৬. বীজনিৱগ্গো

১. ৱিধূপনদাযকত্থেৰঅপদানৱণ্ণনা

পদুমুত্তৰবুদ্ধস্সাতিআদিকং আযস্মতো ৱিধূপনদাযকত্থেৰস্স অপদানং. অযম্পি পুৰিমজিনৱৰেসু পূৰিতপুঞ্ঞসম্ভাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে একস্মিং কুলগেহে নিব্বত্তো ৱিঞ্ঞুতং পত্তো ৱিভৱসম্পন্নো সদ্ধাজাতো ভগৱতি পসন্নো গিম্হকালে সুৱণ্ণৰজতমুত্তামণিমযং বীজনিং কাৰেত্ৱা ভগৱতো অদাসি. সো তেন পুঞ্ঞকম্মেন দেৱেসু চ মনুস্সেসু চ সংসৰন্তো দ্ৱে সম্পত্তিযো অনুভৱিত্ৱা ইমস্স অম্হাকং সম্মাসম্বুদ্ধস্স উপ্পন্নকালে একস্মিং কুলগেহে নিব্বত্তো ঘৰবন্ধনেন বন্ধিত্ৱা ঘৰাৱাসে আদীনৱং দিস্ৱা পব্বজ্জায চ আনিসংসং দিস্ৱা সদ্ধাসম্পন্নো সাসনে পব্বজিত্ৱা ৱিপস্সনং ৱড্ঢেত্ৱা নচিৰস্সেৱ অৰহা অহোসি.

১. সো ‘‘কেন মযা পুঞ্ঞকম্মেন অযং লোকুত্তৰসম্পত্তি লদ্ধা’’তি অত্তনো পুব্বকম্মং অনুস্সৰন্তো তং পচ্চক্খতো ঞত্ৱা পুব্বচৰিতাপদানং পকাসেন্তো পদুমুত্তৰবুদ্ধস্সাতিআদিমাহ. তং হেট্ঠা ৱুত্তত্থমেৱ. বীজনিকা মযা দিন্নাতি ৱিসেসেন সন্তাপযন্তানং সত্তানং সন্তাপং নিব্বাপেন্তি সীতলং ৱাতং জনেতীতি বীজনী, বীজনীযেৱ বীজনিকা, সা সত্তৰতনমযা ৱিজ্জোতমানা বীজনিকা মযা কাৰাপেত্ৱা দিন্নাতি অত্থো.

ৱিধূপনদাযকত্থেৰঅপদানৱণ্ণনা সমত্তা.

২. সতৰংসিত্থেৰঅপদানৱণ্ণনা

উচ্চিযং সেলমাৰুয্হাতিআদিকং আযস্মতো সতৰংসিত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে ব্ৰাহ্মণকুলে নিব্বত্তো ৱিঞ্ঞুতং পত্তো সক্কটব্যাকৰণে ৱেদত্তযে চ পাৰঙ্গতো ঘৰাৱাসং পহায অৰঞ্ঞং পৱিসিত্ৱা ইসিপব্বজ্জং পব্বজিত্ৱা হিমৱন্তে ৱাসং কপ্পেসি. তস্মিং সমযে পদুমুত্তৰো ভগৱা ৱিৱেককামতায উচ্চং একং পব্বতং আৰুয্হ জলিতগ্গিক্খন্তো ৱিয নিসীদি. তং তথানিসিন্নং ভগৱন্তং দিস্ৱা তাপসো সোমনস্সজাতো অঞ্জলিং পগ্গয্হ অনেকেহি কাৰণেহি থোমেসি. সো তেন পুঞ্ঞকম্মেন ততো চুতো ছসু কামাৱচৰদেৱেসু দিব্বসম্পত্তিং অনুভৱিত্ৱা ততো মনুস্সলোকে সতৰংসী নাম চক্কৱত্তী ৰাজা হুত্ৱা নিব্বত্তি. তম্পি সম্পত্তিং অনেকক্খত্তুং অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো পুব্বপুঞ্ঞসম্ভাৰৱসেন ঞাণস্স পৰিপক্কত্তা সত্তৱস্সিকোৱ পব্বজিত্ৱা অৰহত্তং পাপুণি.

