৪১. মেত্তেয্যৱগ্গো

১. তিস্সমেত্তেয্যত্থেৰঅপদানৱণ্ণনা

১. একচত্তালীসমে ৱগ্গে পঠমাপদানে পব্ভাৰকূটং নিস্সাযাতিআদিকং তিস্সমেত্তেয্যত্থেৰস্স অপদানং. তত্থ তাপসপব্বজ্জং পব্বজিত্ৱা পদুমুত্তৰস্স ভগৱতো অজিনচম্মং নিসীদনত্থায দিন্নমেৱ নানং. সেসং অপদানপাড়িযা সুৱিঞ্ঞেয্যমেৱাতি.

২. পুণ্ণকত্থেৰঅপদানৱণ্ণনা

২৯. দুতিযাপদানে পব্ভাৰকূটং নিস্সাযাতিআদিকং আযস্মতো পুণ্ণকত্থেৰস্স অপদানং. তত্থ হিমৱন্তে যক্খসেনাপতি হুত্ৱা পৰিনিব্বুতস্স পচ্চেকবুদ্ধস্স আড়হনকৰণমেৱ নানত্তং. সেসং পাঠানুসাৰেন সুৱিঞ্ঞেয্যমেৱ.

৪৫. ততিযাপদানে হিমৱন্তস্সাৱিদূৰেতিআদিকং আযস্মতো মেত্তগুত্থেৰস্স অপদানং. তত্থ হিমৱন্তসমীপে অসোকপব্বতে সো তাপসো হুত্ৱা পণ্ণসালাযং ৱসন্তো সুমেধসম্বুদ্ধং দিস্ৱা পত্তং গহেত্ৱা সপ্পিপূৰণং ৱিসেসো. সেসং পুঞ্ঞফলানি চ সুৱিঞ্ঞেয্যানেৱ. অপদানগাথানং অত্থো চ পাকটোযেৱ.

৭২. চতুত্থাপদানে গঙ্গা ভাগীৰথী নামাতিআদিকং আযস্মতো ধোতকত্থেৰস্স অপদানং. তত্ৰাপি ব্ৰাহ্মণো হুত্ৱা ভাগীৰথীগঙ্গায তৰমানে ভিক্খূ দিস্ৱা পসন্নমানসো সেতুং কাৰাপেত্ৱা বুদ্ধপ্পমুখস্স ভিক্খুসঙ্ঘস্স নিয্যাদিতভাৱোযেৱ ৱিসেসো. পুঞ্ঞফলপৰিদীপনগাথানং অত্থো নযানুসাৰেন সুৱিঞ্ঞেয্যোৱ.

১০০. পঞ্চমাপদানে হিমৱন্তস্সাৱিদূৰেতিআদিকং আযস্মতো উপসিৱত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে কুলগেহে নিব্বত্তো ৱিঞ্ঞুতং পত্তো ঘৰাৱাসং পহায ইসিপব্বজ্জং পব্বজিত্ৱা হিমৱন্তে পদুমুত্তৰং ভগৱন্তং দিস্ৱা তিণসন্থৰং সন্থৰিত্ৱা তত্থ নিসিন্নস্স ভগৱতো সালপুপ্ফপূজং অকাসীতি অযং ৱিসেসো, সেসমুত্তানমেৱ.

১৬১. ছট্ঠাপদানে মিগলুদ্দো পুৰে আসিন্তিআদিকং আযস্মতো নন্দকত্থেৰস্স অপদানং. অযং কিৰ পদুমুত্তৰস্স ভগৱতো কালে কৰৱিকসকুণো হুত্ৱা মধুৰকূজিতং কৰোন্তো সত্থাৰং পদক্খিণং অকাসি. অপৰভাগে মযূৰো হুত্ৱা অঞ্ঞতৰস্স পচ্চেকবুদ্ধস্স ৱসনগুহাদ্ৱাৰে পসন্নমানসো দিৱসস্স তিক্খত্তুং মধুৰেন ৱস্সিতং ৱস্সি. এৱং তত্থ তত্থ ভৱে পুঞ্ঞানি কত্ৱা অম্হাকং ভগৱতো কালে সাৱত্থিযং কুলগেহে নিব্বত্তো নন্দকোতি লদ্ধনামো সত্থু সন্তিকে ধম্মং সুত্ৱা পব্বজিত্ৱা ৱিপস্সনং ৱড্ঢেত্ৱা অৰহত্তং পাপুণি. সো অপৰভাগে অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো মিগলুদ্দো পুৰে আসিন্তিআদিমাহ. তত্থ পচ্চেকবুদ্ধস্স মণ্ডপং কত্ৱা পদুমপুপ্ফেহি ছদনমেৱ ৱিসেসো.

