসে চঙ্কমন্তং পাদুদ্ধাৰে পাদুদ্ধাৰচঙ্কমনট্ঠানে পুপ্ফানং ৱিকিৰণং অচ্ছৰিযঞ্চ দিস্ৱা পসন্নমানসো পুপ্ফানি আকাসে উক্খিপি, তানি ৱিতানং হুত্ৱা অট্ঠংসু.

২৬. সো তেন পুঞ্ঞেন সুগতীসুযেৱ সংসৰন্তো সব্বত্থ পূজিতো সুখং অনুভৱিত্ৱা ইমস্মিং বুদ্ধুপ্পাদে একস্মিং কুলে নিব্বত্তো কমেন যোব্বঞ্ঞং পাপুণিত্ৱা সদ্ধাজাতো পব্বজিত্ৱা ৱত্তসম্পন্নো নচিৰস্সেৱ অৰহত্তং পত্তো চঙ্কমনস্স পূজিতত্তা মগ্গদত্তিকত্থেৰোতি পাকটো. সো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো অনোমদস্সী ভগৱাতিআদিমাহ. দিট্ঠধম্মসুখত্থাযাতি ইমস্মিং অত্তভাৱে চঙ্কমনেন সৰীৰসল্লহুকাদিসুখং পটিচ্চাতি অত্থো. অব্ভোকাসম্হি চঙ্কমীতি অব্ভোকাসে অঙ্গণট্ঠানে চঙ্কমি, পদৱিক্খেপং পদসঞ্চাৰং অকাসীতি অত্থো.

উদ্ধতে পাদে পুপ্ফানীতি চঙ্কমন্তেন পাদে উদ্ধতে পদুমুপ্পলাদীনি পুপ্ফানি পথৱিতো উগ্গন্ত্ৱা চঙ্কমে ৱিকিৰিংসূতি অত্থো. সোভং মুদ্ধনি তিট্ঠৰেতি বুদ্ধস্স মুদ্ধনি সীসে সোভযমানা তানি তিট্ঠন্তীতি অত্থো. সেসং সুৱিঞ্ঞেয্যমেৱাতি.

মগ্গদত্তিকত্থেৰঅপদানৱণ্ণনা সমত্তা.

৭. একদীপিযত্থেৰঅপদানৱণ্ণনা

পদুমুত্তৰস্স মুনিনোতিআদিকং আযস্মতো একদীপিযত্থেৰস্স অপদানং. অযম্পাযস্মা পুৰিমজিনসেট্ঠেসু কতকুসলসম্ভাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে গহপতিকুলে নিব্বত্তো ৱুদ্ধিপ্পত্তো সদ্ধো পসন্নো ভগৱতো সললমহাবোধিম্হি একপদীপং পূজেসি, থাৱৰং কত্ৱা নিচ্চমেকপদীপপূজনত্থায তেলৱট্টং পট্ঠপেসি. সো তেন পুঞ্ঞেন দেৱমনুস্সেসু সংসৰন্তো সব্বত্থ জলমানো পসন্নচক্খুকো উভযসুখমনুভৱিত্ৱা ইমস্মিং বুদ্ধুপ্পাদে সাৱত্থিযং ৱিভৱসম্পন্নে একস্মিং কুলে নিব্বত্তো ৱিঞ্ঞুতং পত্তো ৰতনত্তযে পসন্নো পব্বজিত্ৱা নচিৰস্সেৱ অৰহত্তং পত্তো দীপপূজায লদ্ধৱিসেসাধিগমত্তা একদীপিযত্থেৰোতি পাকটো.

৩০. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পদুমুত্তৰস্স মুনিনোতিআদিমাহ. তং সব্বং উত্তানত্থমেৱাতি.

একদীপিযত্থেৰঅপদানৱণ্ণনা সমত্তা.

