৯. সোণকোটিৱীসত্থেৰঅপদানৱণ্ণনা

নৱমাপদানে পন ৱিপস্সিনো পাৱচনেতিআদিকং আযস্মতো সোণস্স কোটিৱীসত্থেৰস্স অপদানং. অযম্পি থেৰো পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে মহাৱিভৱে সেট্ঠিকুলে নিব্বত্তো ৱুদ্ধিপ্পত্তো সেট্ঠি হুত্ৱা উপাসকেহি সদ্ধিং ৱিহাৰং গন্ত্ৱা সত্থু ধম্মদেসনং সুত্ৱা পসন্নমানসো ভগৱতো চঙ্কমনট্ঠানে সুধায পৰিকম্মং কাৰেত্ৱা একঞ্চ লেণং কাৰেত্ৱা নানাৱিৰাগৱত্থেহি লেণভূমিযা সন্থৰিত্ৱা উপৰি ৱিতানঞ্চ কত্ৱা চাতুদ্দিসস্স সঙ্ঘস্স নিয্যাদেত্ৱা সত্তাহং মহাদানং দত্ৱা পণিধানং অকাসি. সত্থা অনুমোদনং অকাসি. সো তেন কুসলকম্মেন দেৱমনুস্সেসু সংসৰন্তো উভযসম্পত্তিযো অনুভৱিত্ৱা ইমস্মিং কপ্পে পৰিনিব্বুতে কস্সপদসবলে অনুপ্পন্নে অম্হাকং ভগৱতি বাৰাণসিযং কুলগেহে নিব্বত্তিত্ৱা ৱিঞ্ঞুতং পত্তো গঙ্গাতীৰে পণ্ণসালং কৰিত্ৱা ৱসন্তং একং পচ্চেকবুদ্ধং তেমাসং চতূহি পচ্চযেহি সক্কচ্চং উপট্ঠহি. পচ্চেকবুদ্ধো ৱুট্ঠৱস্সো পৰিপুণ্ণপৰিক্খাৰো গন্ধমাদনমেৱ অগমাসি. সোপি কুলপুত্তো যাৱজীৱং তত্থ পুঞ্ঞানি কত্ৱা ততো চৱিত্ৱা দেৱমনুস্সেসু সংসৰন্তো অম্হাকং ভগৱতো কালে চম্পানগৰে অগ্গসেট্ঠিস্স গেহে পটিসন্ধিং গণ্হি. তস্স পটিসন্ধিগ্গহণকালতো পট্ঠায সেট্ঠিস্স মহাভোগক্খন্ধো অভিৱড্ঢি. তস্স মাতুকুচ্ছিতো নিক্খমনদিৱসে সকলনগৰে মহালাভসক্কাৰসম্মানো অহোসি, তস্স পুব্বে পচ্চেকবুদ্ধস্স সতসহস্সগ্ঘনিকৰত্তকম্বলপৰিচ্চাগেন সুৱণ্ণৱণ্ণো সুখুমালতৰো চ অত্তভাৱো অহোসি, তেনস্স সোণোতি নামং অকংসু. সো মহতা পৰিৱাৰেন অভিৱড্ঢি. তস্স হত্থপাদতলানি বন্ধুজীৱকপুপ্ফৱণ্ণানি অহেসুং, তেসং সতৱাৰং ৱিহতকপ্পাসং ৱিয মুদুসম্ফস্সো অহোসি. পাদতলেসু মণিকুণ্ডলাৱট্টৱণ্ণলোমানি জাযিংসু. ৱযপ্পত্তস্স তস্স তিণ্ণং উতূনং অনুচ্ছৱিকে তযো পাসাদে কাৰাপেত্ৱা নাটকিত্থিযো উপট্ঠাপেসুং. সো তত্থ মহতিং সম্পত্তিং অনুভৱন্তো দেৱকুমাৰো ৱিয পটিৱসতি.