১৮৩. সত্তমাপদানে পব্ভাৰকূটং নিস্সাযাতিআদিকং আযস্মতো হেমকত্থেৰস্স অপদানং. তত্থাপি ইসিপব্বজ্জং পব্বজিত্ৱা হিমৱন্তে ৱসন্তো পিযদস্সিং ভগৱন্তং উপগতং দিস্ৱা ৰতনমযং পীঠং অত্থৰিত্ৱা অট্ঠাসি. তত্থ নিসিন্নস্স কুম্ভমত্তং জম্বুফলং আহৰিত্ৱা অদাসি. ভগৱা তস্স চিত্তপ্পসাদত্থায তং ফলং পৰিভুঞ্জি. এত্তকমেৱ ৱিসেসো.

২২৪. অট্ঠমাপদানে ৰাজাসি ৱিজযো নামাতিআদিকং আযস্মতো তোদেয্যত্থেৰস্স অপদানং. তত্থ ৰাজাসি ৱিজযো নামাতি দহৰকালতো পট্ঠায সব্বসঙ্গামেসু জিনতো, চতূহি সঙ্গহৱত্থূহি জনং ৰঞ্জনতো অল্লীযনতো ৱিজযো নাম ৰাজা অহোসীতি অত্থো. কেতুমতীপুৰুত্তমেতি কেতু ৱুচ্চন্তি ধজপটাকা. অথ ৱা নগৰসোভনত্থায নগৰমজ্ঝে উস্সাপিতৰতনতোৰণানি, তে কেতূ নিচ্চং উস্সাপিতা সোভযমানা অস্সা অত্থীতি কেতুমতী. পূৰেতি ধনধঞ্ঞেহি সব্বজনানং মনন্তি পুৰং. কেতুমতী চ সা পুৰঞ্চ সেট্ঠট্ঠেন উত্তমঞ্চেতি কেতুমতীপুৰুত্তমং, তস্মিং কেতুমতীপুৰুত্তমে. সূৰো ৱিক্কমসম্পন্নোতি অভীতো ৱীৰিযসম্পন্নো ৱিজযো নাম ৰাজা অজ্ঝাৱসীতি সম্বন্ধো. ইত্থং ভূতং পুৰঞ্চ সব্বৱত্থুৱাহনঞ্চ ছড্ডেত্ৱা হিমৱন্তং পৱিসিত্ৱা ইসিপব্বজ্জং পব্বজিত্ৱা ৱসন্তো সুমেধভগৱন্তং দিস্ৱা সোমনস্সং উপ্পাদেত্ৱা চন্দনেন পূজাকৰণমেৱ ৱিসেসো.

২৭৬. নৱমাপদানে নগৰে হংসৱতিযাতিআদিকং আযস্মতো জতুকণ্ণিত্থেৰস্স অপদানং. তত্থ সেট্ঠিপুত্তো হুত্ৱা সুৱণ্ণপাসাদে ৱসনভাৱো চ পঞ্চহি কামগুণেহি সমঙ্গী হুত্ৱা ৱসনভাৱো চ সব্বদেসৱাসীনং সব্বসিপ্পৱিঞ্ঞূনঞ্চ আগন্ত্ৱা সেৱনভাৱো চ ৱিসেসো.

৩৩০. দসমাপদানে হিমৱন্তস্সাৱিদূৰেতিআদিকং আযস্মতো উদেনত্থেৰস্স অপদানং. তত্থ হিমৱন্তসমীপে পদুমপব্বতং নিস্সায তাপসপব্বজ্জং পব্বজিত্ৱা ৱসন্তেন পদুমুত্তৰস্স ভগৱতো পদুমপুপ্ফং গহেত্ৱা পূজিতভাৱোৱ ৱিসেসো. সেসং সব্বত্থ উত্তানমেৱাতি.

একচত্তালীসমৱগ্গৱণ্ণনা সমত্তা.