৮-৯. সো ‘‘অহং কেন কম্মেন সত্তৱস্সিকোৱ সন্তিপদং অনুপ্পত্তোস্মী’’তি সৰমানো পুব্বকম্মং ঞাণেন পচ্চক্খতো দিস্ৱা সোমনস্সজাতো পুব্বচৰিতাপদানং উদানৱসেন পকাসেন্তো উচ্চিযং সেলমাৰুয্হাতিআদিমাহ. তত্থ উচ্চিযন্তি উচ্চং সেলমযং পব্বতং আৰুয্হ নিসীদি পদুমুত্তৰোতি সম্বন্ধো. পব্বতস্সাৱিদূৰম্হীতি ভগৱতো নিসিন্নস্স পব্বতস্স আসন্নট্ঠানেতি অত্থো. ব্ৰাহ্মণো মন্তপাৰগূতি মন্তসঙ্খাতস্স ৱেদত্তযস্স পাৰং পৰিযোসানং কোটিং গতো একো ব্ৰাহ্মণোতি অত্থো, অঞ্ঞং ৱিয অত্তানং নিদ্দিসতি অযং মন্তপাৰগূতি. উপৱিট্ঠং মহাৱীৰন্তি তস্মিং পব্বতে নিসিন্নং ৱীৰৱন্তং জিনং, কিং ৱিসিট্ঠং? দেৱদেৱং সকলছকামাৱচৰব্ৰহ্মদেৱানং অতিদেৱং নৰাসভং নৰানং আসতং সেট্ঠং লোকনাযকং সকলসত্তলোকং নযন্তং নিব্বানং পাপেন্তং অহং অঞ্জলিং দসনখসমোধানঞ্জলিপুটং সিৰসি মুদ্ধনি পগ্গহেত্ৱান পতিট্ঠপেত্ৱা সন্থৱিং সুট্ঠুং থোমেসিন্তি সম্বন্ধো.

১২. অভাসথাতি ‘‘যেনাযং অঞ্জলী দিন্নো…পে… অৰহা সো ভৱিস্সতী’’তি ব্যাকাসি. সেসং উত্তানত্থমেৱাতি.

সতৰংসিত্থেৰঅপদানৱণ্ণনা সমত্তা.

৩. সযনদাযকত্থেৰঅপদানৱণ্ণনা

পদুমুত্তৰবুদ্ধস্সাতিআদিকং আযস্মতো সযনদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে একস্মিং কুলগেহে নিব্বত্তো ৱিঞ্ঞুতং পত্তো ঘৰাৱাসং সণ্ঠপেত্ৱা সুখমনুভৱন্তো সত্থু ধম্মদেসনং সুত্ৱা সত্থৰি পসন্নো দন্তসুৱণ্ণৰজতমুত্তমণিমযং মহাৰহং মঞ্চং কাৰাপেত্ৱা চীনপট্টকম্বলাদীনি অত্থৰিত্ৱা সযনত্থায ভগৱতো অদাসি. ভগৱা তস্স অনুগ্গহং কৰোন্তো তত্থ সযি. সো তেন পুঞ্ঞকম্মেন দেৱমনুস্সেসু সংসৰন্তো তদনুৰূপং আকাসগমনসুখসেয্যাদিসুখং অনুভৱিত্ৱা ইমস্মিং বুদ্ধুপ্পাদে ৱিভৱসম্পন্নে একস্মিং কুলে নিব্বত্তিত্ৱা ৱিঞ্ঞুতং পাপুণিত্ৱা সত্থু ধম্মদেসনং সুত্ৱা পসন্নমানসো পব্বজিত্ৱা ৱিপস্সন্তো নচিৰস্সেৱ অৰহা অহোসি.

২০. সো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পদুমুত্তৰবুদ্ধস্সাতিআদিমাহ. তং হেট্ঠা ৱুত্তত্থমেৱ.

২১. সুখেত্তে বীজসম্পদাতি যথা তিণকচৱৰৰহিতে কদ্দমাদিসম্পন্নে সুখেত্তে ৱুত্তবীজানি সাদুফলানি নিপ্ফাদেন্তি, এৱমেৱ ৰাগদোসাদিদিযড্ঢসহস্সকিলেসসঙ্খাততিণকচৱৰৰহিতে সুদ্ধসন্তানে পুঞ্ঞক্খেত্তে ৱুত্তদানানি অপ্পানিপি সমানানি মহপ্ফলানি হোন্তীতি অত্থো. সেসং সুৱিঞ্ঞেয্যমেৱাতি.

সযনদাযকত্থেৰঅপদানৱণ্ণনা সমত্তা.

