৭. সকচিন্তনিযৱগ্গো

১. সকচিন্তনিযত্থেৰঅপদানৱণ্ণনা

পৱনং কাননং দিস্ৱাতিআদিকং আযস্মতো সকচিন্তনিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে একস্মিং কুলগেহে নিব্বত্তো ৱুদ্ধিমন্ৱায তস্স ভগৱতো আযুপৰিযোসানে উপ্পন্নো ধৰমানং ভগৱন্তং অপাপুণিত্ৱা পৰিনিব্বুতকালে ইসিপব্বজ্জং পব্বজিত্ৱা হিমৱন্তে ৱসন্তো ৱিৱেকং ৰমণীযং একং ৱনং পত্ৱা তত্থেৱেকায কন্দৰায পুলিনচেতিযং কত্ৱা ভগৱতি সঞ্ঞং কত্ৱা সধাতুকসঞ্ঞঞ্চ কত্ৱা ৱনপুপ্ফেহি পূজেত্ৱা নমস্সমানো পৰিচৰি. সো তেন পুঞ্ঞকম্মেন দেৱমনুস্সেসু সংসৰন্তো দ্ৱীসু অগ্গং অগ্গসম্পত্তিং অগ্গঞ্চ চক্কৱত্তিসম্পত্তিং অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱিভৱসম্পন্নো সদ্ধাসম্পন্নো সত্থৰি পসীদিত্ৱা পব্বজিত্ৱা অৰহা ছড়ভিঞ্ঞো অহোসি.

১. সো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পৱনং কাননং দিস্ৱাতিআদিমাহ. তত্থ পৱনন্তি পকাৰেন ৱনং পত্থটং ৱিত্থিণ্ণং গহনভূতন্তি পৱনং. কাননং অৱকুচ্ছিতং আননং অৱহনং সততং সীহব্যগ্ঘযক্খৰক্খসমদ্দহত্থিঅস্সসুপণ্ণউৰগেহি ৱিহঙ্গগণসদ্দকুক্কুটকোকিলেহি ৱা বহলন্তি কাননং, তং কাননসঙ্খাতং পৱনং মনুস্সসদ্দৱিৰহিতত্তা অপ্পসদ্দং নিস্সদ্দন্তি অত্থো. অনাৱিলন্তি ন আৱিলং উপদ্দৱৰহিতন্তি অত্থো. ইসীনং অনুচিণ্ণন্তি বুদ্ধপচ্চেকবুদ্ধঅৰহন্তখীণাসৱসঙ্খাতানং ইসীনং অনুচিণ্ণং নিসেৱিতন্তি অত্থো. আহুতীনং পটিগ্গহন্তি আহুনং ৱুচ্চতি পূজাসক্কাৰং পটিগ্গহং গেহসদিসন্তি অত্থো.

২. থূপং কত্ৱান ৱেড়ুনাতি ৱেড়ুপেসিকাহি চেতিযং কত্ৱাতি অত্থো. নানাপুপ্ফং সমোকিৰিন্তি চম্পকাদীহি অনেকেহি পুপ্ফেহি সমোকিৰিং পূজেসিন্তি অত্থো. সম্মুখা ৱিয সম্বুদ্ধন্তি সজীৱমানস্স সম্বুদ্ধস্স সম্মুখা ইৱ নিম্মিতং উপ্পাদিতং চেতিযং অহং অভি ৱিসেসেন ৱন্দিং পণামমকাসিন্তি অত্থো. সেসং সুৱিঞ্ঞেয্যমেৱাতি.

সকচিন্তনিযত্থেৰঅপদানৱণ্ণনা সমত্তা.

