৭. সূচিদাযকত্থেৰঅপদানৱণ্ণনা

তিংসকপ্পসহস্সম্হীতিআদিকং আযস্মতো সূচিদাযকত্থেৰস্স অপদানং. অযম্পি পুৰিমজিনৱৰেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সুমেধস্স ভগৱতো কালে একস্মিং কুলগেহে নিব্বত্তো ৱুদ্ধিমন্ৱায ভগৱতো চীৱৰকম্মং কাতুং পঞ্চ সূচিযো অদাসি. সো তেন পুঞ্ঞেন দেৱমনুস্সেসু পুঞ্ঞমনুভৱিত্ৱা ৱিচৰন্তো উপ্পন্নুপ্পন্নভৱে তিক্খপঞ্ঞো হুত্ৱা পাকটো ইমস্মিং বুদ্ধুপ্পাদে একস্মিং কুলগেহে নিব্বত্তো ৱুদ্ধিমন্ৱায সত্থৰি পসীদিত্ৱা পব্বজন্তো তিক্খপঞ্ঞতায খুৰগ্গেযেৱ অৰহত্তং পাপুণি.

৩০. সো অপৰভাগে পুঞ্ঞং পচ্চৱেক্খন্তো তং দিস্ৱা সোমনস্সজাতো পুব্বচৰিতাপদানং পকাসেন্তো তিংসকপ্পসহস্সম্হীতিআদিমাহ. অন্তৰন্তৰং পনেত্থ সুৱিঞ্ঞেয্যমেৱ.

৩১. পঞ্চসূচী মযা দিন্নাতি এত্থ সূচতি ছিদ্দং কৰোতি ৱিজ্ঝতীতি সূচি, পঞ্চমত্তা সূচী পঞ্চসূচী মযা দিন্নাতি অত্থো. সেসং সুৱিঞ্ঞেয্যমেৱাতি.

সূচিদাযকত্থেৰঅপদানৱণ্ণনা সমত্তা.