৪০. পিলিন্দৱচ্ছৱগ্গো

১. পিলিন্দৱচ্ছত্থেৰঅপদানৱণ্ণনা

চত্তালীসমৱগ্গে অপদানে নগৰে হংসৱতিযাতিআদিকং আযস্মতো পিলিন্দৱচ্ছত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে হংসৱতীনগৰে দোৱাৰিককুলে নিব্বত্তো মহদ্ধনো মহাভোগো অহোসি. সো কোটিসন্নিচিতধনৰাসিং ওলোকেত্ৱা ৰহো নিসিন্নো ‘‘ইমং সব্বধনং মযা সম্মা গহেত্ৱা গন্তুং ৱট্টতী’’তি চিন্তেত্ৱা ‘‘বুদ্ধপ্পমুখস্স ভিক্খুসঙ্ঘস্স সব্বপৰিক্খাৰদানং দাতুং ৱট্টতী’’তি সন্নিট্ঠানং কত্ৱা ছত্তসতসহস্সং আদিং কত্ৱা সব্বপৰিভোগপৰিক্খাৰানিপি সতসহস্সৱসেন কাৰেত্ৱা পদুমুত্তৰং ভগৱন্তং নিমন্তেত্ৱা বুদ্ধপ্পমুখস্স ভিক্খুসঙ্ঘস্স মহাদানং অদাসি. এৱং সত্তাহং দানং দত্ৱা পৰিযোসানদিৱসে নিব্বানাধিগমং পত্থেত্ৱা যাৱজীৱং পুঞ্ঞানি কত্ৱা জীৱিতপৰিযোসানে দেৱলোকে নিব্বত্তো ছ কামাৱচৰে দিব্বসম্পত্তিযো অনুভৱিত্ৱা মনুস্সেসু চ চক্কৱত্তিআদিসম্পত্তিযো অনুভৱিত্ৱা ইমস্মিং বুদ্ধুপ্পাদে ব্ৰাহ্মণকুলে নিব্বত্তো সব্বসিপ্পেসু নিপ্ফত্তিং পত্তো গোত্তৱসেন পিলিন্দৱচ্ছোতি পাকটো অহোসি.

১. সো একদিৱসং সত্থু সন্তিকে ধম্মদেসনং সুত্ৱা পটিলদ্ধসদ্ধো পব্বজিত্ৱা নচিৰস্সেৱ অৰহা হুত্ৱা অত্তনো পুব্বকম্মং সৰিত্ৱা সোমনস্সজাতো উদানৱসেন তং পকাসেন্তো নগৰে হংসৱতিযাতিআদিমাহ. তস্সত্থো হেট্ঠা ৱুত্তোৱ. আসিং দোৱাৰিকো অহন্তি অহং হংসৱতীনগৰে ৰঞ্ঞো গেহদ্ৱাৰে দ্ৱাৰপালকো আসিং অহোসিন্তি অত্থো. অক্খোভং অমিতং ভোগন্তি ৰঞ্ঞো ৱল্লভত্তা অঞ্ঞেহি খোভেতুং চালেতুং অসক্কুণেয্যং অমিতং অপৰিমাণভোগং ধনং মম ঘৰে সন্নিচিতং ৰাসীকতং অহোসীতি অত্থো.

৩. বহূ মেধিগতা ভোগাতি অনেকা ভোগা মে মযা অধিগতা পত্তা পটিলদ্ধাতি অত্থো. সত্থৱাসিআদীনং পৰিক্খাৰানং নামানি নযানুযোগেন সুৱিঞ্ঞেয্যানি. পৰিক্খাৰদানানিসংসানি চ সুৱিঞ্ঞেয্যানেৱাতি.

পিলিন্দৱচ্ছত্থেৰঅপদানৱণ্ণনা সমত্তা.

দুতিযততিযচতুত্থপঞ্চমাপদানানি উত্তানানেৱাতি.