৮. মণিপূজকত্থেৰঅপদানৱণ্ণনা

ওৰেন হিমৱন্তস্সাতিআদিকং আযস্মতো মণিপূজকত্থেৰস্স অপদানং. অযম্পি থেৰো পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে একস্মিং কুলে নিব্বত্তো ঘৰাৱাসং সণ্ঠপেত্ৱা তত্থাদীনৱং দিস্ৱা ঘৰাৱাসং পহায তাপসপব্বজ্জং পব্বজিত্ৱা হিমৱন্তওৰভাগে একিস্সা নদিযা সমীপে পণ্ণসালং কাৰেত্ৱা ৱসন্তো ৱিৱেককামতায তস্সানুকম্পায চ তত্থ উপগতং পদুমুত্তৰং ভগৱন্তং দিস্ৱা পসন্নমানসো মণিপল্লঙ্কং ভগৱতো পূজেসি. ভগৱা তস্স পসাদৱড্ঢনত্থায তত্থ নিসীদি. সো ভিয্যোসোমত্তায পসন্নো নিব্বানাধিগমত্থায পত্থনং অকাসি. ভগৱা অনুমোদনং ৱত্ৱা পক্কামি. সো তেন পুঞ্ঞেন দেৱমনুস্সেসু সংসৰন্তো সব্বত্থ পূজিতো সুখং অনুভৱিত্ৱা ইমস্মিং বুদ্ধুপ্পাদে সাৱত্থিযং ৱিভৱসম্পন্নে কুলে নিব্বত্তো ঘৰাৱাসং ৱসন্তো একদিৱসং সত্থু ধম্মদেসনং সুত্ৱা পটিলদ্ধসদ্ধো পব্বজিত্ৱা নচিৰস্সেৱ অৰহা অহোসি.

৩৪. সো একদিৱসং অত্তনা কতকুসলং সৰিত্ৱা সঞ্জাতসোমনস্সো পুব্বচৰিতাপদানং পকাসেন্তো ওৰেন হিমৱন্তস্সাতিআদিমাহ. তত্থ ওৰেনাতি হিমৱন্তস্স অপৰং ভাগং ৱিহায ওৰেন, ভুম্মত্থে কৰণৱচনং, ওৰস্মিং দিসাভাগেতি অত্থো. নদিকা সম্পৱত্তথাতি অপাকটনামধেয্যা একা নদী সংসুট্ঠু পৱত্তানী ৱহানী সন্দমানা অহোসীতি অত্থো. তস্সা চানুপখেত্তম্হীতি তস্সা নদিযা অনুপখেত্তম্হি তীৰসমীপেতি অত্থো. সযম্ভূ ৱসতে তদাতি যদা অহং মণিপল্লঙ্কং পূজেসিং, তদা অনাচৰিযকো হুত্ৱা সযমেৱ বুদ্ধভূতো ভগৱা ৱসতে ৱিহৰতীতি অত্থো.

৩৫. মণিং পগ্গয্হ পল্লঙ্কন্তি মণিন্তি চিত্তং আৰাধেতি সোমনস্সং কৰোতীতি মণি, অথ ৱা মাতি পমাণং কৰোতি আভৰণন্তি মণি, অথ ৱা মৰন্তাপি ৰাজযুৱৰাজাদযো তং ন পৰিচ্চজন্তি তদত্থায সঙ্গামং কৰোন্তীতি মণি, তং মণিং মণিমযং পল্লঙ্কং মনোৰমং সাধু চিত্তং সুট্ঠু ৱিচিত্তং পগ্গয্হ গহেত্ৱা বুদ্ধসেট্ঠস্স অভিৰোপযিং পূজেসিন্তি অত্থো. সেসং সব্বং উত্তানত্থমেৱাতি.

মণিপূজকত্থেৰঅপদানৱণ্ণনা সমত্তা.

৯. তিকিচ্ছকত্থেৰঅপদানৱণ্ণনা

নগৰে বন্ধুমতিযাতিআদিকং আযস্মতো তিকিচ্ছকত্থেৰস্স অপদানং. অযম্পাযস্মা পুৰিমজিনৱৰেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে বন্ধুমতীনগৰে ৱেজ্জকুলে নিব্বত্তো বহুস্সুতো সুসিক্খিতো ৱেজ্জকম্মে ছেকো বহূ ৰোগিনো তিকিচ্ছন্তো ৱিপস্সিস্স ভগৱতো উপট্ঠাকস্স অসোকনামত্থেৰস্স ৰোগং তিকিচ্ছি. সো তেন পুঞ্ঞেন দেৱমনুস্সেসু অপৰাপৰং সুখং অনুভৱন্তো নিব্বত্তনিব্বত্তভৱে অৰোগো দীঘাযুকো সুৱণ্ণৱণ্ণসৰীৰো অহোসি.

