১০. পুব্বকম্মপিলোতিকবুদ্ধঅপদানৱণ্ণনা

৬৪. দসমাপদানে অনোতত্তসৰাসন্নেতি পব্বতকূটেহি পটিচ্ছন্নত্তা চন্দিমসূৰিযানং সন্তাপেহি ওতত্তং উণ্হং উদকং এত্থ নত্থীতি অনোতত্তো. সৰন্তি গচ্ছন্তি পভৱন্তি সন্দন্তি এতস্মা মহানদিযোতি সৰো. সীহমুখাদীহি নিক্খন্তা মহানদিযো তিক্খত্তুং তিক্খত্তুং পদক্খিণং কত্ৱা নিক্খন্তনিক্খন্তদিসাভাগেন সৰন্তি গচ্ছন্তীতি অত্থো. অনোতত্তো চ সো সৰো চাতি অনোতত্তসৰো. তস্স আসন্নং সমীপট্ঠানন্তি অনোতত্তসৰাসন্নং, তস্মিং অনোতত্তসৰাসন্নে, সমীপেতি অত্থো. ৰমণীযেতি দেৱদানৱগন্ধব্বকিন্নৰোৰগবুদ্ধপচ্চেকবুদ্ধাদীহি ৰমিতব্বং অল্লীযিতব্বন্তি ৰমণীযং, তস্মিং ৰমণীযে. সিলাতলেতি একগ্ঘনপব্বতসিলাতলেতি অত্থো. নানাৰতনপজ্জোতেতি পদুমৰাগৱেড়ুৰিযাদিনানাঅনেকেহি ৰতনেহি পজ্জোতে পকাৰেন জোতমানে. নানাগন্ধৱনন্তৰেতি নানপ্পকাৰেহি চন্দনাগৰুকপ্পূৰতমালতিলকাসোকনাগপুন্নাগকেতকাদীহি অনেকেহি সুগন্ধপুপ্ফেহি গহনীভূতৱনন্তৰে সিলাতলেতি সম্বন্ধো.

৬৫. গুণমহন্ততায সঙ্খ্যামহন্ততায চ মহতা ভিক্খুসঙ্ঘেন, পৰেতো পৰিৱুতো লোকনাযকো লোকত্তযসামিসম্মাসম্বুদ্ধো তত্থ সিলাসনে নিসিন্নো অত্তনো পুব্বানি কম্মানি ব্যাকৰী ৱিসেসেন পাকটমকাসীতি অত্থো. সেসমেত্থ হেট্ঠা বুদ্ধাপদানে (অপ. থেৰ ১.১.১ আদযো) ৱুত্তত্তা উত্তানত্থত্তা চ সুৱিঞ্ঞেয্যমেৱ. বুদ্ধাপদানে অন্তোগধম্পি ইধাপদানে কুসলাকুসলং কম্মসংসূচকত্তা ৱগ্গসঙ্গহৱসেন ধম্মসঙ্গাহকত্থেৰা সঙ্গাযিংসূতি.

পুব্বকম্মপিলোতিকবুদ্ধঅপদানৱণ্ণনা সমত্তা.

একূনচত্তালীসমৱগ্গৱণ্ণনা সমত্তা.