৪. গন্ধোদকিযত্থেৰঅপদানৱণ্ণনা

পদুমুত্তৰবুদ্ধস্সাতিআদিকং আযস্মতো গন্ধোদকিযত্থেৰস্স অপদানং. অযম্পি পুৰিমমুনিৱৰেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে কুলগেহে নিব্বত্তো পৰিনিব্বুতে ভগৱতি নগৰৱাসিনো বোধিপূজং কুৰুমানে দিস্ৱা ৱিচিত্তঘটে চন্দনকপ্পুৰাগৰুআদিমিস্সকসুগন্ধোদকেন পূৰেত্ৱা বোধিৰুক্খং অভিসিঞ্চি. তস্মিং খণে দেৱো মহাধাৰাহি পৱস্সি. তদা সো অসনিৱেগেন কালং কতো. তেনেৱ পুঞ্ঞকম্মেন দেৱলোকে নিব্বত্তি, তত্থেৱ ঠিতো ‘‘অহো বুদ্ধো, অহো ধম্মো’’তিআদিগাথাযো অভাসি. এৱং সো দেৱমনুস্সেসু সম্পত্তিযো অনুভৱিত্ৱা সব্বপৰিড়াহৱিপ্পমুত্তো নিব্বত্তনিব্বত্তট্ঠানে সীতিভাৱমুপগতো সুখিতো ইমস্মিং বুদ্ধুপ্পাদে কুলগেহে নিব্বত্তো ৱিঞ্ঞুতং পত্তো সত্থৰি পসন্নো পব্বজিত্ৱা কম্মট্ঠানং আৰভিত্ৱা ৱিপস্সন্তো নচিৰস্সেৱ অৰহত্তং পাপুণি. পুব্বে কতপুঞ্ঞেন গন্ধোদকিযত্থেৰোতি পাকটো অহোসি.

২৫. সো একদিৱসং অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পদুমুতৰস্সাতিআদিমাহ. তং ৱুত্তত্থমেৱ. মহাবোধিমহো অহূতি মহাবোধিৰুক্খস্স পূজা অহোসীতি অত্থো. ৱিচিত্তং ঘটমাদাযাতি অনেকেহি চিত্তকম্মসুৱণ্ণকম্মেহি ৱিচিত্তং সোভমানং গন্ধোদকপুণ্ণং ঘটং গহেত্ৱাতি অত্থো. গন্ধোদকমদাসহন্তি গন্ধোদকং অদাসিং, অহং গন্ধোদকেন অভিসিঞ্চিন্তি অত্থো.

২৬. ন্হানকালে চ বোধিযাতি বোধিযা পূজাকৰণসমযেতি অত্থো. সেসং উত্তানত্থমেৱাতি.

গন্ধোদকিযত্থেৰঅপদানৱণ্ণনা সমত্তা.

৫. ওপৱয্হত্থেৰঅপদানৱণ্ণনা

পদুমুত্তৰবুদ্ধস্সাতিআদিকং আযস্মতো ওপৱয্হত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰজিনাদিচ্চে লোকে পাতুভূতে একস্মিং ৱিভৱসম্পন্নকুলে নিব্বত্তো ৱুদ্ধিমন্ৱায মহদ্ধনো মহাভোগো ঘৰাৱাসং ৱসমানো সাসনে পসন্নো সত্থৰি পসাদবহুমানো আজানীযেন সিন্ধৱেন পূজং অকাসি, পূজেত্ৱা চ পন ‘‘বুদ্ধাদীনং সমণানং হত্থিঅস্সাদযো ন কপ্পন্তি, কপ্পিযভণ্ডং দস্সামী’’তি চিন্তেত্ৱা তং অগ্ঘাপেত্ৱা তদগ্ঘনকেন কহাপণেন কপ্পিযং কপ্পাসিককম্বলকোজৱাদিকং চীৱৰং কপ্পূৰতক্কোলাদিকং ভেসজ্জপৰিক্খাৰঞ্চ অদাসি. সো তেন পুঞ্ঞকম্মেন যাৱতাযুকং ঠত্ৱা ততো চুতো দেৱেসু চ মনুস্সেসু চ হত্থিঅস্সাদিঅনেকৱাহনসম্পন্নো সুখং অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱিঞ্ঞুতং পত্তো সদ্ধাসম্পন্নো সাসনে পব্বজিত্ৱা কম্মট্ঠানং গহেত্ৱা ৱিপস্সনং ৱড্ঢেত্ৱা মগ্গপটিপাটিযা অৰহত্তে পতিট্ঠাসি, পুব্বে কতপুঞ্ঞসম্ভাৰৱসেন ওপৱয্হত্থেৰোতি পাকটো অহোসি.

