৫. উপালিৱগ্গো

১. ভাগিনেয্যুপালিত্থেৰঅপদানৱণ্ণনা

খীণাসৱসহস্সেহীতিআদিকং আযস্মতো উপালিত্থেৰস্স ভাগিনেয্যুপালিত্থেৰস্স অপদানং. এসো হি থেৰো পুৰিমবুদ্ধেসু কতাধিকাৰো তস্মিং তস্মিং ভৱে পুঞ্ঞানি উপচিনন্তো পদুমুত্তৰস্স ভগৱতো কালে একস্মিং কুলে নিব্বত্তো ৱুদ্ধিমন্ৱায ঘৰাৱাসে আদীনৱং দিস্ৱা গেহং পহায ইসিপব্বজ্জং পব্বজিত্ৱা পঞ্চাভিঞ্ঞাঅট্ঠসমাপত্তিলাভী হুত্ৱা হিমৱন্তে ৱাসং কপ্পেসি. তস্মিং সমযে পদুমুত্তৰো ভগৱা ৱিৱেককামো হিমৱন্তং পাৱিসি. তাপসো ভগৱন্তং পুণ্ণচন্দমিৱ ৱিৰোচমানং দূৰতোৱ দিস্ৱা পসন্নমানসো অজিনচম্মং অংসে কত্ৱা অঞ্জলিং পগ্গয্হ ৱন্দিত্ৱা ঠিতকোৱ দসনখসমোধানঞ্জলিং সিৰসি পতিট্ঠপেত্ৱা অনেকাহি উপমাহি অনেকেহি থুতিৱচনেহি ভগৱন্তং থোমেসি. তং সুত্ৱা ভগৱা – ‘‘অযং তাপসো অনাগতে গোতমস্স নাম ভগৱতো সাসনে পব্বজিত্ৱা ৱিনযে তিখিণপঞ্ঞানং অগ্গো ভৱিস্সতী’’তি ব্যাকৰণমদাসি. সো যাৱতাযুকং ঠত্ৱা অপৰিহীনজ্ঝানো ব্ৰহ্মলোকে নিব্বত্তি. ততো চুতো দেৱমনুস্সেসু সংসৰন্তো সম্পত্তিযো অনুভৱিত্ৱা ইমস্মিং বুদ্ধুপ্পাদে কপিলৱত্থুনগৰে উপালিত্থেৰস্স ভাগিনেয্যো হুত্ৱা নিব্বত্তি. সো কমেন ৱুদ্ধিপ্পত্তো মাতুলস্স উপালিত্থেৰস সন্তিকে পব্বজিত্ৱা কম্মট্ঠানং গহেত্ৱা ৱিপস্সনং ৱড্ঢেত্ৱা নচিৰস্সেৱ অৰহা অহোসি. সো অত্তনো আচৰিযস্স সমীপে ৱসিতত্তা ৱিনযপঞ্হে তিখিণঞাণো অহোসি. অথ ভগৱা ‘‘এতদগ্গং, ভিক্খৱে, মম সাৱকানং ভিক্খূনং ৱিনযপঞ্হে তিখিণপঞ্ঞানং ভিক্খূনং যদিদং ভাগিনেয্যুপালী’’তি তং এতদগ্গট্ঠানে ঠপেসি.

১. সো এৱং এতদগ্গট্ঠানং পত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো খীণাসৱসহস্সেহীতিআদিমাহ. তত্থ আ সমন্ততো যাৱভৱগ্গা সৱন্তি পৱত্তন্তীতি আসৱা. কামাসৱাদযো চত্তাৰো আসৱা, তে খীণা সোসিতা ৱিসোসিতা ৱিদ্ধংসিতা যেহি তেতি খীণাসৱা, তেযেৱ সহস্সা খীণাসৱসহস্সা, তেহি খীণাসৱসহস্সেহি. পৰেতো পৰিৱুতো লোকনাযকো লোকস্স নিব্বানপাপনকো ৱিৱেকং অনুযুত্তো পটিসল্লিতুং একীভৱিতুং গচ্ছতেতি সম্বন্ধো.

২. অজিনেন নিৱত্থোহন্তি অহং অজিনমিগচম্মেন পটিচ্ছন্নো, অজিনচম্মৱসনোতি অত্থো. তিদণ্ডপৰিধাৰকোতি কুণ্ডিকট্ঠপনত্থায তিদণ্ডং গহেত্ৱা ধাৰেন্তোতি অত্থো. ভিক্খুসঙ্ঘেন পৰিব্যূড়্হং পৰিৱাৰিতং লোকনাযকং অদ্দসন্তি সম্বন্ধো. সেসং পাকটমেৱাতি.

ভাগিনেয্যুপালিত্থেৰঅপদানৱণ্ণনা সমত্তা.