২. অৱোপুপ্ফিযত্থেৰঅপদানৱণ্ণনা

ৱিহাৰা অভিনিক্খম্মাতিআদিকং আযস্মতো অৱোপুপ্ফিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিখিস্স ভগৱতো কালে কুলগেহে নিব্বত্তো ৱিঞ্ঞুতং পত্তো সদ্ধাসম্পন্নো ধম্মং সুত্ৱা সোমনস্সপ্পত্তো নানাপুপ্ফানি উভোহি হত্থেহি গহেত্ৱা বুদ্ধস্স উপৰি অব্ভুক্কিৰি. সো তেন পুঞ্ঞেন দেৱমনুস্সেসু সংসৰন্তো সগ্গসম্পত্তিঞ্চ চক্কৱত্তিসম্পত্তিঞ্চ অনুভৱিত্ৱা সব্বত্থ পূজিতো ইমস্মিং বুদ্ধুপ্পাদে একস্মিং কুলগেহে নিব্বতো ৱুদ্ধিপ্পত্তো সাসনে পসীদিত্ৱা পব্বজিত্ৱা নচিৰস্সেৱ অৰহা অহোসি. আ সমন্ততো কাসতি দিপ্পতীতি আকাসো, তস্মিং আকাসে পুপ্ফানং অৱকিৰিতত্তা অৱোপুপ্ফিযত্থেৰোতি পাকটো.

৭. এৱং পত্তসন্তিপদো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো ৱিহাৰা অভিনিক্খম্মাতিআদিমাহ. তত্থ ৱিহাৰাতি ৱিসেসেন হৰতি চতূহি ইৰিযাপথেহি অপতন্তং অত্তভাৱং আহৰতি পৱত্তেতি এত্থাতি ৱিহাৰো, তস্মা ৱিহাৰা অভি ৱিসেসেন নিক্খম্ম নিক্খমিত্ৱা. অব্ভুট্ঠাসি চ চঙ্কমেতি চঙ্কমনত্থায সট্ঠিৰতনে চঙ্কমে অভিৱিসেসেন উট্ঠাসি, অভিৰুহীতি অত্থো. চতুসচ্চং পকাসেন্তোতি তস্মিং চঙ্কমে চঙ্কমন্তো দুক্খসমুদযনিৰোধমগ্গসচ্চসঙ্খাতং চতুসচ্চং পকাসেন্তো পাকটং কৰোন্তো অমতং পদং নিব্বানং দেসেন্তো ৱিভজন্তো উত্তানীকৰোন্তো তস্মিং চঙ্কমেতি সম্বন্ধো.

৮. সিখিস্স গিৰমঞ্ঞায, বুদ্ধসেট্ঠস্স তাদিনোতি সেট্ঠস্স তাদিগুণসমঙ্গিস্স সিখিস্স বুদ্ধস্স গিৰং সদ্দং ঘোসং অঞ্ঞায জানিত্ৱা. নানাপুপ্ফং গহেত্ৱানাতি নাগপুন্নাগাদিঅনেকানি পুপ্ফানি গহেত্ৱা আহৰিত্ৱা. আকাসম্হি সমোকিৰিন্তি চঙ্কমন্তস্স ভগৱতো মুদ্ধনি আকাসে ওকিৰিং পূজেসিং.

৯. তেন কম্মেন দ্ৱিপদিন্দাতি দ্ৱিপদানং দেৱব্ৰহ্মমনুস্সানং ইন্দ পধানভূত. নৰাসভ নৰানং আসভভূত. পত্তোম্হি অচলং ঠানন্তি তুম্হাকং সন্তিকে পব্বজিত্ৱা অচলং ঠানং নিব্বানং পত্তো অম্হি ভৱামি. হিত্ৱা জযপৰাজযন্তি দিব্বমনুস্সসম্পত্তিসঙ্খাতং জযঞ্চ চতুৰাপাযদুক্খসঙ্খাতং পৰাজযঞ্চ হিত্ৱা ছড্ডেত্ৱা নিব্বানং পত্তোস্মীতি অত্থো. সেসং সুৱিঞ্ঞেয্যমেৱাতি.

অৱোপুপ্ফিযত্থেৰঅপদানৱণ্ণনা সমত্তো.