৩৩. সো ‘‘কেন নু খো কাৰণেন ইদং মযা সন্তিপদং অধিগত’’ন্তি উপধাৰেন্তো পুব্বকম্মং ঞাণেন পচ্চক্খতো ঞত্ৱা সোমনস্সজাতো পুব্বচৰিতাপদানং উদানৱসেন পকাসেন্তো পদুমুত্তৰবুদ্ধস্সাতিআদিমাহ. তং ৱুত্তত্থমেৱ. আজানীযমদাসহন্তি আজানীযং উত্তমজাতিসিন্ধৱং অহং অদাসিং পূজেসিন্তি অত্থো.

৩৫. সপত্তভাৰোতি সস্স অত্তনো পত্তানি অট্ঠ পৰিক্খাৰানি ভাৰানি যস্স সো সপত্তভাৰো, অট্ঠপৰিক্খাৰযুত্তোতি অত্থো.

৩৬. খমনীযমদাসহন্তি খমনীযযোগ্গং চীৱৰাদিকপ্পিযপৰিক্খাৰন্তি অত্থো.

৪০. চৰিমোতি পৰিযোসানো কোটিপ্পত্তো ভৱোতি অত্থো. সেসং সুৱিঞ্ঞেয্যমেৱাতি.

ওপৱয্হত্থেৰঅপদানৱণ্ণনা সমত্তা.

৬. সপৰিৱাৰাসনত্থেৰঅপদানৱণ্ণনা

পদুমুত্তৰবুদ্ধস্সাতিআদিকং আযস্মতো সপৰিৱাৰাসনত্থেৰস্স অপদানং. সোপি পুৰিমবুদ্ধেসু কতাধিকাৰো তত্থ তত্থ ভৱেসু ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে ৱিভৱসম্পন্নে কুলগেহে নিব্বত্তো ৱুদ্ধিপ্পত্তো সদ্ধাজাতো সাসনে পসন্নো দানফলং সদ্দহন্তো নানগ্গৰসভোজনেন ভগৱতো পিণ্ডপাতং অদাসি, দত্ৱা চ পন ভোজনসালাযং ভোজনত্থায নিসিন্নাসনং জাতিসুমনমল্লিকাদীহি অলঙ্কৰি. ভগৱা চ ভত্তানুমোদনমকাসি. সো তেন পুঞ্ঞকম্মেন দেৱমনুস্সেসু সংসৰন্তো অনেকৱিধং সম্পত্তিং অনুভৱিত্ৱা ইমস্মিং বুদ্ধুপ্পাদে ৱিভৱসম্পন্নে কুলগেহে নিব্বত্তো ৱুদ্ধিমন্ৱায সদ্ধো পসন্নো পব্বজিত্ৱা ন চিৰস্সেৱ অৰহা অহোসি.

৪৩. সো এৱং পত্তসন্তিপদো ‘‘কেন নু খো পুঞ্ঞেন ইদং সন্তিপদং অনুপ্পত্ত’’ন্তি ঞাণেন উপধাৰেন্তো পুব্বকম্মং দিস্ৱা সোমনস্সজাতো পুব্বচৰিতাপদানং পকাসেন্তো পদুমুত্তৰবুদ্ধস্সাতিআদিমাহ. তং ৱুত্তত্থমেৱ. পিণ্ডপাতং অদাসহন্তি তত্থ তত্থ লদ্ধানং পিণ্ডানং কবড়ং কবড়ং কত্ৱা পাতব্বতো খাদিতব্বতো আহাৰো পিণ্ডপাতো, তং পিণ্ডপাতং ভগৱতো অদাসিং, ভগৱন্তং ভোজেসিন্তি অত্থো.

৪৪. অকিত্তযি পিণ্ডপাতন্তি মযা দিন্নপিণ্ডপাতস্স গুণং আনিসংসং পকাসেসীতি অত্থো.