২. সোণকোড়িৱিসত্থেৰঅপদানৱণ্ণনা

অনোমদস্সিস্স মুনিনোতিআদিকং আযস্মতো কোড়িৱিসত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো অনোমদস্সিস্স ভগৱতো কালে একস্মিং কুলগেহে নিব্বত্তো ৱযপ্পত্তো পুত্তদাৰেহি ৱড্ঢিতো ৱিভৱসম্পন্নো ভগৱতো চঙ্কমনত্থায সোভনং চঙ্কমং কাৰেত্ৱা সুধাপৰিকম্মং কাৰেত্ৱা আদাসতলমিৱ সমং ৱিজ্জোতমানং কত্ৱা দীপধূপপুপ্ফাদীহি সজ্জেত্ৱা ভগৱতো নিয্যাদেত্ৱা বুদ্ধপ্পমুখং ভিক্খুসঙ্ঘং পণীতেনাহাৰেন পূজেসি. সো এৱং যাৱজীৱং পুঞ্ঞানি কত্ৱা ততো চৱিত্ৱা দেৱলোকে নিব্বত্তো. তত্থ পাড়িযা ৱুত্তনযেন দিব্বসম্পত্তিং অনুভৱিত্ৱা অন্তৰা ওক্কাককুলপ্পসুতোতি তং সব্বং পাড়িযা ৱুত্তানুসাৰেন ৱেদিতব্বং. পচ্ছিমভৱে পন কোলিযৰাজৱংসে জাতো ৱযপ্পত্তো কোটিঅগ্ঘনকস্স কণ্ণপিড়ন্ধনস্স ধাৰিতত্তা কোটিকণ্ণোতি, কুটিকণ্ণোতি চ পাকটো অহোসি. সো ভগৱতি পসন্নো ধম্মং সুত্ৱা পটিলদ্ধসদ্ধো পব্বজিত্ৱা ৱিপস্সনং ৱড্ঢেত্ৱা নচিৰস্সেৱ অৰহত্তং পাপুণি.

২৫. সো অৰহা হুত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো অনোমদস্সিস্স মুনিনোতিআদিমাহ. তত্থ অনোমদস্সিস্সাতি অনোমং অলামকং সুন্দৰং দস্সনং দ্ৱত্তিংসমহাপুৰিসলক্খণপটিমণ্ডিতত্তা ব্যামপ্পভামণ্ডলোপসোভিতত্তা আৰোহপৰিণাহেন সমন্নাগতত্তা চ দস্সনীযং সৰীৰং যস্স ভগৱতো সো অনোমদস্সী, তস্স অনোমদস্সিস্স মুনিনোতি অত্থো. তাদিনোতি ইট্ঠানিট্ঠেসু অকম্পিযসভাৱস্স. সুধায লেপনং কত্ৱাতি সুধায অৱলিত্তং কত্ৱা দীপধূপপুপ্ফধজপটাকাদীহি চ অলঙ্কতং চঙ্কমং কাৰযিং অকাসিন্তি অত্থো. সেসগাথানং অত্থো পাড়িযা অনুসাৰেন সুৱিঞ্ঞেয্যোৱ.

৩৫. পৰিৱাৰসম্পত্তিধনসম্পত্তিসঙ্খাতং যসং ধাৰেতীতি যসোধৰো, সব্বে এতে সত্তসত্ততিচক্কৱত্তিৰাজানো যসোধৰনামেন একনামকাতি সম্বন্ধো.

৫২. অঙ্গীৰসোতি অঙ্গতো সৰীৰতো নিগ্গতা ৰস্মি যস্স সো অঙ্গীৰসো, ছন্দদোসমোহভযাগতীহি ৱা পাপাচাৰৱসেন ৱা চতুৰাপাযং ন গচ্ছতীতি নাগো, মহন্তো পূজিতো চ সো নাগো চেতি মহানাগো. সেসং উত্তানত্থমেৱাতি.

কোড়িৱিসত্থেৰঅপদানৱণ্ণনা সমত্তা.

৩. কাড়িগোধাপুত্তভদ্দিযত্থেৰঅপদানৱণ্ণনা

পদুমুত্তৰসম্বুদ্ধন্তিআদিকং আযস্মতো ভদ্দিযস্স কাড়িগোধাপুত্তত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে ৱিভৱসম্পন্নে একস্মিং কুলে নিব্বত্তো ৱুদ্ধিপ্পত্তো পুত্তদাৰেহি ৱড্ঢিতো নগৰৱাসিনো পুঞ্ঞানি কৰোন্তে দিস্ৱা সযম্পি পুঞ্ঞানি কাতুকামো বুদ্ধপ্পমুখং ভিক্খুসঙ্ঘং নিমন্তেত্ৱা থূলপটলিকাদিঅনেকানি মহাৰহানি সযনানি পঞ্ঞাপেত্ৱা তত্থ নিসিন্নে ভগৱতি সসঙ্ঘে পণীতেনাহাৰেন ভোজেত্ৱা মহাদানং অদাসি. সো এৱং যাৱতাযুকং পুঞ্ঞানি কত্ৱা দেৱমনুস্সেসু উভযসম্পত্তিযো অনুভৱিত্ৱা অপৰভাগে ইমস্মিং বুদ্ধুপ্পাদে কাড়িগোধায নাম দেৱিযা পুত্তো হুত্ৱা নিব্বত্তি. সো ৱিঞ্ঞুতং পত্তো আৰোহপৰিণাহহত্থপাদৰূপসম্পত্তিযা ভদ্দত্তা চ কাড়িগোধায দেৱিযা পুত্তত্তা চ ভদ্দিযো কাড়িগোধাপুত্তোতি পাকটো. সত্থৰি পসীদিত্ৱা মাতাপিতৰো আৰাধেত্ৱা পব্বজিত্ৱা নচিৰস্সেৱ অৰহা অহোসি.