৩. পচ্চাগমনিযত্থেৰঅপদানৱণ্ণনা

সিন্ধুযা নদিযা তীৰেতিআদিকং আযস্মতো পচ্চাগমনিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে সিন্ধুযা গঙ্গায সমীপে চক্কৱাকযোনিযং নিব্বত্তো পুব্বসম্ভাৰযুত্তত্তা পাণিনো অখাদন্তো সেৱালমেৱ ভক্খযন্তো চৰতি. তস্মিং সমযে ৱিপস্সিভগৱা সত্তানুগ্গহং কৰোন্তো তত্থ অগমাসি. তস্মিং খণে সো চক্কৱাকো ৱিজ্জোতমানং ভগৱন্তং দিস্ৱা পসন্নমানসো তুণ্ডেন সালৰুক্খতো সালপুপ্ফং ছিন্দিত্ৱা আগম্ম পূজেসি. সো তেনেৱ চিত্তপ্পসাদেন ততো চুতো দেৱলোকে উপ্পন্নো অপৰাপৰং ছকামাৱচৰসম্পত্তিং অনুভৱিত্ৱা ততো চুতো মনুস্সলোকে উপ্পজ্জিত্ৱা চক্কৱত্তিসম্পত্তিআদযো অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱিঞ্ঞুতং পত্তো পুব্বচৰিতৱসেন সত্থৰি পসন্নো পব্বজিত্ৱা নচিৰস্সেৱ অৰহা অহোসি, চক্কৱাকো হুত্ৱা ভগৱন্তং দিস্ৱা কত্থচি গন্ত্ৱা পুপ্ফমাহৰিত্ৱা পূজিতত্তা পুব্বপুঞ্ঞনামেন পচ্চাগমনিযত্থেৰোতি পাকটো.

১৩. অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো সিন্ধুযা নদিযা তীৰেতিআদিমাহ. সীতি সদ্দং কুৰুমানা ধুনাতি কম্পতীতি সিন্ধু, নদতি সদ্দং কৰোন্তো গচ্ছতীতি নদি. চক্কৱাকো অহং তদাতি চক্কং সীঘং গচ্ছন্তং ইৱ উদকে ৱা থলে ৱা আকাসে ৱা সীঘং ৱাতি গচ্ছতীতি চক্কৱাকো. তদা ৱিপস্সিং ভগৱন্তং দস্সনকালে অহং চক্কৱাকো অহোসিন্তি অত্থো. সুদ্ধসেৱালভক্খোহন্তি অঞ্ঞগোচৰঅমিস্সত্তা সুদ্ধসেৱালমেৱ খাদন্তো অহং ৱসামি. পাপেসু চ সুসঞ্ঞতোতি পুব্বৱাসনাৱসেন পাপকৰণে সুট্ঠু সঞ্ঞতো তীহি দ্ৱাৰেহি সঞ্ঞতো সুসিক্খিতো.

১৪. অদ্দসং ৱিৰজং বুদ্ধন্তি ৰাগদোসমোহৱিৰহিতত্তা ৱিৰজং নিক্কিলেসং বুদ্ধং অদ্দসং অদ্দক্খিং. গচ্ছন্তং অনিলঞ্জসেতি অনিলঞ্জসে আকাসপথে গচ্ছন্তং বুদ্ধং. তুণ্ডেন ময্হং মুখতুণ্ডেন তালং সালপুপ্ফং পগ্গয্হ পগ্গহেত্ৱা ৱিপস্সিস্সাভিৰোপযিং ৱিপস্সিস্স ভগৱতো পূজেসিন্তি অত্থো. সেসং সুৱিঞ্ঞেয্যমেৱাতি.

পচ্চাগমনিযত্থেৰঅপদানৱণ্ণনা সমত্তা.

৪. পৰপ্পসাদকত্থেৰঅপদানৱণ্ণনা

উসভং পৱৰং ৱীৰন্তিআদিকং আযস্মতো পৰপ্পসাদকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে ব্ৰাহ্মণকুলে নিব্বত্তো তিণ্ণং ৱেদানং পাৰগূ ইতিহাসপঞ্চমানং পদকো ৱেয্যাকৰণো সনিঘণ্ডুকেটুভানং সাক্খৰপ্পভেদানং লোকাযতমহাপুৰিসলক্খণেসু অনৱযো নামেন সেলব্ৰাহ্মণোতি পাকটো সিদ্ধত্থং ভগৱন্তং দিস্ৱা দ্ৱত্তিংসমহাপুৰিসলক্খণেহি অসীতিঅনুব্যঞ্জনেহি চাতি সযং সোভমানং দিস্ৱা পসন্নমানসো অনেকেহি কাৰণেহি অনেকাহি উপমাহি থোমনং পকাসেসি. সো তেন পুঞ্ঞকম্মেন দেৱলোকে সক্কমাৰাদযো ছ কামাৱচৰসম্পত্তিযো অনুভৱিত্ৱা মনুস্সেসু চক্কৱত্তিসম্পত্তিং অনুভৱিত্ৱা ইমস্মিং বুদ্ধুপ্পাদে ৱিভৱসম্পন্নে একস্মিং কুলগেহে নিব্বত্তো ৱিঞ্ঞুতং পত্তো সত্থৰি পসীদিস্ৱা পব্বজিতো নচিৰস্সেৱ চতুপটিসম্ভিদাছড়ভিঞ্ঞপ্পত্তো মহাখীণাসৱো অহোসি, বুদ্ধস্স থুতিযা সত্তানং সব্বেসং চিত্তপ্পসাদকৰণতো পৰপ্পসাদকত্থেৰোতি পাকটো.