৬. বাকুলত্থেৰঅপদানৱণ্ণনা

ছট্ঠাপদানে হিমৱন্তস্সাৱিদূৰেতিআদিকং বাকুলত্থেৰস্স অপদানং. অযং কিৰ থেৰো অতীতে ইতো কপ্পসতসহস্সাধিকস্স অসঙ্খ্যেয্যস্স মত্থকে অনোমদস্সিস্স ভগৱতো উপ্পত্তিতো পুৰেতৰমেৱ ব্ৰাহ্মণকুলে নিব্বত্তিত্ৱা ৱযপ্পত্তো তযো ৱেদে উগ্গণ্হিত্ৱা তত্থ সাৰং অপস্সন্তো ‘‘সম্পৰাযিকত্থং গৱেসিস্সামী’’তি ইসিপব্বজ্জং পব্বজিত্ৱা পব্বতপাদে ৱিহৰন্তো পঞ্চাভিঞ্ঞাঅট্ঠসমাপত্তীনং লাভী হুত্ৱা ৱিহৰন্তো বুদ্ধুপ্পাদং সুত্ৱা সত্থু সন্তিকং গন্ত্ৱা ধম্মং সুত্ৱা সৰণেসু পতিট্ঠিতো সত্থু ৱাতাবাধে উপ্পন্নে অৰঞ্ঞতো ভেসজ্জানি আনেত্ৱা তং ৱূপসমেত্ৱা তং পুঞ্ঞং আৰোগ্যত্থায পৰিণামেত্ৱা ততো চুতো ব্ৰহ্মলোকে নিব্বত্তো একং অসঙ্খ্যেয্যং দেৱমনুস্সেসু সংসৰন্তো পদুমুত্তৰবুদ্ধকালে হংসৱতীনগৰে একস্মিং কুলে নিব্বত্তো ৱিঞ্ঞুতং পত্ৱা সত্থু ধম্মদেসনং সুত্ৱা সত্থাৰং একং ভিক্খুং অপ্পাবাধানং অগ্গট্ঠানে ঠপেন্তং দিস্ৱা সযং তং ঠানন্তৰং আকঙ্খন্তো পণিধানং কত্ৱা যাৱজীৱং কুসলকম্মং উপচিনিত্ৱা সুগতীসুযেৱ সংসৰন্তো ৱিপস্সিস্স ভগৱতো উপ্পত্তিতো পুৰেতৰমেৱ বন্ধুমতীনগৰে ব্ৰাহ্মণকুলে নিব্বত্তো সব্বসিপ্পেসু নিপ্ফত্তিং পত্তো তত্থ সাৰং অপস্সন্তো ইসিপব্বজ্জং পব্বজিত্ৱা ঝানাভিঞ্ঞালাভী হুত্ৱা পব্বতপাদে ৱসন্তো বুদ্ধুপ্পাদং সুত্ৱা সত্থু সন্তিকং গন্ত্ৱা সৰণেসু পতিট্ঠায ভিক্খূনং তিণপুপ্ফকৰোগে উপ্পন্নে তং ৱূপসমেত্ৱা তত্থ যাৱতাযুকং ঠত্ৱা ততো চুতো ব্ৰহ্মলোকে নিব্বত্তিত্ৱা ততো একনৱুতিকপ্পে দেৱমনুস্সেসু সংসৰন্তো কস্সপস্স ভগৱতো কালে বাৰাণসিযং কুলগেহে নিব্বত্তিত্ৱা ঘৰাৱাসং ৱসন্তো একং জিণ্ণং ৱিনস্সমানং মহাৱিহাৰং দিস্ৱা তত্থ উপোসথাগাৰাদিকং সব্বং আৱসথং কাৰাপেত্ৱা তত্থ ভিক্খুসঙ্ঘস্স সব্বং ভেসজ্জং পটিযাদেত্ৱা যাৱজীৱং কুসলং কত্ৱা একং বুদ্ধন্তৰং দেৱমনুস্সেসু সংসৰন্তো অম্হাকং ভগৱতো উপ্পত্তিতো পুৰেতৰমেৱ কোসম্বিযং সেট্ঠিকুলে নিব্বত্তি.

সো মাতুকুচ্ছিতো নিক্খমিত্ৱা ধাতীহি অৰোগভাৱায যমুনাযং ন্হাপিযমানো তাসং হত্থতো মুচ্চিত্ৱা মচ্ছেন গিলিতো অহোসি. কেৱট্টা তং মচ্ছং জালায গহেত্ৱা বাৰাণসিযং সেট্ঠিভৰিযায ৱিক্কিণিংসু. সা তং গহেত্ৱা ফালযমানা পুব্বে কতপুঞ্ঞফলেন অৰোগং দাৰকং দিস্ৱা ‘‘পুত্তো মে লদ্ধো’’তি গহেত্ৱা পোসেসি. সো জনকেহি মাতাপিতূহি তং পৱত্তিং সুত্ৱা আগন্ত্ৱা ‘‘অযং অম্হাকং পুত্তো, দেথ নো পুত্ত’’ন্তি অনুযোগে কতে ৰঞ্ঞা ‘‘উভযেসম্পি সাধাৰণো হোতূ’’তি দ্ৱিন্নং কুলানং দাযাদভাৱেন ৱিনিচ্ছযং কত্ৱা ঠপিতত্তা বাকুলোতি লদ্ধনামো ৱযপ্পত্তো মহাসম্পত্তিং অনুভৱন্তো দ্ৱীসু সেট্ঠিকুলেসু একেকস্মিং ছমাসং ছমাসং ৱসতি. তে অত্তনো ৱাৰে সম্পত্তে নাৱাসঙ্ঘাটং বন্ধিত্ৱা তত্ৰূপৰি ৰতনমণ্ডপং কাৰেত্ৱা পঞ্চঙ্গিকতূৰিযে নিপ্ফাদেত্ৱা কুমাৰং তত্থ নিসীদাপেত্ৱা উভযনগৰমজ্ঝট্ঠানং গঙ্গায আগচ্ছন্তি, অপৰসেট্ঠিমনুস্সাপি এৱমেৱ সজ্জেত্ৱা তং ঠানং গন্ত্ৱা কুমাৰং তত্থ আৰোপেত্ৱা গচ্ছন্তি. সো এৱং ৱড্ঢমানো আসীতিকো হুত্ৱা উভযসেট্ঠিপুত্তোতি পাকটো. সত্থু সন্তিকং গন্ত্ৱা ধম্মং সুত্ৱা পটিলদ্ধসদ্ধো পব্বজিত্ৱা সত্তাহং ৱাযমন্তো অট্ঠমে দিৱসে সহ পটিসম্ভিদায অৰহত্তং পাপুণি.

