১-৬০. সকিংসম্মজ্জকত্থেৰঅপদানাদিৱণ্ণনা

তেচত্তালীসমৱগ্গে সব্বথেৰাপদানানি উত্তানানেৱ. কেৱলং থেৰানং নামনানত্তং পুঞ্ঞনানত্তঞ্চ ৱিসেসো.

চতুচত্তালীসমে ৱগ্গেপি সব্বানি অপদানানি পাকটানেৱ. কেৱলং পুঞ্ঞনানত্তং ফলনানত্তঞ্চ ৱিসেসো.

১. পঞ্চচত্তালীসমৱগ্গে পঠমাপদানে ককুসন্ধো মহাৱীৰোতিআদিকং আযস্মতো ৱিভীটকমিঞ্জিযত্থেৰস্স অপদানং.

২. তত্থ বীজমিঞ্জমদাসহন্তি ৱিভীটকফলানি ফালেত্ৱা বীজানি মিঞ্জানি গহেত্ৱা মধুসক্কৰাহি যোজেত্ৱা ককুসন্ধস্স ভগৱতো অদাসিন্তি অত্থো. দুতিযাপদানাদীনি সব্বানি সুৱিঞ্ঞেয্যানেৱ, থেৰানং নামনানত্তাদীনিপি পাঠানুসাৰেন ৱেদিতব্বানি.

১. ছচত্তালীসমে ৱগ্গে পঠমাপদানে জগতিং কাৰযিং অহন্তি উত্তমবোধিৰুক্খস্স সমন্ততো আড়িন্দং অহং কাৰযিন্তি অত্থো. সেসানি দুতিযাপদানাদীনি সব্বানিপি উত্তানানেৱ.

সত্তচত্তালীসমে ৱগ্গে পঠমাপদানাদীনি পাড়িঅনুসাৰেন সুৱিঞ্ঞেয্যানেৱ.

অট্ঠচত্তালীসমে ৱগ্গে পঠমদুতিযাপদানানি উত্তানানেৱ.

৩০. ততিযাপদানে কোসিযো নাম ভগৱাতি কোসিযগোত্তে জাতত্তা কোসিযো নাম পচ্চেকবুদ্ধোতি অত্থো. চিত্তকূটেতি চিত্তকূটকেলাসকূটসানুকূটাদীসু অনোতত্তদহং পটিচ্ছাদেত্ৱা ঠিতপব্বতকূটেসু নানাৰতনওসধাদীহি ৱিচিত্তে চিত্তকূটপব্বতে সো পচ্চেকবুদ্ধো ৱসীতি অত্থো.

চতুত্থপঞ্চমাপদানানি উত্তানানেৱ.

৫৬. ছট্ঠাপদানে কুসট্ঠকমদাসহন্তি পক্খিকভত্তউপোসথিকভত্তধুৰভত্তসলাকভত্তাদীসু কুসপণ্ণৱসেন দাতব্বং অট্ঠসলাকভত্তং অহং অদাসিন্তি অত্থো.

৬১. সত্তমাপদানে সোভিতো নাম সম্বুদ্ধোতি আৰোহপৰিণাহদ্ৱত্তিংসমহাপুৰিসলক্খণব্যামপ্পভাদীহি সোভমানসৰীৰত্তা সোভিতো নাম সম্মাসম্বুদ্ধোতি অত্থো.

৬৬. অট্ঠমাপদানে তক্কৰাযং ৱসী তদাতি তং দসপুঞ্ঞকিৰিযৱত্থুং কৰোন্তা জনা পটিৱসন্তি এত্থাতি তক্কৰা, ৰাজধানী. তিস্সং তক্কৰাযং, তদা ৱসীতি অত্থো.

৭২. নৱমাপদানে পানধিং সুকতং গয্হাতি উপাহনযুগং সুন্দৰাকাৰেন নিপ্ফাদিতং গহেত্ৱাতি অত্থো. দসমাপদানং সুৱিঞ্ঞেয্যমেৱাতি.

অট্ঠচত্তালীসমৱগ্গৱণ্ণনা নিট্ঠিতা.