৫৪. সো অৰহা হুত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পদুমুত্তৰসম্বুদ্ধন্তিআদিমাহ. তং হেট্ঠা ৱুত্তত্থমেৱ. মেত্তচিত্তন্তি মিজ্জতি সিনেহতি নন্দতি সব্বসত্তেতি মেত্তা, মেত্তায সহগতং চিত্তং মেত্তচিত্তং, তং যস্স ভগৱতো অত্থীতি মেত্তচিত্তো, তং মেত্তচিত্তং. মহামুনিন্তি সকলভিক্খূনং মহন্তত্তা মহামুনি, তং পদুমুত্তৰং সম্বুদ্ধন্তি সম্বন্ধো. জনতা সব্বাতি সব্বো জনকাযো, সব্বনগৰৱাসিনোতি অত্থো. সব্বলোকগ্গনাযকন্তি সকললোকস্স অগ্গং সেট্ঠং নিব্বানস্স নযনতো পাপনতো নাযকং পদুমুত্তৰসম্বুদ্ধং জনতা উপেতি সমীপং গচ্ছতীতি সম্বন্ধো.

৫৫. সত্তুকঞ্চ বদ্ধকঞ্চাতি বদ্ধসত্তুঅবদ্ধসত্তুসঙ্খাতং আমিসং. অথ ৱা ভত্তপূপখজ্জভোজ্জযাগুআদযো যাৱকালিকত্তা আমিসং পানভোজনঞ্চ গহেত্ৱা পুঞ্ঞক্খেত্তে অনুত্তৰে সত্থুনো দদন্তীতি সম্বন্ধো.

৫৮. আসনং বুদ্ধযুত্তকন্তি বুদ্ধযোগ্গং বুদ্ধাৰহং বুদ্ধানুচ্ছৱিকং সত্তৰতনমযং আসনন্তি অত্থো. সেসং নযানুযোগেন সুৱিঞ্ঞেয্যমেৱাতি.

কাড়িগোধাপুত্তভদ্দিযত্থেৰঅপদানৱণ্ণনা সমত্তা.

৪. সন্নিট্ঠাপকত্থেৰঅপদানৱণ্ণনা

অৰঞ্ঞে কুটিকং কত্ৱাতিআদিকং আযস্মতো সন্নিট্ঠাপকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে কুলগেহে নিব্বত্তো ৱিঞ্ঞুতং পত্তো ঘৰবন্ধনেন বদ্ধো ঘৰাৱাসে আদীনৱং দিস্ৱা ৱত্থুকামকিলেসকামে পহায হিমৱন্তস্স অৱিদূৰে পব্বতন্তৰে অৰঞ্ঞৱাসং কপ্পেসি. তস্মিং কালে পদুমুত্তৰো ভগৱা ৱিৱেককামতায তং ঠানং পাপুণি. অথ সো তাপসো ভগৱন্তং দিস্ৱা পসন্নমানসো ৱন্দিত্ৱা নিসীদনত্থায তিণসন্থৰং পঞ্ঞাপেত্ৱা অদাসি. তত্থ নিসিন্নং ভগৱন্তং অনেকেহি মধুৰেহি তিণ্ডুকাদীহি ফলাফলেহি সন্তপ্পেসি. সো তেন পুঞ্ঞকম্মেন ততো চুতো দেৱেসু চ মনুস্সেসু চ অপৰাপৰং সংসৰন্তো দ্ৱে সম্পত্তিযো অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো সদ্ধাসম্পন্নো পব্বজিতো ৱিপস্সনং ৱড্ঢেত্ৱা নচিৰস্সেৱ অৰহা অহোসি. খুৰগ্গে অৰহত্তফলপ্পত্তিযং ৱিয নিৰুস্সাহেনেৱ সন্তিপদসঙ্খাতে নিব্বানে সুট্ঠু ঠিতত্তা সন্নিট্ঠাপকত্থেৰোতি পাকটো.

