১০. তিপদুমিযত্থেৰঅপদানৱণ্ণনা

পদুমুত্তৰো নাম জিনোতিআদিকং আযস্মতো তিপদুমিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে হংসৱতিযং মালাকাৰকুলগেহে নিব্বত্তো ৱুদ্ধিপ্পত্তো মালাকাৰকম্মং কত্ৱা ৱসন্তো একদিৱসং অনেকৱিধানি জলজথলজপুপ্ফানি গহেত্ৱা ৰঞ্ঞো সন্তিকং গন্তুকামো এৱং চিন্তেসি – ‘‘ৰাজা ইমানি তাৱ পুপ্ফানি দিস্ৱা পসন্নো সহস্সং ৱা ধনং গামাদিকং ৱা দদেয্য, লোকনাথং পন পূজেত্ৱা নিব্বানামতধনং লভামি, কিং মে এতেসু সুন্দৰ’’ন্তি তেন ‘‘ভগৱন্তং পূজেত্ৱা সগ্গমোক্খসম্পত্তিযো নিপ্ফাদেতুং ৱট্টতী’’তি চিন্তেত্ৱা ৱণ্ণৱন্তং অতীৱ ৰত্তপুপ্ফত্তযং গহেত্ৱা পূজেসি. তানি গন্ত্ৱা আকাসং ছাদেত্ৱা পত্থৰিত্ৱা অট্ঠংসু. নগৰৱাসিনো অচ্ছৰিযব্ভুতচিত্তজাতা চেলুক্খেপসহস্সানি পৱত্তযিংসু. তং দিস্ৱা ভগৱা অনুমোদনং অকাসি. সো তেন পুঞ্ঞেন দেৱমনুস্সেসু সম্পত্তিযো অনুভৱিত্ৱা ইমস্মিং বুদ্ধুপ্পাদে গহপতিকুলে নিব্বত্তো ৱুদ্ধিমন্ৱায সত্থৰি পসীদিত্ৱা ধম্মং সুত্ৱা পটিলদ্ধসদ্ধো পব্বজিত্ৱা নচিৰস্সেৱ অৰহা অহোসি.

৪৮. সো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পদুমুত্তৰো নাম জিনোতিআদিমাহ. তস্সত্থো হেট্ঠা ৱুত্তোৱ. সব্বধম্মান পাৰগূতি সব্বেসং নৱলোকুত্তৰধম্মানং পাৰং নিব্বানং গতো পচ্চক্খং কতোতি অত্থো. দন্তো দন্তপৰিৱুতোতি সযং কাযৱাচাদীহি দন্তো এতদগ্গে ঠপিতেহি সাৱকেহি পৰিৱুতোতি অত্থো. সেসং সব্বত্থ সম্বন্ধৱসেন উত্তানত্থমেৱাতি.

তিপদুমিযত্থেৰঅপদানৱণ্ণনা সমত্তা.

অট্ঠমৱগ্গৱণ্ণনা সমত্তা.