৪৮. সংৱুতো পাতিমোক্খস্মিন্তি পাতিমোক্খসংৱৰসীলেন সংৱুতো পিহিতো পটিচ্ছন্নোতি অত্থো. ইন্দ্ৰিযেসু চ পঞ্চসূতি চক্খুন্দ্ৰিযাদীসু পঞ্চসু ইন্দ্ৰিযেসু ৰূপাদীহি গোপিতো ইন্দ্ৰিযসংৱৰসীলঞ্চ গোপিতোতি অত্থো. সেসং সুৱিঞ্ঞেয্যমেৱাতি.

সপৰিৱাৰাসনত্থেৰঅপদানৱণ্ণনা সমত্তা.

৭. পঞ্চদীপকত্থেৰঅপদানৱণ্ণনা

পদুমুত্তৰবুদ্ধস্সাতিআদিকং আযস্মতো পঞ্চদীপকত্থেৰস্স অপদানং. অযম্পি পুৰিমবুদ্ধেসু কতাধিকাৰো উপ্পন্নুপ্পন্নভৱেসু ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে কুলগেহে নিব্বত্তো ৱুদ্ধিমন্ৱায ঘৰাৱাসে ৱসন্তো ভগৱতো ধম্মং সুত্ৱা সম্মাদিট্ঠিযং পতিট্ঠিতো সদ্ধো পসন্নো মহাজনেহি বোধিপূজং কযিৰমানং দিস্ৱা সযম্পি বোধিং পৰিৱাৰেত্ৱা দীপং জালেত্ৱা পূজেসি. সো তেন পুঞ্ঞকম্মেন দেৱমনুস্সেসু সংসৰন্তো চক্কৱত্তিসম্পত্তিআদযো অনুভৱিত্ৱা সব্বত্থেৱ উপ্পন্নভৱে জলমানো জোতিসম্পন্নৱিমানাদীসু ৱসিত্ৱা ইমস্মিং বুদ্ধুপ্পাদে একস্মিং ৱিভৱসম্পন্নে কুলগেহে নিব্বত্তো ৱুদ্ধিপ্পত্তো সদ্ধাজাতো পব্বজিত্ৱা নচিৰস্সেৱ অৰহা অহোসি, দীপপূজানিস্সন্দেন দীপকত্থেৰোতি পাকটো.

৫০. সো একদিৱসং অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পদুমুত্তৰবুদ্ধস্সাতিআদিমাহ. তং ৱুত্তত্থমেৱ. উজুদিট্ঠি অহোসহন্তি ৱঙ্কং মিচ্ছাদিট্ঠিং ছড্ডেত্ৱা উজু অৱঙ্কং নিব্বানাভিমুখং পাপুণনসম্মাদিট্ঠি অহোসিন্তি অত্থো.

৫১. পদীপদানং পাদাসিন্তি এত্থ পকাৰেন দিব্বতি জোততীতি পদীপো, তস্স দানং পদীপদানং, তং অদাসিং পদীপপূজং অকাসিন্তি অত্থো. সেসং সব্বত্থ উত্তানত্থমেৱাতি.

পঞ্চদীপকত্থেৰঅপদানৱণ্ণনা সমত্তা.

৮. ধজদাযকত্থেৰঅপদানৱণ্ণনা

পদুমুত্তৰবুদ্ধস্সাতিআদিকং আযস্মতো ধজদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে একস্মিং কুলগেহে নিব্বত্তো ৱুদ্ধিমন্ৱায সত্থৰি পসীদিত্ৱা সুন্দৰেহি অনেকেহি ৱত্থেহি ধজং কাৰাপেত্ৱা ধজপূজং অকাসি. সো তেন পুঞ্ঞকম্মেন উপ্পন্নুপ্পন্নভৱে উচ্চকুলে নিব্বত্তো পূজনিযো অহোসি. অপৰভাগে ইমস্মিং বুদ্ধুপ্পাদে একস্মিং কুলগেহে নিব্বত্তো ৱুদ্ধিমন্ৱায পুত্তদাৰেহি ৱড্ঢিত্ৱা মহাভোগো যসৱা সদ্ধাজাতো সত্থৰি পসন্নো ঘৰাৱাসং পহায পব্বজিত্ৱা নচিৰস্সেৱ অৰহা অহোসি.