৭০. অৰহা পন হুত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো অৰঞ্ঞে কুটিকং কত্ৱাতিআদিমাহ. তত্থ অৰঞ্ঞেতি সীহব্যগ্ঘাদীনং ভযেন মনুস্সা এত্থ ন ৰজ্জন্তি ন ৰমন্তি ন অল্লীযন্তীতি অৰঞ্ঞং, তস্মিং অৰঞ্ঞে. কুটিকন্তি তিণচ্ছদনকুটিকং কত্ৱা পব্বতন্তৰে ৱসামি ৱাসং কপ্পেসিন্তি অত্থো. লাভেন চ অলাভেন চ যসেন চ অযসেন চ সন্তুট্ঠো ৱিহাসিন্তি সম্বন্ধো.

৭২. জলজুত্তমনামকন্তি জলে জাতং জলজং, পদুমং, জলজং উত্তমং জলজুত্তমং, জলজুত্তমেন সমানং নামং যস্স সো জলজুত্তমনামকো, তং জলজুত্তমনামকং বুদ্ধন্তি অত্থো. সেসং পাড়িনযানুযোগেন সুৱিঞ্ঞেয্যমেৱাতি.

সন্নিট্ঠাপকত্থেৰঅপদানৱণ্ণনা সমত্তা.

৫. পঞ্চহত্থিযত্থেৰঅপদানৱণ্ণনা

সুমেধো নাম সম্বুদ্ধোতিআদিকং আযস্মতো পঞ্চহত্থিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সুমেধস্স ভগৱতো কালে একস্মিং কুলগেহে নিব্বত্তো ৱিঞ্ঞুতং পত্ৱা ৰতনত্তযে পসন্নো ৱিহাসি. তস্মিং সমযে পঞ্চউপ্পলহত্থানি আনেসুং. সো তেহি পঞ্চউপ্পলহত্থেহি ৱীথিযং চৰমানং সুমেধং ভগৱন্তং পূজেসি. তানি গন্ত্ৱা আকাসে ৱিতানং হুত্ৱা ছাযং কুৰুমানানি তথাগতেনেৱ সদ্ধিং গচ্ছিংসু. সো তং দিস্ৱা সোমনস্সজাতো পীতিযা ফুট্ঠসৰীৰো যাৱজীৱং তদেৱ পুঞ্ঞং অনুস্সৰিত্ৱা ততো চুতো দেৱলোকে নিব্বত্তো অপৰাপৰং সংসৰন্তো ইমস্মিং বুদ্ধুপ্পাদে একস্মিং কুলগেহে নিব্বত্তো ৱিঞ্ঞুতং পত্তো সদ্ধাজাতো পব্বজিত্ৱা ৱিপস্সনং ৱড্ঢেত্ৱা নচিৰস্সেৱ অৰহা অহোসি. কতকুসলনামেন পঞ্চহত্থিযত্থেৰোতি পাকটো.

৭৭. সো অত্তনো পুব্বকম্মং সৰিত্ৱা পচ্চক্খতো পঞ্ঞায দিট্ঠপুব্বচৰিতাপদানং পকাসেন্তো সুমেধো নাম সম্বুদ্ধোতিআদিমাহ. তত্থ সুমেধোতি সুন্দৰা মেধা চতুসচ্চপটিৱেধপটিসম্ভিদাদযো পঞ্ঞা যস্স সো ভগৱা সুমেধো সম্বুদ্ধো অন্তৰাপণে অন্তৰৱীথিযং গচ্ছতীতি সম্বন্ধো. ওক্খিত্তচক্খূতি অধোখিত্তচক্খু. মিতভাণীতি পমাণং ঞত্ৱা ভণনসীলো, পমাণং জানিত্ৱা ধম্মং দেসেসীতি অত্থো. সেসং সুৱিঞ্ঞেয্যমেৱাতি.

পঞ্চহত্থিযত্থেৰঅপদানৱণ্ণনা সমত্তা.

৬. পদুমচ্ছদনিযত্থেৰঅপদানৱণ্ণনা

নিব্বুতে লোকনাথম্হীতিআদিকং আযস্মতো পদুমচ্ছদনিযত্থেৰস্স অপদানং. অযম্পি পুৰিমবুদ্ধেসু কতপুঞ্ঞসম্ভাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে একস্মিং কুলগেহে নিব্বত্তো ৱিঞ্ঞুতং পত্তো ৰতনত্তযে পসন্নো পৰিনিব্বুতস্স ৱিপস্সিস্স ভগৱতো চিতকং পদুমপুপ্ফেহি পূজেসি. সো তেনেৱ চিত্তপ্পসাদেন যাৱতাযুকং ঠত্ৱা ততো সুগতীসুযেৱ সংসৰন্তো দিব্বসম্পত্তিং মনুস্সসম্পত্তিঞ্চাতি দ্ৱে সম্পত্তিযো অনেকক্খত্তুং অনুভৱিত্ৱা ইমস্মিং অম্হাকং সম্মাসম্বুদ্ধকালে একস্মিং কুলগেহে নিব্বত্তো ৱিঞ্ঞুতং পত্তো সত্থৰি পসীদিত্ৱা সাসনে পব্বজিতো ঘটেন্তো ৱাযমন্তো নচিৰস্সেৱ অৰহা অহোসি. তস্স ৰত্তিট্ঠানদিৱাট্ঠানাদীসু তত্থ তত্থ ৱিহৰন্তস্স ৱিহাৰো পদুমপুপ্ফেহি ছাদীযতি, তেন সো পদুমচ্ছদনিযত্থেৰোতি পাকটো.

