৫. একসঞ্ঞকত্থেৰঅপদানৱণ্ণনা

খণ্ডো নামাসি নামেনাতিআদিকং আযস্মতো একসঞ্ঞকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে কুলগেহে নিব্বত্তো ৱিঞ্ঞুতং পত্তো ৰতনত্তযে পসন্নমানসো তস্স সত্থুনো খণ্ডং নাম অগ্গসাৱকং ভিক্খায চৰমানং দিস্ৱা সদ্দহিত্ৱা পিণ্ডপাতমদাসি. সো তেন পুঞ্ঞকম্মেন দেৱমনুস্সসম্পত্তিযো অনুভৱিত্ৱা ইমস্মিং বুদ্ধুপ্পাদে সাৱত্থিযং একস্মিং কুলগেহে নিব্বত্তো ৱিঞ্ঞুতং পত্তো সত্থু ধম্মদেসনং সুত্ৱা পটিলদ্ধসদ্ধো পব্বজিত্ৱা নচিৰস্সেৱ অৰহা অহোসি. সো একদিৱসং পিণ্ডপাতস্স সঞ্ঞং মনসিকৰিত্ৱা পটিলদ্ধৱিসেসত্তা একসঞ্ঞকত্থেৰোতি পাকটো.

১৮. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো খণ্ডো নামাসি নামেনাতিআদিমাহ. তত্থ তস্স অগ্গসাৱকত্থেৰস্স কিলেসানং খণ্ডিতত্তা খণ্ডোতি নামং. সেসং সব্বত্থ উত্তানমেৱাতি.

একসঞ্ঞকত্থেৰঅপদানৱণ্ণনা সমত্তা.