৯. ধম্মচক্কিকত্থেৰঅপদানৱণ্ণনা

সিদ্ধত্থস্স ভগৱতোতিআদিকং আযস্মতো ধম্মচক্কিকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে একস্মিং কুলগেহে নিব্বত্তো ৱুদ্ধিপ্পত্তো পুত্তদাৰেহি ৱড্ঢিতো ৱিভৱসম্পন্নো মহাভোগো, সো ৰতনত্তযে পসন্নো সদ্ধাজাতো ধম্মসভাযং ধম্মাসনস্স পিট্ঠিতো ৰতনমযং ধম্মচক্কং কাৰেত্ৱা পূজেসি. সো তেন পুঞ্ঞকম্মেন দেৱমনুস্সেসু নিব্বত্তট্ঠানেসু সক্কসম্পত্তিং চক্কৱত্তিসম্পত্তিঞ্চ অনুভৱিত্ৱা কমেন ইমস্মিং বুদ্ধুপ্পাদে একস্মিং কুলগেহে উপ্পন্নো ৱিভৱসম্পন্নো সঞ্জাতসদ্ধো পব্বজিত্ৱা ৱিপস্সনং ৱড্ঢেত্ৱা নচিৰস্সেৱ অৰহত্তং পত্ৱা পুব্বে কতকুসলনামসদিসনামেন ধম্মচক্কিকত্থেৰোতি পাকটো জাতো অহোসি.

১০২. সো পুঞ্ঞসম্ভাৰানুৰূপেন পত্তঅৰহত্তফলো অত্তনো পুব্বকম্মং সৰিত্ৱা জাতসোমনস্সো পুব্বচৰিতাপদানং পকাসেন্তো সিদ্ধত্থস্স ভগৱতোতিআদিমাহ. সীহাসনস্স সম্মুখাতি সীহস্স ভগৱতো নিসিন্নস্স সম্মুখা বুদ্ধাসনস্স অভিমুখট্ঠানেতি অত্থো, ধম্মচক্কং মে ঠপিতন্তি মযা ধম্মচক্কাকাৰেন উভতো সীহৰূপং দস্সেত্ৱা মজ্ঝে আদাসসদিসং কাৰেত্ৱা কতং ধম্মচক্কং ঠপিতং পূজিতং. কিং ভূতং? ৱিঞ্ঞূহি মেধাৱীহি ‘‘অতীৱ সুন্দৰ’’ন্তি ৱণ্ণিতং থোমিতং সুকতং ধম্মচক্কন্তি সম্বন্ধো.

১০৩. চাৰুৱণ্ণোৱ সোভামীতি সুৱণ্ণৱণ্ণো ইৱ সোভামি ৱিৰোচামীতি অত্থো. ‘‘চতুৱণ্ণেহি সোভামী’’তিপি পাঠো, তস্স খত্তিযব্ৰাহ্মণৱেস্সসুদ্দজাতিসঙ্খাতেহি চতূহি ৱণ্ণেহি সোভামি ৱিৰোচামীতি অত্থো. সযোগ্গবলৱাহনোতি সুৱণ্ণসিৱিকাদীহি যোগ্গেহি চ সেনাপতিমহামত্তাদীহি সেৱকেহি বলেহি চ হত্থিঅস্সৰথসঙ্খাতেহি ৱাহনেহি চ সহিতোতি অত্থো. বহুজ্জনা বহৱো মনুস্সা অনুযন্তা মমানুৱত্তন্তা নিচ্চং নিচ্চকালং পৰিৱাৰেন্তীতি সম্বন্ধো. সেসং সুৱিঞ্ঞেয্যমেৱাতি.

ধম্মচক্কিকত্থেৰঅপদানৱণ্ণনা সমত্তা.