৪৯. পংসুকূলৱগ্গো

১-১০. পংসুকূলসঞ্ঞকত্থেৰঅপদানাদিৱণ্ণনা

একূনপঞ্ঞাসমৱগ্গে পঠমাপদানং সুৱিঞ্ঞেয্যমেৱ.

১৪. দুতিযাপদানে অধিচ্চুপ্পত্তিকা বুদ্ধাতি অধিচ্চেন অকাৰণেন উপ্পত্তিকা সযম্ভূতা, অঞ্ঞেহি দেৱব্ৰহ্মমাৰাদীহি উপদেসদাযকেহি ৰহিতা সযম্ভূঞাণেন উপ্পন্না জাতা পাতুভূতাতি অত্থো.

১৬. ওদুম্বৰিকপুপ্ফং ৱাতি উদুম্বৰৰুক্খে পুপ্ফং দুল্লভং দুল্লভুপ্পত্তিকং ইৱ. চন্দম্হি সসকং যথাতি চন্দমণ্ডলে সসলেখায ৰূপং দুল্লভং যথা. ৱাযসানং যথা খীৰন্তি কাকানং নিচ্চং ৰত্তিন্দিৱং খুদ্দাপীড়িতভাৱেন খীৰং দুল্লভং যথা, এৱং দুল্লভং লোকনাযকং চতুৰাসঙ্খ্যেয্যং ৱা অট্ঠাসঙ্খ্যেয্যং ৱা সোড়সাসঙ্খ্যেয্যং ৱা কপ্পসতসহস্সং পাৰমিযো পূৰেত্ৱা বুদ্ধভাৱতো দুল্লভো লোকনাযকোতি অত্থো.

৩০. ততিযাপদানে মধুং ভিসেহি সৱতীতি পোক্খৰমধুপদুমকেসৰেহি সৱতি পগ্ঘৰতি. খীৰং সপ্পিং মুড়ালিভীতি খীৰঞ্চ সপ্পিৰসঞ্চ পদুমমুড়ালেহি সৱতি পগ্ঘৰতি. তস্মা তদুভযং মম সন্তকং বুদ্ধো পটিগ্গণ্হতূতি অত্থো.

চতুত্থপঞ্চমছট্ঠাপদানানি উত্তানানেৱ.

১১৯. সত্তমাপদানে চত্তালীসদিজাপি চাতি দ্ৱিক্খত্তুং জাতাতি দিজা. কুমাৰৱযে উট্ঠিতদন্তানং পতিতত্তা পুন উট্ঠিতদন্তা দিজা, তে চ দন্তা. ব্যাকৰণঞ্চ হেট্ঠা নিদানকথাযং ৱুত্তমেৱ.

অট্ঠমাপদানং উত্তানমেৱাতি.

১৭১. নৱমাপদানে তদাহং মাণৱো আসিন্তি যদা সুমেধপণ্ডিতো দীপঙ্কৰভগৱতো সন্তিকা ব্যাকৰণং লভি, তদা অহং মেঘো নাম ব্ৰাহ্মণমাণৱো হুত্ৱা সুমেধতাপসেন সহ ইসিপব্বজ্জং পব্বজিত্ৱা সিক্খাপদেসু সিক্খিতো কেনচি পাপসহাযেন সংসট্ঠো সংসগ্গদোসেন পাপৱিতক্কাদিৱসং গতো মাতুঘাতকম্মৱসেন নৰকে অগ্গিজালাদিদুক্খমনুভৱিত্ৱা ততো চুতো সমুদ্দে তিমিঙ্গলমহামচ্ছো হুত্ৱা নিব্বত্তো, সমুদ্দমজ্ঝে গচ্ছন্তং মহানাৱং গিলিতুকামো গতো. দিস্ৱা মং ৱাণিজা ভীতা ‘‘অহো গোতমো ভগৱা’’তি সদ্দমকংসু. অথ মহামচ্ছো পুব্বৱাসনাৱসেন বুদ্ধগাৰৱং উপ্পাদেত্ৱা ততো চুতো সাৱত্থিযং ৱিভৱসম্পন্নে ব্ৰাহ্মণকুলে নিব্বত্তো সদ্ধো পসন্নো সত্থু ধম্মদেসনং সুত্ৱা পব্বজিত্ৱা সহ পটিসম্ভিদাহি অৰহত্তং পাপুণিত্ৱা দিৱসস্স তিক্খত্তুং উপট্ঠানং গন্ত্ৱা সৰমানো ৱন্দতি. তদা ভগৱা ‘‘চিৰং ধম্মৰুচী’’তি মং আহ.

১৮৪. অথ সো থেৰো ‘‘সুচিৰং সতপুঞ্ঞলক্খণ’’ন্তিআদীহি গাথাহি থোমেসি. ভন্তে, সতপুঞ্ঞলক্খণধৰ গোতম. পতিপুব্বেন ৱিসুদ্ধপচ্চযন্তি পুব্বে দীপঙ্কৰপাদমূলে পৰিপুণ্ণপাৰমীপচ্চযসম্ভাৰো সুট্ঠু চিৰং কালং মযা ন দিট্ঠো অসীতি অত্থো. অহমজ্জসুপেক্খনন্তি অজ্জ ইমস্মিং দিৱসে অহং সুপেক্খনং সুন্দৰদস্সনং, সুন্দৰদিট্ঠং ৱা নিৰুপমং ৱিগ্গহং উপমাৰহিতসৰীৰং গোতমং ৱত একন্তেন পস্সামি দক্খামীতি অত্থো.

১৮৫-১৮৬. সুচিৰং ৱিহততমো মযাতি ৱিসেসেন হততমো ৱিদ্ধংসিতমোহো ত্ৱং মযাপি সুট্ঠু চিৰং থোমিতোতি অত্থো. সুচিৰক্খেন নদী ৱিসোসিতাতি এসা তণ্হানদী সুন্দৰৰক্খেন গোপনেন ৱিসেসেন সোসিতা, অভব্বুপ্পত্তিকতা তযাতি অত্থো. সুচিৰং অমলং ৱিসোধিতন্তি সুট্ঠু চিৰং দীঘেন অদ্ধুনা অমলং নিব্বানং ৱিসেসেন সোধিতং, সুট্ঠু কতং অধিগতং তযাতি অত্থো. নযনং ঞাণমযং মহামুনে. চিৰকালসমঙ্গিতোতি মহামুনে মহাসমণ ঞাণমযং নযনং দিব্বচক্খুং চিৰকালং সমধিগতো সম্পত্তো ত্ৱন্তি অত্থো. অৱিনট্ঠো পুনৰন্তৰন্তি অহং পুন অন্তৰং অন্তৰাভৱে মজ্ঝে পৰিনট্ঠো পৰিহীনো অহোসিন্তি অত্থো. পুনৰজ্জসমাগতো তযাতি অজ্জ ইমস্মিং কালে তযা সদ্ধিং পুনপি সমাগতো একীভূতো সহ ৱসামীতি অত্থো. ন হি নস্সন্তি কতানি গোতমাতি গোতম সব্বঞ্ঞুবুদ্ধ, তযা সদ্ধিং কতানি সমাগমাদীনি ন হি নস্সন্তি যাৱ খন্ধপৰিনিব্বানা ন ৱিনা ভৱিস্সন্তীতি অত্থো. সেসং উত্তানমেৱাতি.

ধম্মৰুচিযত্থেৰঅপদানৱণ্ণনা সমত্তা.

দসমাপদানং সুৱিঞ্ঞেয্যমেৱাতি.

একূনপঞ্ঞাসমৱগ্গৱণ্ণনা সমত্তা.