২০. একদিৱসং অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো উসভং পৱৰং ৱীৰন্তিআদিমাহ. তত্থ উসভন্তি ৱসভো নিসভো ৱিসভো আসভোতি চত্তাৰো জেট্ঠপুঙ্গৱা. তত্থ গৱসতজেট্ঠকো ৱসভো, গৱসহস্সজেট্ঠকো নিসভো, গৱসতসহস্সজেট্ঠকো ৱিসভো, গৱকোটিসতসহস্সজেট্ঠকো আসভোতি চ যস্স কস্সচি থুতিং কৰোন্তা ব্ৰাহ্মণপণ্ডিতা বহুস্সুতা অত্তনো অত্তনো পঞ্ঞাৱসেন থুতিং কৰোন্তি, বুদ্ধানং পন সব্বাকাৰেন থুতিং কাতুং সমত্থো একোপি নত্থি. অপ্পমেয্যো হি বুদ্ধো. ৱুত্তঞ্হেতং –

‘‘বুদ্ধোপি বুদ্ধস্স ভণেয্য ৱণ্ণং, কপ্পম্পি চে অঞ্ঞমভাসমানো;

খীযেথ কপ্পো চিৰদীঘমন্তৰে, ৱণ্ণো ন খীযেথ তথাগতস্সা’’তি. (দী. নি. অট্ঠ. ১.৩০৪; ৩.১৪১; ম. নি. অট্ঠ. ২.৪২৫; উদা. অট্ঠ. ৫৩) –

আদিকং. অযম্পি ব্ৰাহ্মণো মুখাৰূড়্হৱসেন একপসীদনৱসেন ‘‘আসভ’’ন্তি ৱত্তব্বে ‘‘উসভ’’ন্তিআদিমাহ. ৱৰিতব্বো পত্থেতব্বোতি ৱৰো. অনেকেসু কপ্পসতসহস্সেসু কতৱীৰিযত্তা ৱীৰো. মহন্তং সীলক্খন্ধাদিকং এসতি গৱেসতীতি মহেসী, তং মহেসিং বুদ্ধং. ৱিসেসেন কিলেসখন্ধমাৰাদযো মাৰে জিতৱাতি ৱিজিতাৱী, তং ৱিজিতাৱিনং সম্বুদ্ধং. সুৱণ্ণস্স ৱণ্ণো ইৱ ৱণ্ণো যস্স সম্বুদ্ধস্স সো সুৱণ্ণৱণ্ণো, তং সুৱণ্ণৱণ্ণং সম্বুদ্ধং দিস্ৱা কো নাম সত্তো নপ্পসীদতীতি.

পৰপ্পসাদকত্থেৰঅপদানৱণ্ণনা সমত্তা.

৫. ভিসদাযকত্থেৰঅপদানৱণ্ণনা

ৱেস্সভূ নাম নামেনাতিআদিকং আযস্মতো ভিসদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱেস্সভুস্স ভগৱতো কালে হিমৱন্তস্মিং হত্থিযোনিযং নিব্বত্তো তস্মিং পটিৱসতি. তস্মিং সমযে ৱেস্সভূ ভগৱা ৱিৱেককামো হিমৱন্তমগমাসি. তং দিস্ৱা সো হত্থিনাগো পসন্নমানসো ভিসমুড়ালং গহেত্ৱা ভগৱন্তং ভোজেসি. সো তেন পুঞ্ঞকম্মেন হত্থিযোনিতো চুতো দেৱলোকে উপ্পজ্জিত্ৱা তত্থ ছ কামাৱচৰসম্পত্তিযো অনুভৱিত্ৱা মনুস্সত্তমাগতো মনুস্সেসু চক্কৱত্তিসম্পত্তিআদযো অনুভৱিত্ৱা ইমস্মিং বুদ্ধুপ্পাদে মহাভোগে অঞ্ঞতৰস্মিং কুলে নিব্বত্তো পুব্বৱাসনাবলেন সত্থৰি পসন্নো পব্বজিত্ৱা নচিৰস্সেৱ অৰহা অহোসি, সো পুব্বে কতকুসলনামেন ভিসদাযকত্থেৰোতি পাকটো.

