২৫. তুৱৰদাযকৱগ্গো

১-১০. তুৱৰদাযকত্থেৰঅপদানাদিৱণ্ণনা

১. পঞ্চৱীসতিমে ৱগ্গে পঠমাপদানে ভৰিত্ৱা তুৱৰমাদাযাতি তুৱৰঅট্ঠিং মুগ্গকলযসদিসং তুৱৰট্ঠিং ভজ্জিত্ৱা পুপ্ফেত্ৱা ভাজনেন আদায সঙ্ঘস্স ৱনমজ্ঝোগাহকস্স অদদিং অদাসিন্তি অত্থো.

৪-৫. দুতিযাপদানে ধনুং অদ্ৱেজ্ঝং কত্ৱানাতি মিগাদীনং মাৰণত্থায ধনুং সন্নয্হিত্ৱা চৰমানো কেসৰং ওগতং দিস্ৱাতি সুপুপ্ফিতং খুদ্দকসৰং দিস্ৱা বুদ্ধস্স অভিৰোপেসিন্তি অহং চিত্তং পসাদেত্ৱা ৱনং সম্পত্তস্স তিস্সস্স ভগৱতো অভিৰোপযিং পূজেসিন্তি অত্থো.

৯-১০. ততিযাপদানে জলকুক্কুটোতি জাতস্সৰে চৰমানকুক্কুটো. তুণ্ডেন কেসৰিং গয্হাতি পদুমপুপ্ফং মুখতুণ্ডেন ডংসিত্ৱা আকাসেন গচ্ছন্তস্স তিস্সস্স ভগৱতো অভিৰোপেসিং পূজেসিন্তি অত্থো.

১৪. চতুত্থাপদানে ৱিৰৱপুপ্ফমাদাযাতি ৱিৱিধং ৰৱতি সদ্দং কৰোতীতি ৱিৰৱং, সদ্দকৰণৱেলাযং ৱিকসনতো ‘‘ৱিৰৱ’’ন্তি লদ্ধনামং পুপ্ফসমূহং আদায গহেত্ৱা সিদ্ধত্থস্স বুদ্ধস্স অভিৰোপযিং পূজেসিন্তি অত্থো.

১৭. পঞ্চমাপদানে কুটিগোপকোতি সেনাসনপালকো. কালেন কালং ধূপেসিন্তি সম্পত্তসম্পত্তকালানুকালে ধূপেসিং, ধূপেন সুগন্ধং অকাসিন্তি অত্থো. সিদ্ধত্থস্স ভগৱতো গন্ধকুটিকালানুসাৰিধূপেন ধূপেসিং ৱাসেসিন্তি অত্থো.

ছট্ঠসত্তমাপদানানি উত্তানত্থানেৱ.

২৭. অট্ঠমাপদানে সত্ত সত্তলিপুপ্ফানীতি সত্তলিসঙ্খাতানি, সত্ত পুপ্ফানি সীসেনাদায ৱেস্সভুস্স ভগৱতো অভিৰোপেসিং পূজেসিন্তি অত্থো.

৩১. নৱমাপদানে বিম্বিজালকপুপ্ফানীতি ৰত্তঙ্কুৰৱকপুপ্ফানি সিদ্ধত্থস্স ভগৱতো পূজেসিন্তি অত্থো.

৩৫. দসমাপদানে উদ্দালকং গহেত্ৱানাতি জাতস্সৰে ৱিহঙ্গসোব্ভে জাতং উদ্দালকপুপ্ফং ওচিনিত্ৱা ককুসন্ধস্স ভগৱতো পূজেসিন্তি অত্থো. সেসং সুৱিঞ্ঞেয্যমেৱাতি.

পঞ্চৱীসতিমৱগ্গৱণ্ণনা সমত্তা.