৩৯. সো ইমস্মিং বুদ্ধুপ্পাদে সাৱত্থিযং গহপতিকুলে নিব্বত্তো ৱুদ্ধিমন্ৱায সব্বসিপ্পেসু নিপ্ফত্তিং পত্তো অৰোগো সুখিতো ৱিভৱসম্পন্নো ৰতনত্তযে পসন্নো সত্থু ধম্মদেসনং সুত্ৱা পটিলদ্ধসদ্ধো ঘৰাৱাসং পহায পব্বজিত্ৱা নচিৰস্সেৱ অৰহা হুত্ৱা পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো নগৰে বন্ধুমতিযাতিআদিমাহ. তং সব্বং হেট্ঠা ৱুত্তনযত্তা উত্তানত্থমেৱাতি.

তিকিচ্ছকত্থেৰঅপদানৱণ্ণনা সমত্তা.

১০. সঙ্ঘুপট্ঠাকত্থেৰঅপদানৱণ্ণনা

ৱেস্সভুম্হি ভগৱতীতিআদিকং আযস্মতো সঙ্ঘুপট্ঠাকত্থেৰস্স অপদানং. অযম্পি থেৰো পুৰিমবুদ্ধেসু কতকুসলসম্ভাৰো অনেকেসু ভৱেসু ৱিৱট্টূপনিস্সযানি পুঞ্ঞানি উপচিনন্তো ৱেস্সভুস্স ভগৱতো কালে তস্সাৰামিকস্স পুত্তো হুত্ৱা নিব্বত্তো ৱিঞ্ঞুতং পত্ৱা সদ্ধো পসন্নো ৱিহাৰেসু আৰামিককম্মং কৰোন্তো সক্কচ্চং সঙ্ঘং উপট্ঠাসি. সো তেনেৱ কুসলকম্মেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং বুদ্ধুপ্পাদে সাৱত্থিযং গহপতিকুলে নিব্বত্তো ৱুদ্ধিপ্পত্তো ৱিভৱসম্পন্নো সুখপ্পত্তো পাকটো সত্থু ধম্মদেসনং সুত্ৱা সাসনে পসন্নো পব্বজিত্ৱা ৱত্তসম্পন্নো সাসনং সোভযমানো ৱিপস্সনং ৱড্ঢেন্তো নচিৰস্সেৱ সহ পটিসম্ভিদাহি অৰহত্তং পত্তো ছড়ভিঞ্ঞো পুব্বে কতকুসলকম্মৱসেন সঙ্ঘুপট্ঠাকত্থেৰোতি পাকটো অহোসি.

৪৫. সো একদিৱসং ‘‘পুব্বে মযা কিং নাম কম্মং কত্ৱা অযং লোকুত্তৰসম্পত্তি লদ্ধা’’তি অত্তনো পুব্বকম্মং সৰিত্ৱা পচ্চক্খতো জানিত্ৱা সোমনস্সজাতো পুব্বচৰিতাপদানং পাকটং কৰোন্তো ৱেস্সভুম্হি ভগৱতীতিআদিমাহ. তত্থ অহোসাৰামিকো অহন্তি অহং ৱেস্সভুস্স ভগৱতো সাসনে আৰামিকো অহোসিন্তি অত্থো. সেসং হেট্ঠা ৱুত্তনযত্তা উত্তানত্থত্তা চ সুৱিঞ্ঞেয্যমেৱাতি.

সঙ্ঘুপট্ঠাকত্থেৰঅপদানৱণ্ণনা সমত্তা.

অট্ঠাৰসমৱগ্গৱণ্ণনা সমত্তা.