২৯. সো অত্তনো পুব্বকম্মং সৰিত্ৱা পুব্বচৰিতাপদানং দস্সেন্তো ৱেস্সভূ নাম নামেনাতিআদিমাহ. তত্থ ৱেস্সভূতি ৱেস্সং ভুনাতি অতিক্কমতীতি ৱেস্সভূ. অথ ৱা ৱেস্সে ৱাণিজকম্মে ৱা কামৰাগাদিকে ৱা কুসলাদিকম্মে ৱা ৱত্থুকামকিলেসকামে ৱা ভুনাতি অভিভৱতীতি ৱেস্সভূ, সো নামেন ৱেস্সভূ নাম ভগৱা. ইসীনং ততিযো অহূতি কুসলধম্মে এসতি গৱেসতীতি ইসি, ‘‘ৱিপস্সী, সিখী, ৱেস্সভূ’’তি ৱুত্তত্তা ততিযো ইসি ততিযো ভগৱা অহু অহোসীতি অত্থো. কাননং ৱনমোগ্গয্হাতি কাননসঙ্খাতং ৱনং ওগয্হ ওগহেত্ৱা পাৱিসীতি অত্থো.

৩০. ভিসমুড়ালং গণ্হিত্ৱাতি দ্ৱিপদচতুপ্পদানং ছাতকং ভিসতি হিংসতি ৱিনাসেতীতি ভিসং, কো সো? পদুমকন্দো, ভিসঞ্চ মুড়ালঞ্চ ভিসমুড়ালং, তং ভিসমুড়ালং গহেত্ৱাতি অত্থো.

৩১. কৰেন চ পৰামট্ঠোতি তং মযা দিন্নদানং, ৱেস্সভূৱৰবুদ্ধিনা উত্তমবুদ্ধিনা ৱেস্সভুনা কৰেন হত্থতলেন পৰামট্ঠো কতসম্ফস্সো অহোসি. সুখাহং নাভিজানামি, সমং তেন কুতোত্তৰিন্তি তেন সুখেন সমং সুখং নাভিজানামি, ততো উত্তৰিং ততো পৰং ততো অধিকং সুখং কুতোতি অত্থো. সেসং নযানুসাৰেন সুৱিঞ্ঞেয্যন্তি.

ভিসদাযকত্থেৰঅপদানৱণ্ণনা সমত্তা.

৬. সুচিন্তিতত্থেৰঅপদানৱণ্ণনা

গিৰিদুগ্গচৰো আসিন্তিআদিকং আযস্মতো সুচিন্তিতত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো অত্থদস্সিস্স ভগৱতো কালে হিমৱন্তপ্পদেসে নেসাদকুলে উপ্পন্নো মিগসূকৰাদযো ৱধিত্ৱা খাদন্তো ৱিহৰতি. তদা লোকনাথো লোকানুগ্গহং সত্তানুদ্দযতঞ্চ পটিচ্চ হিমৱন্তমগমাসি. তদা সো নেসাদো ভগৱন্তং দিস্ৱা পসন্নমানসো অত্তনো খাদনত্থায আনীতং ৱৰমধুৰমংসং অদাসি. পটিগ্গহেসি ভগৱা তস্সানুকম্পায, তং ভুঞ্জিত্ৱা অনুমোদনং ৱত্ৱা পক্কামি. সো তেনেৱ পুঞ্ঞেন তেনেৱ সোমনস্সেন ততো চুতো সুগতীসু সংসৰন্তো ছ কামাৱচৰসম্পত্তিযো অনুভৱিত্ৱা মনুস্সেসু চক্কৱত্তিসম্পত্তিআদযো অনুভৱিত্ৱা ইমস্মিং বুদ্ধুপ্পাদে কুলগেহে নিব্বত্তো সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