৫৭. সো পত্তঅৰহত্তফলো পুব্বকম্মং সৰিত্ৱা সোমনস্সজাতো অত্তনো পুব্বচৰিতাপদানং পকাসেন্তো পদুমুত্তৰবুদ্ধস্সাতিআদিমাহ. তস্সত্থো পুব্বে ৱুত্তোযেৱ. হট্ঠো হট্ঠেন চিত্তেনাতি সোমনস্সসহগতচিত্তযুত্তত্তা হট্ঠো পৰিপুণ্ণৰূপকাযো সদ্ধাসম্পযুত্তচিত্ততায হট্ঠেন চিত্তেন সন্তুট্ঠেন চিত্তেনাতি অত্থো. ধজমাৰোপযিং অহন্তি ধুনাতি কম্পতি চলতীতি ধজং, তং ধজং আৰোপযিং ৱেড়গ্গে লগ্গেত্ৱা পূজেসিন্তি অত্থো.

৫৮-৯. পতিতপত্তানি গণ্হিত্ৱাতি পতিতানি বোধিপত্তানি গহেত্ৱা অহং বহি ছড্ডেসিন্তি অত্থো. অন্তোসুদ্ধং বহিসুদ্ধন্তি অন্তো চিত্তসন্তাননামকাযতো চ বহি চক্খুসোতাদিৰূপকাযতো চ সুদ্ধিং অধি ৱিসেসেন মুত্তং কিলেসতো ৱিমুত্তং অনাসৱং সম্বুদ্ধং ৱিয সম্মুখা উত্তমং বোধিং অৱন্দিং পণামমকাসিন্তি অত্থো. সেসং সব্বত্থ উত্তানত্থমেৱাতি.

ধজদাযকত্থেৰঅপদানৱণ্ণনা সমত্তা.

৯. পদুমত্থেৰঅপদানৱণ্ণনা

চতুসচ্চং পকাসেন্তোতিআদিকং আযস্মতো পদুমত্থেৰস্স অপদানং. অযম্পি পুৰিমবুদ্ধেসু কতকুসলসম্ভাৰো পদুমুত্তৰমুনিনা ধম্মপজ্জোতে জোতমানে একস্মিং কুলগেহে নিব্বত্তো ঘৰাৱাসং সণ্ঠপেত্ৱা ভোগসম্পন্নোতি পাকটো. সো সত্থৰি পসীদিত্ৱা মহাজনেন সদ্ধিং ধম্মং সুণন্তো ধজেন সহ পদুমকলাপং গহেত্ৱা অট্ঠাসি, সধজং তং পদুমকলাপং আকাসমুক্খিপিং, তং অচ্ছৰিযং দিস্ৱা অতিৱিয সোমনস্সজাতো অহোসি. সো যাৱজীৱং কুসলং কত্ৱা জীৱিতপৰিযোসানে সগ্গে নিব্বত্তো ধজমিৱ ছকামাৱচৰে পাকটো পূজিতো চ দিব্বসম্পত্তিমনুভৱিত্ৱা মনুস্সেসু চ চক্কৱত্তিসম্পত্তিমনুভৱিত্ৱা ইমস্মিং বুদ্ধুপ্পাদে ৱিভৱসম্পন্নে সদ্ধাসম্পন্নে একস্মিং কুলগেহে নিব্বত্তো ৱুদ্ধিমন্ৱায সদ্ধাজাতো পঞ্চৱস্সিকোৱ পব্বজিত্ৱা নচিৰস্সেৱ অৰহা হুত্ৱা কতপুঞ্ঞনামেন পদুমত্থেৰোতি পাকটো.

৬৭. অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো চতুসচ্চং পকাসেন্তোতিআদিমাহ. তত্থ সচ্চন্তি তথং অৱিতথং অৱিপৰীতং সচ্চং, দুক্খসমুদযনিৰোধমগ্গৱসেন চত্তাৰি সচ্চানি সমাহটানীতি চতুসচ্চং, তং চতুসচ্চং পকাসেন্তো লোকে পাকটং কৰোন্তোতি অত্থো. ৱৰধম্মপ্পৱত্তকোতি উত্তমধম্মপ্পৱত্তকো পকাসকোতি অত্থো. অমতং ৱুট্ঠিন্তি অমতমহানিব্বানৱুট্ঠিধাৰং পৱস্সন্তো পগ্ঘৰন্তো সদেৱকং লোকং তেমেন্তো সব্বকিলেসপৰিড়াহং নিব্বাপেন্তো ধম্মৱস্সং ৱস্সতীতি অত্থো.

৬৮. সধজং পদুমং গয্হাতি ধজেন সহ একতো কত্ৱা পদুমং পদুমকলাপং গহেত্ৱাতি অত্থো. অড্ঢকোসে ঠিতো অহন্তি উভো উক্খিপিত্ৱা ঠিতো অহন্তি অত্থো. সেসং সব্বত্থ উত্তানত্থমেৱাতি.

