৮. পাটলিপুপ্ফিযত্থেৰঅপদানৱণ্ণনা

সুৱণ্ণৱণ্ণং সম্বুদ্ধন্তিআদিকং আযস্মতো পাটলিপুপ্ফিযত্থেৰস্স অপদানং. অযম্পি পুৰিমজিনৱৰেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো তিস্সস্স ভগৱতো কালে একস্মিং কুলগেহে সেট্ঠিপুত্তো হুত্ৱা নিব্বত্তো ৱুদ্ধিপ্পত্তো কুসলাকুসলঞ্ঞূ সত্থৰি পসীদিত্ৱা পাটলিপুপ্ফং গহেত্ৱা সত্থু পূজেসি. সো তেন পুঞ্ঞেন বহুধা সুখসম্পত্তিযো অনুভৱন্তো দেৱমনুস্সেসু সংসৰন্তো ইমস্মিং বুদ্ধুপ্পাদে কুলগেহে নিব্বত্তো ৱুদ্ধিমন্ৱায সত্থৰি পসন্নো পব্বজিত্ৱা নচিৰস্সেৱ অৰহা অহোসি.

৩৬. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো সুৱণ্ণৱণ্ণং সম্বুদ্ধন্তিআদিমাহ. তত্থ অন্তৰাপণেতি আ সমন্ততো হিৰঞ্ঞসুৱণ্ণাদিকং ভণ্ডং পণেন্তি ৱিক্কিণন্তি পত্থৰন্তি এত্থাতি আপণং, আপণস্স অন্তৰং ৱীথীতি অন্তৰাপণং, তস্মিং অন্তৰাপণে. সুৱণ্ণৱণ্ণং কঞ্চনগ্ঘিযসংকাসং দ্ৱত্তিংসৱৰলক্খণং সম্বুদ্ধং দিস্ৱা পাটলিপুপ্ফং পূজেসিন্তি অত্থো. সেসং সব্বত্থ উত্তানত্থমেৱাতি.

পাটলিপুপ্ফিযত্থেৰঅপদানৱণ্ণনা সমত্তা.