অথ অম্হাকং ভগৱতি সব্বঞ্ঞুতং পত্ৱা পৱত্তিতৱৰধম্মচক্কে ৰাজগহং উপনিস্সায ৱিহৰন্তে বিম্বিসাৰৰঞ্ঞা পক্কোসাপিতো তেহি অসীতিযা গামিকসহস্সেহি সদ্ধিং ৰাজগহং আগতো সত্থু সন্তিকং গন্ত্ৱা ধম্মং সুত্ৱা পটিলদ্ধসদ্ধো মাতাপিতৰো অনুজানাপেত্ৱা ভগৱতো সন্তিকে পব্বজিত্ৱা লদ্ধূপসম্পদো সত্থু সন্তিকে কম্মট্ঠানং গহেত্ৱা জনসংসগ্গপৰিহৰণত্থং সীতৱনে ৱিহাসি. সো তত্থ ৱসন্তো ‘‘মম সৰীৰং সুখুমালং, ন চ সক্কা সুখেনেৱ সুখং অধিগন্তুং, কাযং কিলমেত্ৱাপি সমণধম্মং কাতুং ৱট্টতী’’তি চিন্তেত্ৱা ঠানচঙ্কমমেৱ অধিট্ঠায পধানমনুযুঞ্জন্তো পাদতলেসু ফোটেসু উট্ঠিতেসুপি ৱেদনং অজ্ঝুপেক্খিত্ৱা দড়্হং ৱীৰিযং কৰোন্তো অচ্চাৰদ্ধৱীৰিযতায ৱিসেসং নিব্বত্তেতুং অসক্কোন্তো ‘‘এৱং অহং ৱাযমন্তোপি মগ্গফলানি নিব্বত্তেতুং ন সক্কোমি, কিং মে পব্বজ্জায, হীনাযাৱত্তিত্ৱা ভোগে চ ভুঞ্জামি, পুঞ্ঞানি চ কৰিস্সামী’’তি চিন্তেসি. অথ সত্থা তস্স চিত্তাচাৰং ঞত্ৱা তত্থ গন্ত্ৱা ৱীণোপমোৱাদেন (মহাৱ. ২৪৩) ওৱদিত্ৱা ৱীৰিযসমতাযোজনৱিধিং দস্সেন্তো কম্মট্ঠানং সোধেত্ৱা গিজ্ঝকূটং গতো. সোণোপি খো সত্থু সন্তিকা ওৱাদং লভিত্ৱা ৱীৰিযসমতং যোজেত্ৱা ৱিপস্সনং উস্সুক্কাপেত্ৱা অৰহত্তে পতিট্ঠাসি.

৪৯. সো অৰহা হুত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো ৱিপস্সিনো পাৱচনেতিআদিমাহ. তত্থ ৱিপস্সীতি ৱিসেসেন, ৱিৱিধং ৱা পস্সতীতি ৱিপস্সী. পাৱচনেতি পকাৰেন ৱুচ্চতীতি পাৱচনং, পিটকত্তযং. তস্স ৱিপস্সিনো তস্মিং পাৱচনেতি অত্থো. লেণন্তি লিনন্তে নিলীযন্তে এত্থাতি লেণং ৱিহাৰং. বন্ধুমাৰাজধানিযাতি বন্ধন্তি কুলপৰম্পৰায ৱসেন অঞ্ঞমঞ্ঞং সম্বজ্ঝন্তীতি বন্ধূ, ঞাতকা. তে এত্থ পটিৱসন্তীতি বন্ধুমা, বন্ধু অস্স অত্থীতি ৱা বন্ধুমা. ৰাজূনং ৱসনট্ঠানন্তি ৰাজধানী, বন্ধুমা চ সা ৰাজধানী চেতি বন্ধুমাৰাজধানী, তস্সা বন্ধুমাৰাজধানিযা, লেণং মযা কতন্তি সম্বন্ধো. সেসমেত্থ উত্তানত্থমেৱাতি.

সোণকোটিৱীসত্থেৰঅপদানৱণ্ণনা সমত্তা.