৮৩. অত্তনো পুব্বকম্মং সৰিত্ৱা সোমনস্সৱসেন পুব্বচৰিতাপদানং পকাসেন্তো নিব্বুতে লোকনাথম্হীতিআদিমাহ. তত্থ নিব্বুতেতি খন্ধপৰিনিব্বানেন পৰিনিব্বুতে সত্থৰি, ৱিপস্সিস্স সম্মাসম্বুদ্ধস্স সৰীৰে চিতমানিযমানে চিতকে আৰোপিতে সুফুল্লং পদুমকলাপং অহং গহেত্ৱা চিতকং আৰোপযিং পূজেসিন্তি অত্থো. সেসগাথাসু হেট্ঠা ৱুত্তনযত্তা উত্তানত্থমেৱাতি.

পদুমচ্ছদনিযত্থেৰঅপদানৱণ্ণনা সমত্তা.

৭. সযনদাযকত্থেৰঅপদানৱণ্ণনা

সিদ্ধত্থস্স ভগৱতোতিআদিকং আযস্মতো সযনদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে অঞ্ঞতৰস্মিং কুলে নিব্বত্তো ৱিঞ্ঞুতং পত্তো সত্থৰি পসীদিত্ৱা হত্থিদণ্ডসুৱণ্ণাদীহি সযনত্থায মঞ্চং কাৰেত্ৱা অনগ্ঘেহি ৱিচিত্তত্থৰণেহি অত্থৰিত্ৱা ভগৱন্তং পূজেসি. সো ভগৱা তস্সানুকম্পায পটিগ্গহেত্ৱা অনুভৱি. সো তেন পুঞ্ঞকম্মেন দিব্বমনুস্সসম্পত্তিযো অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱিঞ্ঞুতং পত্ৱা সত্থু সাসনে পসন্নো পব্বজিত্ৱা ৱিপস্সনং আৰভিত্ৱা নচিৰস্সেৱ অৰহা অহোসি. পুব্বে কতপুঞ্ঞনামেন সযনদাযকত্থেৰোতি পাকটো.

৮৮. সো একদিৱসং অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো সিদ্ধত্থস্স ভগৱতোতিআদিমাহ. তং সব্বং পাড়িনযানুসাৰেন সুৱিঞ্ঞেয্যমেৱাতি.

সযনদাযকত্থেৰঅপদানৱণ্ণনা সমত্তা.

৮. চঙ্কমনদাযকত্থেৰঅপদানৱণ্ণনা

অত্থদস্সিস্স মুনিনোতিআদিকং আযস্মতো চঙ্কমনদাযকত্থেৰস্স অপদানং. অযম্পাযস্মা পুৰিমবুদ্ধেসু কতাধিকাৰো তেসু তেসু ভৱেসু ৱিৱট্টূপনিস্সযানি পুঞ্ঞানি উপচিনন্তো অত্থদস্সিস্স ভগৱতো কালে একস্মিং কুলগেহে নিব্বত্তো ৱিঞ্ঞুতং পত্তো সত্থৰি পসীদিত্ৱা উচ্চৱত্থুকং সুধাপৰিকম্মকতং ৰজতৰাসিসদিসং সোভমানং চঙ্কমং কাৰেত্ৱা মুত্তদলসদিসং সেতপুলিনং অত্থৰিত্ৱা ভগৱতো অদাসি. পটিগ্গহেসি ভগৱা, চঙ্কমং পটিগ্গহেত্ৱা চ পন সুখং কাযচিত্তসমাধিং অপ্পেত্ৱা ‘‘অযং অনাগতে গোতমস্স ভগৱতো সাসনে সাৱকো ভৱিস্সতী’’তি ব্যাকাসি. সো তেন পুঞ্ঞকম্মেন দেৱমনুস্সেসু অপৰাপৰং সংসৰন্তো দ্ৱে সম্পত্তিযো অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো ৱুদ্ধিপ্পত্তো সদ্ধাসম্পন্নো সাসনে পব্বজিত্ৱা নচিৰস্সেৱ অৰহত্তং পত্ৱা কতপুঞ্ঞনামেন চঙ্কমনদাযকত্থেৰোতি পাকটো অহোসি.