৩৬. চতুপটিসম্ভিদাপঞ্চাভিঞ্ঞাদিভেদং পত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো গিৰিদুগ্গচৰো আসিন্তিআদিমাহ. গিৰতি সদ্দং কৰোতীতি গিৰি, কো সো? সিলাপংসুমযপব্বতো, দুট্ঠু দুক্খেন গমনীযং দুগ্গং, গিৰীহি দুগ্গং গিৰিদুগ্গং, দুগ্গমোতি অত্থো. তস্মিং গিৰিদুগ্গে পব্বতন্তৰে চৰো চৰণসীলো আসিং অহোসিং. অভিজাতোৱ কেসৰীতি অভি ৱিসেসেন জাতো নিব্বত্তো কেসৰীৱ কেসৰসীহো ইৱ গিৰিদুগ্গস্মিং চৰামীতি অত্থো.

৪০. গিৰিদুগ্গং পৱিসিং অহন্তি অহং তদা তেন মংসদানেন পীতিসোমনস্সজাতো পব্বতন্তৰং পাৱিসিং. সেসং উত্তানত্থমেৱাতি.

সুচিন্তিতত্থেৰঅপদানৱণ্ণনা সমত্তা.

৭. ৱত্থদাযকত্থেৰঅপদানৱণ্ণনা

পক্খিজাতো তদা আসিন্তিআদিকং আযস্মতো ৱত্থদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো অত্থদস্সিস্স ভগৱতো কালে সুপণ্ণযোনিযং নিব্বত্তো গন্ধমাদনপব্বতং গচ্ছন্তং অত্থদস্সিং ভগৱন্তং দিস্ৱা পসন্নমানসো সুপণ্ণৱণ্ণং ৱিজহিত্ৱা মাণৱকৱণ্ণং নিম্মিনিত্ৱা মহগ্ঘং দিব্বৱত্থং আদায ভগৱন্তং পূজেসি. সোপি ভগৱা পটিগ্গহেত্ৱা অনুমোদনং ৱত্ৱা পক্কামি. সো তেনেৱ সোমনস্সেন ৱীতিনামেত্ৱা যাৱতাযুকং ঠত্ৱা ততো চুতো দেৱলোকে নিব্বত্তো তত্থ অপৰাপৰং সংসৰন্তো পুঞ্ঞানি অনুভৱিত্ৱা ততো মনুস্সেসু মনুস্সসম্পত্তিন্তি সব্বত্থ মহগ্ঘং ৱত্থাভৰণং লদ্ধং, ততো উপ্পন্নুপ্পন্নভৱে ৱত্থচ্ছাযায গতগতট্ঠানে ৱসন্তো ইমস্মিং বুদ্ধুপ্পাদে একস্মিং কুলগেহে নিব্বত্তো ৱিঞ্ঞুতং পত্তো সত্থৰি পসীদিত্ৱা পব্বজিতো নচিৰস্সেৱ ছড়ভিঞ্ঞপ্পত্তখীণাসৱো অহোসি, পুব্বে কতপুঞ্ঞনামেন ৱত্থদাযকত্থেৰোতি পাকটো.

৪৫. সো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পক্খিজাতো তদা আসিন্তিআদিমাহ. তত্থ পক্খিজাতোতি পক্খন্দতি উপলৱতি সকুণো এতেনাতি পক্খং, পক্খমস্স অত্থীতি পক্খী, পক্খিযোনিযং জাতো নিব্বত্তোতি অত্থো. সুপণ্ণোতি সুন্দৰং পণ্ণং পত্তং যস্স সো সুপণ্ণো, ৱাতগ্গাহসুৱণ্ণৱণ্ণজলমানপত্তমহাভাৰোতি অত্থো. গৰুড়াধিপোতি নাগে গণ্হনত্থায গৰুং ভাৰং পাসাণং গিড়ন্তীতি গৰুড়া, গৰুড়ানং অধিপো ৰাজাতি গৰুড়াধিপো, ৱিৰজং বুদ্ধং অদ্দসাহন্তি সম্বন্ধো.

ৱত্থদাযকত্থেৰঅপদানৱণ্ণনা সমত্তা.