৩৮৬. সো অৰহা হুত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো হিমৱন্তস্সাৱিদূৰেতিআদিমাহ. তস্সত্থো হেট্ঠা ৱুত্তোৱ. অপদানপাড়িঅত্থোপি সুৱিঞ্ঞেয্যোৱ. সো অৰহত্তং পত্ৱা ৱিমুত্তিসুখেন ৱিহৰন্তো সট্ঠিৱস্সসতাযুকো হুত্ৱা পৰিনিব্বাযীতি.

বাকুলত্থেৰঅপদানৱণ্ণনা সমত্তা.

৭. গিৰিমানন্দত্থেৰঅপদানৱণ্ণনা

সত্তমাপদানে ভৰিযা মে কালঙ্কতাতিআদিকং আযস্মতো গিৰিমানন্দত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সুমেধস্স ভগৱতো কালে কুলগেহে নিব্বত্তো ৱযপ্পত্তো ঘৰাৱাসং সণ্ঠপেত্ৱা ৱসন্তো অত্তনো ভৰিযায চ পুত্তে চ কালঙ্কতে সোকসল্লসমপ্পিতো অৰঞ্ঞং পৱিসিত্ৱা পৱত্তফলভোজনো ৰুক্খমূলে ৱিহাসি. তদা সুমেধো ভগৱা তস্সানুকম্পায তত্থ গন্ত্ৱা ধম্মং দেসেত্ৱা সোকসল্লং অব্বূড়্হেসি. সো ধম্মং সুত্ৱা পসন্নমানসো সুগন্ধপুপ্ফেহি ভগৱন্তং পূজেত্ৱা পঞ্চপতিট্ঠিতেন ৱন্দিত্ৱা সিৰসি অঞ্জলিং কত্ৱা অভিত্থৱি.

সো তেন পুঞ্ঞেন দেৱমনুস্সেসু সংসৰন্তো উভযত্থ সুখং অনুভৱিত্ৱা ইমস্মিং বুদ্ধুপ্পাদে ৰাজগহে বিম্বিসাৰৰঞ্ঞো পুৰোহিতস্স পুত্তো হুত্ৱা নিব্বত্তি, গিৰিমানন্দোতিস্স নামং অহোসি. সো ৱিঞ্ঞুতং পত্ৱা সত্থু ৰাজগহাগমনে বুদ্ধানুভাৱং দিস্ৱা পটিলদ্ধসদ্ধো পব্বজিত্ৱা সমণধম্মং কৰোন্তো কতিপযং দিৱসং গামকাৱাসে ৱসিত্ৱা সত্থাৰং ৱন্দিতুং ৰাজগহং অগমাসি. বিম্বিসাৰমহাৰাজা তস্স আগমনং সুত্ৱা তং উপসঙ্কমিত্ৱা ‘‘ইধেৱ, ভন্তে, ৱসথ, অহং চতূহি পচ্চযেহি উপট্ঠহামী’’তি সম্পৱাৰেত্ৱা গতোপি বহুকিচ্চত্তা তং ন সৰি. ‘‘থেৰো অব্ভোকাসেযেৱ ৱসতী’’তি. দেৱতা থেৰস্স তেমনভযেন ৱস্সধাৰং ৱাৰেসুং. ৰাজা অৱস্সনকাৰণং উপধাৰেত্ৱা ঞত্ৱা থেৰস্স কুটিকং কাৰাপেসি. থেৰো কুটিকাযং ৱসন্তো সেনাসনসপ্পাযলাভেন চিত্তসমাধানং লভিত্ৱা ৱীৰিযসমতং যোজেত্ৱা ৱিপস্সনং উস্সুক্কাপেত্ৱা অৰহত্তং পাপুণি.

৪১৯. সো অৰহত্তং পত্ৱা অত্তনো পুব্বকম্মং সৰিত্ৱা সঞ্জাতসোমনস্সো পুব্বচৰিতাপদানং পকাসেন্তো ভৰিযা মে কালঙ্কতাতিআদিমাহ. তং ভগৱতো নিৱেদনঞ্চ ভগৱতা কতানুসাসনঞ্চ মগ্গং ফলাধিগমাপদানঞ্চ পাঠানুসাৰেন সুৱিঞ্ঞেয্যমেৱাতি.

গিৰিমানন্দত্থেৰঅপদানৱণ্ণনা সমত্তা.

অট্ঠমনৱমদসমাপদানানি উত্তানত্থানেৱাতি.

চত্তালীসমৱগ্গৱণ্ণনা সমত্তা.