৯৩. সো একদিৱসং অত্তনা পুব্বে কতপুঞ্ঞকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো অত্থদস্সিস্স মুনিনোতিআদিমাহ. তত্থ অত্থদস্সিস্সাতি অত্থং পযোজনং ৱুদ্ধিং ৱিৰূড়্হিং নিব্বানং দক্খতি পস্সতীতি অত্থদস্সী, অথ ৱা অত্থং নিব্বানং দস্সনসীলো জাননসীলোতি অত্থদস্সী, তস্স অত্থদস্সিস্স মুনিনো মোনেন ঞাণেন সমন্নাগতস্স ভগৱতো মনোৰমং মনল্লীনং ভাৱনীযং মনসি কাতব্বং চঙ্কমং কাৰেসিন্তি সম্বন্ধো. সেসং ৱুত্তনযানুসাৰেনেৱ সুৱিঞ্ঞেয্যমেৱাতি.

চঙ্কমনদাযকত্থেৰঅপদানৱণ্ণনা সমত্তা.

৯. সুভদ্দত্থেৰঅপদানৱণ্ণনা

পদুমুত্তৰো লোকৱিদূতিআদিকং আযস্মতো সুভদ্দত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে নিব্বানাধিগমনত্থায পুঞ্ঞানি উপচিনন্তো পদুমুত্তৰস্স ভগৱতো কালে ৱিভৱসম্পন্নে সদ্ধাসম্পন্নে একস্মিং কুলগেহে নিব্বতো ৱিঞ্ঞুতং পত্ৱা ঘৰবন্ধনেন বদ্ধো ৰতনত্তযে পসন্নো পৰিনিব্বানমঞ্চে নিপন্নং পদুমুত্তৰং ভগৱন্তং দিস্ৱা সন্নিপতিতা দসসহস্সচক্কৱাড়দেৱতাযো চ দিস্ৱা পসন্নমানসো নিগ্গুণ্ডিকেটকনীলকাসোকাসিতাদিঅনেকেহি সুগন্ধপুপ্ফেহি পূজেসি. সো তেন পুঞ্ঞকম্মেন যাৱতাযুকং ঠত্ৱা ততো চৱিত্ৱা তুসিতাদীসু দিব্বসম্পত্তিযো অনুভৱিত্ৱা ততো মনুস্সেসু মনুস্সসম্পত্তিযো অনুভৱিত্ৱা নিব্বত্তনিব্বত্তট্ঠানেসু চ সুগন্ধেহি পুপ্ফেহি পূজিতো অহোসি. ইমস্মিং পন বুদ্ধুপ্পাদে একস্মিং ৱিভৱসম্পন্নে কুলে নিব্বত্তিত্ৱা ৱিঞ্ঞুতং পত্তো কামেসু আদীনৱং দিস্ৱাপি যাৱ বুদ্ধস্স ভগৱতো পৰিনিব্বানকালো তাৱ অলদ্ধবুদ্ধদস্সনো ভগৱতো পৰিনিব্বানমঞ্চে নিপন্নকালেযেৱ পব্বজিত্ৱা অৰহত্তং পাপুণি. পুব্বে কতপুঞ্ঞনামেন সুভদ্দোতি পাকটো অহোসি.

১০১. সো অত্তনো পুব্বকম্মং সৰিত্ৱা সোমনস্সৱসেন পুব্বচৰিতাপদানং পকাসেন্তো পদুমুত্তৰো লোকৱিদূতিআদিমাহ. তং উত্তানত্থমেৱ. সুণাথ মম ভাসতো…পে… নিব্বাযিস্সতিনাসৱোতি ইদং পৰিনিব্বানমঞ্চে নিপন্নোৱ পদুমুত্তৰো ভগৱা ব্যাকাসি.

পঞ্চমভাণৱাৰৱণ্ণনা সমত্তা.

১১৫. সো অত্তনো পটিপত্তিং দস্সেন্তো পুব্বকম্মেন সংযুত্তোতিআদিমাহ. একগ্গোতি একগ্গচিত্তো. সুসমাহিতোতি সুট্ঠু সমাহিতো, সন্তকাযচিত্তোতি অত্থো. বুদ্ধস্স ওৰসো পুত্তোতি বুদ্ধস্স উৰসা হদযেন নিগ্গতওৱাদানুসাসনিং সুত্ৱা পত্তঅৰহত্তফলোতি অত্থো. ধম্মজোম্হি সুনিম্মিতোতি ধম্মতো কম্মট্ঠানধম্মতো জাতো অৰিযায জাতিযা সুনিম্মিতো সুট্ঠু নিপ্ফাদিতসব্বকিচ্চো অম্হি ভৱামীতি অত্থো.