৮. অম্বদাযকত্থেৰঅপদানৱণ্ণনা

অনোমদস্সী ভগৱাতিআদিকং আযস্মতো অম্বদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো অনোমদস্সিস্স ভগৱতো কালে ৱানৰযোনিযং নিব্বত্তো হিমৱন্তে কপিৰাজা হুত্ৱা পটিৱসতি. তস্মিং সমযে অনোমদস্সী ভগৱা তস্সানুকম্পায হিমৱন্তমগমাসি. অথ সো কপিৰাজা ভগৱন্তং দিস্ৱা পসন্নমানসো সুমধুৰং অম্বফলং খুদ্দমধুনা অদাসি. অথ ভগৱা তস্স পস্সন্তস্সেৱ তং সব্বং পৰিভুঞ্জিত্ৱা অনুমোদনং ৱত্ৱা পক্কামি. অথ সো সোমনস্সসম্পন্নহদযো তেনেৱ পীতিসোমনস্সেন যাৱতাযুকং ঠত্ৱা ততো চুতো দেৱলোকে নিব্বত্তো অপৰাপৰং তত্থ দিব্বসুখমনুভৱিত্ৱা মনুস্সেসু চ মনুস্সসম্পত্তিং অনুভৱিত্ৱা ইমস্মিং বুদ্ধুপ্পাদে ৱিভৱসম্পন্নে একস্মিং কুলগেহে নিব্বত্তো সত্থৰি পসীদিত্ৱা পব্বজিত্ৱা নচিৰস্সেৱ ছড়ভিঞ্ঞপ্পত্তো অহোসি. পুব্বপুঞ্ঞনামেন অম্বদাযকত্থেৰোতি পাকটো.

৫৩. সো অপৰভাগে অত্তনা কতকুসলবীজং দিস্ৱা সোমনস্সজাতো অত্তনো পুব্বচৰিতাপদানং পকাসেন্তো অনোমদস্সী ভগৱাতিআদিমাহ. মেত্তায অফৰি লোকে, অপ্পমাণে নিৰূপধীতি সো ভগৱা সব্বলোকে অপ্পমাণে সত্তে ‘‘সুখী হোন্তূ’’তিআদিনা নিৰুপধি উপধিৱিৰহিতং কত্ৱা মেত্তায মেত্তচিত্তেন অফৰি পত্থৰি ৱড্ঢেসীতি অত্থো.

৫৪. কপি অহং তদা আসিন্তি তদা তস্সাগমনকালে কপিৰাজা অহোসিন্তি অত্থো.

অম্বদাযকত্থেৰঅপদানৱণ্ণনা সমত্তা.

৯. সুমনত্থেৰঅপদানৱণ্ণনা

সুমনো নাম নামেনাতিআদিকং আযস্মতো সুমনত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিখিস্স ভগৱতো কালে মালাকাৰস্স কুলগেহে নিব্বত্তো ৱুদ্ধিমন্ৱায সদ্ধাজাতো ভগৱতি পসন্নমানসো সুমনমালামুট্ঠিযো গহেত্ৱা উভোহি হত্থেহি পূজেসি. সো তেন পুঞ্ঞেন দেৱমনুস্সেসু দ্ৱে সম্পত্তিযো অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱুদ্ধিমন্ৱায পুত্তদাৰেহি ৱড্ঢিত্ৱা সুমননামেন পাকটো সত্থৰি পসীদিত্ৱা পব্বজিতো নচিৰস্সেৱ অৰহা অহোসি.

৬২. সো অৰহা হুত্ৱা অত্তনো পুব্বকম্মং সৰিত্ৱা সোমনস্সজাতো অত্তনো পুব্বচৰিতাপদানং পকাসেন্তো সুমনো নাম নামেনাতিআদিমাহ. সুন্দৰং মনং চিত্তং যস্স সো সুমনো. সদ্ধাপসাদবহুমানেন যুত্তো নামেন সুমনো নাম মালাকাৰো তদা অহং অহোসিং.

৬৩. সিখিনো লোকবন্ধুনোতি সিখা মুদ্ধা কাসতীতি সিখী. অথ ৱা সম্পযুত্তসম্পযোগে খাদতি ৱিদ্ধংসেতীতি সিখী, কা সা? অগ্গিসিখা, অগ্গিসিখা ৱিয সিখায দিপ্পনতো সিখী. যথা অগ্গিসিখা জোততি পাকটা হোতি, সিখী পত্ততিণকট্ঠপলাসাদিকে দহতি, এৱমযম্পি ভগৱা নীলপীতাদিৰংসীহি জোততি সকললোকসন্নিৱাসে পাকটো হোতি. সকসন্তানগতসব্বকিলেসে সোসেতি ৱিদ্ধংসেতি ঝাপেতীতি ৱোহাৰনামং নামকম্মং নামধেয্যং, তস্স সিখিনো. সকললোকস্স বন্ধুঞাতকোতি লোকবন্ধু, তস্স সিখিনো লোকবন্ধুনো ভগৱতো সুমনপুপ্ফং অভিৰোপযিং পূজেসিন্তি অত্থো.

