৬. তিণসন্থৰদাযকত্থেৰঅপদানৱণ্ণনা

হিমৱন্তস্সাৱিদূৰেতিআদিকং আযস্মতো তিণসন্থৰদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো তিস্সস্স ভগৱতো কালে একস্মিং কুলগেহে নিব্বত্তো বুদ্ধুপ্পাদতো পগেৱ উপ্পন্নত্তা ঘৰাৱাসং পহায তাপসপব্বজ্জং পব্বজিত্ৱা হিমৱন্তস্স অৱিদূৰে একং সৰং নিস্সায পটিৱসতি. তস্মিং সমযে তিস্সো ভগৱা তস্সানুকম্পায আকাসেন অগমাসি. অথ খো সো তাপসো আকাসতো ওৰুয্হ ঠিতং তং ভগৱন্তং দিস্ৱা পসন্নমানসো তিণং লাযিত্ৱা তিণসন্থৰং কত্ৱা নিসীদাপেত্ৱা বহুমানাদৰেন পঞ্চপতিট্ঠিতেন ৱন্দিত্ৱা পটিকুটিকো হুত্ৱা পক্কামি. সো যাৱতাযুকং ঠত্ৱা ততো চৱিত্ৱা দেৱমনুস্সেসু সংসৰন্তো অনেকৱিধসম্পত্তিং অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱুদ্ধিপ্পত্তো সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

২২. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো হিমৱন্তস্সাৱিদূৰেতিআদিমাহ. তং হেট্ঠা ৱুত্তত্থমেৱ. মহাজাতস্সৰোতি এত্থ পন সৰন্তি এত্থ পানীযত্থিকা দ্ৱিপদচতুপ্পদাদযো সত্তাতি সৰং, অথ ৱা সৰন্তি এত্থ নদীকন্দৰাদযোতি সৰং, মহন্তো চ সো সযমেৱ জাতত্তা সৰো চেতি মহাজাতস্সৰো. অনোতত্তছদ্দন্তদহাদযো ৱিয অপাকটনামত্তা ‘‘মহাজাতস্সৰো’’তি ৱুত্তোতি দট্ঠব্বো. সতপত্তেহি সঞ্ছন্নোতি একেকস্মিং পুপ্ফে সতসতপত্তানং ৱসেন সতপত্তো, সতপত্তসেতপদুমেহি সঞ্ছন্নো গহনীভূতোতি অত্থো. নানাসকুণমালযোতি অনেকে হংসকুক্কুটকুক্কুহদেণ্ডিভাদযো একতো কুণন্তি সদ্দং কৰোন্তীতি সকুণাতি লদ্ধনামানং পক্খীনং আলযো আধাৰভূতোতি অত্থো. সেসং সব্বত্থ উত্তানত্থমেৱাতি.

তিণসন্থৰদাযকত্থেৰঅপদানৱণ্ণনা সমত্তা.