১১৬. ধম্মৰাজং উপগম্মাতি ধম্মেন সব্বসত্তানং ৰাজানং ইস্সৰভূতং ভগৱন্তং উপগন্ত্ৱা সমীপং গন্ত্ৱাতি অত্থো. অপুচ্ছিং পঞ্হমুত্তমন্তি উত্তমং খন্ধাযতনধাতুসচ্চসমুপ্পাদাদিপটিসংযুত্তং পঞ্হং অপুচ্ছিন্তি অত্থো. কথযন্তো চ মে পঞ্হন্তি এসো অম্হাকং ভগৱা মে ময্হং পঞ্হং কথযন্তো ব্যাকৰোন্তো. ধম্মসোতং উপানযীতি অনুপাদিসেসনিব্বানধাতুসঙ্খাতং ধম্মসোতং ধম্মপৱাহং উপানযি পাৱিসীতি অত্থো.

১১৮. জলজুত্তমনাযকোতি পদুমুত্তৰনামকো ম-কাৰস্স য-কাৰং কত্ৱা কতৱোহাৰো. নিব্বাযি অনুপাদানোতি উপাদানে পঞ্চক্খন্ধে অগ্গহেত্ৱা নিব্বাযি ন পঞ্ঞাযি অদস্সনং অগমাসি, মনুস্সলোকাদীসু কত্থচিপি অপতিট্ঠিতোতি অত্থো. দীপোৱ তেলসঙ্খযাতি ৱট্টিতেলানং সঙ্খযা অভাৱা পদীপো ইৱ নিব্বাযীতি সম্বন্ধো.

১১৯. সত্তযোজনিকং আসীতি তস্স পৰিনিব্বুতস্স পদুমুত্তৰস্স ভগৱতো ৰতনমযং থূপং সত্তযোজনুব্বেধং আসি অহোসীতি অত্থো. ধজং তত্থ অপূজেসিন্তি তত্থ তস্মিং চেতিযে সব্বভদ্দং সব্বতো ভদ্দং সব্বসো মনোৰমং ধজং পূজেসিন্তি অত্থো.

১২০. কস্সপস্স চ বুদ্ধস্সাতি পদুমুত্তৰস্স ভগৱতো কালতো পট্ঠায আগতস্স দেৱমনুস্সেসু সংসৰতো মে ময্হং ওৰসো পুত্তো তিস্সো নাম কস্সপস্স সম্মাসম্বুদ্ধস্স অগ্গসাৱকো জিনসাসনে বুদ্ধসাসনে দাযাদো আসি অহোসীতি সম্বন্ধো.

১২১. তস্স হীনেন মনসাতি তস্স মম পুত্তস্স তিস্সস্স অগ্গসাৱকস্স হীনেন লামকেন মনসা চিত্তেন অভদ্দকং অসুন্দৰং অযুত্তকং ‘‘অন্তকো পচ্ছিমো’’তি ৱাচং ৱচনং অভাসিং কথেসিন্তি অত্থো. তেন কম্মৱিপাকেনাতি তেন অৰহন্তভক্খানসঙ্খাতস্স অকুসলকম্মস্স ৱিপাকেন. পচ্ছিমে অদ্দসং জিনন্তি পচ্ছিমে পৰিযোসানে পৰিনিব্বানকালে মল্লানং উপৱত্তনে সালৱনে পৰিনিব্বানমঞ্চে নিপন্নং জিনং জিতসব্বমাৰং অম্হাকং গোতমসম্মাসম্বুদ্ধং অদ্দসং অহন্তি অত্থো. ‘‘পচ্ছা মে আসি ভদ্দক’’ন্তিপি পাঠো. তস্স পচ্ছা তস্স ভগৱতো অৱসানকালে নিব্বানাসন্নকালে মে ময্হং ভদ্দকং সুন্দৰং চতুসচ্চপটিৱিজ্ঝনং আসি অহোসীতি অত্থো.

১২২. পব্বাজেসি মহাৱীৰোতি মহাৱীৰিযো সব্বসত্তহিতো কৰুণাযুত্তো জিতমাৰো মুনি মল্লানং উপৱত্তনে সালৱনে পচ্ছিমে সযনে পৰিনিব্বানমঞ্চে সযিতোৱ মং পব্বাজেসীতি সম্বন্ধো.

১২৩. অজ্জেৱ দানি পব্বজ্জাতি অজ্জ এৱ ভগৱতো পৰিনিব্বানদিৱসেযেৱ মম পব্বজ্জা, তথা অজ্জ এৱ উপসম্পদা, অজ্জ এৱ দ্ৱিপদুত্তমস্স সম্মুখা পৰিনিব্বানং অহোসীতি সম্বন্ধো. সেসং সুৱিঞ্ঞেয্যমেৱাতি.

সুভদ্দত্থেৰঅপদানৱণ্ণনা সমত্তা.