সুমনত্থেৰঅপদানৱণ্ণনা সমত্তা.

১০. পুপ্ফচঙ্কোটিযত্থেৰঅপদানৱণ্ণনা

অভীতৰূপং সীহং ৱাতিআদিকং আযস্মতো পুপ্ফচঙ্কোটিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিখিস্স ভগৱতো কালে একস্মিং কুলগেহে নিব্বত্তো ৱিঞ্ঞুতং পত্তো মহাৱিভৱসম্পন্নো সত্থৰি পসীদিত্ৱা পসন্নাকাৰং দস্সেন্তো সুৱণ্ণৱণ্ণং অনোজপুপ্ফমোচিনিত্ৱা চঙ্কোটকং পূৰেত্ৱা ভগৱন্তং পূজেত্ৱা ‘‘ভগৱা, ইমস্স নিস্সন্দেন নিব্বত্তনিব্বত্তট্ঠানে সুৱণ্ণৱণ্ণো পূজনীযো হুত্ৱা নিব্বানং পাপুণেয্য’’ন্তি পত্থনমকাসি. সো তেন পুঞ্ঞকম্মেন দেৱমনুস্সেসু নিব্বত্তো সব্বত্থ পূজিতো সুৱণ্ণৱণ্ণো অভিৰূপো অহোসি. সো অপৰভাগে ইমস্মিং বুদ্ধুপ্পাদে ৱিভৱসম্পন্নে একস্মিং কুলগেহে নিব্বত্তো ৱুদ্ধিপ্পত্তো সত্থৰি পসীদিত্ৱা পব্বজিতো ৱিপস্সনং ৱড্ঢেত্ৱা নচিৰস্সেৱ অৰহা অহোসি.

৬৮-৯. সো পত্তঅৰহত্তফলো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো অভীতৰূপং সীহং ৱাতিআদিমাহ. তত্থ সীহন্তি দ্ৱিপদচতুপ্পদাদযো সত্তে অভিভৱতি অজ্ঝোত্থৰতীতি সীহো, অভীতৰূপো অভীতসভাৱো, তং অভীতৰূপং সীহং ইৱ নিসিন্নং পূজেসিন্তি সম্বন্ধো. পক্খীনং অগ্গং গৰুড়ৰাজং ইৱ পৱৰং উত্তমং ব্যগ্ঘৰাজং ইৱ অভি ৱিসেসেন জাতং সব্বসীহানং ৱিসেসং কেসৰসীহং ইৱ তিলোকস্স সৰণং সিখিং সম্মাসম্বুদ্ধং. কিং ভূতং? অনেজং নিক্কিলেসং খন্ধমাৰাদীহি অপৰাজিতং নিসিন্নং সিখিন্তি সম্বন্ধো. মাৰণানগ্গন্তি সব্বকিলেসানং মাৰণে সোসনে ৱিদ্ধংসনে অগ্গং সেট্ঠং কিলেসে মাৰেন্তানং পচ্চেকবুদ্ধবুদ্ধসাৱকানং ৱিজ্জমানানম্পি তেসং অগ্গন্তি অত্থো. ভিক্খুসঙ্ঘপুৰক্খতং পৰিৱাৰিতং পৰিৱাৰেত্ৱা নিসিন্নং সিখিন্তি সম্বন্ধো.

৭০. চঙ্কোটকে ঠপেত্ৱানাতি উত্তমং অনোজপুপ্ফং কৰণ্ডকে পূৰেত্ৱা সিখীসম্বুদ্ধং সেট্ঠং সমোকিৰিং পূজেসিন্তি অত্থো.

পুপ্ফচঙ্কোটিযত্থেৰঅপদানৱণ্ণনা সমত্তা.

সত্তমৱগ্গৱণ্ণনা সমত্তা.