পদুমত্থেৰঅপদানৱণ্ণনা সমত্তা.

১০. অসনবোধিযত্থেৰঅপদানৱণ্ণনা

জাতিযা সত্তৱস্সোহন্তিআদিকং আযস্মতো অসনবোধিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো তিস্সস্স ভগৱতো কালে অঞ্ঞতৰস্মিং কুলগেহে নিব্বত্তো ৱুদ্ধিপ্পত্তো সুখপ্পত্তো সাসনে পসন্নো অসনবোধিতো ফলং গহেত্ৱা ততো ৱুট্ঠিতবোধিতৰুণে গহেত্ৱা বোধিং ৰোপেসি, যথা ন ৱিনস্সতি তথা উদকাসিঞ্চনাদিকম্মেন ৰক্খিত্ৱা পূজেসি. সো তেন পুঞ্ঞেন দেৱমনুস্সেসু সম্পত্তিযো অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো পৰিপক্কসম্ভাৰত্তা সত্তৱস্সিকোৱ সমানো পব্বজিত্ৱা খুৰগ্গেযেৱ অৰহত্তং পাপুণি, পুৰাকতপুঞ্ঞনামেন অসনবোধিযত্থেৰোতি পাকটো.

৭৮. সো পুব্বসম্ভাৰমনুস্সৰিত্ৱা সোমনস্সজাতো পুব্বচৰিতাপদানং পকাসেন্তো জাতিযা সত্তৱস্সোহন্তিআদিমাহ. তত্থ জাতিযাতি মাতুগব্ভতো নিক্খন্তকালতো পট্ঠাযাতি অত্থো. সত্তৱস্সো পৰিপুণ্ণসৰদো অহং লোকনাযকং তিস্সং ভগৱন্তং অদ্দসন্তি সম্বন্ধো. পসন্নচিত্তো সুমনোতি পকাৰেন পসন্নঅনালুড়িতঅৱিকম্পিতচিত্তো, সুমনো সুন্দৰমনো সোমনস্সসহগতচিত্তোতি অত্থো.

৭৯. তিস্সস্সাহং ভগৱতোতি তিক্খত্তুং জাতোতি তিস্সো, সো মাতুগব্ভতো, মনুস্সজাতিতো, পঞ্চক্খন্ধতো চ মুত্তো হুত্ৱা জাতো নিব্বত্তো বুদ্ধো জাতোতি অত্থো. তস্স তিস্সস্স ভগৱতো তাদিনো, লোকজেট্ঠস্স অসনবোধিং উত্তমং ৰোপযিন্তি সম্বন্ধো.

৮০. অসনো নামধেয্যেনাতি নামপঞ্ঞত্তিযা নামসঞ্ঞায অসনো নাম অসনৰুক্খো বোধি অহোসীতি অত্থো. ধৰণীৰুহপাদপোতি ৱল্লিৰুক্খপব্বতগঙ্গাসাগৰাদযো ধাৰেতীতি ধৰণী, কা সা? পথৱী, তস্সং ৰুহতি পতিট্ঠহতীতি ধৰণীৰুহো, পাদেন পিৱতীতি পাদপো, পাদসঙ্খাতেন মূলেন সিঞ্চিতোদকং পিৱতি আপোৰসং সিনেহং ধাৰেতীতি অত্থো. ধৰণীৰুহো চ সো পাদপো চাতি ধৰণীৰুহপাদপো, তং উত্তমং অসনং বোধিং পঞ্চ ৱস্সানি পৰিচৰিং পোসেসিন্তি অত্থো.

৮১. পুপ্ফিতং পাদপং দিস্ৱাতি তং মযা পোসিতং অসনবোধিৰুক্খং পুপ্ফিতং অচ্ছৰযোগ্গভূতপুপ্ফত্তা অব্ভুতং লোমহংসকৰণং দিস্ৱা সকং কম্মং অত্তনো কম্মং পকিত্তেন্তো পকাৰেন কথযন্তো বুদ্ধসেট্ঠস্স সন্তিকং অগমাসিন্তি অত্থো. সেসং সব্বত্থ উত্তানত্থমেৱাতি.

অসনবোধিযত্থেৰঅপদানৱণ্ণনা সমত্তা.

ছট্ঠৱগ্গৱণ্ণনা সমত্তা.