১০. চুন্দত্থেৰঅপদানৱণ্ণনা

সিদ্ধত্থস্স ভগৱতোতিআদিকং আযস্মতো চুন্দত্থেৰস্স অপদানং. অযম্পি পুৰিমবুদ্ধেসু কতপুঞ্ঞসম্ভাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে ৱিভৱসম্পন্নে কুলে নিব্বত্তো ৱিঞ্ঞুতং পত্ৱা সত্থৰি পসীদিত্ৱা সত্তৰতনমযং সুৱণ্ণগ্ঘিযং কাৰেত্ৱা সুমনপুপ্ফেহি ছাদেত্ৱা ভগৱন্তং পূজেসি. তানি পুপ্ফানি আকাসং সমুগ্গন্ত্ৱা ৱিতানাকাৰেন অট্ঠংসু. অথ নং ভগৱা ‘‘অনাগতে গোতমস্স নাম ভগৱতো সাসনে চুন্দো নাম সাৱকো ভৱিস্সতী’’তি ব্যাকাসি. সো তেন পুঞ্ঞকম্মেন ততো চুতো দেৱলোকে উপপন্নো কমেন ছসু কামাৱচৰদেৱেসু সুখং অনুভৱিত্ৱা মনুস্সেসু চক্কৱত্তিআদিসম্পত্তিযো চ অনুভৱিত্ৱা ইমস্মিং বুদ্ধুপ্পাদে ব্ৰাহ্মণকুলে ৰূপসাৰিযা পুত্তো সাৰিপুত্তত্থেৰস্স কনিট্ঠো হুত্ৱা নিব্বত্তি. তস্স ৱিঞ্ঞুতং পত্তস্স আৰোহপৰিণাহৰূপৱযানং সুন্দৰতায সকাৰস্স চকাৰং কত্ৱা চুন্দোতি নামং কৰিংসু. সো ৱযপ্পত্তো ঘৰাৱাসে আদীনৱং পব্বজ্জায চ আনিসংসং দিস্ৱা ভাতুত্থেৰস্স সন্তিকে পব্বজিত্ৱা ৱিপস্সনং ৱড্ঢেত্ৱা নচিৰস্সেৱ অৰহত্তং পাপুণি.

১২৫. সো পত্তঅৰহত্তফলো একদিৱসং অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো সিদ্ধত্থস্স ভগৱতোতিআদিমাহ. তং হেট্ঠা ৱুত্তত্থমেৱ. অগ্ঘিযন্তিআদযোপি উত্তানত্থাযেৱ.

১২৮. ৱিতিণ্ণকঙ্খো সম্বুদ্ধোতি ৱিসেসেন মগ্গাধিগমেন ৱিচিকিচ্ছায খেপিতত্তা ৱিতিণ্ণকঙ্খো অসংসযো সম্বুদ্ধো. তিণ্ণোঘেহি পুৰক্খতোতি কামোঘাদীনং চতুন্নং ওঘানং তিণ্ণত্তা অতিক্কন্তত্তা ওঘতিণ্ণেহি খীণাসৱেহি পুৰক্খতো পৰিৱাৰিতোতি অত্থো. ব্যাকৰণগাথা উত্তানত্থাযেৱ.

১৩৯. উপট্ঠহিং মহাৱীৰন্তি উত্তমত্থস্স নিব্বানস্স পত্তিযা পাপুণনত্থায কপ্পসতসহস্সাধিকেসু চতুৰাসঙ্খ্যেয্যেসু কপ্পেসু পাৰমিযো পূৰেন্তেন কতৱীৰিযত্তা মহাৱীৰং বুদ্ধং উপট্ঠহিং উপট্ঠানং অকাসিন্তি অত্থো. অঞ্ঞে চ পেসলে বহূতি ন কেৱলমেৱ বুদ্ধং উপট্ঠহিং, পেসলে পিযসীলে সীলৱন্তে অঞ্ঞে চ বহুঅগ্গপ্পত্তে সাৱকে, মে ময্হং ভাতৰং সাৰিপুত্তত্থেৰঞ্চ উপট্ঠহিন্তি সম্বন্ধো.

১৪০. ভাতৰং মে উপট্ঠহিত্ৱাতি ময্হং ভাতৰং উপট্ঠহিত্ৱা ৱত্তপটিৱত্তং কত্ৱা তস্স পৰিনিব্বুতকালে ভগৱতো পঠমং পৰিনিব্বুতত্তা তস্স ধাতুযো গহেত্ৱা পত্তম্হি ওকিৰিত্ৱা লোকজেট্ঠস্স নৰানং আসভস্স বুদ্ধস্স উপনামেসিং অদাসিন্তি অত্থো.

১৪১. উভো হত্থেহি পগ্গয্হাতি তং মহা দিন্নং ধাতুং সো ভগৱা অত্তনো উভোহি হত্থেহি পকাৰেন গহেত্ৱা তং ধাতুং সংসুট্ঠু দস্সযন্তো অগ্গসাৱকং সাৰিপুত্তত্থেৰং কিত্তযি পকাসেসীতি অত্থো. সেসং উত্তানত্থমেৱাতি.

চুন্দত্থেৰঅপদানৱণ্ণনা সমত্তা.

পঞ্চমৱগ্গৱণ্ণনা সমত্তা.